Selemia
4 Koʼeni te folafola ʼa Sehova: “Iselaele, kapau ʼe ke toe fia liliu mai,
ʼEi, kapau ʼe ke toe liliu mai kia te au,
ʼO toʼo kehe ʼi ʼoku muʼa ʼau fakatata fakalialia,
ʼE mole ke toe feholaʼaki anai.+
2 Kapau ʼe ke fakapapau ʼaki te moʼoni, mo te agatonu pea mo te faitotonu
Ia muʼa ʼo Sehova te ʼAtua maʼuli,
Pea ʼe maʼu anai e te ʼu puleʼaga he tapuakina mai ia te ia
Mo natou fiameʼameʼa ia ia.”+
3 Koʼeni te folafola ʼa Sehova ki te ʼu tagata ʼo Suta pea mo te hahaʼi ʼo Selusalemi:
“Kotou gaueʼi he kele ʼe maʼuli lelei maʼa koutou,
Pea ʼaua naʼa kotou haga nunusi ni pulapula ʼi ni vao talatala.+
4 ʼU tagata ʼo Suta mo hahaʼi ʼo Selusalemi,
Kotou silikosisioʼi ia koutou maʼa Sehova
Pea kotou fakamaʼa ʼokotou loto,+
Naʼa to toku hauhau kia koutou ohage ko he afi
Pea ʼe vela anai ʼo mole feala ke matehi e he tahi
ʼUhi ko ʼakotou aga ʼae ʼe kovi.”+
5 Kotou tala ki Suta mo fakaha ki Selusalemi.
Kotou kalaga mo pupuhi te fakatagi pupuhi ʼi te fenua katoa.+
Kotou kalaga leʼo lahi: “Kotou fakatahitahi,
Tou feholaki ʼo fenonoʼi ʼi te ʼu kolo tau.+
6 Kotou fakatuʼu he pou fakailoga ki te ala ʼo Sione.
Kotou kumi he nonoʼaga pea ʼaua naʼa kotou tuʼu,”
He ʼe au fekauʼi mai te potu noleto he malaʼia,+ he toe maumau lahi.
7 Kua haʼele mai te tagata ʼae ʼe ina maumauʼi te ʼu puleʼaga.+
Kua ʼoho mai ohage ko he laione ʼe mavae mai te vao ʼae neʼe nono ai.+
Neʼe mavae mai tona nonoʼaga moʼo fakaliliu tou fenua ko he meʼa fakaʼofaʼofa.
ʼE maumauʼi anai ʼou kolo pea ʼe mole toe nofoʼi anai e he tahi.+
8 Koia kotou kofuʼi ni taga,*+
Kotou putu mo tagilaulau,
He neʼe mole maliu kehe te hauhau ʼo Sehova ia tatou.
9 Koʼeni te folafola ʼa Sehova: “ ʼI te ʼaho ʼaia, ʼe tete anai te mafu ʼo* te hau,+
ʼO toe feia pe mo te mafu ʼo* te ʼu tama ʼaliki.
ʼE matataku anai te kau pelepitelo pea ʼe punamaʼuli anai te kau polofeta.”+
10 Neʼe au ui leva: “Oie, siʼoku Tuʼi ʼAliki ko Sehova! Neʼe ke kakaʼi te hahaʼi ʼaeni+ pea mo te hahaʼi ʼo Selusalemi. Neʼe ke ui: ‘ ʼE kotou maʼuʼuli anai ʼi te tokalelei,’+ kae koʼeni kua vave matehi pe matou ʼaki te heleta.”
11 ʼI te temi ʼaia, ʼe ui anai ki te hahaʼi ʼaia mo te hahaʼi ʼo Selusalemi:
“ ʼE haʼu anai he matagi vela mai te ʼu kiʼi moʼuga lauʼatea ʼo te toafa.
ʼE agi anai te matagi ki te taʼahine* ʼo taku hahaʼi.
ʼE mole haʼu ia moʼo fakamaʼa te fulumeto.
12 ʼE haʼu te tuʼani matagi mai te ʼu potu ʼaia ʼo mulimuli ki taku fakatotonu.
ʼI te temi nei, ʼe au fakaha anai ni fakamau ʼo ʼuhiga mo koutou.
13 Kotou fagono! ʼE haʼu anai te fili ohage ko ni ʼao fakapoʼuli,
Pea ʼe hage ʼana saliote tau ko he afā.+
ʼE gaholo age ʼana hosi ʼi te ʼu akuila.+
Malaʼia kia tatou he ʼe kua tou vave pupuli!
14 Selusalemi, toʼo te agakovi ʼae ʼi tou loto ke maʼa pea ke haofaki ai koe.+
ʼE kaku anai ki ʼafea tau nofo mo ni fakakaukau kovi?
15 ʼE tala e he leʼo te logo mai Tane,+
Pea ʼe fakaha te malaʼia mai te ʼu moʼuga ʼo Efalaimi.
16 Kotou fakaha te logo ʼaia, ʼei, ki te ʼu puleʼaga.
Kotou fakaha te ʼu meʼa ʼae ka hoko ki Selusalemi.”
“ ʼE ʼomai mai he fenua mamaʼo ni kau leʼo.*
ʼE natou kalaga anai ki te ʼu kolo ʼo Suta.
17 ʼE natou ʼa takai te ʼu takafoli fuli ʼo te kolo ohage ko he ʼu tagata leʼo ʼo he gaueʼaga,+
Koteʼuhi neʼe natou agatuʼu kia te au,”+ ko te ui ʼaia ʼa Sehova.
18 “ ʼE fua kovi anai tau aga mo ʼau gaue.+
ʼE kona te malaʼia ʼae ka hoko kia koe,
He ʼe malave ʼosi ki tou loto!”
19 Oie, ʼi fakamataku leva!
ʼE au logoʼi he toe mamahi ʼi toku mafu.
ʼE kua ta vave toku mafu.
ʼE mole feala ke au nofo fakalogologo,
He neʼe au logo ki te pupuhi ʼo te fakatagi pupuhi,
20 Neʼe palalauʼi he malaʼia pea hoko he tahi malaʼia,
Koteʼuhi neʼe maumauʼi te fenua katoa.
Neʼe maumauʼi fakapunamaʼuli ʼoku fale la,
Mo ʼoku la ʼi he temi pe ʼe tahi.+
21 ʼE kaku anai ki ʼafea taku sio ki te pou fakailoga?
ʼE kaku anai koa ki ʼafea taku logo ki te pupuhi ʼo te fakatagi pupuhi?+
22 “Kua agavale taku hahaʼi,+
ʼE mole natou tokagaʼi pe la ia au.
ʼE ko ni foha lotonoa, ʼe mole natou fakakaukau ki he meʼa.
ʼE natou popoto pe ʼi te fai ʼo te meʼa ʼae ʼe kovi,
Kae ʼe mole natou lava fai pe la te meʼa ʼae ʼe lelei.”
23 Neʼe au sioʼi te fenua, pea koʼeni neʼe lavaki pea mo liʼakina.+
Neʼe au sioʼi te lagi pea kua puli tona malama.+
24 Neʼe au sioʼi te ʼu moʼuga, pea koʼeni neʼe galulu ia,
Pea neʼe luluʼi te ʼu kiʼi moʼuga.+
25 Neʼe au sio, pea koʼeni neʼe mole ʼi ai pe la he tagata,
Pea kua feholaki fuli te ʼu manulele ʼo te lagi.+
26 Neʼe au sio, pea koʼeni kua liliu ko he toafa te fenua ʼaia ʼe maʼuli lelei ʼona gaueʼaga,
Pea kua maumauʼi fuli ʼona kolo.+
Neʼe hoko ʼuhi ko Sehova,
ʼUhi ko te lahi ʼo tona ita.
27 Koʼeni te folafola ʼa Sehova: “ ʼE tuʼu lavaki anai te fenua katoa,+
Kae ʼe mole au maumauʼi katoa anai.
Koteʼuhi neʼe au palalau pea neʼe au fakatotonu,
ʼE mole fetogi anai taku manatu pea ʼe mole holoʼi anai.+
29 Kua feholaki te kolo katoa+
ʼI te logoaʼa ʼa te kau heka hosi pea mo te kau fainahau.
Kua fenonoʼi te hahaʼi ʼi te vao,
Kua natou fekakeʼi ʼi te ʼu ʼutu.+
Kua tuʼu lavaki te ʼu kolo fuli
Pea ʼe mole kei nofoʼi e he tahi.”
30 ʼI te temi nei ʼae kua maumauʼi ai koe, kotea ʼae ka ke fai?
Neʼe ke kofu ki ni kie kula,
Neʼe ke faiteuteu ki ni meʼa aulo,
Neʼe ke fakamataleleiʼi ʼou mata ʼo pena ʼuli.
Kae neʼe mole he ʼuhiga ʼo tau fakamatalelei ʼaia,+
He ʼe kua liʼaki koe e natou ʼae neʼe holi kia koe.
ʼI te temi nei, ʼe natou fia matehi koe.+
31 ʼEi, neʼe au logo ki he meʼa ʼe hage ko he leʼo ʼo he fafine ʼe mahaki,
Ohage ko te hoha ʼa he fafine ʼe ina fanauʼi tana ʼuluaki tamasiʼi,
Ki te leʼo ʼo te taʼahine ʼo Sione ʼae ʼe helahela.
ʼE ina faoʼi ʼona nima mo ui:+
“Malaʼia kia au, he kua au gaʼegaʼe ʼuhi ko te kau faifakapo.”