Tuʼi Fakamau

6 Kae neʼe toe fai pe e te kau Iselaele te meʼa ʼae ʼe kovi kia mata ʼo Sehova.+ Koia neʼe tuku ai e Sehova ia natou ki te ʼu nima ʼo te kau Matiane lolotoga taʼu ʼe fitu.+ 2 Neʼe malohi age te kau Matiane ʼi te kau Iselaele.+ Koia neʼe natou keli ai honatou ʼu nonoʼaga* ʼi te ʼu moʼuga, mo te ʼu ʼana pea mo te ʼu koga meʼa ʼae ʼe faigataʼa te kaku ki ai. Neʼe natou fai te faʼahi ʼaia ʼuhi ko te kau Matiane.+ 3 Ka nunusi e te kau Iselaele tanatou pulapula, neʼe ʼohofi natou e te kau Matiane, mo te kau Amaleke+ pea mo te Hahaʼi ʼo Te Potu Esite.+ 4 Neʼe natou fakatuʼu ʼonatou nofoʼaga ʼi te fenua ʼo Iselaele pea neʼe natou maumauʼi ʼanatou taʼukai ʼo kaku ki te ʼu tafaʼaki ʼo Kasa. Neʼe mole natou tuku he meʼa kai maʼa te kau Iselaele. Neʼe mole natou tuku hanatou ovi, peʼe ko hanatou vitulo, peʼe ko hanatou asino.+ 5 Koteʼuhi neʼe natou ʼomai mo tanatou faga manu pea mo ʼonatou fale la, pea neʼe natou kaugamalie ʼaupito ohage ko he ʼu heʼe.+ Neʼe mole feala ke lau tonatou kaugamalie, ʼo feia mo ʼanatou kamelo.+ Neʼe natou ʼomai ke natou maumauʼi te fenua. 6 Koia neʼe liliu ai ia Iselaele ʼo masiva ʼaupito ʼuhi ko te kau Matiane. Pea neʼe tagi leva te kau Iselaele kia Sehova ke tokoni age kia natou.+

7 Neʼe tagi ai te kau Iselaele kia Sehova ke tokoni kia natou ʼuhi ko te kau Matiane.+ 8 Pea neʼe fekauʼi leva e Sehova he polofeta ke alu ʼo ui age kia natou: “Koʼeni te meʼa ʼae ʼe ui e Sehova, te ʼAtua ʼo Iselaele: ‘Neʼe au fakamavae koutou mai te fenua ʼo Esipito, ʼae neʼe fakapopulaʼi ai koutou.*+ 9 Koia neʼe au haofaki ai koutou mai te ʼu nima ʼo te kau Esipito pea mo natou fuli ʼae neʼe natou gaohi koviʼi koutou. Neʼe au kapu ʼokotou fili ʼi tonatou fenua, pea neʼe au foaki atu kia koutou tonatou fenua.+ 10 Pea neʼe au ui atu: “ ʼE ko au ia Sehova, tokotou ʼAtua.+ ʼE mole tonu ke kotou manavasiʼi ki te ʼu ʼatua ʼo te kau Amole, ia koutou ʼae ʼe nonofo ʼi tonatou fenua.”+ Kae neʼe mole kotou fakalogo mai kia te au.’ ”*+

11 Ki muli age, neʼe alu te ʼaselo ʼa Sehova+ ʼo heka ʼi te lalo fuʼu ʼakau lahi ʼae neʼe tuʼu ʼi Ofala. Neʼe ko te fuʼu ʼakau ʼaia ʼo Soasi, te tagata Apiesele.+ Pea neʼe lolotoga haha e Seteone,+ te foha ʼo Soasi ia te fulumeto ʼi te lomiʼaga vite ke ʼū ʼi te kau Matiane naʼa sisio age. 12 Neʼe ha te ʼaselo ʼa Sehova ki ai, ʼo ina ui age: “Tagata tau malohi, ʼe nofo ia Sehova mo koe.”+ 13 Kae neʼe tali age e Seteone: “Siʼoku ʼaliki, fakalelei mai, kapau la ʼe nofo ia Sehova mo matou, he koʼe neʼe ina tuku ke hoko te ʼu meʼa fuli ʼaeni kia matou?+ Pea kofea ʼana gaue fakaofoofo fuli ʼae neʼe fakamatala mai e ʼamatou kui,+ ʼi tanatou ui: ‘Ko Sehova ʼae neʼe ina fakamavae matou mai Esipito’?+ Kua liʼaki matou e Sehova+ pea kua ina tuku matou ki te ʼu nima ʼo te kau Matiane.” 14 Neʼe haʼu ia Sehova ʼo haga ki ai, pea neʼe ina ui age: “Alu mo te malohi ʼae ʼe ke maʼu, pea ʼe ke haofaki anai ia Iselaele mai te ʼu nima ʼo te kau Matiane.+ ʼE ko au ʼae ʼe au fekauʼi ia koe!” 15 Neʼe tali age e Seteone: “Sehova, fakalelei mai. Kae ʼe au lava haofaki feafeaʼi anai ia Iselaele? Koʼeni, ʼe mole iloa toku famili* ʼi te telepi ʼo Manase, pea ʼe mole au maʼuhiga ʼi te famili ʼo taku tamai.” 16 Kae neʼe ui age e Sehova: “ ʼE au nofo anai mo koe,+ pea ʼe ke malo anai ʼi te kau Matiane ohage pe ko hau malo ʼi he tagata ʼe tahi.”

17 Pea neʼe ui age e Seteone: “Kapau ʼe ke ʼofa moʼoni ia au, pea ke ʼofa ʼo fakaha mai he fakailoga ʼe fakamoʼoni ai ʼe ko koe totonu ʼae ʼe palalau mai kia au. 18 Fakalelei siʼou loto, ke ke nofo ʼi heni ʼo kaku ki taku toe liliu mai ʼo tuku ki ʼou muʼa he meʼa ʼofa.”+ Pea neʼe ina tali age: “ ʼE au nofo anai ʼi heni ʼo kaku ki tau toe liliu mai.” 19 Pea neʼe alu ia Seteone ki tona ʼapi, ʼo teuteuʼi he tao kei mui, ʼo feia mo ni pane hala fakatupu neʼe ina fai ʼaki he efa* falena ʼe tahi.+ Neʼe ina ʼai te kanoʼi manu ki he kato pea mo tona huhuʼa ki he kulo. Neʼe ina ʼave leva te ʼu meʼa fuli ʼaia ʼo tuku ki ʼona muʼa ʼi te lalo fuʼu ʼakau lahi.

20 Pea neʼe ui leva e te ʼaselo ʼa te ʼAtua moʼoni: “Ke ke toʼo te kanoʼi manu ʼo feia mo te pane hala fakatupu pea ke hili ki te fuʼu maka lahi ʼaeni, pea ke huaʼi leva ki ai tona huhuʼa.” Pea neʼe fai leva e Seteone te faʼahi ʼaia. 21 Neʼe puke e te ʼaselo ʼa Sehova ia he ʼakau. Pea neʼe ina faoʼi leva tona nima, ʼo fakalave te muʼamuʼaʼi ʼakau ki te kanoʼi manu pea mo te pane hala fakatupu. Neʼe alu ake ai he afi mai te fuʼu maka ʼo vela ai te kanoʼi manu mo te pane hala fakatupu.+ Pea neʼe mole kei sio leva ia Seteone ki te ʼaselo ʼa Sehova he neʼe kua puli. 22 Neʼe mahino ai leva kia Seteone neʼe ko te ʼaselo ʼaia ʼa Sehova.+

Pea neʼe ui e Seteone: “Tuʼi ʼAliki ko Sehova, malaʼia kia au koteʼuhi neʼe au sio mata ki te ʼaselo ʼa Sehova.”*+ 23 Kae neʼe ui e Sehova: “Ke ke nofo ʼi te fimalie. ʼAua naʼa ke mataku,+ ʼe mole ke mate anai.” 24 Pea neʼe laga ai e Seteone he ʼaletale maʼa Sehova, pea ʼe kei higoa pe ko Sehova-salomi*+ ʼo kaku mai ki te ʼaho nei. ʼE kei tuʼu pe ʼi Ofala ʼo te kau Apiesele.

25 ʼI te po ʼaia, neʼe ui e Sehova kia ia: “Toʼo te vitulo ʼae ʼe kei mui ʼo tau tamai, ia te lua vitulo ʼae ʼe kei mui mo taʼu fitu. Ke ke maumauʼi te ʼaletale ʼo tau tamai, ʼae neʼe fai maʼa Paale, pea ke taʼaga te pou ʼakau taputapu* ʼae ʼe tuʼu ʼi ʼona tafa.+ 26 Ke ke fakatuʼuga ni maka ʼo fakaʼatuʼatu lelei ʼo ke laga he ʼaletale maʼa Sehova tou ʼAtua ʼi te tumutumu ʼo te moʼuga ʼaeni. Pea ʼe ke toʼo anai te lua vitulo ʼae ʼe kei mui, ʼo momoli ohage ko he holokoseta.* Pea ʼe ke fakaʼaogaʼi anai te pou ʼakau taputapu* ʼae ka ke taʼaga, ohage ko he fafie.” 27 Neʼe alu ai ia Seteone mo ʼana tagata faifekau ʼe toko hogofulu pea neʼe ina fai te meʼa ʼae neʼe ui age e Sehova. Kae neʼe mole ina fai te faʼahi ʼaia ʼi te ʼaho, koteʼuhi neʼe mataku ʼi te famili ʼo tana tamai pea mo te ʼu tagata ʼo te kolo. Koia neʼe ina fai ai ʼi te poʼuli.

28 ʼI te ʼaho ake, neʼe ʼaʼala ake te ʼu tagata ʼo te kolo kae kei hegihegi. Pea neʼe natou sisio ai kua maumauʼi te ʼaletale ʼo Paale, mo taʼaga te pou ʼakau taputapu* ʼae neʼe tuʼu ʼi ʼona tafa, pea kua momoli te lua vitulo ʼae ʼe kei mui ʼi te ʼaletale ʼae neʼe hoki laga. 29 Neʼe natou feuiʼaki: “Ko ai ʼae neʼe ina fai te faʼahi ʼaia?” ʼI tanatou ʼosi fai ʼanatou fekumi, neʼe natou ui: “ ʼE ko Seteone, te foha ʼo Soasi.” 30 Pea neʼe ui e te ʼu tagata ʼo te kolo kia Soasi: “ ʼAumai ki tuʼa tou foha ke matehi, he neʼe ina maumauʼi te ʼaletale ʼo Paale mo taʼaga te pou ʼakau taputapu* ʼae neʼe tuʼu ʼi ʼona tafa.” 31 Pea neʼe ui e Soasi+ kia natou fuli ʼae neʼe fia laga kē kia ia: “ ʼE ko koutou koa ʼae ʼe tonu ke ʼomai ʼo palalau moʼo haofaki ia Paale? ʼE ko koutou koa ʼae ʼe tonu ke kotou haofaki ia ia? Ke matehi ʼi te uhu nei ia ia ʼae ʼe haʼu ʼo palalau moʼo haofaki ia Paale.+ Kua maumauʼi tona ʼaletale, koia ke haʼu ia ia totonu ʼo palalau moʼo haofaki ia ia, mo kapau ʼe ko he ʼatua.”+ 32 Pea ʼi te ʼaho ʼaia, neʼe fakahigoaʼi e Soasi ia tona foha ko Selupaale,* he neʼe ina ui: “Ke haofaki e Paale ia ia totonu he neʼe ko tona ʼaletale ʼae neʼe maumauʼi.”

33 Neʼe fakatahiʼi e te kau Matiane fuli,+ mo te kau Amaleke+ pea mo te Hahaʼi ʼo Te Potu Esite ʼanatou solia.+ Neʼe natou fakalaka ai ʼi te vai tafe ʼo olo ki te Potu Fenua Laulelei ʼo Siseleele, pea neʼe natou fakatuʼu ʼi ai tonatou nofoʼaga. 34 Pea neʼe hifo te laumalie ʼo Sehova kia Seteone.+ Neʼe pupuhi leva e Seteone te fakatagi pupuhi+ pea neʼe ʼomai te kau Apiesele+ ʼo lagolago ki ai. 35 Neʼe ina fekauʼi he ʼu tagata ʼave logo ke olo ki te fenua katoa ʼo Manase, pea neʼe toe ʼomai te ʼu tagata ʼo te telepi ʼaia ʼo lagolago ki ai. Neʼe ina toe fekauʼi foki he ʼu tagata ʼave logo ke olo ki te ʼu fenua ʼo Asele, mo Sepulone pea mo Nefetali, pea neʼe ʼomai te ʼu tagata ʼo te ʼu telepi ʼaia ʼo fakafelaveʼi kia ia.

36 Pea neʼe ui e Seteone ki te ʼAtua moʼoni: “Kapau ʼe ke fia haofaki moʼoni ia Iselaele ʼaki ia au, ohage pe ko tau fakapapau,+ 37 koʼeni ʼe au folahi he kiliʼi ovi ʼi te hahaʼaga fulumeto. Kapau ko te kiliʼi ovi pe ʼae ʼe palapala ʼuhi ko te hahau, kae moamoa te kele ʼae ʼi ʼona tafaʼaki, pea ʼe au iloʼi ai anai ʼe ke haofaki ia Iselaele ʼaki ia au, ohage pe ko tau fakapapau.” 38 Pea neʼe ko te meʼa ʼaia neʼe hoko. ʼI te ʼaho ake, neʼe ʼala kae kei mafoata, ʼo tatau te kiliʼi ovi. Pea neʼe ina fakafonu ai he ipu lahi ʼaki te huʼa vai ʼo te hahau. 39 Kae neʼe ui e Seteone ki te ʼAtua moʼoni: “Ke ʼaua naʼa to tou ita kia au, kae ke ke fakagafua mai ke au fai atu he tahi kole. Fakalelei siʼou loto, ke ke fakagafua mai ke au toe ʼahiʼahi fai he meʼa ʼaki te kiliʼi ovi. Fakalelei siʼou loto, ke moamoa pe te kiliʼi ovi kae ke palapala fuli te kele ʼae ʼi ʼona tafaʼaki, ʼuhi ko te hahau.” 40 Pea neʼe ko te meʼa ʼaia neʼe fai e te ʼAtua ʼi te po ʼaia: neʼe moamoa pe te kiliʼi ovi kae palapala fuli te kele ʼuhi ko te hahau.