Numelo
10 Neʼe ui leva e Sehova kia Moisese: 2 “Ke ke fai he ʼu fakatagi pupuhi ʼe lua.+ ʼE ke tuki anai te siliva moʼo fai ʼaki te ʼu fakatagi pupuhi ʼaia, pea ʼe ke fakaʼaogaʼi anai ki te fakatahiʼi ʼo te hahaʼi pea ke natou iloʼi ai ʼe tonu ke natou mavae. 3 ʼI te temi ʼae ʼe pupuhi lualua ai te ʼu fakatagi pupuhi, ʼe tonu anai ke fakatahitahi mai te hahaʼi katoa kia koe, ʼi te huʼaga ʼo te fale la ʼo te fono.+ 4 Pea kapau ʼe pupuhi he fakatagi pupuhi pe ʼe tahi, ʼe fakatahitahi mai anai kia koe te kau pule ʼo te toko lauʼi afe ʼo Iselaele.+
5 “Ka kotou pupuhi te ʼu fakatagi pupuhi ʼo kotou fetofetogi tona faʼahiga pupuhi, ʼe tonu anai ke mavae te ʼu telepi ʼae ʼe nonofo ʼi te potu esite.+ 6 Ka kotou toe pupuhi feia te ʼu fakatagi pupuhi, ko tona tuʼa lua ʼaia, ʼe tonu anai ke mavae te ʼu telepi ʼae ʼe nonofo ʼi te potu saute.+ ʼE kotou pupuhi feia anai te ʼu fakatagi pupuhi ʼi te temi fuli pe ʼae ʼe mavae ai he kalasi.
7 “ ʼE tonu anai ke kotou pupuhi te ʼu fakatagi pupuhi, kae mole kotou fetofetogi anai tona faʼahiga pupuhi, ke fakatahitahi ai te hahaʼi katoa.+ 8 ʼE pupuhi anai te ʼu fakatagi pupuhi e te ʼu foha ʼo Alone, ia te kau pelepitelo.+ Pea ʼe kotou taupau anai te lao ʼo ʼuhiga mo te fakaʼaogaʼi ʼo te ʼu fakatagi pupuhi mai he taʼiake ki he tahi taʼiake, ʼo talu ai.
9 “Ka kotou olo ʼo tauʼi ʼi tokotou fenua ʼokotou fili ʼae ʼe natou gaohi koviʼi koutou, ʼe kotou pupuhi anai te ʼu fakatagi pupuhi ke kotou fakatahitahi ai ki te tau.+ ʼE manatuʼi anai koutou e Sehova tokotou ʼAtua, pea ʼe ina haofaki anai koutou mai ʼokotou fili.
10 “Pea ʼi ʼokotou temi fakafiafia,+ ʼae ko ʼokotou ʼaho lalahi+ pea mo te ʼu ʼuluaki ʼaho ʼo te ʼu mahina, ʼe kotou pupuhi anai te ʼu fakatagi pupuhi moka kotou momoli ʼakotou holokoseta+ pea mo ʼakotou sakilifisio ʼo te tokalelei.+ ʼAki te pupuhi ʼaia ʼo te ʼu fakatagi pupuhi, ʼe manatuʼi ai anai koutou e tokotou ʼAtua. Ko au ia Sehova tokotou ʼAtua.”+
11 ʼI te lua taʼu, ʼi te ʼaho 20 ʼo te lua mahina,+ neʼe malaga ai te ʼao mai te tapenakulo+ ʼo te Fakamoʼoni. 12 Neʼe mavae ai te kau Iselaele ʼi te toafa ʼo Sinai, ʼo mulimuli ki te fakatuʼutuʼu ʼae neʼe fai ʼo ʼuhiga mo tanatou mavae.+ Pea neʼe tuʼu leva te ʼao ʼi te toafa ʼo Palani.+ 13 Neʼe ko tanatou hoki mavae ʼaia, ʼo mulimuli ki te fakatotonu ʼae neʼe fai e Sehova ʼaki ia Moisese.+
14 Neʼe ʼuluaki mavae ia te kalasi ʼae ko telepi ʼe tolu ʼo te kau Suta mo ʼanatou kutuga,* pea ko tonatou pule neʼe ko Naasone,+ te foha ʼo Aminatape. 15 Ko te pule ʼo te telepi ʼo Isakale neʼe ko Netanele,+ te foha ʼo Suala. 16 Pea ko te pule ʼo te telepi ʼo Sepulone neʼe ko Eliape,+ te foha ʼo Elone.
17 ʼI te kua ʼosi vete ʼo te tapenakulo,+ neʼe mavae leva te kau Kelesoni+ mo te kau Melali,+ ʼae neʼe natou ʼave ia te ʼu meʼa kehekehe ʼo te tapenakulo.
18 Neʼe mavae leva ia te kalasi ʼae ko telepi ʼe tolu ʼo te kau Lupeni mo ʼanatou kutuga,* pea ko tonatou pule neʼe ko Elisule,+ te foha ʼo Seteule. 19 Ko te pule ʼo te telepi ʼo Simeone neʼe ko Selumiele,+ te foha ʼo Sulisatai. 20 Pea ko te pule ʼo te telepi ʼo Kate neʼe ko Eliasafe,+ te foha ʼo Teuele.
21 Neʼe mavae leva te kau Keate, ʼae neʼe natou ʼave te ʼu meʼa taputapu ʼo te sagatualio.+ Neʼe tonu ke fakatuʼu te tapenakulo ʼi muʼa ʼo tanatou tau age.
22 Neʼe mavae leva ia te kalasi ʼae ko telepi ʼe tolu ʼo te kau Efalaimi mo ʼanatou kutuga,* pea ko tonatou pule neʼe ko Elisama,+ te foha ʼo Amiute. 23 Ko te pule ʼo te telepi ʼo Manase neʼe ko Kamaliele,+ te foha ʼo Petasuli. 24 Pea ko te pule ʼo te telepi ʼo Pesamino neʼe ko Apitane,+ te foha ʼo Kiteoni.
25 Neʼe mavae leva ia te kalasi ʼae ko telepi ʼe tolu ʼo te kau Tane mo ʼanatou kutuga,* pea neʼe natou puipui te ʼu telepi fuli moka ʼohofi natou mai muli. Ko tonatou pule neʼe ko Ahiesele,+ te foha ʼo Amikatai. 26 Ko te pule ʼo te telepi ʼo Asele neʼe ko Pakiele,+ te foha ʼo Okalane. 27 Ko te pule ʼo te telepi ʼo Nefetali neʼe ko Aila,+ te foha ʼo Enani. 28 Neʼe fakatuʼutuʼu feia te mavae ʼa te kau Iselaele mo ʼanatou kutuga.*+
29 Pea neʼe ui e Moisese kia Opapi, te foha ʼo Leuele,*+ te tagata Matiane pea ko te tamai ʼo te ʼohoana ʼo Moisese: “ ʼE matou olo ki te koga meʼa ʼae neʼe fakapapauʼi mai e Sehova ke ina foaki mai.+ Haʼu ke tou olo,+ pea ʼe matou agalelei anai kia koe, he neʼe fakapapauʼi e Sehova ke ina foaki he ʼu meʼa ʼe lelei ki Iselaele.”+ 30 Kae neʼe ina tali age: “ ʼE mole au alu anai mo koutou. Kae ʼe au toe liliu au ki toku fenua pea mo ʼoku kaiga.” 31 Neʼe ina ui age ki ai: “Fakalelei siʼou loto, ʼaua naʼa ke mavae ia matou, he ʼe ke iloʼi te ʼu faʼahi ʼae ʼe tonu ke fakatuʼu ai tomatou nofoʼaga ʼi te toafa, pea ʼe feala anai ke ke taki matou. 32 Pea kapau ʼe ke haʼu mo matou,+ ko te ʼu lelei fuli pe ʼae ʼe foaki mai anai e Sehova, ʼe matou vaevae anai mo koe.”
33 Neʼe natou mavae ai mai te moʼuga ʼo Sehova,+ ʼo natou haʼele lolotoga ʼaho ʼe tolu. Pea neʼe olo ʼi muʼa te kau pelepitelo ʼae neʼe natou fata ia te aleka+ ʼo te fuakava ʼa Sehova, ʼi tanatou fagona ʼaia lolotoga ʼaho ʼe tolu ʼo kumi he koga meʼa ke natou malolo ai.+ 34 ʼI tanatou mavae ʼaia, neʼe tuʼu te ʼao ʼo Sehova+ ʼi ʼoluga ʼo natou ʼi te ʼaho.
35 ʼI te temi fuli pe ʼae neʼe hiki ai te Aleka, neʼe ui e Moisese: “Sehova e, tuʼu ake,+ pea ke mavetevete ʼou fili, pea ke feholaki ʼi ʼou muʼa ia natou ʼae ʼe fehihiʼa kia te koe.” 36 Pea ʼi te temi ʼae neʼe tuku ifo ai te Aleka, neʼe ina ui: “Sehova e, ke ke toe liliu mai ki te kaugamalie ʼo Iselaele ʼae ʼe mole feala hona lau.”+