Sopo
40 Neʼe hoko atu e Sehova tana tali kia Sopo:
2 “Ko ia ʼae ʼe valoki, ʼe tonu koa ke ina tauʼi te Mafimafi?+
Ke tali e ia ʼae ʼe ina fia fakatonutonuʼi te ʼAtua.”+
3 Neʼe tali e Sopo kia Sehova:
4 “Koʼeni, ko au ko te meʼa noa.+
Kotea he meʼa ke au tali atu?
ʼE mole au gu anai.+
5 Neʼe au palalau tuʼa tahi, kae ʼe mole au toe tali anai,
Tuʼa lua, kae ʼe mole au toe palalau anai.”
6 Pea neʼe tali leva e Sehova kia Sopo ʼi te tuʼani matagi:+
7 “Fakalelei siʼou loto, ke ke teuteu ohage ko he tagata malohi,
ʼE au fakafehuʼi anai koe pea ʼe ke fakamahino mai.+
8 ʼE ke fakafihiʼi* anai koa taku faitotonu?
ʼE ke tukugakoviʼi anai koa ia au ke tupu ai hau ui ʼe ke tonu?+
9 ʼE malohi koa tou nima ohage ko te nima ʼo te ʼAtua moʼoni?+
ʼE gugulu koa tou leʼo ohage ko tona leʼo?+
10 Fakalelei siʼou loto, ke ke teuteuʼi ia koe ʼaki te kololia mo te ʼalikisia,
Ke ke kofuʼi te maʼuhiga pea mo te taulekaleka.
11 Tuku ke hoko tou hauhau,
Sio ki te tagata fialahi fuli mo ke fakamalaloʼi ia ia.
12 Sio ki te tagata fialahi fuli mo ke fakalainoaʼi ia ia,
Pea ke molomoloki te kau agakovi ʼi te ʼu potu ʼae ʼe nonofo ai.
13 Fufu ia natou fuli ʼi te efu,
Seiniʼi natou ʼi te potu ʼae ʼe ʼū.
14 Pea ʼe au fakamoʼoni anai mo au,*
ʼE feala ke haofaki koe e tou nima mataʼu.
15 Koʼeni leva ia Pehemote,* ʼae neʼe au fakatupu ohage pe ko taku fakatupu ia koe.
ʼE ina kai te luna ohage pe ko te vitulo.
16 Sio ki te malohi ʼo ʼona vaʼe,
Mo te malohi ʼo te ʼu ivi ʼo tona fatu!
17 ʼE ina fakafefeka tona hiku ohage ko he fuʼu sete,
Pea ʼe feuluʼaki te ʼu ivi ʼi ʼona alaga.
18 ʼE hage ʼona hui ko ni pou kapa,
Pea ʼe hage ʼona koga sino ko ni potu ukamea.
19 ʼE ko ia te ʼuluaki* ʼi te ʼu gaue ʼa te ʼAtua.
Ko Ia tokotahi pe ʼae neʼe ina fakatupu ʼe feala ke fakaovi ki ai mo tana heleta.
20 ʼE maʼu ʼi te ʼu moʼuga he meʼa kai maʼa ia,
Pea ʼe gaoʼi fuli ai te ʼu manu ʼo te vao.
21 ʼE takoto ia ʼi te ʼu lalo fuʼu lotusi,
ʼI te malumalu ʼo te ʼulu kaho ʼi te ʼu foʼi vai.
22 ʼE fakamalumalu ia ia e te ʼu fuʼu lotusi,
Pea ʼe ʼa takai ia ia e te ʼu fuʼu sole ʼae ʼi te vai tafe.*
23 ʼE mole mataku ia moka hou te vai tafe.
ʼE fimalie pe ia, tatau aipe pe ʼe tatafe malohi te Solotane+ ki tona fofoga.
24 ʼE feala koa ki he tahi ke ina puke kae ʼe ina sioʼi?
ʼE feala koa ki he tahi ke ina pūhi tona ihu ʼaki he mātaʼu?