Pesalemo
Pesalemo ʼa Tavite.
141 Sehova e, ʼe au tagi atu ke ke tokoni mai.+
Haʼu fakavilivili ʼo haofaki au.+
Ke ke tokaga mai moka au pauʼi atu.+
2 Ke hage taku faikole ko te iseso+ ʼae ʼe teuteuʼi ʼi ʼou muʼa,+
Pea ke hage te hiki atu ʼo ʼoku nima ko te molaga meʼa kai ʼae ʼe momoli atu ʼi te afiafi.+
3 Sehova e, tokoni mai ke au lava puleʼi ʼaku palalau,
ʼEi, tokoni mai ke au tokaga ki ʼaku palalau ohage ko he tagata leʼo matapa.+
4 ʼAua naʼa ke tuku ke falele toku loto ki te ʼu meʼa ʼae ʼe kovi,+
Ke mole au fai ai ni meʼa fakalialia mo te ʼu tagata agakovi.
ʼE mole au fia kai anai ʼi he temi ki ʼanatou meʼa kai kano lelei.
5 ʼE ko he ʼofa agatonu anai mo kapau ʼe taʼi au e te tagata faitotonu,+
ʼE hage anai ko he lolo ʼi toku ʼulu mo kapau ʼe ina fakatonutonuʼi au,+
Pea ʼe mole au fakafisi tuʼa tahi anai ki ai.+
ʼE au haga faikole anai maʼa ia lolotoga ʼona malaʼia.
6 ʼE li ifo anai ʼonatou tuʼi fakamau mai te mata mato,
Kae ʼe tokagaʼi anai e te hahaʼi ʼaku palalau he ʼe lave lelei.
7 Neʼe mavetevete ʼomatou hui ʼo ovi ki te Faitoka,*
Ohage ko te gaueʼi mo te fakamalū ʼo te kele.
8 Kae Tuʼi ʼAliki ko Sehova, ʼe au haga atu kia te koe.+
ʼE au nono ia te koe.
ʼAua naʼa ke toʼo toku maʼuli.
9 Puipui au mai te hele ʼae neʼe natou fai kia au,
Mai te ʼu hele ʼa te kau agakovi.
10 ʼE maʼua fakatahi anai te kau agakovi fuli ʼi ʼanatou kupega,+
Kae ʼe au fakalaka anai au ʼi te fimalie.