Selemia

7 Koʼeni te ʼu folafola ʼae neʼe ui e Sehova kia Selemia: 2 “Ke ke tuʼu ʼi te matapa ʼo te fale ʼo Sehova, pea ke kalagaʼi te logo ʼaeni: ‘Kotou fagono ki te logo ʼa Sehova ia koutou fuli, hahaʼi ʼo Suta ʼae ʼe fehufi ʼi te ʼu matapa ʼaeni ʼo tulolo ia muʼa ʼo Sehova. 3 Koʼeni te folafola ʼa Sehova ʼo te ʼatu kautau, te ʼAtua ʼo Iselaele: “Kotou fetogi takotou aga mo ʼakotou gaue, pea ʼe au fakagafua anai ke hoko atu takotou nonofo ʼi te fenua ʼaeni.+ 4 ʼAua naʼa kotou falala ki ni palalau kaka pea ʼaua naʼa kotou ui: ‘Ko te fale lotu ʼo Sehova, ko te fale lotu ʼo Sehova, ko te fale lotu ʼo Sehova!’+ 5 Kotou fetogi moʼoni takotou aga mo ʼakotou gaue. Kotou tokaga lelei ʼo fakahoko te faitotonu moka kotou fakamauʼi ni tagata.+ 6 ʼAua naʼa kotou gaohi koviʼi te kau matapule, te ʼu fanau hala mo tamai pea mo te ʼu fafine vitua.+ ʼAua naʼa kotou liligi te toto ʼo natou ʼae neʼe mole natou fai he meʼa ʼe kovi ʼi te fenua ʼaeni. ʼAua naʼa kotou fakatupu tokotou malaʼia ʼi takotou fakalogo ki ʼihi ʼatua.+ 7 Pea ʼe hoki au fakagafua leva ke hoko atu takotou nonofo ʼi te fenua ʼaeni, te fenua ʼaeni neʼe au foaki ki ʼakotou kui ʼo talu ai.” ’ ”*

8 “Kae ʼe kotou falala koutou ki ni palalau kaka,+ ʼe mole anai hona ia ʼuhiga. 9 ʼE kotou kaihaʼa,+ ʼe kotou faifakapo, ʼe kotou tono, ʼe kotou fai ni fakapapau loi,+ ʼe kotou momoli ni sakilifisio kia Paale+ pea ʼe kotou fakalogo ki ni ʼatua neʼe mole kotou iloʼi pe la. 10 ʼI takotou manatu la, ʼe feala koa ke kotou fai te ʼu meʼa fakalialia fuli ʼaia pea kotou ʼomai leva ʼo tutuʼu ʼi ʼoku muʼa ʼi te ʼapi ʼaeni ʼe tuʼu ai toku huafa pea mo ui: ‘ ʼE haofaki anai matou’? 11 ʼE kotou fakaʼuhiga koa koutou te ʼapi ʼaeni ʼe tuʼu ai toku huafa ko he ʼana ʼo te kau kaihaʼa?+ Ko te meʼa ʼaia neʼe au tokagaʼi,” ko te ui ʼaia ʼa Sehova.

12 “ ‘Kae kotou olo la ki Silo,+ ki toku sagatualio, ʼae neʼe au fakatuʼu ki ai toku huafa ʼi te temi muʼa.+ Pea kotou sisio ki te meʼa ʼae neʼe au fakahoko ki ai ʼuhi ko te agakovi ʼo taku hahaʼi ko Iselaele.+ 13 Kae neʼe mole kotou tuku pe la takotou fai te ʼu meʼa fuli ʼaia,’ ko te ui ʼaia ʼa Sehova. ‘Neʼe au palalau liuliuga atu kia koutou, kae neʼe mole kotou fakalogo mai pe la.+ Neʼe au pauʼi tuʼumaʼu koutou, kae neʼe mole kotou fia tali mai pe la.+ 14 Koia ko te meʼa ʼae neʼe au fakahoko ki Silo,+ ʼe au toe fakahoko pe anai ki te ʼapi ʼae ʼe tuʼu ai toku huafa,+ te ʼapi ʼaeni ʼe kotou falala ki ai,+ pea mo te koga meʼa ʼaeni neʼe au foaki atu maʼa koutou pea mo ʼakotou kui. 15 ʼE au kapu anai koutou ʼi ʼoku muʼa ohage ko taku kapu ʼokotou tehina fuli, te hologa katoa ʼo Efalaimi.’+

16 “Kae kia koe, ʼaua naʼa ke hufakiʼi te hahaʼi ʼaeni. ʼE mole he ʼuhiga ʼo tau kole tokoni mai, peʼe ko tau faikole mai, peʼe ko tau kole mamahi mai ʼo ʼuhiga mo natou,+ he ʼe mole au fakalogo atu anai.+ 17 ʼE mole ke sio koa koe ki te ʼu meʼa ʼae ʼe natou fai ʼi te ʼu kolo ʼo Suta pea mo te ʼu ala ʼo Selusalemi? 18 ʼE tae fafie te ʼu tama, ʼe tafu te afi e te ʼu tamai pea ʼe natu e te ʼu fafine te falena moʼo fai ni keke ke natou momoli ko he sakilifisio ki te Fineʼaliki ʼo Te Lagi.*+ Pea ʼe natou liligi ni molaga meʼa inu ki ʼihi ʼatua moʼoku fakamamahiʼi.+ 19 ‘Kae ko au koa ʼae ʼe natou fakamamahiʼi?’ ko te ui ʼaia ʼa Sehova. ‘Kailoa ia, ko natou totonu pe, pea ʼe natou ufiufi aipe.’+ 20 Koʼeni te folafola ʼa te Tuʼi ʼAliki ko Sehova: ‘Kotou fagono, ʼe au fakato anai toku hauhau ki te fenua ʼaeni,+ ki te ʼu tagata pea mo te ʼu manu, ki te ʼu fuʼu ʼakau ʼo te fenua pea mo te ʼu fua ʼo te kele. ʼE kakaha anai toku hauhau ohage ko he afi pea ʼe mole feala anai ke matehi.’+

21 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘Kotou hilifaki ʼakotou holokoseta ki ʼakotou sakilifisio ʼae, pea kotou kai tonu te kanoʼi manu.+ 22 ʼI te ʼaho ʼae neʼe au fakamavae ai ʼakotou kui ʼi Esipito, neʼe mole au tala age peʼe fakatotonu age he meʼa ʼo ʼuhiga mo te ʼu holokoseta pea mo te ʼu sakilifisio.+ 23 Kae neʼe au foaki age te fakatotonu ʼaeni: “Kotou fakalogo mai kia te au, pea ʼe au liliu anai ko tokotou ʼAtua pea ʼe kotou liliu anai ko taku hahaʼi.+ ʼE tonu anai ke kotou mulimuli lelei ki te ala ʼae ka au fakaha atu ke fua lelei meʼa fuli kia koutou.” ’+ 24 Kae neʼe mole pe la natou fakalogo peʼe tokaga mai.+ Neʼe natou mulimuli pe ki te ala ʼo ʼanatou fakatuʼutuʼu kaka. Neʼe natou uigataʼa ʼo mulimuli ki ʼonatou holi kovi.+ Pea neʼe mole natou laka ki muʼa, kae neʼe natou holomuli. 25 Neʼe feia pe tanatou aga talu mai te ʼaho ʼae neʼe mavae ai ʼakotou kui ʼi Esipito ʼo kaku mai ki te ʼaho nei.+ Neʼe au fekauʼi tuʼumaʼu kia natou ʼaku polofeta fuli, ʼei, neʼe au fekauʼi liuliuga natou ʼi te ʼaho fuli.+ 26 Kae neʼe mole fia fakalogo mai te hahaʼi ʼaia pea mo tokaga mai.+ Neʼe natou uigataʼa ʼo kovi age tanatou aga ʼi ʼanatou kui!

27 “ ʼE ke tala anai kia natou te ʼu folafola fuli ʼaia,+ kae ʼe mole natou fakalogo atu anai. ʼE ke pauʼi anai natou, kae ʼe mole natou tali atu anai. 28 Pea ʼe ke tala age anai kia natou: ‘Koʼeni te puleʼaga ʼae neʼe mole fakalogo kia Sehova tona ʼAtua pea neʼe mole ina tokagaʼi te fakatonutonu. ʼE mole kei natou palalau ʼo ʼuhiga mo te agatonu, kua puli ia.’+

29 “Tele tou lauʼulu ʼae neʼe heʼeki kosi* pea ke siʼaki. Alu ki te ʼu kiʼi moʼuga lauʼatea pea ke hiva leʼo lahi ai he tagilaulau.* Kua liʼaki e Sehova te taʼiake ʼaeni neʼe tupu ai tona hauhau pea ʼe lituʼa anai kia natou. 30 ‘Neʼe fai e te hahaʼi ʼo Suta te meʼa ʼae ʼe kovi ki ʼoku mata,’ ko te ui ʼaia ʼa Sehova. ‘Neʼe natou fakatuʼu ʼanatou fakatata fakalialia ʼi te ʼapi ʼae ʼe tuʼu ai toku huafa moʼona ʼulihi.+ 31 Neʼe natou laga te ʼu faʼahi maʼoluga ʼi Tofete,* ʼi te potu fenua lauveliveli ʼae ko Te Foha ʼo Hinome*+ ke tutu ai ʼonatou foha mo ʼonatou ʼofafine.+ Kae neʼe mole au fakatotonu te faʼahi ʼaia pea neʼe heʼeki au manatu pe la ki ai.’+

32 “ ʼE ui e Sehova: ‘Koia, kotou fagono! ʼE hoko mai anai he ʼaho ʼe mole toe fakahigoaʼi ko Tofete peʼe ko te potu fenua lauveliveli ʼo Te Foha ʼo Hinome,* kae ʼe fakahigoaʼi anai ko te Potu Fenua ʼo Te Mātea. ʼE tanu anai te ʼu mate ʼi Tofete ʼo kaku ki te mole kei maʼu he koga meʼa.+ 33 ʼE kai anai e te ʼu manulele pea mo te ʼu manu ʼo te vao te ʼu sino mate ʼo te hahaʼi ʼaia pea ʼe mole haʼu anai he tahi ʼo fakamatakuʼi natou.+ 34 ʼE au fakagata anai te ʼu kalaga fakafiafia ʼi te ʼu kolo ʼo Suta pea mo te ʼu ala ʼo Selusalemi. ʼE mole toe logo anai ki te leʼo ʼo te tagata ʼohoana peʼe ko te leʼo ʼo te fafine ʼohoana he ʼe kua maumauʼi te fenua.’ ”+