Sakalia
10 “Kotou kole kia Sehova ke ʼua ʼi te temi ʼua ʼo te temi mātala ʼo te ʼu fisiʼi ʼakau.
ʼE ko Sehova ʼae ʼe ina fai te ʼu ʼao ʼo te afā,
Mo fakato te ʼua ki te tagata+
Pea mo foaki ki te hahaʼi fuli te vao ʼakau.
2 Neʼe fai e te ʼu fakatata* ni palalau kaka.*
Neʼe mole moʼoni te meʼa ʼae neʼe ha ki te kau faifakakikite.
ʼE natou fakamatala ni moemisi ʼe mole hona ʼuhiga.
Pea ʼe natou faigaʼi ke natou fakafimalieʼi ʼihi, kae ʼe mole logo fimalie he tahi.
Koia ʼae ʼe hehe ai anai te hahaʼi ohage ko ni ovi.
ʼE natou lotomamahi anai, he ʼe mole he tagata tauhi ovi.
3 ʼE to anai toku hauhau ki te kau tauhi ovi,
Pea ʼe au fakamauʼi anai te kau takitaki agafekai.*
ʼEi, ʼe tokaga ia Sehova ʼo te ʼatu kautau ki tana faga ovi,+ ia te hahaʼi ʼo Suta,
Pea ʼe ina fakaliliu ia natou ohage ko tana hosi tau malohi mo matalelei.
4 ʼE hifo mai ia natou te tagata maʼuhiga,*
ʼE hifo mai ia natou te pule ʼae ʼe lagolago kia natou,*
ʼE haʼu mai ia natou te nahau ʼo te tau,
ʼE hifo mai ia natou te kau taupau* fuli, ʼei, ia natou fuli.
5 ʼE natou liliu anai ohage ko ni tagata tau
ʼE natou haʼele ʼi te pela ʼi te ʼu ala lolotoga ʼo he tau.
6 ʼE au faigaʼi anai ke malo te hahaʼi ʼo Suta,
Pea ʼe au haofaki anai te hologa ʼo Sosefo.+
ʼE au toe fakaliliu anai ia natou ki tonatou fenua,
He ʼe au manavaʼofa anai kia natou.+
Pea ʼe hage anai neʼe mole au siʼaki ia natou,+
He ʼe ko au ia Sehova tonatou ʼAtua, pea ʼe au tali anai kia natou.
7 ʼE liliu anai te kau Efalaimi ohage ko he tagata tau malohi,
Pea ʼe fiafia anai ʼonatou loto ohage ko he tahi ʼe inu vino.+
ʼE sisio anai ʼonatou foha ki te meʼa ʼaia pea ʼe natou fakafiafia anai.
ʼE fiafia anai ʼonatou loto ʼuhi ko Sehova.+
8 ‘ ʼE au vekaʼi anai natou pea mo fakatahiʼi natou,
He ʼe au toe totogi anai ia natou.+
ʼE natou liliu anai ʼo kaugamalie, ʼei, ʼe natou kaugamalie anai ʼo talu ai.
9 Tatau aipe pe ʼe au fakamavetevete ia natou ʼi te hahaʼi ohage ko te nunusi ʼo te pulapula,
ʼE natou manatuʼi anai au ʼi te ʼu potu fenua mamaʼo.
ʼE natou toe malolohi anai mo ʼonatou foha pea ʼe natou toe liliu mai anai.
10 ʼE au toe fakaliliu mai anai ia natou mai Esipito,
Pea ʼe au toe fakaliliu mai anai ia natou mai Asilia ʼo toe fakatahiʼi.+
ʼE au ʼave anai ia natou ki te potu fenua ʼo Kileate+ pea mo te fenua ʼo Lipane,
Pea ʼe mole feʼauga anai te fenua maʼa natou.+
11 ʼE au fakalaka anai ʼi te tai ʼo fakatupu mamahi ki ai
Pea ʼe au taʼi anai te ʼu peau.+
ʼE moamoa anai te ʼu koga meʼa loloto fuli ʼo te Nile.
ʼE fakamalaloʼi anai te fiameʼalahi ʼo Asilia,
Pea ʼe fakamamaʼo anai te tokotoko ʼo Esipito.+