Sopo
15 Neʼe tali e Elifasi+ te tagata Temane:
2 “ ʼE gali koa mo he tagata poto he tali vaʼiganoa?
ʼE ina fakafonu koa tona fatu ʼaki te matagi ʼo te potu esite?
3 ʼE mole he ʼaoga ʼo te fakatonutonuʼi ʼo he tahi ʼaki pe ni palalau,
Pea ʼe mole he ʼuhiga ʼo te tautalaga.
4 Kua puli te manavasiʼi ki te ʼAtua ʼuhi ko koe,
Pea ʼe ke meʼa noaʼi te metitasio* ki te ʼAtua.
5 ʼE ke palalau feia ʼuhi ko tau hala,
Pea ʼe ke fili ni palalau kaka.
6 ʼE mole ko au ʼae ʼe ina fakatuʼā ia koe, kae ʼe ko tou pe ia gutu,
ʼE ko tou gutu pe ʼae ʼe fakamoʼoni ki tau hala.+
7 ʼE ko koe koa te ʼuluaki tagata ʼae neʼe tupu?
Neʼe ke muʼa koa koe ʼi te ʼu kiʼi moʼuga?
8 ʼE ke fagono koa ki te ʼu fakatuʼutuʼu fakalilo ʼa te ʼAtua?
ʼE ko koe tokotahi pe koa ʼae ʼe poto?
9 Kotea ʼae ʼe ke iloʼi kae ʼe mole matou iloʼi?+
Kotea ʼae ʼe ke mahino ki ai kae ʼe mole matou mahino ki ai?
10 ʼE nonofo mo matou te kau ʼulu hina mo te kau matuʼa,+
Ni tagata kua matuʼatuʼa age ia ʼi tau tamai.
11 ʼE mole ke feʼaugaʼia koa koe te ʼu fakapelepele ʼa te ʼAtua?
Ko he ʼu palalau neʼe fai atu ʼaki te agamalū.
12 He koʼe koa ʼe ke tuku ke puleʼi koe e ʼau manatu?
Pea he koʼe koa ʼe ke matamamalu?
13 ʼE ke fakafeagai ki te ʼAtua totonu,
Pea ʼe haʼu mai tou gutu te ʼu taʼi palalau ʼaia.
14 ʼE feala koa ke maʼa te tagata ia muʼa ʼo te ʼAtua?
ʼE feala koa ke faitotonu he tahi neʼe tupu mai he fafine?+
15 Sio! ʼE mole falala pe la ia te ʼAtua ki tana kau ʼaselo,
Maʼiape la mo te lagi ʼe mole maʼa ki ʼona mata.+
16 Kae ʼe feafeaʼi age la ki he tahi ʼe aga fakalialia mo kaka,+
ʼAe ʼe fia fai ki te heʼe faitotonu ohage pe ko hana fia inu he moʼi vai?
17 Fakalogo mai ke au fakamahino atu tona tali!
ʼE au fakamatala atu anai te ʼu meʼa ʼae neʼe au sio ki ai,
18 Te ʼu meʼa ʼae neʼe mole fufu e te kau popoto,
Te ʼu meʼa ʼae neʼe natou maʼu mai ʼanatou tamai, pea neʼe natou fakamatala.+
19 Neʼe foaki ʼateaina pe te fenua kia natou,
Neʼe mole fakalaka he matapule ia natou.
20 ʼE kovi te mamahi ʼo te tagata agakovi ʼi te ʼaho fuli,
ʼE mamahi pe ia ʼi tona maʼuli katoa.
21 ʼE logo ia ki ni logoaʼa fakamataku,+
ʼI te temi tokalelei, ʼe ʼohofi ia e te kau kaihaʼa.
22 ʼE mole manatu ia ʼe hao anai mai te fakapoʼuli,+
He ʼe kua tuku keheʼi ia ke matehi ʼaki te heleta.
23 ʼE ina kumi ʼi he mo he hana meʼa kai:* ʼe maʼu koa ʼifea?
ʼE ina iloʼi lelei pe kua vave hoko mai te ʼaho ʼo te fakapoʼuli.
24 ʼE ina tuʼaniaʼi te lotomamahi mo te lotohoha,
ʼO mataku ai ohage ko te fakamataku ʼo he hau malohi ʼe laga tau.
25 ʼE ina hiki tona nima ʼo fakafeagai ki te ʼAtua totonu,
ʼE faiga ia ke fakatutuʼu ki* te Mafimafi.
26 ʼI tana uigataʼa, ʼe ʼoho ia kia te ia
Mo tana meʼa tali tau malohi mo matolu.
27 ʼE putaputa tona fofoga,
Mo foʼi sino ʼosi.
28 Koia ʼe nofo ʼi ni kolo ʼe maumauʼi anai,
ʼI ni ʼapi ʼe mole nofoʼi anai e he tahi,
Pea ʼe liliu anai ko ni tuʼuga maka.
29 ʼE mole koloaʼia anai, ʼe mole tuputupu ai tana paʼaga,
Pea ʼe mole lahi anai ʼona koloa ʼi te kele.
30 ʼE mole hao anai mai te fakapoʼuli.
ʼE moamoa anai tona huli* ʼuhi ko he uloʼi afi,
Pea ʼe mate anai ʼuhi ko te tuku manava ʼa te ʼAtua.+
31 ʼE mole tonu ia ke hehe mo falala ki ni meʼa ʼe vaʼiganoa,
He ʼe ko te meʼa ʼae ka ina maʼu moʼona fetogi ʼe vaʼiganoa anai.
32 Pea kua vave hoko pe ki ai te ʼu meʼa ʼaia,
ʼE mole fisi anai ʼona vaʼa ʼi he temi.+
33 ʼE hage anai ko he fuʼu vite ʼe maluku ʼona fua ʼae ʼe kei mumui,
Pea mo he fuʼu oliveto ʼe maʼofa ʼona matalaʼi ʼakau.
34 ʼE mole kei he fua ʼo te ʼu gaue ʼa te hahaʼi ʼae ʼe mole fakaʼapaʼapa ki te ʼAtua,*+
Pea ʼe vela anai te ʼu fale la ʼae neʼe fonu ai te ʼu meʼa ʼofa neʼe foaki fakakaka.
35 ʼE natou fakatuʼutuʼu te malaʼia mo fai tuʼumaʼu te meʼa ʼae ʼe kovi,
Pea ʼe haʼu te kaka mai ʼonatou loto.”