Selemia
40 Neʼe palalau leva ia Sehova kia Selemia hili tona fakaʼateainaʼi ʼi Lama+ e Nepusalatane,+ te pule ʼo te kau leʼo. Neʼe ʼaumai seiniʼi ia Selemia e Nepusalatane ki te kolo ʼaia, pea neʼe nofo ai ia Selemia mo te hahaʼi katoa ʼo Selusalemi mo Suta ʼae ka ʼave popula ki Papiloni. 2 Pea neʼe ina toʼo tokotahi ia Selemia ʼo ui ki ai: “Neʼe fakaha e Sehova tou ʼAtua ia te malaʼia ʼae neʼe hoko ki te koga meʼa ʼaeni. 3 Pea neʼe fakahoko e Sehova ohage pe ko tana ui koteʼuhi neʼe kotou agahala kia Sehova pea neʼe mole kotou fakalogo kia te ia. Koia la ʼae neʼe hoko ai kia koutou te aluʼaga ʼaia.+ 4 ʼI te ʼaho nei, ʼe au veteki ʼou seini mai ʼou nima. Kapau ʼe ke loto ki ai, ʼe feala hau alu mo au ki Papiloni, pea ʼe au tokaga anai kia koe. Kae kapau ʼe mole ke fia alu mo au ki Papiloni, pea nofo koe. Sio ki te fenua, pea ke fili te koga meʼa ʼae ʼe ke fia nofo ai.”+
5 ʼI te tuai ʼo te tali ʼa Selemia, neʼe ui age e Nepusalatane: “Toe liliu kia Ketalia,+ foha ʼo Asikame,+ mokopuna ʼo Safani,+ ʼae neʼe fakanofo e te hau ʼo Papiloni ke pule ki te ʼu kolo ʼo Suta. Nofo mo ia pea mo te hahaʼi peʼe ke alu ki te koga meʼa ʼae ʼe ke loto ki ai.”
Neʼe foaki age leva e te pule ʼo te kau leʼo tana meʼa kai mo tana meʼa ʼofa, pea ina tuku ai ke alu. 6 Neʼe alu ai ia Selemia kia Ketalia, foha ʼo Asikame ʼi Misipa+ ʼo nofo mo ia pea mo te hahaʼi ʼae neʼe tuku ʼi te fenua.
7 Neʼe logo leva ia te kau pule solia fuli ʼae neʼe nonofo ʼi te fenua pea mo ʼanatou kau solia, neʼe fakanofo e te hau ʼo Papiloni ia Ketalia, foha ʼo Asikame ke pule ki te fenua pea mo tokaga ki te hahaʼi masisiva ʼo te fenua ʼae neʼe mole ʼave popula ki Papiloni: te hahaʼi tagata, mo te hahaʼi fafine pea mo te ʼu fanau.+ 8 Neʼe natou olo ai kia Ketalia ʼi Misipa.+ Neʼe ko Isemaele+ te foha ʼo Netania, mo Seonane+ pea mo Sonatane, te ʼu foha ʼo Kalease, mo Selasa te foha ʼo Tanumete, mo te ʼu foha ʼo Efai te tagata Netofa, pea mo Sesania+ te foha ʼo te tagata Maakate pea mo ʼanatou kau solia. 9 Neʼe fakapapau leva e Ketalia, foha ʼo Asikame, foha ʼo Safani ki te ʼu pule solia ʼaia mo ʼanatou kau solia: “ ʼAua naʼa kotou matataku ʼi te tauhi ki te kau Kaletea. Kotou nonofo ʼi te fenua mo tauhi te hau ʼo Papiloni. Pea ʼe fua lelei pe anai kia koutou.+ 10 ʼE au nofo anai au ʼi Misipa moʼo fakafofoga ʼo koutou ia muʼa ʼo te kau Kaletea ʼae ka ʼomai kia tatou. Kae ʼe kotou fai anai he vino mo he lolo pea ʼe kotou tanaki anai mo ni fuaʼi ʼakau ʼo te temi vela* ʼo kotou tanaki ki ʼakotou ʼaiʼaga vai. ʼE kotou nonofo anai ʼi te ʼu kolo ʼae kua kotou maʼu.”+
11 Neʼe toe logo mo te kau Sutea fuli ʼae neʼe nonofo ʼi Moape, mo Amone pea mo Etome, ʼo feia mo natou ʼae neʼe nonofo ʼi te ʼu fenua fuli ʼae, neʼe tuku ʼihi hahaʼi e te hau ʼo Papiloni ʼi Suta pea neʼe ina fakanofo ia Ketalia, foha ʼo Asikame, foha ʼo Safani ke pule kia natou. 12 Neʼe toe liliu mai leva te kau Sutea katoa mai te ʼu koga meʼa ʼae neʼe natou mavetevete ai. Neʼe natou kaku mai ki te fenua ʼo Suta, kia Ketalia ʼi Misipa. Pea neʼe lahi te vino ʼae neʼe natou fai pea mo te ʼu fuaʼi ʼakau ʼo te temi vela ʼae neʼe natou tanaki.
13 Pea neʼe olo ai ia Seonane, foha ʼo Kalease pea mo te ʼu pule solia fuli ʼae neʼe nonofo ʼi te fenua kia Ketalia ʼi Misipa. 14 Neʼe natou ui ki ai: “ ʼE ke iloʼi koa neʼe fekauʼi e Paalise, te hau ʼo te kau Amone+ ia Isemaele, foha ʼo Netania ke haʼu ʼo matehi koe?”+ Kae neʼe mole tui kia natou ia Ketalia, foha ʼo Asikame.
15 Pea neʼe fakaha fakafufu e Seonane, foha ʼo Kalease kia Ketalia ʼi Misipa: “Fakagafua mai ke au alu ʼo matehi ia Isemaele, foha ʼo Netania. ʼE mole iloʼi anai e he tahi. He koʼe ʼe matehi anai ia koe? Pea he koʼe ʼe mavetevete anai te hahaʼi fuli ʼo Suta ʼae kua natou fakatahi mai kia koe? He koʼe ʼe mamate anai te hahaʼi ʼae neʼe nonofo ʼi Suta?” 16 Kae neʼe tali leva e Ketalia,+ foha ʼo Asikame kia Seonane, foha ʼo Kalease: “ ʼAua naʼa ke fai te meʼa ʼaia. ʼE mole moʼoni ʼau palalau ʼo ʼuhiga mo Isemaele.”