Pesalemo
Ki te pule ʼo te kau faimaholo. Mikitame* ʼa Tavite, ʼo mulimuli ki te fasi ʼo te hiva
“ ʼAua Naʼa Ke Maumauʼi.”
58 ʼE feala koa ke kotou palalau ʼo ʼuhiga mo te faitotonu kae ʼe kotou nonofo fakalogologo?+
ʼU foha ʼo te tagata, ʼe feala koa hakotou faifakamau ʼi te faitotonu?+
2 Kailoa ia, ʼe kotou fai ni fakatuʼutuʼu heʼe faitotonu ʼi ʼokotou loto,+
Pea ʼe kotou fakahoko te agamalohi ʼi te fenua.+
3 ʼE agakaka te kau agakovi talu mai tanatou tutupu.
ʼE natou agatuʼu, mo gutuloi talu mai te ʼaho ʼae neʼe natou tutupu ai.
4 ʼE hage tonatou kafokona ko te kafokona ʼo te gata.+
ʼE natou tuli ohage ko te gata ʼae ʼe ina pupunu ʼona taliga.
5 ʼE mole fakalogo anai ki te leʼo ʼo te ʼu tagata ʼae ʼe gaohi meʼa fakatemonio,
Logope la tonatou faiva ʼi te gaohi meʼa fakatemonio.
6 ʼAtua e, fasifasiʼi ʼonatou nifo!
Sehova e, maumauʼi te ʼu kaugao ʼo te ʼu laione ʼaia!
7 Ke natou pulinoa ohage ko te tafe ʼo te vai.
Ke teuteuʼi e te ʼAtua tana nahau pea ke ina fana natou ke natou fetoki ai.
8 Ke natou hage ko he esikalako kua vave mate,
Peʼe ko he kiʼi toe neʼe fanauʼi mai kua mate ʼe mole sio anai ki te laʼa.
9 ʼE ʼave anai e te ʼAtua te vaʼa ʼakau mata mo te vaʼa ʼakau ʼae ʼe ulo, ohage ko he afā,
Kae heʼeki mafana ʼakotou kulo ʼi te vela ʼo te ʼu ʼakau talatala.+
10 ʼE fiafia anai te tagata faitotonu he neʼe sio ki te lagavaka.+
ʼE maʼanu anai ʼona vaʼe ʼi te toto ʼo te kau agakovi.+
11 ʼE ui leva anai e ni tagata: “ ʼEi, ʼe ʼi ai te fakapale ʼo te kau faitotonu.+
ʼE mahino papau ia, ʼe ʼi ai te ʼAtua ʼe ina fakamauʼi te kele.”+