Senesi

34 Pea ko Tina, te taʼahine ʼa Lea pea mo Sakopo,+ neʼe ko tana agamahani ko te alu ki te ʼu taʼahine ʼo te fenua.+ 2 Pea neʼe sio ki ai ia Sekemi, te foha ʼo Amole, te tagata Hevi+ pea neʼe ko he pule ʼo te fenua. Ki muli age, neʼe ina toʼo ia ia pea neʼe ina fakaʼalikiʼi. 3 Pea neʼe manatu tuʼumaʼu pe ia kia Tina, te ʼofafine ʼo Sakopo. Neʼe manako ʼi te taʼahine pea neʼe ina fai he ʼu palalau fakaoloolo ki ai.* 4 Ki muli age, neʼe ui e Sekemi ki tana tamai ko Amole:+ “Alu ʼo kole te taʼahine ʼaia ke au ʼohoana mo ia.”

5 Neʼe logo ia Sakopo neʼe ina ʼulihi tona ʼofafine ko Tina, kae neʼe kei nonofo ʼona foha mo tana faga manu ʼi he koga meʼa lunaʼia. Koia, neʼe mole palalau ia Sakopo ki he tahi ʼo ʼuhiga mo te faʼahi ʼaia, ʼo kaku ki tanatou toe liliu mai. 6 Ki muli age, neʼe haʼu ia Amole, te tamai ʼa Sekemi ʼo palalau mo Sakopo. 7 Kae ʼi te temi pe ʼae neʼe logo ai ia te ʼu foha ʼo Sakopo ki te meʼa ʼae neʼe hoko, neʼe natou toe liliu mai tanatou nonofo ʼi te koga meʼa lunaʼia. Neʼe natou lotomamahi pea neʼe kovi ʼosi tonatou iita he neʼe fai e Sekemi he meʼa fakaufiufi ki Iselaele ʼi tana momoe mo te ʼofafine ʼo Sakopo,+ kae ʼe mole tonu ke fai he meʼa feia.+

8 Neʼe ui e Amole: “ ʼE manako toku foha ko Sekemi ʼi tou ʼofafine. Koia, fakalelei siʼou loto, ke ke foaki age ki ai tou ʼofafine ke ʼohoana mo ia, 9 pea ke tou feʼohoanaʼaki. Ke kotou foaki mai ʼokotou ʼofafine pea ke kotou toʼo ʼomatou ʼofafine.+ 10 ʼE feala anai hakotou nonofo mo matou pea mo feoloʼaki faʼitaliha ʼi te fenua. Kotou nonofo ʼi ai ʼo faikoloa pea mo totogi hokotou ʼu kele.” 11 Neʼe ui leva e Sekemi ki te tamai pea mo te ʼu tokolua ʼo Tina: “ ʼE au foaki atu anai te ʼu meʼa fuli ʼae ʼe kotou kole mai, ke tupu ai hakotou ʼoʼofa ia au. 12 Kotou kole mai he totogi ʼe lahi mo he meʼa ʼofa ke feala haku ʼohoana mo ia.+ ʼE au lotolelei anai ke au foaki atu te ʼu meʼa fuli ʼae ʼe kotou fakaha mai, kehe pe ke kotou foaki mai te taʼahine ke au ʼohoana mo ia.”

13 Pea neʼe fakatuʼutuʼu e te ʼu foha ʼo Sakopo ke natou kakaʼi ia Sekemi pea mo tana tamai ko Amole, he neʼe ina ʼulihi tonatou tokolua ko Tina. 14 Koia, neʼe natou tali age kia naua: “ ʼE mole feala ke matou foaki tomatou tokolua ki he tagata ʼe heʼeki silikosisio,*+ he ʼe ko he meʼa fakaufiufi anai kia matou. 15 ʼE hoki matou tali pe anai takolua kole mo kapau ʼe kolua hage ko matou pea mo silikosisioʼi te hahaʼi tagata fuli ʼae ia koutou.+ 16 ʼE matou foaki atu anai ʼomatou ʼofafine pea ʼe matou toʼo anai ʼokotou ʼofafine, pea ʼe matou nonofo anai mo koutou pea ʼe tou liliu anai ko he hahaʼi ʼe tahi. 17 Kae kapau ʼe mole kotou fakalogo mai ʼo mole kotou silikosisio, ʼe matou toʼo anai tomatou tokolua pea ʼe matou olo anai.”

18 Neʼe leleiʼia e Amole+ pea mo tona foha ko Sekemi+ ʼanatou palalau. 19 Neʼe fai atu aipe e te tama te meʼa ʼae neʼe natou kole age,+ he neʼe manako ʼi te ʼofafine ʼo Sakopo, pea neʼe ko ia ʼae neʼe lahi age tona fakaʼapaʼapaʼi ʼi te loto fale katoa ʼo tana tamai.

20 Koia, neʼe alu ai ia Amole mo tona foha ko Sekemi ki te matapa ʼo te kolo ʼo ui age ki te hahaʼi tagata ʼo tonā kolo:+ 21 “ ʼE loto e te ʼu tagata ʼaia ke natou maʼuli tokalelei mo tatou. Tou tuku ke natou nonofo ʼi te fenua ʼo faikoloa ai, he ʼe lahi feʼauga te fenua. ʼE feala anai ke tou ʼohoana mo ʼonatou ʼofafine pea ke tou foaki ʼotatou ʼofafine kia natou.+ 22 ʼE hoki tali pe anai e te ʼu tagata ʼaia ke nonofo mo tatou pea ke tou liliu ko he hahaʼi ʼe tahi, mo kapau ʼe silikosisioʼi te ʼu tagata fuli ʼae ʼi te lotolotoiga ʼo tatou, ohage pe ko natou.+ 23 Pea ʼe ʼa tatou leva ʼonatou koloa pea mo tanatou faga manu katoa. Koia, tou tali ke natou nonofo mo tatou.” 24 Ko natou fuli ʼae neʼe maʼopoʼopo ʼi te matapa ʼo te kolo neʼe natou fakalogo kia Amole mo tona foha ko Sekemi, pea neʼe silikosisioʼi te ʼu tagata fuli, ia natou fuli ʼae neʼe maʼopoʼopo ʼi te matapa ʼo te kolo.

25 Kae ʼi te tolu ʼaho, ʼi tanatou kei mamahi, ko Simeone mo Levi, te ʼu foha ʼe lua ʼo Sakopo pea ko te ʼu tokolua ʼo Tina,+ neʼe nā tahi toʼo tana heleta. Pea neʼe nā hu ki te kolo kae neʼe mole tokagaʼi naua e he tahi, ʼo nā matematehi ai te ʼu tagata fuli.+ 26 Neʼe nā matehi ia Amole mo tona foha ko Sekemi ʼaki te heleta, pea neʼe nā toʼo leva ia Tina ʼi te fale ʼo Sekemi ʼo natou olo ai. 27 Neʼe ʼomai te tahi ʼu foha ʼo Sakopo pea neʼe natou sisio ki te kua mamate ʼa te ʼu tagata. Pea neʼe natou toʼo leva te ʼu koloa ʼo te kolo, he neʼe ʼulihi tonatou tokolua.+ 28 Neʼe natou toʼo ai tanatou faga ovi, mo tanatou faga pipi, mo ʼanatou asino pea mo te ʼu meʼa fuli ʼae neʼe ʼi te kolo pea mo te tuʼa kolo. 29 Neʼe natou toe toʼo foki mo ʼonatou koloa fuli, mo ʼave ʼanatou tamaliki fuli mo ʼonatou ʼohoana, pea neʼe natou toʼo te ʼu meʼa fuli ʼae neʼe ʼi ʼonatou loto fale.

30 Pea neʼe ui e Sakopo kia Simeone mo Levi:+ “Kua lahi ʼaupito te mamahi ʼae neʼe kolua fakatupu mai kia au ʼi takolua fakaliliu au ko he tahi ʼe fehiʼaʼinaʼi e te hahaʼi ʼo te fenua, ia te kau Kanaane mo te kau Pelesite. ʼE mole tou hahaʼi pea ʼe mahino papau ia, ʼe natou fakatahitahi anai ke natou ʼohofi au pea mo matehi ia au mo toku famili.” 31 Kae neʼe nā tali age: “Neʼe tonu koa ke gaohi tomatou tokolua ohage ko he fafine paomutu?”