Selemia

29 Koʼeni te tohi ʼae neʼe momoli e te polofeta ko Selemia mai Selusalemi ki te kau takitaki ʼae neʼe maʼuʼuli popula, mo te kau pelepitelo, mo te kau polofeta pea mo te hahaʼi katoa ʼae neʼe ʼave popula e Nepukanesa mai Selusalemi ki Papiloni. 2 Neʼe ina momoli kae neʼe kua mavae mai Selusalemi te Hau ko Sekoniasi+ pea mo tana faʼe,+ mo te kau faifekau ʼo te fale hau, mo te ʼu tama ʼaliki ʼo Suta pea mo Selusalemi, mo te kau tufuga pea mo te kau tufuga ukamea.*+ 3 Neʼe ina fakatoʼo te tohi ʼaia kia Elasa, foha ʼo Safani+ pea mo Kemalia, foha ʼo Ilekisa. ʼEi, neʼe fekauʼi e te Hau ʼo Suta ko Setesiasi+ ia te ʼu tagata ʼaia ʼe lua ke olo ki Papiloni ki te Hau ʼo Papiloni ko Nepukanesa. Neʼe ui ʼi te tohi:

4 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele ki te hahaʼi fuli ʼae neʼe ina ʼave popula mai Selusalemi ki Papiloni: 5 ‘Kotou laga ni fale pea kotou nofoʼi. Kotou to ni ʼoloto pea kotou kai ʼona fua. 6 Kotou ʼohoana pea kotou maʼu ni foha mo ni ʼofafine. Kotou fakaʼohoanaʼi ʼokotou foha pea kotou fakaʼohoanaʼi ʼokotou ʼofafine ke natou toe maʼu mo natou ni tama mo ni taʼahine. Kotou liliu ʼo kaugamalie ʼi te fenua ʼae ʼe kotou nonofo ai pea ʼaua naʼa kotou tokosiʼi. 7 Kotou tokoni ki te tokalelei ʼo te kolo ʼae neʼe au ʼave popula koutou ki ai pea kotou faikole kia Sehova ʼo ʼuhiga mo te kolo ʼaia, koteʼuhi kapau ʼe tokalelei pea ʼe kotou toe maʼuli tokalelei anai.+ 8 ʼEi, koʼeni te folafola ʼa Sehova ʼo te ʼatu kautau, te ʼAtua ʼo Iselaele: “ ʼAua naʼa fakahalaʼi koutou e ʼakotou polofeta mo ʼakotou hahaʼi faifakakikite fakatemonio,+ pea ʼaua naʼa kotou fakalogo ki te ʼu moemisi ʼae ʼe natou fakamatala atu. 9 ‘Ko te ʼu fakakikite ʼae ʼe natou fai atu ʼi toku huafa ko ni loi. Neʼe mole au fekauʼi atu ia natou,’+ ko te ui ʼaia ʼa Sehova.” ’ ”

10 “Koʼeni te folafola ʼa Sehova: ‘Ka hili anai te ʼu taʼu ʼe 70 ʼi Papiloni, ʼe au manatuʼi anai koutou+ pea ʼe au fakahoko anai taku fakapapau ʼae ʼe au toe ʼaumai anai koutou ki te koga meʼa ʼaeni.’+

11 “ ʼE ui e Sehova: ‘ ʼE au iloʼi lelei ia taku fakatuʼutuʼu ʼo ʼuhiga mo koutou. ʼE au fia foaki atu ia te tokalelei kae mole ko te malaʼia.+ ʼE au fia foaki atu ia he ka haʼu mo he ʼamanaki.+ 12 ʼE kotou pauʼi mai anai, mo faikole mai pea ʼe au fagono atu anai.’+

13 “ ‘ ʼE kotou kumi anai au ʼo kotou maʼu au+ koteʼuhi ʼe kotou kumi anai au ʼaki tokotou loto katoa.+ 14 ʼEi, ʼe au tuku anai ke kotou maʼu au,’+ ko te ui ʼaia ʼa Sehova. ‘ ʼE au fakatahiʼi anai ia koutou ʼae ʼe nofo popula, ʼei, ʼe au fakatahiʼi mo toe fakaliliu mai anai koutou mai te ʼu puleʼaga fuli pea mo te ʼu koga meʼa fuli ʼae neʼe au fakamavetevete koutou ki ai,’+ ko te ui ʼaia ʼa Sehova. ‘ ʼEi, ʼe au toe ʼaumai anai koutou ki te koga meʼa ʼae neʼe au toʼo koutou mai ai ʼo ʼave popula.’+

15 “Kae neʼe kotou ui: ‘Neʼe foaki mai e Sehova ni polofeta ʼi Papiloni.’

16 “Koʼeni te folafola ʼa Sehova ki te hau ʼae ʼe heka ʼi te hekaʼaga fakahau ʼo Tavite+ pea mo te hahaʼi fuli ʼae ʼe nonofo ʼi te kolo ʼaeni, ʼokotou tehina ʼae neʼe mole ʼave popula mo koutou: 17 ‘Koʼeni te folafola ʼa Sehova ʼo te ʼatu kautau: “ ʼE au ʼaumai anai kia natou ia te tau, mo te hoge pea mo te ʼu taʼi mahaki*+ pea ʼe au fakaliliu anai natou ke hage ko ni fiku kua pala* ʼe mole feala pe la tona kai.” ’+

18 “ ‘ ʼEi, ʼe au fakamamahiʼi anai natou ʼaki te tau,+ mo te hoge mo te ʼu taʼi mahaki, pea ʼe au fakaliliu anai natou ko he meʼa fakalialia ki te ʼu puleʼaga fuli ʼo te kele.+ ʼE talanoaʼi anai natou e te hahaʼi ʼi ʼanatou faitutuku, ʼi te ʼu puleʼaga fuli ʼae ʼe au fakamavetevete anai natou ki ai.+ ʼE punamaʼuli anai te hahaʼi moka sisio kia natou, ʼe natou fehihiʼa anai mo fakalainoaʼi natou.+ 19 Neʼe mole natou fakalogo ki ʼaku folafola ʼae neʼe au fakaha ʼaki ʼaku tagata faifekau, ia te kau polofeta, ʼae neʼe au fekauʼi liuliuga kia natou,’+ ko te ui ʼaia ʼa Sehova.

“ ‘Kae neʼe mole kotou fakalogo,’+ ko te ui ʼaia ʼa Sehova.

20 “Koia kotou fakalogo ki te folafola ʼa Sehova, ia koutou fuli ʼae neʼe au ʼave popula mai Selusalemi ki Papiloni. 21 Ko te ʼu fakakikite ʼae ʼe fai e Akapo, foha ʼo Kolasa pea mo Setesiasi, foha ʼo Maasesa ʼi toku huafa ʼe ko ni loi.+ Koia koʼeni te folafola ʼa Sehova ʼo te ʼatu kautau, te ʼAtua ʼo Iselaele ʼo ʼuhiga mo naua: ‘ ʼE au tuku anai naua ki te nima ʼo te Hau ʼo Papiloni ko Nepukanesa pea ʼe ina matehi anai naua ʼi ʼokotou muʼa. 22 ʼE toe talanoaʼi anai te aluʼaga ʼae ka hoko kia naua ʼi te ʼu faitutuku ʼa te hahaʼi fuli ʼo Suta ʼae ʼe maʼuli popula ʼi Papiloni. ʼE ui anai e te hahaʼi: “Ke fakaliliu koe e Sehova ohage ko Setesiasi pea mo Akapo ʼae neʼe tutu e te hau ʼo Papiloni.” 23 ʼEi, neʼe nā fai he ʼu aga fakaufiufi ʼi Iselaele.+ Neʼe nā tono mo te ʼu ʼohoana ʼo ʼonā vahaʼa fale pea neʼe nā ui ʼe nā palalau ʼi toku huafa kae neʼe mole au fakatotonu age.+

“ ‘ “ ʼE au iloʼi te ʼu meʼa ʼae neʼe nā fai pea neʼe au sio ki ai,”+ ko te ui ʼaia ʼa Sehova.’ ”

24 “Pea ʼe ke ui anai kia Semaea+ mai Neselami: 25 ‘Koʼeni te folafola ʼa Sehova ʼo te ʼatu kautau, te ʼAtua ʼo Iselaele: “Neʼe ke momoli ʼi tou higoa ni tohi ki te hahaʼi katoa ʼo Selusalemi, mo Sofoni+ foha ʼo Maasesa, ia te pelepitelo pea mo te ʼu pelepitelo fuli. Neʼe ui ʼi te ʼu tohi ʼaia: 26 ‘Neʼe fakanofo koe e Sehova ko he pelepitelo moʼo fetogi te pelepitelo ko Seosata ke ke liliu ai ko te tagata taupau ʼo te fale ʼo Sehova. Koia kapau ʼe hage te aga ʼa he tagata vale ko he polofeta, ʼe ke tauteaʼi anai ia ia ʼo fakamaʼumaʼu ʼi ni lauʼi papa.+ 27 Koia he koʼe neʼe mole ke fakatonutonuʼi ia Selemia, te tagata mai Anatote+ ʼae ʼe hage tana aga ko he polofeta ʼi ʼokotou muʼa?+ 28 Neʼe ina momoli mai he tohi ki Papiloni ʼe ui ai: “ ʼE fualoa anai takotou nonofo popula! Kotou laga ni fale pea kotou nofoʼi. Kotou to ni ʼoloto pea kotou kai ʼona fua+ . . .” ’ ” ’ ”

29 ʼI te lau ʼae e te pelepitelo ko Sofoni+ te tohi ʼaia ia muʼa ʼo te polofeta ko Selemia, 30 neʼe palalau leva ia Sehova kia Selemia ʼo ina ui: 31 “Fakaha te logo ʼaeni kia natou fuli ʼae ʼe maʼuli popula: ‘Koʼeni te folafola ʼa Sehova ʼo ʼuhiga mo Semaea mai Neselami: “Neʼe faifakakikite atu ia Semaea kae neʼe mole au fekauʼi atu pea neʼe faiga ke kotou tui ki ni loi.+ 32 Koia koʼeni te folafola ʼa Sehova: ‘ ʼE au tauteaʼi anai ia Semaea mai Neselami mo tona hakoga. ʼE mole maʼuli anai he tagata ʼo tona famili ʼi te hahaʼi ʼaeni, pea ʼe mole sio anai ki te ʼu lelei ʼae ka au fakahoko ki taku hahaʼi,’ ko te ui ʼaia ʼa Sehova, ‘koteʼuhi neʼe ina uga te hahaʼi ke agatuʼu kia Sehova.’ ” ’ ”