Sakalia
13 “ ʼI te ʼaho ʼaia, ʼe avahi anai he vai keli maʼa te hologa ʼo Tavite pea mo te hahaʼi ʼo Selusalemi. ʼE feala ai anai ke natou fakamaʼa ia natou mai ʼanatou agahala pea mo tonatou heʼe maʼa.+
2 ʼE ui e Sehova ʼo te ʼatu kautau: “ ʼI te ʼaho ʼaia, ʼe au molehi anai ʼi te fenua te ʼu higoa ʼo te ʼu taula ʼatua,+ pea ʼe mole toe manatuʼi anai e he tahi. ʼE au toe pulihi anai ʼi te fenua te ʼu polofeta+ pea mo te holi ki te heʼe maʼa. 3 Pea kapau ʼe toe faifakakikite he tagata, ʼe ui age anai e tana tamai mo tana faʼe ʼae neʼe nā fakatupu: ‘ ʼE mole ke maʼuli anai he neʼe ke tala ni loi ʼi te huafa ʼo Sehova.’ ʼEi, ʼe hukiʼi anai ia ia e tana tamai mo tana faʼe ʼae neʼe nā fakatupu he neʼe faifakakikite.+
4 “ ʼI te ʼaho ʼaia, ʼe ufiufi anai te ʼu polofeta fuli ʼi te meʼa ʼae ka ha age kia natou moka natou faifakakikite. ʼE mole natou tui anai he pulupulu fuluʼi manu+ moʼo kakaʼi te hahaʼi. 5 ʼE natou ui anai: ‘ ʼE mole ko au ko he polofeta. Ko au ko he tagata gaue kele, he neʼe totogi au e he tagata ʼi taku kei tupulaga.’ 6 Pea kapau ʼe fehuʼi age e he tahi kia natou: ‘Kotea te ʼu mataʼi lavea ʼaena ʼi tou sino?’* ʼe natou tali age anai: ‘Neʼe au lavea ʼi te ʼapi ʼo ʼoku kaumeʼa.’ ”
7 ʼE ui e Sehova ʼo te ʼatu kautau: “Ke taʼi e te heleta taku tagata tauhi ovi,+
Ia te tagata ʼae ʼe ko toku kaumeʼa!
ʼEi, ke taʼi te tagata tauhi ovi+ pea ke mavetevete te faga ovi!+
Pea ʼe au fakatonutonuʼi anai ia natou ʼae ʼe mole maʼuhiga.”
8 ʼE ui e Sehova: “ ʼEi, ʼi te fenua katoa,
ʼE toʼo anai te vahe lua ki te tolu ʼo te hahaʼi pea ʼe matehi anai ia natou,
Kae ko te vahe tahi ki te tolu ʼo te hahaʼi ʼe tuku anai ke natou maʼuʼuli ai.
9 ʼE au tutu anai te vahe tahi ki te tolu ʼo te hahaʼi.
ʼE au fakamaʼa anai natou ohage ko tona fai ki te siliva.
Pea ʼe au vakavakaʼi anai natou ohage ko tona fai ki te aulo, ke au iloʼi ai tonatou ʼuhiga totonu.+
ʼE natou pauʼi anai toku huafa,
Pea ʼe au tali age anai.
ʼE au ui age anai: ‘Ko natou ko taku hahaʼi,’+
Pea ʼe natou tali anai: ‘Ko Sehova ko tomatou ʼAtua.’ ”