Selemia

35 Neʼe palalau leva ia Sehova kia Selemia ʼi te temi ʼae neʼe pule ai ia Soakimi+ foha ʼo Sosiasi, te hau ʼo Suta, ʼo ina ui: 2 “Alu ki te famili ʼo te kau Lekape+ ʼo palalau mo natou, pea ke ʼaumai ia natou ki he fale kai ʼi te fale ʼo Sehova. Pea ke foaki kia natou he vino.”

3 Neʼe au ʼaumai leva ia Saasania foha ʼo Selemia, ʼae ko te foha ʼo Apasinia, mo ʼona tehina, mo ʼona foha fuli, mo te famili katoa ʼo te kau Lekape, 4 ki te fale lotu ʼo Sehova. Neʼe au fakahu ia natou ki te fale kai ʼo te ʼu foha ʼo Hanane, ʼae ko te foha ʼo Siketalia, te tagata ʼa te ʼAtua moʼoni. Ko te fale kai ʼaia neʼe ovi ki te fale kai ʼo te kau tama ʼaliki, ʼae neʼe tuʼu ʼi ʼoluga ʼo te fale kai ʼo Maasesa foha ʼo Salume, te tagata leʼo matapa. 5 Pea neʼe au tuku he ʼu ipu fonu ko te vino kia muʼa ʼo te ʼu tagata ʼo te famili ʼo te kau Lekape. Pea neʼe au ui kia natou: “Kotou inu muʼa he moʼi vino.”

6 Kae neʼe natou tali mai: “ ʼE mole matou iinu anai ki he vino he neʼe fai mai te fakatotonu ʼaeni e tamatou kui ko Sonatape,+ foha ʼo Lekape: ‘ ʼE mole kotou iinu anai ʼi he ʼaho ki he vino, ia koutou pea mo ʼokotou foha. 7 ʼE mole tonu anai ke kotou laga ni fale peʼe nunusi he pulapula. ʼE mole tonu anai ke kotou to peʼe maʼu ni gaueʼaga vite. ʼE kotou nonofo tuʼumaʼu anai ʼi ni fale la. Kapau ʼe kotou fai feia, ʼe kotou maʼuʼuli fualoa anai ʼi te fenua ohage ni matapule.’ 8 ʼE hoko atu pe tamatou mulimuli ki te fakatotonu ʼae neʼe foaki mai e Sonatape, foha ʼo Lekape tamatou kui: ʼe mole matou iinu ʼi he ʼaho ki he vino, mo ʼomatou ʼohoana, mo ʼomatou foha pea mo ʼomatou ʼofafine. 9 ʼE mole matou laga ni fale moʼo nofoʼi. ʼE mole ni ʼamatou gaueʼaga vite, ni gaueʼaga, pea mo ni pulapula. 10 ʼE kei matou hoko atu pe tamatou nonofo ʼi ni fale la mo fakaʼapaʼapa ki te ʼu meʼa fuli ʼae neʼe fakatotonu mai e tamatou kui ko Sonatape. 11 Kae ʼi te haʼu ʼae ʼa te Hau ʼo Papiloni ko Nepukanesa ʼo tauʼi te fenua,+ neʼe matou ui: ‘ ʼOmai, tou olo ki Selusalemi ke tou hao mai te kautau ʼo te kau Kaletea mo te kau Silia.’ Pea talu mai ai, ʼe matou maʼuʼuli ʼi Selusalemi.”

12 Neʼe palalau leva ia Sehova kia Selemia, ʼo ina ui: 13 “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘Alu ʼo fakaha ki te ʼu tagata ʼo Suta mo te hahaʼi ʼo Selusalemi: “Neʼe mole au haga uga koa la koutou ke kotou fakalogo ki ʼaku folafola?”+ ko te ui ʼaia ʼa Sehova. 14 “Neʼe fai e Sonatape, foha ʼo Lekape te fakatotonu ki ʼona hakoga ke ʼaua naʼa natou inu he vino. Pea neʼe natou mulimuli ki te fakatotonu ʼaia. Ia ʼaho nei, ʼe kei hoko atu pe tanatou mole inu he vino. ʼE natou fakalogo ki te fakatotonu ʼo tanatou kui.+ Kae neʼe mole pe la kotou fia fakalogo ʼi taku palalau liuliuga atu.+ 15 Neʼe au fekauʼi tuʼumaʼu atu ʼaku polofeta fuli. Neʼe au fekauʼi liuliuga atu ia natou+ ke natou ui atu: ‘Fakalelei ʼokotou loto ia koutou fuli, kotou liʼaki ʼakotou aga ʼae ʼe kovi+ kae ke kotou fai te meʼa ʼae ʼe totonu. ʼAua naʼa kotou fakalogo ki ʼihi ʼatua mo tauhi kia natou. Kapau ʼe kotou fai feia, pea ʼe kotou haga nonofo anai ʼi te fenua ʼae neʼe au foaki atu kia koutou pea mo ʼakotou kui.’+ Kae neʼe mole pe la kotou tokagaʼi ʼaku folafola, neʼe mole pe la kotou fakalogo mai. 16 Neʼe fakalogo te ʼu hakoga ʼo Sonatape, foha ʼo Lekape ki te fakatotonu ʼo tanatou kui,+ kae ki taku hahaʼi neʼe mole pe la natou fakalogo mai.” ’ ”

17 “Koʼeni te folafola ʼa Sehova, te ʼAtua ʼo te ʼatu kautau, te ʼAtua ʼo Iselaele: ‘ ʼE au fakato anai ki Suta mo te hahaʼi fuli ʼo Selusalemi te malaʼia katoa ʼae neʼe kua au fakatokaga pe kia natou,+ he neʼe au palalau kia natou kae neʼe mole natou fia fakalogo mai. Neʼe au pauʼi tuʼumaʼu natou kae neʼe mole natou fia tali mai.’ ”+

18 Pea neʼe ui e Selemia ki te famili ʼo te kau Lekape. “Koʼeni te folafola ʼa Sehova ʼo te ʼatu kautau, te ʼAtua ʼo Iselaele: ‘Neʼe kotou fakalogo ki te fakatotonu ʼo takotou kui ko Sonatape pea ʼe kei hoko atu pe takotou fakaʼapaʼapa mo takotou fai ia meʼa fuli ʼo mulimuli pe ki tana fakatotonu atu. 19 Koia koʼeni te folafola ʼa Sehova ʼo te ʼatu kautau, te ʼAtua ʼo Iselaele: “ ʼE ʼi ai tuʼumaʼu pe anai he hakoga ʼo Sonatape, foha ʼo Lekape ke tauhi kia te au.” ’ ”