Selemia
18 Koʼeni te ʼu folafola ʼa Sehova kia Selemia: 2 “Tuʼu ake pea ke hifo ki te tagata faʼu ipu kele,+ pea ʼe au fakaha atu anai ʼi ai ʼaku folafola.”
3 Neʼe au hifo ai ki te tagata faʼu ipu kele. Neʼe gaue ʼi tana meʼa faʼu ipu. 4 Kae neʼe maumau ʼi tona nima te ipu ʼae neʼe ina lolotoga faʼu ʼaki te kele. Pea neʼe ina toe kamata faʼu ʼaki pe te moʼi kele ʼaia he tahi ipu ohage pe ko te meʼa ʼae neʼe loto ki ai.
5 Neʼe toe palalau mai ia Sehova, ʼo ina ui: 6 “ ‘Hahaʼi ʼo Iselaele, ʼe mole feala koa la ke au fai kia koutou ia te meʼa ʼae neʼe fai e te tagata faʼu ipu ʼaeni?’ ko te fehuʼi ʼaia ʼa Sehova. ‘Koʼeni, siʼaku hahaʼi ko Iselaele, ʼe kotou hage kia au ko te kele ʼae ʼi te nima ʼo te tagata faʼu ipu.+ 7 Kapau ʼe au fakaha ʼe au taʼaki anai, mo tuʼusi pea mo maumauʼi ia he puleʼaga,+ 8 kae ʼe tuku e te puleʼaga ʼaia ia tana agakovi ʼae ʼe au valokiʼi, ʼe au fetogi anai taku manatu, ʼe mole au fakato anai te malaʼia ʼae neʼe au fakatuʼutuʼu ke au fakahoko ki ai.+ 9 Pea kapau ʼe au fakaha ʼe au laga anai mo fakatuʼu ia he puleʼaga, 10 kae ʼe fai e te puleʼaga ʼaia te meʼa ʼae ʼe kovi ki ʼoku mata pea mole fakalogo mai ia kia te au, ʼe fetogi anai taku manatu, ʼe mole au fai anai te lelei ʼae neʼe au fakatuʼutuʼu ke au fakahoko ki ai.’
11 “Fakalelei tou loto, ke ke ui ʼi te temi nei ki te ʼu tagata ʼo Suta mo te hahaʼi ʼo Selusalemi: ‘Koʼeni te folafola ʼa Sehova: “ ʼE au lolotoga teuteuʼi he malaʼia pea mo he fakatuʼutuʼu kia koutou. Fakalelei siʼokotou ʼu loto, kotou tafoki mai pea kotou liʼaki ʼakotou aga ʼae ʼe kovi. Kotou fakatonutonuʼi ʼakotou aga.” ’ ”+
12 Kae neʼe natou ui: “ ʼE mole hona ia ʼaoga,+ koteʼuhi ʼe matou mulimuli pe anai ki ʼamatou manatu pea ʼe matou tahi fai anai ʼo mulimuli ki te ʼu holi kovi ʼo ʼomatou loto.”+
13 Koia, koʼeni te folafola ʼa Sehova:
“Fakalelei ʼokotou loto, kotou fakafehuʼi te ʼu puleʼaga.
Neʼe kua hoko koa he meʼa feia?
Neʼe fai e te taʼahine taupoʼou ʼo Iselaele he aga fakalialia ʼaupito.+
14 ʼE puli anai koa te nive ʼo te Lipane* ʼi te ʼu maka ʼo ʼona mahifo?
Peʼe mamaha anai koa te ʼu vai tafe mokomoko ʼae ʼe haʼu mai mamaʼo?
15 Kae neʼe galoʼi au e taku hahaʼi.+
ʼE natou momoli ni sakilifisio ki he meʼa ʼe vaʼiganoa,+
Pea ʼe natou fakatukia te hahaʼi ʼae ʼe haʼele ʼi ʼonatou ala, ia te ʼu ala foufou ʼafeā,+
Ke olo ʼo haʼele ʼi ni kiʼi ala tokakovi.
16 Koia ʼe liliu anai tonatou fenua ʼo fakaʼofaʼofa.+
Pea ʼe sisio anai ki ai te hahaʼi mo he fehiʼa.+
Ko natou fuli ʼae ka fakalaka ʼi ai, ʼe natou fakalialia anai mo kalokalo ʼonatou ʼulu.+
17 ʼE au fakamavetevete anai natou ia muʼa ʼo tonatou fili ohage ko te matagi ʼo te potu esite.
Ka hoko mai te ʼaho ʼo tonatou malaʼia, ʼe au situʼa anai pea ʼe mole au sio anai kia natou.”+
18 Pea neʼe natou ui: “Kotou ʼomai ke tou fonofono ʼo ʼuhiga mo Selemia,+ he ʼe maʼu tuʼumaʼu anai te lao* e te kau pelepitelo, mo te tokoni e te kau poto, mo te folafola e te kau polofeta. Kotou ʼomai, tou palalau kovi ʼo ʼuhiga mo ia pea ʼaua naʼa tou tokagaʼi ʼana palalau.”
19 Sehova e, tokaga mai kia au,
Pea ke logo ki te meʼa ʼae ʼe ui e ʼoku fili.
20 ʼE tonu koa ke tauʼi te lelei ʼaki te kovi?
Neʼe natou keli he luo ke natou matehi au.+
Manatuʼi, ʼe au tuʼu ʼi ʼou muʼa ke au palalau lelei ʼo ʼuhiga mo natou
Ke mole to tou hauhau kia natou.
21 Koia, fakato te hoge ki ʼonatou foha
Pea ke natou mamate ʼi te heleta.+
Ke hala fanau ʼonatou ʼohoana pea ke natou liliu ʼo vitua.+
Ke mamate ʼanatou hahaʼi tagata ʼi he mahaki fakatupu mate,
Pea ke mamate ʼanatou tama tupulaga ʼi te heleta ʼi te tau.+
22 Ke logo he kalaga mai ʼonatou ʼapi,
ʼI tau fekauʼi fakafokifa kia natou ni tagata kaihaʼa.
Neʼe natou keli he luo ke au to ki ai
Pea neʼe natou fakatuʼu ni hele ki ʼoku vaʼe.+
23 Kae ko koe, Sehova e,
ʼE ke iloʼi lelei te ʼu fonofono fuli ʼae ʼe natou fai ke natou matehi au.+
ʼAua naʼa ke fakamolemole ʼanatou hala
Pea ʼaua naʼa ke molehi ʼanatou agahala.