Sosue
18 Neʼe fakatahitahi leva te kau Iselaele fuli ʼi Silo,+ pea neʼe natou fakatuʼu ai te fale la ʼo te fono,+ koteʼuhi kua fakalogo te fenua kia natou.+ 2 Kae neʼe kei toe te ʼu telepi ʼe fitu ʼo Iselaele neʼe heʼeki maʼu honatou tofiʼa. 3 Neʼe ui e Sosue ki te kau Iselaele: “ ʼE kotou talitali anai koa ki ʼafea ke kotou olo ai ʼo toʼo te fenua ʼae neʼe foaki atu e Sehova, te ʼAtua ʼo ʼakotou kui?+ 4 Kotou filifili he ʼu tagata ʼe toko tolu ʼi te ʼu telepi takitahi. ʼE au fekauʼi anai ia natou ke olo ʼi te fenua pea ke natou fakamape, ʼo mulimuli ki te ʼu vahe ʼae ka foaki ki te ʼu telepi. Pea ʼe natou toe liliu mai anai kia au. 5 ʼE natou vae fitu anai te fenua.+ ʼE nofo anai ia Suta ʼi tona fenua, ʼi te potu saute,+ pea ʼe nofo anai te hologa ʼo Sosefo ʼi tona fenua, ʼi te potu noleto.+ 6 ʼE kotou fakamape anai te fenua ʼo vae fitu, pea ʼe kotou ʼomai anai ʼo fakaha mai kia au. Pea ʼe au fai anai he toho+ maʼa koutou, ʼi heni, ia muʼa ʼo Sehova totatou ʼAtua. 7 Kae ʼe mole maʼu anai he vahe ʼo te kau Levite ʼi te fenua ʼi te lotolotoiga ʼo koutou,+ he ʼe ko tonatou tofiʼa, ʼe ko tanatou gaue maʼa Sehova ʼi tonatou ʼuhiga pelepitelo.+ Pea ko te ʼu telepi ʼo Kate, mo Lupeni pea mo te vaelua ʼo te telepi ʼo Manase,+ ʼe kua natou ʼosi maʼu tonatou tofiʼa ʼi te potu esite ʼo te Solotane, ʼae neʼe foaki age e Moisese, te tagata faifekau ʼa Sehova.”
8 Neʼe teuteu ai te ʼu tagata ke natou olo. Pea neʼe fakatotonu leva e Sosue kia natou ʼae neʼe olo ʼo fakamape te fenua: “Kotou olo ʼi te fenua ʼo fakamape, pea kotou toe liliu mai kia au. Pea ʼe au fai anai he toho maʼa koutou, ʼi heni, ʼi Silo, ia muʼa ʼo Sehova.”+ 9 Pea neʼe olo ai te ʼu tagata ʼi te fenua. Neʼe natou fakamape ʼo mulimuli ki te ʼu kolo pea neʼe natou vae fitu ai te fenua. Pea neʼe natou hiki ai leva ki he takaiga tohi. Hili ʼaia, neʼe natou toe liliu ai kia Sosue, ʼi te nofoʼaga, ʼi Silo. 10 Pea neʼe fai ai e Sosue he toho maʼa natou ʼi Silo, ia muʼa ʼo Sehova.+ Neʼe vae ai leva e Sosue te fenua ki te kau Iselaele, ʼo tahi maʼu ai e te telepi tona vahe.+
11 ʼI te temi ʼae neʼe fai ai te toho, neʼe to te ʼuluaki vahe ki te telepi ʼo Pesamino, pea neʼe vaevae ʼi ʼonatou famili. Pea neʼe tuʼu te fenua ʼae neʼe foaki age kia natou ʼi te vaha ʼo te fenua ʼo Suta+ pea mo te fenua ʼo te hologa ʼo Sosefo.+ 12 ʼI te potu noleto, neʼe kamata te tuʼakoi ʼo tonatou fenua ʼi te Solotane. Neʼe alu ki te faʼahi ʼo Seliko+ ʼae ʼe haga ki te potu noleto, ʼo alu ai ki te moʼuga ʼi te potu uesite, ʼo kaku ki te toafa ʼo Pete-aveni.+ 13 Neʼe hoko atu pe te alu ʼo te tuʼakoi mai ai ki te faʼahi ʼo Lusi, ʼae ʼe haga ki te potu saute. ʼE toe higoa ia Lusi ko Petele.+ Neʼe alu ai te tuʼakoi ki Ataloti-ata+ ʼi te moʼuga ʼae ʼe tuʼu ʼi te potu saute ʼo Pete-oloni ʼi Lalo.+ 14 Pea neʼe fai leva te tuʼakoi ʼo te potu uesite. Neʼe alu ki te potu saute mai te moʼuga ʼae ʼe haga ki Pete-oloni, ʼi te potu saute. Pea neʼe gata ai te tuʼakoi ʼi Kiliate-paale, ʼae ʼe toe higoa ko Kiliate-sealimi,+ ko he kolo ʼo Suta. ʼE ko te tuʼakoi ʼaia ʼo te potu uesite.
15 ʼI te potu saute, neʼe kamata te tuʼakoi mai te potu taupotu ʼo Kiliate-sealimi pea neʼe alu ki te potu uesite, ʼo kaku ki te matapuna vai ʼo Nefetoa.+ 16 Neʼe hifo ki te vaʼe moʼuga ʼae ʼe haga ki te potu fenua lauveliveli ʼae ko Te Foha ʼo Hinome,+ pea ʼe tuʼu te vaʼe moʼuga ʼaia ʼi te Potu Fenua Laulelei ʼo Lefaimi,+ ʼi te potu noleto. Neʼe hifo ki te potu fenua lauveliveli ʼo Hinome, ki te faʼahi ʼo te kolo ʼo te kau Sepusi+ ʼae ʼe haga ki te potu saute, ʼo kaku ki Ene-lokeli.+ 17 Pea neʼe alu te tuʼakoi ki te potu noleto, ʼo kaku ki Ene-semesi ʼo alu atu ai ki Kelisoti, ʼae ʼe haga ki te mahake ʼo Atumime.+ Pea neʼe alu ifo te tuʼakoi ki te fuʼu maka+ ʼo Poani,+ te foha ʼo Lupeni. 18 Neʼe hoko atu te alu ʼo te tuʼakoi ki te ʼu kiʼi moʼuga, ʼi te potu noleto, ʼae ʼe haga ki te Alapa, pea neʼe alu ifo ai ki te Alapa. 19 Neʼe hoko atu te alu ʼo te tuʼakoi ki te faʼahi ʼo Pete-okala,+ ʼae ʼe haga ki te potu noleto. Pea neʼe gata ai te tuʼakoi ʼi te matatai ʼo te potu noleto ʼo te Tai Kona,*+ ʼi te gataʼaga ʼo te Solotane, ʼae ʼi te potu saute. Neʼe ko te tuʼakoi ʼaia ʼo te potu saute. 20 Ko te tuʼakoi ʼo te potu esite neʼe ko te Solotane. Neʼe ko te ʼu tuʼakoi fuli ʼaia ʼo te fenua ʼae neʼe foaki ki te hologa ʼo Pesamino ko honatou tofiʼa pea neʼe vaevae ʼi ʼonatou famili.
21 Koʼeni te ʼu kolo ʼae neʼe vaevae ʼi te ʼu famili ʼo te telepi ʼo Pesamino: ko Seliko, mo Pete-okala, mo Emeki-ketesi, 22 mo Pete-alapa,+ mo Semalaimi, mo Petele,+ 23 mo Avime, mo Pala, mo Ofala, 24 mo Kefa-amonai, mo Ofeni, pea mo Kepa.+ Neʼe fakatahiʼi ko kolo ʼe 12, pea mo te ʼu kolo liliki ʼae ʼi ʼonatou tafaʼaki.
25 Neʼe toe ʼi ai mo Kipeone,+ mo Lama, mo Peeloti, 26 mo Misipe, mo Kefila, mo Mosa, 27 mo Lekeme, mo Selepeele, mo Taleala, 28 mo Tesuela,+ mo Alefi, mo Sepusi, ʼae ʼe toe higoa ko Selusalemi,+ mo Kipease+ pea mo Kiliate. Neʼe fakatahiʼi ko kolo ʼe 14, pea mo te ʼu kolo liliki ʼae ʼi ʼonatou tafaʼaki.
Neʼe ko te fenua ʼaia neʼe foaki ki te hologa ʼo Pesamino ko honatou tofiʼa pea neʼe vaevae ʼi ʼonatou famili.