Selemia

28 Koʼeni te meʼa ʼae neʼe hoko ʼi te taʼu ʼaia, ʼi te temi ʼae neʼe kamata pule ai te Hau ʼo Suta ko Setesiasi.+ Ko te nima mahina ʼaia ʼo te fa taʼu ʼo tana pule. Neʼe ui e te polofeta ko Hanania, foha ʼo Asuli mai Kipeone+ kia Selemia kae neʼe natou ʼi te fale lotu ʼo Sehova mo te ʼu pelepitelo pea mo te hahaʼi katoa: 2 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘ ʼE au fakagata anai te pule ʼa te hau ʼo Papiloni.+ 3 ʼI muʼa ʼo te hili ʼo taʼu ʼe lua, ʼe au toe ʼaumai anai ki te koga meʼa ʼaeni te ʼu meʼa gaue fuli ʼae ʼe fai ʼaki te tauhi ʼi te fale ʼo Sehova ʼae neʼe toʼo e te Hau ʼo Papiloni ko Nepukanesa ʼi te koga meʼa ʼaeni ʼo ʼave ki Papiloni.’ ”+ 4 “ ‘ ʼE au toe ʼaumai anai ki te koga meʼa ʼaeni ia Sekoniasi,+ foha ʼo Soakimi,+ te hau ʼo Suta mo te kau Sutea fuli ʼae neʼe ʼave popula ki Papiloni,+ he ʼe au fakagata anai te pule ʼa te hau ʼo Papiloni,’ ko te ui ʼaia ʼa Sehova.”

5 Neʼe tali leva e te polofeta ko Selemia ki te polofeta ko Hanania ia muʼa ʼo te kau pelepitelo pea mo te hahaʼi katoa ʼae neʼe ʼi te fale lotu ʼo Sehova. 6 Neʼe ui e te polofeta ko Selemia: “Ameni!* Ke fakahoko e Sehova! ʼEi, ke fakahoko e Sehova te meʼa ʼae neʼe ke fakakikite, ʼo toe fakaliliu mai ki te koga meʼa ʼaeni te ʼu meʼa gaue ʼae ʼe fai ʼaki te tauhi ʼi te fale ʼo Sehova mo natou fuli ʼae ʼe maʼuli popula ʼi Papiloni. 7 Kae fakalelei siʼou loto, fagono ki te logo ʼaeni ka au fakaha atu kia koe mo te hahaʼi katoa. 8 Talu mai fualoa, neʼe faifakakikite te ʼu polofeta ʼae neʼe muʼamuʼa ia koe mo au ʼo ʼuhiga mo ni fenua kaugamalie pea mo ni puleʼaga lalahi. Neʼe natou tala ʼe hoko anai ni tau, mo ni malaʼia pea mo ni taʼi mahaki.* 9 Koia kapau ʼe fakaha e he polofeta ʼe ʼi ai anai te tokalelei, ʼe hoki iloʼi anai ko te polofeta neʼe fekauʼi tonu e Sehova moka ʼe hoko tana lea fakapolofeta.”

10 Neʼe toʼo leva e te polofeta ko Hanania te ʼakau ʼamo ʼae neʼe hili ʼi te kia ʼo te polofeta ko Selemia ʼo fasiʼi.+ 11 Pea neʼe ui e Hanania ia muʼa ʼo te hahaʼi katoa: “Koʼeni te folafola ʼa Sehova: ‘ ʼI muʼa ʼo te hili ʼo taʼu ʼe lua, ʼe au fasiʼi feia anai te ʼakau ʼamo ʼae neʼe hili e te Hau ʼo Papiloni ko Nepukanesa ki te ʼu puleʼaga fuli.’ ”+ Pea neʼe mavae leva te polofeta ko Selemia.

12 Hili leva te fasiʼi e te polofeta ko Hanania te ʼakau ʼamo ʼae neʼe hili ʼi te kia ʼo te polofeta ko Selemia, neʼe ui e Sehova te logo ʼaeni kia Selemia: 13 “Alu ʼo ui age kia Hanania: ‘Koʼeni te folafola ʼa Sehova: “Neʼe ke fasiʼi he ʼu ʼamo ʼakau,+ pea ʼe ke fai anai ni ʼamo ukamea moʼo fetogi ʼaki.” 14 Koʼeni te folafola ʼa Sehova ʼo te ʼatu kautau, te ʼAtua ʼo Iselaele: “ ʼE au hili anai ki te ʼu puleʼaga fuli te ʼamo ukamea ke natou tauhi ai ki te Hau ʼo Papiloni ko Nepukanesa. ʼE fakamaʼua anai ke natou tauhi kia ia.+ Pea ʼe au toe foaki anai kia ia te ʼu manu ʼo te vao.” ’ ”+

15 Neʼe ui leva e te polofeta ko Selemia ki te polofeta ko Hanania:+ “Fakalelei siʼou loto Hanania, ke ke fakalogo! Neʼe mole fekauʼi koe e Sehova kae neʼe ke uga te hahaʼi ke tui ki tau loi.+ 16 Koʼeni te folafola ʼa Sehova: ‘Fakalogo! ʼE au pulihi anai koe ʼi te kele. ʼE ke mate anai ʼi te taʼu ʼaeni koteʼuhi neʼe ke uga te hahaʼi ke agatuʼu kia Sehova.’ ”+

17 Pea neʼe mate leva te polofeta ko Hanania ʼi te taʼu ʼaia, ʼi te fitu mahina.