Selemia
52 Neʼe hau ia Setesiasi+ ʼi tona taʼu 21, pea neʼe pule lolotoga taʼu ʼe 11 ʼi Selusalemi. Neʼe higoa tana faʼe ko Amutale,+ ko te ʼofafine ʼo Selemia mai Lipina. 2 Neʼe haga fai pe e Setesiasi te meʼa ʼae ʼe kovi kia mata ʼo Sehova, ohage pe ko te ʼu meʼa fuli ʼae neʼe fai e Soakimi.+ 3 Neʼe hoko te ʼu faʼahi ʼaia ʼi Selusalemi pea mo Suta ʼuhi ko te ita ʼo Sehova, ʼo kaku ki tana fakamamaʼo natou mai ia te ia.+ Pea neʼe agatuʼu leva ia Setesiasi ki te hau ʼo Papiloni.+ 4 ʼI te hiva taʼu ʼo te pule ʼa Setesiasi, ʼi te ʼaho hogofulu ʼo te hogofulu mahina, neʼe haʼu ia Nepukanesa, te Hau ʼo Papiloni mo tana foʼi kautau katoa ʼo tauʼi ia Selusalemi. Neʼe natou fakatuʼu leva tonatou nofoʼaga solia ʼo ovi ki Selusalemi pea neʼe natou laga he kaupa moʼo ʼa takai te kolo.+ 5 Pea neʼe ʼa takai te kolo ʼo kaku ki te 11 taʼu ʼo te pule ʼa te Hau ko Setesiasi.
6 ʼI te ʼaho hiva ʼo te fa mahina,+ ʼi te kua kovi ʼosi ʼo te hoge ʼi te kolo, pea mo te mole kei ʼi ai ʼo he meʼa kai maʼa te hahaʼi ʼo te fenua,+ 7 neʼe fai leva he ava ʼi te kaupa ʼo te kolo. ʼI te lolotoga ʼa takai e te kau Kaletea ia te kolo, neʼe feholaki ai te kau solia fuli ʼi te poʼuli. Neʼe natou feulufi ʼi te matapa ʼae ʼe tuʼu ʼi te vaha ʼo te ʼu kaupa ʼe lua, ʼae neʼe ovi ki te ʼoloto ʼo te hau. Pea neʼe hoko atu tanatou feholaki ʼi te ala ʼo te Alapa.+ 8 Kae neʼe tuli e te foʼi kautau Kaletea ia te Hau ko Setesiasi,+ pea neʼe natou maʼu ia ia ʼi te toafa ʼo Seliko. Neʼe mavetevete ai tana kau solia fuli. 9 Neʼe natou puke leva te hau ʼo ʼave ki te hau ʼo Papiloni ʼi Lipila, ʼi te potu fenua ʼo Hamate pea neʼe ina fakamauʼi ai ia ia. 10 Neʼe matehi e te hau ʼo Papiloni te ʼu foha ʼo Setesiasi ʼi ʼona muʼa, pea ʼi Lipila neʼe ina toe matehi ai te ʼu tama ʼaliki fuli ʼo Suta. 11 Neʼe fakatotonu e te hau ʼo Papiloni ke kapeʼi te ʼu mata ʼo Setesiasi+ pea ke haʼi ʼona nima mo ʼona vaʼe ʼaki he ʼu seini kapa, pea ke ʼave leva ki Papiloni. Neʼe ina tuku leva ia ia ʼi te pilisoni ʼo kaku ki tana mate.
12 ʼI te ʼaho hogofulu ʼo te nima mahina, ʼi te 19 taʼu ʼo te pule ʼa te Hau ʼo Papiloni ko Nepukanesa, neʼe haʼu ki Selusalemi ia Nepusalatane, te pule ʼo te kau leʼo pea neʼe ko te tagata faifekau ʼa te hau ʼo Papiloni.+ 13 Neʼe ina tutu te fale ʼo Sehova,+ mo te fale hau pea mo te ʼu fale fuli ʼo Selusalemi. Neʼe ina toe tutu foki mo te ʼu fale lalahi fuli. 14 Pea neʼe holoʼi te ʼu kaupa ʼo Selusalemi e te foʼi kautau katoa ʼa te kau Kaletea ʼae neʼe takitaki e te pule ʼo te kau leʼo.+
15 Pea neʼe ʼave popula e Nepusalatane, te pule ʼo te kau leʼo, he koga ʼo te hahaʼi ʼae neʼe mole ako, mo te hahaʼi ʼae neʼe kei maʼuʼuli ʼi te kolo. Neʼe ina toe ʼave mo te hahaʼi ʼae neʼe feholaki ki te hau ʼo Papiloni ʼo feia ki te toe ʼo te kau tufuga faiva.+ 16 Kae neʼe tuku e Nepusalatane, te pule ʼo te kau leʼo, ʼihi hahaʼi ʼo te fenua ʼae neʼe masisiva ʼaupito, ke natou gaue ʼi te ʼu gaueʼaga vite pea mo te tahi ʼu gaueʼaga.+
17 Pea neʼe laliki leva e te kau Kaletea te ʼu meʼa ʼaeni neʼe tuku ʼi te fale ʼo Sehova: te ʼu pou kapa+ ʼo te fale ʼo Sehova, mo te ʼu saliote,+ pea mo te foʼi tane vai neʼe higoa ko te Tai ʼae neʼe fai ʼaki te kapa.+ Neʼe natou ʼave leva te kapa fuli ki Papiloni.+ 18 Neʼe natou toe ʼave foki mo te ʼu tanakiʼaga lefulefu, mo te ʼu huo takele, mo te ʼu faʼahiga pipi, mo te ʼu pa loloto,+ mo te ʼu ipu+ pea mo te ʼu faʼahiga meʼa kehekehe neʼe fai ʼaki te kapa, ʼae neʼe fakaʼaogaʼi ki te tauhi ʼi te fale lotu. 19 Neʼe toe ʼave e te pule ʼo te kau leʼo te ʼu foʼi topu,+ mo te ʼu ʼaiʼaga afi, mo te ʼu pa loloto, mo te ʼu tanakiʼaga lefulefu, mo te ʼu tuʼulaga malama,+ mo te ʼu ipu, pea mo te ʼu pa loloto ʼae neʼe fai ʼaki te siliva pea mo te aulo maʼa.+ 20 Neʼe mole feala ia ke fua te kapa ʼo te ʼu meʼa fuli ʼaeni: te ʼu pou ʼe lua, mo te foʼi tane vai neʼe higoa ko te Tai, mo te ʼu vitulo kapa ʼe 12+ ʼae neʼe hili ki ai te Tai, pea mo te ʼu saliote ʼae neʼe faʼu e te Hau ko Salomone maʼa te fale ʼo Sehova.
21 Neʼe fasiga nima* 18 te maʼoluga ʼo te ʼu pou takitahi, pea neʼe ʼaoga he maea ʼe fasiga nima 12 tona loa moʼo fuafua te takafuafua ʼo te ʼu pou ʼaia ʼe lua.+ Neʼe teitei satimeta 7 tona matolu* pea neʼe gaʼasi ʼi loto. 22 Pea neʼe fai te ʼu ʼuluʼi pou ʼaki te kapa. Pea ko te maʼoluga ʼo te ʼu ʼuluʼi pou neʼe fasiga nima nima,+ pea ko te meʼa vagavaga mo te ʼu kelenate ʼae neʼe ʼa takai ʼaki te ʼu ʼuluʼi pou, neʼe fai ʼaki te kapa. Neʼe tatau te ʼu pou ʼaia ʼe lua ʼo feia mo tonā fakamataleleiʼi ʼaki te ʼu kelenate. 23 Neʼe ʼi ai kelenate ʼe 96 ʼi te takafoli, pea fakatahiʼi age neʼe ko kelenate ʼe 100 ʼi te meʼa vagavaga.+
24 Neʼe toe ʼave foki e te pule ʼo te kau leʼo ia te pelepitelo pule ko Selasa,+ mo Sofoni,+ te pelepitelo ʼae neʼe tokoni kia ia, pea mo te ʼu tagata leʼo matapa ʼe toko tolu.+ 25 Pea neʼe ina toʼo ʼi te kolo he tagata neʼe gaue ʼi te fale hau mo pule ki te kau solia, mo te ʼu tagata ʼe toko fitu neʼe kaugā gaue mo te hau. Neʼe ina toe toʼo mo te sikalaipe ʼo te pule ʼo te foʼi kautau ʼae neʼe ina pauʼi te kau solia, ʼo toe feia pe mo te ʼu tagata ʼo te fenua ʼe toko 60 ʼae neʼe kei nonofo ʼi te kolo. 26 Neʼe pilisoniʼi natou e Nepusalatane, te pule ʼo te kau leʼo ʼo ina ʼave ki te hau ʼo Papiloni, ʼi Lipila. 27 Pea neʼe matehi leva natou e te hau ʼo Papiloni ʼi Lipila,+ ʼi te potu fenua ʼo Hamate. Neʼe ʼave popula ai te hahaʼi ʼo Suta mai tonatou fenua.+
28 Koʼeni te hahaʼi ʼae neʼe ʼave popula e Nepukanesa: neʼe ko te toko 3 023 kau Sutea ʼi te fitu taʼu ʼo tona temi pule.+
29 ʼI te 18 taʼu ʼo te temi pule ʼo Nepukanesa,+ neʼe ko te toko 832 hahaʼi ʼae neʼe ʼave mai Selusalemi.
30 ʼI te 23 taʼu ʼo te temi pule ʼo Nepukanesa, neʼe ʼave popula e Nepusalatane, te pule ʼo te kau leʼo ia he kau Sutea: neʼe ko te toko 745.+
Neʼe fakatahiʼi ai neʼe ko te toko 4 600 ʼae neʼe ʼave popula.
31 Ki muli age, ʼi te taʼu ʼae neʼe hau ai ia Evile-melotake, te Hau ʼo Papiloni, neʼe ina fakaʼateainaʼi ia Seoakini,+ te Hau ʼo Suta mai te fale pilisoni. Neʼe hoko te faʼahi ʼaia ʼi te 37 taʼu ʼae neʼe maʼuli popula ai ia Seoakini, te Hau ʼo Suta, ʼi te ʼaho 25 ʼo te 12 mahina.+ 32 Neʼe palalau lelei leva te hau ʼo Papiloni kia ia pea neʼe ina hiki tona tuʼulaga ke maʼoluga age ʼi te tahi ʼu hau ʼae neʼe nonofo mo ia ʼi Papiloni. 33 Pea neʼe huʼi e Seoakini te ʼu mutuʼi meʼa ʼae neʼe ina tui ʼi te fale pilisoni pea neʼe kai tuʼumaʼu pe ʼi te laupapa ʼo te hau ʼo kaku ki tana mate. 34 Neʼe foaki tuʼumaʼu pe kia ia he vaega meʼa kai mai te hau ʼo Papiloni, ʼi te ʼaho fuli pe, ʼo kaku ki tana mate.