Selemia
49 Koʼeni te folafola ʼa Sehova ʼo ʼuhiga mo te kau Amone:+
“ ʼE mole koa la he foha ʼo Iselaele?
ʼE mole koa la ʼi ai hona hakoga?
He koʼe neʼe maʼu e Malekame*+ ia Kate?+
He koʼe ʼe nofo tana hahaʼi ʼi te ʼu kolo ʼo Iselaele?”
2 “ ʼE ui e Sehova: ‘Koia, kotou fakalogo!
ʼE hoko anai te ʼaho ʼae ʼe au fakatatagi ai te fakatokaga ʼo te tau* ki te kolo ʼo Amone+ ko Lapa.+
ʼE maumauʼi anai mo tuʼu lavaki,
Pea ʼe tutu anai te ʼu kolo liliki ʼae ʼi ʼona tafaʼaki.’
‘ ʼE toʼo anai e Iselaele te fenua ʼo natou ʼae neʼe natou toʼo tona fenua mai ia ia,’+ ko te ui ʼaia ʼa Sehova.
3 ‘Heseponi, lauga he ʼe kua maumauʼi te kolo ko Ai!
Kotou kalaga, ʼu kolo liliki ʼae ʼi te ʼu tafaʼaki ʼo Lapa!
Kotou tui ni taga.*
Kotou tagilaulau mo feoloʼaki ʼi te ʼu lotoʼa maka.*
ʼE ʼave popula anai ia Malekame,
Mo ʼana pelepitelo pea mo ʼana tama ʼaliki.+
4 He koʼe ʼe ke laupisiʼi te ʼu potu fenua laulelei,
Te potu fenua ʼae ʼe maʼuli lelei, taʼahine heʼe agatonu,
Ia koe ʼae ʼe ke falala ki ʼou koloa
Pea ke ui: “Ko ai ʼae ka ina lava tauʼi au?” ’ ”
5 “ ʼE ui e te Tuʼi ʼAliki ko Sehova ʼo te ʼatu kautau: ‘ ʼE au fakato anai kia koe he meʼa fakamataku
ʼAe ka fakahoko e natou fuli ʼae ʼi ʼou tafaʼaki.
ʼE kotou mavetevete anai ʼi te ʼu potu fuli
Pea ʼe mole he tahi ʼe ina fakatahiʼi anai ia natou ʼae neʼe feholaki.’ ”
6 “ ‘Kae hili ia ʼe au fakatahiʼi anai te kau popula ʼo Amone,’ ko te ui ʼaia ʼa Sehova.”
7 Koʼeni te folafola ʼa Sehova ʼo te ʼatu kautau ʼo ʼuhiga mo Etome:
“Kua puli koa te poto ʼi Temane?+
ʼE mole kei foaki koa la e te ʼu tagata popoto ni tokoni ʼe lelei?
Kua kovi koa tonatou poto?
8 Kotou feholaki! Kotou toe liliu!
Hahaʼi ʼo Tetane,+ kotou olo ʼo fenonoʼi ʼi te ʼu potu loloto!
ʼE au fakato anai he maumau kia Esau,
Moka hoko mai te temi ʼae ʼe au fakatuʼā ai ia ia.
9 Kapau ʼe ʼomai ni tagata toli vite kio koe,
ʼE mole natou tuku pe anai koa ni kiʼi vite?
Kapau ʼe ʼomai ni tagata kaihaʼa ʼi te poʼuli,
ʼE natou toʼo pe anai te meʼa ʼae ʼe natou loto ki ai.+
10 Kae ʼe au fakamasivaʼi anai ia Esau.
ʼE au fakaha anai ʼona nonoʼaga
Ke ʼaua naʼa feala hana toe nono.
11 Mavae ʼi ʼau fanau ʼae ʼe hala mo tamai,
Pea ʼe au haofaki anai ia natou.
Pea ʼe falala mai anai ʼau fafine vitua.”
12 Koʼeni te folafola ʼa Sehova: “Fakalogo! Ko natou ʼae neʼe mole tauteaʼi ke natou inu te ipu, ʼe maʼua ke natou inu. Kae ʼe ke ui koa koe ʼe ke hao anai ’i te tuʼā? Kailoa! ʼE fakatuʼā anai koe, ʼe maʼua anai ke ke inu te ipu.”+
13 ʼE ui e Sehova: “Neʼe au fakapapau totonu ʼe liliu anai ia Potisela ko he meʼa fakalialia,+ ko he koga meʼa fakaufiufi, ko he koga meʼa maumau ʼe talanoaʼi e te hahaʼi ʼi ʼanatou faitutuku. Pea ko te ʼu kolo fuli ʼae ʼi ʼona tafaʼaki ʼe tuʼu maumau anai ʼo heʼe gata.”+
14 Neʼe au maʼu he logo mai ia Sehova.
Neʼe fekauʼi he tagata ʼave logo ke alu ʼo ui ki te ʼu puleʼaga:
“Kotou fakatahi ʼo ʼomai ʼo tauʼi ia Etome!
Kotou teuteu ki te tau!”+
15 “Koʼeni, neʼe au fakamalaloʼi koe ʼi te ʼu puleʼaga,
Pea kua meʼa noaʼi koe e te hahaʼi.+
16 Ia koe ʼae ʼe ke nofo ʼi te ʼu ava ʼo te ʼu fuʼu maka,
Pea mo te tumutumu ʼo te moʼuga,
Neʼe ke kakaʼi pe ia koe totonu ʼuhi ko tau fiameʼalahi
Pea mo te mataku ʼa te hahaʼi ia koe.
ʼE ke fiu pe ʼi te faʼu hou nofoʼaga ʼi te maʼoluga ohage ko te akuila,
Kae ʼe au fakahifo anai ia koe mai ai,” ko te ui ʼaia ʼa Sehova.
17 “ ʼE liliu anai ia Etome ko he meʼa fakalialia.+ Pea ko natou fuli ʼae ka fakalaka ʼo ovi ki ai, ʼe natou sisio anai ʼaki he fakalialia pea ʼe natou vaʼi anai ʼuhi ko te ʼu malaʼia fuli ʼae neʼe hoko ki ai. 18 ʼE hage anai ko te maumauʼi ʼo Sotoma mo Komola pea mo te ʼu kolo ʼae ʼi ʼonā tafaʼaki.+ ʼE mole toe maʼuli ai anai he tahi, ʼei, ʼe mole toe nofoʼi anai,”+ ko te ui ʼaia ʼa Sehova.
19 “Koʼeni, ʼe haʼu anai he tahi ʼo tauʼi te ʼu koga meʼa lunaʼia ʼae ʼe maʼuli fimalie ai te faga ovi ohage ko he laione+ ʼe haʼu mai te vao ʼakau ʼae ʼe maʼuli ʼi te vaʼe Solotane. Kae ʼi he kiʼi temi pe, ʼe au kapu anai ia natou* ʼi tonatou fenua. ʼE au fakanofo anai ia ia ʼae neʼe filifili ke pule ki Etome. Ko ai ʼae ʼe hage ko au? Ko ai ʼae ʼe lava fakafeagai mai kia au? Ko ai te tauhi ovi ʼae ʼe ina lava tauʼi au?+ 20 Koia, kotou fakalogo ki te tonu ʼae neʼe toʼo e Sehova ʼo ʼuhiga mo Etome pea mo te fakatuʼutuʼu ʼae neʼe ina fakakaukauʼi ʼo ʼuhiga mo te hahaʼi ʼo Temane:+
ʼE taki anai ki mamaʼo te ʼu ʼuhi ʼo te faga ovi.
ʼE maumauʼi anai ʼonatou koga meʼa lunaʼia ʼuhi ko tanatou aga.+
21 Neʼe galulu te kele ʼi te logoaʼa ʼo tanatou fetoki.
Neʼe logoʼi te kalaga.
Pea neʼe logo ʼo kaku ki te Tai Kula.+
22 Koʼeni, ʼe malaga anai ki ʼoluga ohage ko he akuila pea ʼe hifo anai ki te kele.+
Pea ʼe ina folahi anai ʼona pakakau ʼi ʼoluga ʼo Potisela.+
ʼI te ʼaho ʼaia, ʼe lotohoha anai te ʼu tagata tau ʼo Etome
Ohage ko he fafine ʼe fanau.”
23 Koʼeni te logo ʼo ʼuhiga mo Tamaso:+
“Neʼe ufiufi ia Hamate+ pea mo Alepate,
He neʼe nā maʼu he logo kovi.
Neʼe nā matataku pea neʼe nā lotovaivai ai.
ʼE hou te tai ʼo mole feala hona fakatokaleleiʼi.
24 Kua lotovaivai ia Tamaso.
Neʼe maliu ko te hola kae neʼe mataku.
Neʼe hoha mo mamahi
Ohage ko he fafine ʼe fanau.
25 He koʼe ʼe kei nofoʼi te kolo taulekaleka,
ʼEi, te kolo matalelei?
26 ʼE mamate anai te kau tupulaga ʼi te ʼu malaʼe lalahi ʼo te kolo,
Pea ʼe mamate fuli anai te kau solia ʼi te ʼaho ʼaia,” ko te ui ʼaia ʼa Sehova ʼo te ʼatu kautau.
27 “ ʼE au tutu anai te kaupa ʼo Tamaso
Pea ʼe vela anai te ʼu tule malolohi ʼo Pene-atate.”+
28 Koʼeni te folafola ʼa Sehova ʼo ʼuhiga mo Keta+ mo te ʼu puleʼaga ʼo Atesoli ʼae neʼe maʼu e te Hau ʼo Papiloni ko Nepukanesa:
“Kotou tutuʼu! Kotou hake ki Keta
Pea kotou matehi te ʼu foha ʼo te potu Esite.
29 Kotou toʼo ʼonatou fale la pea mo ʼanatou faga manu,
Kotou toʼo ʼanatou la pea mo ʼonatou koloa fuli.
Kotou toe ʼave mo ʼanatou kamelo.
Pea ʼe kalaga anai te hahaʼi: ‘Kua fakamataku te ʼu potu fuli!’ ”
30 “Kotou feholaki mamaʼo!
Hahaʼi ʼo Atesoli, kotou olo ʼo fenonoʼi ʼi te ʼu potu loloto,” ko te ui ʼaia ʼa Sehova,
“He neʼe fakakaukauʼi e te Hau ʼo Papiloni ko Nepukanesa he puleʼaki,
Neʼe ina fai he fakatuʼutuʼu moʼokotou tauʼi.”
31 “Kotou tutuʼu! Kotou olo ʼo tauʼi te puleʼaga ʼae ʼe maʼuli ʼi te tokalelei,
ʼAe ʼe nofo ʼi te fimalie,” ko te ui ʼaia ʼa Sehova.
“ ʼE mole ni ʼona matapa mo ni ʼakau fakalava. ʼE natou maʼuli kehe.
32 ʼE kaihaʼa anai ʼanatou kamelo,
ʼE ʼave anai ʼanatou faga manu lalahi.
Pea ko natou ʼae ʼe tuʼusi ʼonatou lauʼulu ʼi ʼonatou niania,+
ʼE au fakamavetevete anai natou ʼi te ʼu potu fuli,
ʼE au fakato anai kia natou te malaʼia mai te ʼu potu fuli,” ko te ui ʼaia ʼa Sehova.
33 “ ʼE liliu anai ia Atesoli ko he nofo’aga ʼo te ʼu kuli vao,
Ko he koga meʼa ʼe tuʼu lavaki anai ʼo talu ai.
ʼE mole toe maʼuli ai anai he tahi
ʼEi, ʼe mole toe nofoʼi anai.”
34 Koʼeni te folafola ʼa Sehova ʼo ʼuhiga mo Elame ʼae neʼe ina fakaha ki te polofeta ko Selemia,+ ʼi te kamata pule ʼa te Hau ʼo Suta ko Setesiasi:+ 35 “Koʼeni te folafola ʼa Sehova ʼo te ʼatu kautau: ‘ ʼE au fasiʼi anai te nahau ʼa Elame+ ʼae ʼe ina maʼu ai tona malohi. 36 ʼE au fakato anai ki Elame te ʼu matagi ʼe fa ʼo te ʼu potu taupotu ʼe fa ʼo te lagi pea ʼe au fakamavetevete anai tana hahaʼi ʼi te ʼu potu fuli. ʼEi, ʼe mavetevete anai te hahaʼi ʼo Elame ʼi te ʼu puleʼaga fuli.’ ”
37 “ ʼE au fakamatakuʼi anai te kau Elame ia muʼa ʼo ʼonatou fili pea ia muʼa ʼo natou ʼae ʼe natou fia matehi natou. ʼE au fakato anai he malaʼia, ʼei, ʼe au fakato anai toku hauhau,” ko te ui ʼaia ʼa Sehova. “ ʼE au tauteaʼi anai natou ʼaki te heleta ʼo kaku ki taku pulihi ia natou.”
38 “ ʼE au fakatuʼu anai toku hekaʼaga fakahau ʼi Elame+ pea ʼe au maumauʼi anai te hau mo te ʼu tama ʼaliki ʼo Elame,” ko te ui ʼaia ʼa Sehova.
39 “Kae ʼi te ʼu ʼaho fakamuli, ʼe au fakatahiʼi anai te kau popula ʼo Elame,” ko te ui ʼaia ʼa Sehova.