ʼUluaki Kolonito

9 ʼE mole au ʼateaina koa la? ʼE mole ko au koa la ko he apositolo? Neʼe mole koa la au sio kia Sesu totatou ʼAliki?+ ʼE mole ko koutou koa la te fua ʼo taku gaue ʼi te ʼAliki? 2 Kapau ki ʼihi ʼe mole ko au ko he apositolo, kae ʼe mahino papau ia ʼe ko au ko he apositolo kia koutou. Koteʼuhi ko koutou te fakailoga ʼae ʼe ina fakamoʼoni taku gaue fakaapositolo ʼi te ʼAliki.

3 Koʼeni taku tali kia natou ʼae ʼe natou fakamauʼi au: 4 ʼE mole matou maʼu koa la te fealagia* ʼae ke matou kakai pea mo iinu? 5 ʼE mole matou maʼu koa la te fealagia ʼae ke matou olo mo ʼomatou ʼohoana Kilisitiano,*+ ohage ko te toe ʼo te kau apositolo, mo te ʼu tehina ʼo te ʼAliki+ pea mo Sefasi?*+ 6 Peʼe gata pe koa kia au mo Palenapa+ ʼae ʼe maʼua ke ma gaue moʼo taupau ʼoma maʼuli? 7 Ko ai koa ʼae ʼe solia kae ʼe ina totogi tonu te ʼu meʼa ʼae ʼe ʼaoga kia ia ʼi tona temi solia? Ko ai koa ʼae ʼe ina to hana gaueʼaga vite kae ʼe mole ina kai ʼona fua?+ Peʼe ko ai koa ʼae ʼe ina tauhi he faga pipi kae ʼe mole ina inu te huʼa pipi ʼo te faga pipi ʼaia?

8 ʼE au fai koa te ʼu palalau ʼaia ʼo mulimuli ki te manatu fakatagata? Peʼe mole toe tohi koa la te ʼu meʼa ʼaia ʼi te Lao? 9 Koteʼuhi ʼe tohi ʼi te Lao ʼa Moisese: “ ʼE mole tonu ke ke fakamaʼu te gutu ʼo te vitulo moka ina malamalaki te fulumeto.”+ ʼE tuʼania koa te ʼAtua ʼo ʼuhiga mo te ʼu vitulo? 10 Pe neʼe mole ina ui koa la te faʼahi ʼaia ʼuhi ko tatou? ʼEi, neʼe tohi moʼoni te faʼahi ʼaia ʼuhi ko tatou, koteʼuhi ko te tagata ʼae ʼe ina fuli te kele pea mo te tagata ʼae ʼe ina haha te fulumeto, ʼe tonu ke nā fai ʼaki te ʼamanaki ʼae ʼe foaki age anai ʼonā vahe.

11 Kapau neʼe matou nunusi ia koutou he ʼu koloa fakalaumalie, pea ʼe kovi koa mo kapau ʼe matou utu mai ia koutou he tokoni fakasino?+ 12 Kapau ʼe maʼu e ʼihi tagata te fealagia ʼae ke natou kole atu te faʼahi ʼaia, ʼe feafeaʼi age la ia matou? Kae neʼe mole matou fakaʼaogaʼi te fealagia* ʼaia,+ pea ʼe matou ʼutakiʼi ia meʼa fuli ke ʼaua naʼa matou taʼofi te logo lelei ʼo ʼuhiga mo Kilisito.*+ 13 ʼE mole kotou iloʼi koa la ko te ʼu tagata ʼae ʼe natou fai te ʼu gaue taputapu ʼe foaki age ʼi te fale lotu tanatou meʼa kai, pea mo foaki age kia natou ʼae ʼe gaue tuʼumaʼu ʼi te ʼaletale he vahe mai te ʼaletale?+ 14 ʼE toe feia aipe, neʼe fakatotonu e te ʼAliki kia natou ʼae ʼe natou tala te logo lelei ke natou maʼu mai ai hanatou meʼa kai.+

15 Kae neʼe mole au fakaʼaogaʼi he fakatuʼutuʼu ʼi te ʼu fakatuʼutuʼu ʼaia.+ Pea neʼe mole au tohi te ʼu meʼa ʼaia ke kotou fai mai te ʼu faʼahi ʼaia kia au, he ʼe lelei age kia au ke au mate. ʼE mole au tuku anai ki he tahi ke ina toʼo te tupuʼaga ʼo taku fiameʼameʼa!+ 16 Kapau ʼe au tala te logo lelei ʼe mole ko he tupuʼaga ke au fiameʼameʼa ai, he ʼe ko he maʼua neʼe tuku mai. ʼEi, malaʼia kia au mo kapau ʼe mole au tala te logo lelei!+ 17 Kapau ʼe au fakahoko te gaue ʼaia mo he lotolelei, ʼe au maʼu ai he fakapale. Kae tatau aipe pe ʼe au fai fakakinau, kae ʼe au fai pe he ʼe ko te maʼua neʼe tuku mai.+ 18 Pea kotea toku fakapale? ʼE ko te foaki noa ia te logo lelei ʼae ʼe au fakaha, ʼo mole au fakaʼaogaʼi kovi ai te fealagia ʼae ʼe au maʼu ʼi taku fakamafola ia te logo lelei.

19 Koteʼuhi logo la ʼe au ʼateaina mai te hahaʼi fuli pe, kae neʼe au fakaliliu ia au totonu ko te kaugana ʼa te hahaʼi fuli pe, ke feala ai haku maʼu he tokolahi. 20 Ki te kau Sutea neʼe au liliu ohage ko he Sutea, ke feala ai haku maʼu he kau Sutea.+ Kia natou ʼae ʼe fakalogo ki te lao, neʼe au hage ko he tahi ʼe fakalogo ki te lao, logo la ʼe mole au fakalogo ki te lao, ke feala ai haku maʼu ia natou ʼae ʼe fakalogo ki te lao.+ 21 Kia natou ʼae ʼe mole fakalogo ki te lao neʼe au hage ko he tahi ʼe mole fakalogo ki te lao, logo la ʼe au mulimuli ki te lao ʼa te ʼAtua pea mo au fakalogo ki te lao ʼa Kilisito,+ ke feala ai haku maʼu ia natou ʼae ʼe mole fakalogo ki te lao. 22 Ki te kau vaivai, neʼe au liliu ʼo vaivai, ke feala ai haku maʼu te kau vaivai.+ Neʼe au liliu ko meʼa fuli maʼa te hahaʼi kehekehe, ke feala ai haku haofaki ʼihi ʼi he aluʼaga pe. 23 Kae ʼe au fai ia meʼa fuli ʼuhi ko te logo lelei, ke feala ai haku vaevae mo ʼihi.+

24 ʼE mole kotou iloʼi koa la, ʼi he lele, ʼe lele fuli te kau lele kae ʼe ko he tokotahi pe ʼae ʼe ina maʼu te fakapale? Kotou lele ke kotou maʼu te fakapale.+ 25 Ko natou fuli ʼae ʼe kau ki he fakataupiepie,* ʼe natou lolomi ia natou ʼi te ʼu faʼahi fuli. ʼE mahino ia, ʼe natou fai te faʼahi ʼaia ke natou maʼu te pale ʼae ka fefe,+ kae ʼe tou maʼu anai tatou te pale ʼae ʼe mole fefe.+ 26 Koia ʼe mole au hoko lele feia pe.+ Pea ʼe au faiga tafito ke ʼaua naʼa au hoko ta feia pe. 27 Kae ʼe au tuki palaʼi* toku sino+ pea mo au taki ohage ko he kaugana, naʼa ʼi hona aluʼaga pe, ʼe mole kei ʼofa te ʼAtua kia au hili taku faifakamafola ki ʼihi.