Numelo
13 Neʼe ui leva e Sehova kia Moisese: 2 “Ke ke filifili he pule ʼi te ʼu telepi takitahi ʼo Iselaele,+ pea ke ke fekauʼi natou ke olo ʼo vakaʼi fakafufu te fenua ʼo Kanaane, ʼae ka au foaki anai ki te kau Iselaele.”+
3 Neʼe fekauʼi ai natou e Moisese mai te toafa ʼo Palani,+ ʼo mulimuli ki te fakatotonu ʼa Sehova. Ko te ʼu tagata fuli ʼaia neʼe ko he ʼu pule ʼo te kau Iselaele. 4 Koʼeni ʼonatou higoa: ʼi te telepi ʼo Lupeni, neʼe ko Samua, te foha ʼo Sakule, 5 ʼi te telepi ʼo Simeone, neʼe ko Sapate, te foha ʼo Oli, 6 ʼi te telepi ʼo Suta, neʼe ko Kalepo,+ te foha ʼo Sefune, 7 ʼi te telepi ʼo Isakale, neʼe ko Sikuale, te foha ʼo Sosefo, 8 ʼi te telepi ʼo Efalaimi, neʼe ko Oseo,+ te foha ʼo Nune, 9 ʼi te telepi ʼo Pesamino, neʼe ko Paleti, te foha ʼo Lafu, 10 ʼi te telepi ʼo Sepulone, neʼe ko Katiele, te foha ʼo Soti, 11 ʼi te telepi ʼo Sosefo,+ ʼae ko te telepi ʼo Manase,+ neʼe ko Kati, te foha ʼo Susi, 12 ʼi te telepi ʼo Tane, neʼe ko Amiele, te foha ʼo Kemali, 13 ʼi te telepi ʼo Asele, neʼe ko Setuli, te foha ʼo Mikaele, 14 ʼi te telepi ʼo Nefetali, neʼe ko Napi, te foha ʼo Vofesi, 15 pea ʼi te telepi ʼo Kate, neʼe ko Keuli, te foha ʼo Maki. 16 Ko te ʼu higoa ʼaia ʼo te ʼu tagata ʼae neʼe fekauʼi e Moisese ke olo ʼo vakaʼi fakafufu ia te fenua. Pea neʼe fakahigoaʼi e Moisese ia Oseo, te foha ʼo Nune, ko Sosue.*+
17 ʼI te temi ʼae neʼe fekauʼi ai e Moisese te ʼu tagata ʼaia ke olo ʼo vakaʼi fakafufu te fenua ʼo Kanaane, neʼe ina ui age kia natou: “Kotou olo ki te Nekepe, pea kotou hake leva ki te potu moʼugaʼia.+ 18 ʼE kotou vakaʼi anai pe ʼe feafeaʼi te fenua,+ pe ʼe malolohi te hahaʼi ʼae ʼe nonofo ai peʼe kailoa, pe ʼe natou tokosiʼi peʼe kaugamalie. 19 Pea kotou vakaʼi pe ʼe lelei peʼe kovi te fenua, pe ʼe ʼa kaupa te ʼu kolo ʼae ʼe natou nonofo ai peʼe kailoa. 20 Kotou toe vakaʼi pe ʼe maʼuli lelei te kele peʼe kailoa,+ pe ʼe ʼi ai ni fuʼu ʼakau peʼe kailoa. ʼE tonu anai ke kotou lototoʼa+ pea ke kotou ʼaumai he ʼu fuaʼi ʼakau ʼo te fenua.” ʼI te temi ʼaia, neʼe kua momoho te ʼu ʼuluaki fuaʼi vite.+
21 Neʼe natou olo ai ʼo vakaʼi fakafufu ia te fenua, mai te toafa ʼo Tesine+ ki Leopi,+ ʼae ʼe ovi ki Lepo-hamate.*+ 22 ʼI tanatou olo ki te Nekepe, neʼe natou tau leva ki Hepelone,+ ʼae neʼe maʼuʼuli ai ia Asimani, mo Sesai pea mo Talamai,+ ia te kau Anake.+ Neʼe laga ia te kolo ko Hepelone ia taʼu ʼe fitu ʼi muʼa ʼo te laga ʼo te kolo ko Tesoane,* ʼi Esipito. 23 Pea ʼi tanatou tau atu ki te Vai Tafe* ʼo Esekoli,+ neʼe natou tuʼusi ai he vaʼa mo hona fuhiga vite ʼe tahi, ʼae neʼe ʼamo e he toko lua ʼaki he ʼakau. Neʼe natou toe toli foki ni fuaʼi kelenate pea mo ni fuaʼi fiku.+ 24 Neʼe fakahigoa te koga meʼa ʼaia ko te Vai Tafe* ʼo Esekoli,*+ ʼuhi ko te fuhiga vite ʼae neʼe tuʼusi e te kau Iselaele ʼi ai.
25 Hili ʼaho ʼe 40,+ neʼe natou toe liliu leva ʼi tanatou ʼosi vakaʼi ia te fenua. 26 Neʼe natou toe liliu leva kia Moisese, mo Alone pea mo te kau Iselaele fuli, ʼi te toafa ʼo Palani, ʼi Katesi.+ Neʼe natou fakamatala ki te hahaʼi te ʼu meʼa fuli ʼae neʼe natou sisio ki ai pea mo fakaha age te ʼu fuaʼi ʼakau ʼo te fenua. 27 Koʼeni te ʼu meʼa ʼae neʼe natou fakamatala age kia Moisese: “Neʼe matou olo ki te fenua ʼae neʼe ke fekauʼi matou ki ai, pea ʼe tafe moʼoni ai te huʼa pipi mo te meli,+ pea koʼeni ʼona fuaʼi ʼakau.+ 28 Kae ʼe malolohi te hahaʼi ʼae ʼe nonofo ʼi te fenua ʼaia, pea ʼe lalahi ʼaupito ʼonatou kolo tau. Neʼe matou toe sisio ki te kau Anake ʼi ai.+ 29 ʼE nonofo te kau Amaleke+ ʼi te fenua ʼo te Nekepe,+ pea ʼe nonofo te kau Heti, mo te kau Sepusi+ pea mo te kau Amole+ ʼi te potu moʼugaʼia, kae ʼe nonofo te kau Kanaane+ ʼi te matatai+ pea mo te ʼu tafaʼaki ʼo te Solotane.”
30 Neʼe faigaʼi leva e Kalepo ke ina fakafimalieʼi te hahaʼi, ʼae neʼe tutuʼu ia muʼa ʼo Moisese. Neʼe ina ui: “Tou foimo hake nei, pea ʼe mahino ia ʼe tou maʼu anai ia te fenua he ʼe tou malo moʼoni anai.”+ 31 Kae neʼe ui age e te ʼu tagata ʼae neʼe kaugā olo mo ia: “ ʼE mole feala ke tou olo ʼo tauʼi te hahaʼi ʼaia, he ʼe natou malolohi age ia tatou.”+ 32 Pea neʼe hoko atu pe tanatou fakamatala ki te kau Iselaele te ʼu meʼa ʼe kovi+ ʼo ʼuhiga mo te fenua ʼae neʼe natou olo ʼo vakaʼi. Neʼe natou ui: “Ko te fenua ʼae neʼe matou olo ʼo vakaʼi, ʼe ko he fenua ʼe fakatupu tuʼutamaki pea ʼe kotou mamate moʼoni anai ʼi ai. Ko te hahaʼi fuli ʼae neʼe matou sisio ki ai ʼe ko he ʼu toe tagata ia.+ 33 Pea neʼe matou sisio ki ni tagata lalahi mo fakamataku,* ia te ʼu foha ʼo Anake ʼae ʼe natou hifo mai te kau Nefilime.+ ʼI tamatou sio, neʼe matou hage ko ni heʼe, pea neʼe toe feia pe tanatou sisio mai kia matou.”