Selemia

36 Neʼe palalau leva ia Sehova kia Selemia ʼi te fa taʼu+ ʼo te temi pule ʼo Soakimi foha ʼo Sosiasi, hau ʼo Suta ʼo ui: 2 “Toʼo ia he takaiga tohi. ʼE ke tohi anai ʼi ai ia te ʼu meʼa fuli ʼae neʼe au ui atu talu te ʼuluaki ʼaho ʼae neʼe au palalau atu ai ʼi te temi pule ʼo Sosiasi ʼo kaku mai ki te ʼaho nei. ʼEi, tohi te ʼu tautea fuli ʼae neʼe au fakaha ʼo ʼuhiga mo Iselaele, mo Suta pea mo te ʼu puleʼaga fuli.+ 3 Ka logo te hahaʼi ʼo Suta ki te malaʼia ʼae ʼe au fia fakahoko kia natou, ʼe lagi natou liʼaki anai ʼanatou aga ʼae ʼe kovi. Pea ʼe feala ai anai ke au fakamolemole ʼanatou hala mo ʼanatou agahala.”+

4 Neʼe pauʼi ai e Selemia ia Paluke+ foha ʼo Nelisa pea neʼe ina fakaha age ki ai te ʼu folafola fuli ʼae neʼe ui age e Sehova. Pea neʼe tohi e Paluke ki te takaiga tohi.+ 5 Neʼe fakatotonu age leva e Selemia kia Paluke: “Neʼe tapuʼi mai taku hu ki te fale lotu ʼo Sehova, 6 ko koe anai ʼae ka ke alu. ʼE ke lau leʼo lahi anai te ʼu folafola ʼa Sehova ʼae neʼe au fakaha atu pea neʼe ke tohi ki te takaiga tohi. Lau ki te hahaʼi ʼi te fale lotu ʼo Sehova ʼi he ʼaho ʼe natou sesunio ai pea ʼe logo anai te hahaʼi fuli ʼo Suta ʼae neʼe ʼomai mai ʼonatou kolo ki te meʼa ʼae ka ke lau. 7 ʼE lagi logo anai ia Sehova ki tanatou kole age tona ʼofa pea ʼe natou liʼaki fuli anai ʼanatou aga ʼae ʼe kovi he neʼe fakaha e Sehova kua lahi tona hauhau ki te hahaʼi ʼaia.”

8 Neʼe fai leva e Paluke foha ʼo Nelisa ia meʼa fuli ʼae neʼe fakatotonu age e te polofeta ko Selemia. Neʼe alu ai ki te fale lotu ʼo Sehova ʼo lau leʼo lahi ia te ʼu folafola ʼa Sehova ʼae ʼi te takaiga tohi.+

9 ʼI te mahina hiva ʼi te nima taʼu ʼo te temi pule ʼo Soakimi+ foha ʼo Sosiasi hau ʼo Suta, neʼe sesunio ai ia muʼa ʼo Sehova ia te hahaʼi fuli ʼo Selusalemi, mo te hahaʼi ʼo te ʼu kolo ʼo Suta ʼae neʼe ʼomai ki Selusalemi.+ 10 Neʼe alu ai ia Paluke ki te fale lotu ʼo Sehova ki te koga fale* ʼo Kemalia+ foha ʼo te sikalaipe* ko Safani,+ ʼi te malaʼe ʼae ʼe maʼoluga age, ʼe ovi ki te huʼaga ʼo te matapa foʼou ʼo te fale lotu ʼo Sehova. Pea neʼe ina lau leʼo lahi ia muʼa ʼo te hahaʼi katoa te ʼu folafola ʼa Selemia ʼae ʼe tuʼu ʼi te takaiga tohi.+

11 ʼI te logo ʼa Mikaia foha ʼo Kemalia, foha ʼo Safani ki te ʼu folafola fuli ʼa Sehova ʼae ʼi te takaiga tohi, 12 neʼe hifo ai ki te fale hau ʼo hu ki te koga fale ʼo te sikalaipe. Neʼe heheka fuli ai te ʼu tama ʼaliki: te sikalaipe ko Elisama,+ mo Telaia foha ʼo Semaea, mo Elenatane+ foha ʼo Akepole,+ mo Kemalia foha ʼo Safani pea mo Setesiasi foha ʼo Hanania, pea mo te ʼu tama ʼaliki fuli ʼae. 13 Neʼe fakaha age leva e Mikaia kia natou ia te ʼu folafola fuli ʼae neʼe logo ki ai ʼi te temi ʼae neʼe lau ai e Paluke ia te takaiga tohi ia muʼa ʼo te hahaʼi katoa.

14 Neʼe fekauʼi ai leva e te ʼu tama ʼaliki fuli ia Seutesi foha ʼo Netania, foha ʼo Selemi, foha ʼo Kusi ke alu ʼo ui kia Paluke: “Toʼo te takaiga tohi ʼae neʼe ke lau ia muʼa ʼo te hahaʼi katoa pea ke haʼu.” Neʼe toʼo ai e Paluke foha ʼo Nelisa te takaiga tohi ʼo alu kia natou. 15 Neʼe natou ui age ki ai: “Fakalelei siʼou loto kae ke heka muʼa pea ke lau leʼo lahi mai ia te takaiga tohi.” Pea neʼe lau ai e Paluke.

16 ʼI tanatou logo ki te ʼu folafola fuli, neʼe natou fesioʼaki ai mo matataku, ʼo natou ui ai kia Paluke: “ ʼE tonu ke tou fakaha te ʼu folafola fuli ʼaeni ki te hau.” 17 Pea neʼe natou fehuʼi kia Paluke: “Fakalelei siʼou loto kae ke fakaha mai. Neʼe ko Selemia ʼae neʼe ina ui atu ke ke tohi te ʼu folafola fuli ʼaeni?” 18 Neʼe tali age e Paluke kia natou: “ ʼEi, neʼe ko ia ʼae neʼe ina fakaha mai ia te ʼu folafola fuli ʼaeni pea neʼe au hiki ki te takaiga tohi ʼaki te vaitohi.” 19 Neʼe ui leva e te ʼu tama ʼaliki kia Paluke: “Kolua olo mo Selemia ʼo fenonoʼi pea ʼaua naʼa kolua fakaha ki he tahi ia tokolua nonoʼaga.”+

20 Neʼe natou tuku leva ia te takaiga tohi ʼi te koga fale ʼo te sikalaipe ko Elisama pea natou olo kia muʼa ʼo te hau ʼi te malaʼe, ʼo fakaha ia te ʼu meʼa fuli ʼae neʼe natou logo ki ai.

21 Pea neʼe fekauʼi ai e te hau ia Seutesi+ ke alu ʼo kumi mai te takaiga tohi. ʼI tana ʼosi toʼo ia te takaiga tohi ʼi te koga fale ʼo te sikalaipe ko Elisama, neʼe ina lau ia muʼa ʼo te hau pea mo te ʼu tama ʼaliki fuli ʼae neʼe tutuʼu ovi ki te hau. 22 Neʼe ko te hiva mahina* ʼaia pea neʼe nofo te hau ʼi ʼona koga fale ʼo te temi momoko. Neʼe ulo te afi ʼi ʼona muʼa ʼi te tutuʼaga afi. 23 ʼI te ʼosi lau e Seutesi ni ʼatu ʼe tolu peʼe fa, neʼe tuʼusi e te hau ia te koga ʼaia ʼaki te hele ʼa te sikalaipe, ʼo ina li ki te afi ʼi te tutuʼaga afi pea neʼe ina fai feia ʼo kaku ki te vela katoa ʼo te takaiga tohi ʼi te tutuʼaga afi. 24 Neʼe mole tuʼania pe la e te hau mo ʼana tagata faifekau ʼi tanatou logo ki te ʼu folafola fuli ʼaia. Pea neʼe mole hae pe la e he tahi ʼona mutuʼi meʼa. 25 Neʼe kole mamahi ai e Elenatane,+ mo Telaia+ pea mo Kemalia+ ki te hau ke ʼaua tana tutu ia te takaiga tohi, kae neʼe mole fia fakalogo ia. 26 Neʼe fakatotonu leva e te hau kia Selasemeele, foha ʼo te hau,* mo Selasa foha ʼo Aselieli, mo Selemi foha ʼo Apeteele ke olo ʼo puke ia te polofeta ko Selemia mo tana sikalaipe ko Paluke. Kae neʼe fakanono naua e Sehova.+

27 ʼI te ʼosi tutu e te hau ia te takaiga tohi ʼae neʼe tuʼu ai te ʼu folafola ʼae neʼe fakaha e Selemia kia Paluke, neʼe toe palalau ia Sehova kia Selemia+ ʼo ui: 28 “Toʼo he tahi takaiga tohi pea ke tohi ki ai ia te ʼu folafola fuli ʼae neʼe tuʼu ʼi te ʼuluaki takaiga tohi, ʼae neʼe tutu e te Hau ʼo Suta ko Soakimi.+ 29 Pea ʼe ke ui anai ʼo ʼuhiga mo te Hau ʼo Suta ko Soakimi: ‘Koʼeni te folafola ʼa Sehova: “Neʼe ke tutu te takaiga tohi ʼaia pea neʼe ke fehuʼi: ‘He koʼe neʼe ke tohi ʼe haʼu anai te hau ʼo Papiloni ʼo maumauʼi te fenua ʼaeni pea ʼe mole ina tuku anai ke maʼuli ʼi ai he tagata peʼe ko he manu?’+ 30 Koia koʼeni te folafola ʼa Sehova ʼo ʼuhiga mo te Hau ʼo Suta ko Soakimi: ‘ ʼE mole he tahi ʼi tona hakoga ʼe heka anai ʼi te hekaʼaga fakahau ʼo Tavite.+ Pea ʼe tuku anai tona sino mate ki te vevela ʼo te ʼaho mo te momoko ʼo te poʼuli.+ 31 ʼE au tauteaʼi anai ia ia, mo tona hakoga pea mo ʼana tagata faifekau ʼuhi ko ʼanatou hala. ʼE au fakahoko anai kia natou, mo te hahaʼi ʼo Selusalemi pea mo te hahaʼi tagata ʼo Suta ia te malaʼia katoa ʼae neʼe au fakaha ʼo ʼuhiga mo natou+ ʼuhi ko tanatou mole fakalogo.’ ” ’ ”+

32 Neʼe toʼo ai e Selemia he tahi takaiga tohi ʼo fakatoʼo ki te sikalaipe ko Paluke foha ʼo Nelisa.+ Pea neʼe fakaha age e Selemia ia te ʼu folafola fuli ʼae neʼe maʼu ʼi te takaiga tohi ʼae neʼe tutu e te Hau ʼo Suta ko Soakimi.+ Pea neʼe lahi te ʼu folafola neʼe tatau mo te ʼu folafola ʼaia neʼe hilifaki ki ai.