Tuʼi Fakamau
5 ʼI te ʼaho ʼaia, neʼe hiva e Tepola+ mo Palake,+ te foha ʼo Apinoame ia te hiva ʼaeni:+
2 “Kotou vikiʼi ia Sehova,
Koteʼuhi neʼe tuku mafola e te kau tagata tau ʼonatou lauʼulu* ʼi Iselaele,
Koteʼuhi ʼe foaki e te hahaʼi ia natou totonu ʼaki he lotolelei!+
3 ʼU hau, kotou fakalogo mai! Kau takitaki, kotou fakalogo mai!
ʼE au hiva anai kia Sehova.
ʼE au hiva anai he ʼu fakavikiviki* kia Sehova,+ te ʼAtua ʼo Iselaele.+
4 Sehova e, ʼi te temi ʼae neʼe ke haʼu ai mai Seili,+
ʼI te temi ʼae neʼe ke mavae ai mai te fenua ʼo Etome,
Neʼe galulu te kele pea neʼe to ifo he ʼua mai te lagi,
ʼEi, neʼe mapeʼe ifo he ʼua.
5 Neʼe holo* te ʼu moʼuga ia muʼa ʼo Sehova,+
ʼEi, maʼia mo te Sinai, neʼe toe holo ia muʼa ʼo Sehova,+ te ʼAtua ʼo Iselaele.+
6 ʼI te temi ʼo Samika,+ te foha ʼo Anate,
ʼI te temi ʼo Saele,+ neʼe lavaki te ʼu ala lalahi.
Neʼe olo te hahaʼi faifagona ʼi te ʼu ala liliki.
7 Neʼe mole kei ʼi ai ni hahaʼi ʼi te ʼu kolo liliki ʼo Iselaele,
Neʼe mole kei ʼi ai ni hahaʼi ʼo kaku ki taku tuʼu ake, ia au ʼae ko Tepola,+
ʼEi, ʼo kaku ki taku tuʼu ake, ohage ko he faʼe ʼi Iselaele.+
8 Neʼe filifili e te hahaʼi honatou ʼu ʼatua foʼou.+
Neʼe hoko ai leva he tau ʼi te ʼu matapa ʼo te ʼu kolo.+
Neʼe mole maʼu he ʼu meʼa tali tau mo ni tao
Maʼa he kau solia ʼe toko 40 000 ʼi Iselaele.
9 ʼE nofo toku loto mo te kau pule solia ʼo Iselaele,+
Ia natou ʼae neʼe lotolelei ke olo mo te hahaʼi.+
Kotou vikiʼi ia Sehova!
10 Ko koutou ʼae ʼe heheka ʼi he ʼu asino lanu kula,
Mo koutou ʼae ʼe nonofo ʼi he ʼu tapi matalelei,
Pea mo koutou ʼae ʼe haʼele ʼi te ala,
Kotou fakakaukauʼi ia te faʼahi ʼaeni:
11 Neʼe logo te ʼu leʼo ʼo te ʼu tagata ʼae neʼe natou tufa te vai
ʼO ovi ki te ʼu koga meʼa ʼae ʼe ohu ai te vai.
Neʼe natou fakamatala ai te ʼu gaue faitotonu ʼa Sehova,
Te ʼu gaue faitotonu ʼa te hahaʼi ʼo te ʼu kolo liliki ʼi Iselaele.
Pea neʼe alu ai leva te hahaʼi ʼa Sehova ki te ʼu matapa ʼo te ʼu kolo.
12 Ke ke ʼala ake, ke ke ʼala ake, Tepola!+
Ke ke ʼala ake, ke ke ʼala ake, pea ke ke hiva!+
Ke ke tuʼu ake, Palake!+ Ke ke ʼave ʼau hahaʼi pilisoni, foha ʼo Apinoame!
13 Pea neʼe ʼomai ai ia natou ʼae neʼe hao ki te kau ʼaliki,
Neʼe haʼu kia au te hahaʼi ʼa Sehova ke natou tauʼi ia te kau malolohi.
14 Neʼe ʼomai mai Efalaimi ia natou ʼae neʼe hihifo ki te potu fenua laulelei.
Pesamino, ʼe natou mulimuli ia koe, ʼi te lotolotoiga ʼo ʼau solia.
Neʼe hihifo mai ia Makile+ te kau pule solia,
Pea neʼe hihifo mai ia Sepulone ia natou ʼae ʼe natou puke te toko ʼo te tagata ʼae ʼe ina fakahu he kau solia.*
15 Neʼe lagolago te kau pule ʼo Isakale kia Tepola,
Pea neʼe toe lagolago foki ia Palake+ kia Tepola ohage pe ko te lagolago ʼa Isakale kia ia.
Neʼe fekauʼi ke alu lalo ki te potu fenua laulelei.+
ʼI te telepi ʼo Lupeni, tokolahi neʼe lotolotolua.
16 He koʼe neʼe ke heka ohage ko he manu mo ʼana kavega ʼe lua ʼi tona tuʼa,
ʼO fakalogo te puhi fagufagu ʼa te kau tauhi ovi maʼa te faga ovi?+
Tokolahi ʼi te telepi ʼo Lupeni neʼe lotolotolua.
17 Neʼe nofo ia Kileate ʼi te tahi faʼahi ʼo te Solotane,+
Pea he koʼe neʼe nofo ovi pe ia Tane ki te ʼu vaka?+
18 Neʼe feala ke tuʼutamakiʼia te maʼuli ʼo te kau Sepulone, ʼei neʼe feala pe ke natou mamate.
19 Neʼe ʼomai ni hau ki Taanake, ʼo ovi ki te ʼu vai ʼo Mekito+
Pea neʼe natou tau.
Neʼe tau te ʼu hau ʼo Kanaane,+
Kae neʼe mole natou ʼave he siliva.+
20 Neʼe tau te ʼu fetuʼu mai te lagi,
Neʼe natou tauʼi ia Sisela, mai ʼonatou tuʼuʼaga.
21 Neʼe ʼave te ʼu fili ʼi te vai tafe* ʼo Kisone,+
Te vai tafe ʼae ʼe tafe talu mai te temi muʼa, ʼei te vai tafe ʼo Kisone.
Neʼe au malamalaki te kau malolohi!
22 Neʼe lele fakavilivili ʼana hosi
Pea neʼe logoaʼa ai tanatou lele.+
23 Neʼe ui e te ʼaselo ʼa Sehova: ‘Ke malaʼia ia Melosi,
ʼEi, ke malaʼia tana hahaʼi,
Koteʼuhi neʼe mole natou ʼomai ʼo tokoni kia Sehova,
ʼEi, ʼo tokoni kia Sehova mo ʼanatou tagata malolohi.’
24 Ko ia ʼae ʼe lahi age tona tapuakiʼi ʼi te hahaʼi fafine, ʼe ko Saele,+
Te ʼohoana ʼo Hepele,+ te tagata Kenite.
ʼEi, ʼe ko ia ʼae ʼe lahi age tona tapuakiʼi ʼi te hahaʼi fafine ʼae ʼe nonofo ʼi te ʼu fale la.
25 Neʼe kole age e Sisela he moʼi vai, pea neʼe ina foaki age he huʼa pipi.
Neʼe ina foaki age he huʼa pipi kua totoka ʼi he ipu lahi ʼe matalelei.+
26 Neʼe ina puke ʼi tona nima te faʼo ʼo te fale la,
Pea neʼe ina toʼo ʼi tona nima mataʼu te hamale ʼa te tagata tufuga.
Pea neʼe ina taʼi ia Sisela ʼaki tana hamale, ʼo mafaʼa ai tona ʼulu,
Neʼe ina tutuki te faʼo ʼo te fale la ki ʼona niania, ʼo ulu loloto ai.+
27 Neʼe toka ʼi ʼona muʼa ʼo mole kei gaugaue.
ʼEi, neʼe toka ʼi ʼona muʼa.
Neʼe mate ai pe ʼi te faʼahi ʼae neʼe toka ai.
28 Neʼe fakasiosio he fafine mai te matapa fakamalama,
Neʼe lama e te faʼe ʼa Sisela, mo feʼekeʼaki:
‘He koʼe ʼe tuai te haʼu ʼo tana saliote?
He koʼe ʼe heʼeki au logo ki te logoaʼa ʼo ʼana hosi?’+
29 Neʼe tali age e te ʼu fafine popoto ʼae neʼe kau ʼi ʼana fafine ʼaliki,
Pea neʼe feʼekeʼaki tuʼumaʼu te faʼe:
30 ‘ ʼE lagi natou lolotoga vaevae nei te ʼu koloa,
ʼO tahi ʼave e te tagata tau he taʼahine ʼe tahi, ʼei, he ʼu taʼahine ʼe lua,
Mo foaki kia Sisela he ʼu kie neʼe ta, ʼei, he ʼu kie neʼe ta,
Mo tui he teu fakailoga, mo he kie neʼe ta, mo he ʼu teu fakailoga ʼe lua
Ki te ʼu kia ʼo te kau tagata ʼae neʼe natou maʼu te ʼu koloa.’
31 Sehova e, ke mamate ʼou fili fuli!+
Kae ke hage ia natou ʼae ʼe ʼoʼofa kia te koe ko te laʼa ʼae ʼe hopo ake ʼi tona kololia.”
Pea neʼe maʼuli te fenua ʼi te tokalelei lolotoga taʼu ʼe 40.+