Numelo

20 ʼI te ʼuluaki mahina, neʼe tau leva te kau Iselaele fuli ki te toafa ʼo Tesine, pea neʼe nonofo leva te hahaʼi ʼi Katesi.+ Neʼe mate ia Miliamu+ pea neʼe ʼavaifo ʼi ai.

2 Neʼe mole maʼu ai he vai maʼa te hahaʼi,+ pea neʼe natou fakatahitahi leva ke natou fakafeagai kia Moisese mo Alone. 3 Pea neʼe fakatupu kē ia te hahaʼi kia Moisese,+ ʼo natou ui age: “Ka na neʼe matou mamate la ʼi te temi ʼae neʼe mamate ai ʼomatou tehina ia muʼa ʼo Sehova! 4 He koʼe neʼe kolua taki mai te hahaʼi ʼa Sehova ki te toafa ʼaeni ke matou mamate ai ʼo feia mo tamatou faga manu?+ 5 Pea he koʼe neʼe kolua fakamavae matou mai Esipito ʼo kolua taki mai matou ki te koga meʼa ʼaeni ʼe mole lelei?+ ʼE mole feala ke matou to ai he meʼa, ʼe mole ʼi ai pe la ni fuaʼi fiku, mo ni fuʼu vite, mo ni fuaʼi kelenate. ʼE mole matou maʼu pe la he vai ke matou inu.”+ 6 Neʼe mavae leva ia Moisese mo Alone mai ia muʼa ʼo te hahaʼi ʼo olo ki te huʼaga ʼo te fale la ʼo te fono, pea neʼe nā tulolo ai ki te kele. Neʼe ha leva te kololia ʼo Sehova kia naua.+

7 Pea neʼe ui e Sehova kia Moisese: 8 “Ke ke toʼo te toko pea ko koe mo tou tehina ko Alone, kolua pauʼi ia te hahaʼi fuli, pea kolua palalau ki te foʼi maka ʼi ʼonatou muʼa, ke haʼu mai ai te vai. ʼE haʼu anai te vai mai te foʼi maka pea ʼe kolua fakainu ʼaki anai te hahaʼi mo tanatou faga manu.”+

9 Neʼe toʼo ai e Moisese te toko ia muʼa ʼo Sehova,+ ohage pe ko Tana fakatotonu age ki ai. 10 Neʼe pauʼi leva e Moisese mo Alone te hahaʼi ke natou fakatahitahi mai ki te foʼi maka, pea neʼe ina ui age kia natou: “Kotou fakalogo mai, hahaʼi agatuʼu! ʼE tonu koa ke ma fakahali he vai mai te foʼi maka ʼaeni maʼa koutou?”+ 11 Pea neʼe hiki leva e Moisese tona nima ʼo taʼi tuʼa lua te foʼi maka ʼaki tona toko. Neʼe puna mai ai te vai ʼo iinu ai te hahaʼi mo tanatou faga manu.+

12 Ki muli age, neʼe ui e Sehova kia Moisese mo Alone: “ ʼE mole kolua fakahu anai te hahaʼi ʼaeni ki te fenua ʼae ka au foaki kia natou, he neʼe mole kolua tui kia te au pea mo fakaha toku maʼoniʼoni ia muʼa ʼo te hahaʼi ʼo Iselaele.”+ 13 ʼE ko te ʼu vai ʼaia ʼo Melipa,*+ ʼae neʼe fakatupu kē ai te kau Iselaele kia Sehova, pea neʼe ina fakaha ai tona maʼoniʼoni kia natou.

14 Neʼe fekauʼi leva e Moisese he ʼu tagata ʼave logo mai Katesi ke natou olo ki te hau ʼo Etome,+ ʼo ui age ki ai: “Koʼeni te meʼa ʼae ʼe ui e Iselaele, tou tehina:+ ‘ ʼE ke iloʼi lelei pe te ʼu faigataʼaʼia fuli ʼae neʼe matou tau mo ia. 15 Neʼe olo ʼamatou kui ki Esipito,+ pea neʼe matou nonofo ʼi Esipito lolotoga ni taʼu,*+ kae neʼe gaohi koviʼi matou mo ʼamatou kui e te kau Esipito.+ 16 Neʼe matou tagi leva kia Sehova,+ pea neʼe logo ki ai. Neʼe ina fekauʼi mai he ʼaselo+ pea neʼe ina fakamavae ai matou mai Esipito. Pea koʼeni, ʼe matou nonofo nei ʼi Katesi, ko he kolo ʼe tuʼu ʼi te tuʼakoi ʼo tou fenua. 17 Fakalelei siʼou loto, tuku ke matou fakalaka ʼi tou fenua. ʼE mole matou fakalaka anai ʼi he moʼi kele neʼe kotou to pulapula ai peʼe ko he gaueʼaga vite, pea ʼe mole matou inu anai te vai ʼo he vai keli. ʼE matou haʼele pe anai ʼi te Ala ʼo Te Hau, pea ʼe mole matou afe anai ki te faʼahi mataʼu peʼe ki te faʼahi hema, ʼo kaku ki tamatou ʼosi fakalaka ʼi tou fenua.’ ”+

18 Kae neʼe ui age e te hau ʼo Etome kia ia: “ ʼE mole ke fakalaka anai ʼi tomatou fenua. Kapau ʼe ke fakalaka, ʼe au alu atu anai kia koe mo te heleta.” 19 Pea neʼe tali age e te kau Iselaele kia ia: “ ʼE matou hake pe anai ʼi te ala lahi, pea kapau ʼe matou inu ʼo feia mo tamatou faga manu te vai ʼo tou fenua, ʼe matou totogi atu anai.+ ʼE matou loto pe ke matou fakalaka lalo ʼi tou fenua.”+ 20 Kae neʼe ina ui: “Kailoa, ʼe mole kotou fakalaka anai.”+ Pea neʼe alu ai te hau ʼo Etome ki te kau Iselaele, mo he hahaʼi kaugamalie pea mo he foʼi kautau malohi. 21 Neʼe mole tali ai e te hau ʼo Etome ke fakalaka ia Iselaele ʼi tona fenua. Koia, neʼe mavae kehe mai ai ia Iselaele.+

22 Neʼe mavae te hahaʼi fuli ʼo Iselaele mai Katesi pea neʼe natou tau leva ki te Moʼuga ʼo Hole.+ 23 Neʼe ui leva e Sehova kia Moisese mo Alone ʼi te Moʼuga ʼo Hole, ʼi te tuʼakoi ʼo te fenua ʼo Etome: 24 “ ʼE tuku fakatahi anai ia Alone mo ʼana kui.*+ ʼE mole hu anai ki te fenua ʼae ʼe au foaki anai ki te kau Iselaele, he neʼe kolua talagataʼa ki taku fakatotonu ʼo ʼuhiga mo te ʼu vai ʼo Melipa.+ 25 Koia, ke ke hake mo Alone pea mo tona foha ko Eleasale ʼi te Moʼuga ʼo Hole. 26 ʼE ke huʼi anai te ʼu teu ʼo Alone+ ʼo fakatui ki tona foha ko Eleasale,+ pea ʼe mate anai ia Alone ʼi ai.”

27 Neʼe fai leva e Moisese ohage pe ko tona fakatotonu age e Sehova. Neʼe natou hake ai ʼi te Moʼuga ʼo Hole ia muʼa ʼo te hahaʼi fuli. 28 Neʼe huʼi leva e Moisese te ʼu teu ʼo Alone ʼo fakatui ki tona foha ko Eleasale. Hili ʼaia, neʼe mate leva ia Alone ʼi te tumutumu ʼo te moʼuga.+ Pea neʼe hifo mai leva ia Moisese mo Eleasale mai te moʼuga. 29 ʼI te sisio ʼa te hahaʼi fuli ʼo Iselaele kua mate ia Alone, neʼe natou fetagihi fuli ai kia Alone lolotoga ʼaho ʼe 30.+