Numelo

14 Pea neʼe kalaga leva te hahaʼi katoa pea neʼe hoko atu tanatou fetagihi leʼo lahi ʼi te po katoa ʼaia.+ 2 Neʼe kamata muhumuhu te kau Iselaele fuli ʼo ʼuhiga mo Moisese pea mo Alone,+ pea neʼe natou palalau kovi ʼo ʼuhiga mo naua. Neʼe natou ui: “Ka na neʼe tou mamate la ʼi te fenua ʼo Esipito, peʼe ʼi te toafa ʼaeni! 3 He koʼe koa neʼe taki mai tatou e Sehova ki te fenua ʼaeni, ke tou mamate ai ʼi te heleta?+ ʼE ʼave popula anai ʼotatou ʼohoana mo ʼatatou fanau.+ ʼE mole lelei age koa la ke tou toe liliu ki Esipito?”+ 4 Neʼe natou toe feuiʼaki: “Tou fakanofo he pule pea tou toe liliu ki Esipito!”+

5 ʼI te temi pe ʼaia, neʼe punou mo tulolo ia Moisese mo Alone ki te kele ia muʼa ʼo te kau Iselaele fuli, ʼae neʼe fakatahitahi ai. 6 Pea ko Sosue,+ te foha ʼo Nune mo Kalepo,+ te foha ʼo Sefune, ʼae neʼe nā kau ia natou ʼae neʼe olo ʼo vakaʼi fakafufu ia te fenua, neʼe nā hae ʼonā kofu, 7 pea neʼe nā ui ki te kau Iselaele fuli: “Ko te fenua ʼae neʼe matou olo ʼo vakaʼi, ʼe ko he fenua ʼe lelei ʼaupito.+ 8 Kapau ʼe ʼofa ia Sehova ia tatou, ʼe ina fakahu moʼoni anai tatou ki te fenua ʼaia ʼe tafe ai te huʼa pipi mo te meli, pea ʼe ina foaki mai anai.+ 9 Kae ʼe mole tonu ke kotou agatuʼu kia Sehova pea ʼe mole tonu ke kotou matataku ki te hahaʼi ʼo te fenua,+ he ʼe faigafua pe anai tatatou malo ia natou. ʼE mole kei ʼi ai honatou puipuiʼaga, pea ʼe nofo ia Sehova mo tatou.+ Koia, ʼaua naʼa kotou matataku.”

10 Kae neʼe ui e te hahaʼi fuli ke tuki makaʼi ia naua.+ Neʼe ha leva te kololia ʼo Sehova ʼi te fuga fale la ʼo te fono, ia muʼa ʼo te hahaʼi fuli ʼo Iselaele.+

11 Neʼe ui leva e Sehova kia Moisese: “ ʼE kaku anai ki ʼafea te mole fakaʼapaʼapa mai kia te au ʼa te hahaʼi ʼaeni?+ ʼE kaku anai ki ʼafea tanatou mole tui mai kia te au logo la te ʼu milakulo fuli ʼae neʼe au fakahoko ʼi te lotolotoiga ʼo natou?+ 12 ʼE au tauteaʼi anai natou ʼaki he taʼi mahaki pea mo fakaʼauha natou, pea ʼe au fakaliliu anai koe ko he puleʼaga lahi mo malohi age ia natou.”+

13 Kae neʼe ui e Moisese kia Sehova: “Neʼe ke fakamavae tau hahaʼi mai Esipito ʼaki tou malohi. Pea ka logo anai te kau Esipito ki te meʼa ʼaia ka ke fai,+ 14 ʼe natou fakamatala anai ki te hahaʼi ʼo te fenua ʼo Kanaane. Neʼe toe logo foki te hahaʼi ʼaia ko koe, Sehova, ʼe ke nofo ʼi te lotolotoiga ʼo te hahaʼi ʼaeni,+ pea neʼe ke ha fakahagatonu kia natou.+ Ko koe ia Sehova, pea ʼe tuʼu tou ʼao ʼi ʼoluga ʼo natou, pea ʼe ke alu ʼi muʼa, ʼi te ʼaho ʼaki he ʼao, pea ʼi te poʼuli ʼaki he pou afi.+ 15 Kapau ʼe ke matehi te hahaʼi ʼaeni ʼi he moʼi temi pe ʼe tahi, ʼe ui anai e te ʼu puleʼaga ʼae neʼe logo ki tou logologona: 16 ‘Neʼe mole lava fakahu e Sehova te hahaʼi ʼaeni ki te fenua ʼae neʼe ina fakapapau ke ina foaki age kia natou, koia neʼe ina matehi ai natou ʼi te toafa.’+ 17 ʼI te lakaga nei, Sehova e, fakalelei siʼou loto, ke ke fakaha tou mafimafi, ʼo mulimuli pe ki te fakapapau ʼae neʼe ke fai, ʼi tau ui: 18 ‘Sehova, tuai ʼi te ita pea mo fonu ʼi te ʼofa agatonu,+ ʼe ina fakamolemole te hala mo te talagataʼa. ʼE mole ina tuku anai ke hao mai te tautea ia ia ʼae neʼe lakahala, kae ʼe ina tauteaʼi te ʼu foha ʼuhi ko te hala ʼo ʼanatou tamai pea ʼe ina toe tauteaʼi mo te tolu taʼiake mo te fa taʼiake.’+ 19 Fakalelei siʼou loto, ke ke fakamolemole te agahala ʼa te hahaʼi ʼaeni ʼo mulimuli ki te lahi ʼo tou ʼofa agatonu, ohage pe ko tau fakamolemole kia natou talu mai Esipito ʼo kaku mai ki te temi nei.”+

20 Neʼe ui leva e Sehova: “ ʼE au fakamolemole kia natou ohage pe ko tau kole mai.+ 21 Kae, ʼe au tala moʼoni atu, ʼe fonu anai te kele katoa ʼi te kololia ʼo Sehova.+ 22 Kae ko te ʼu tagata ʼae neʼe sisio ki toku kololia pea mo te ʼu milakulo+ ʼae neʼe au fakahoko ʼi Esipito pea mo te toafa, kae neʼe natou ʼahiʼahiʼi au+ ʼo tuʼa hogofulu pea neʼe mole natou fakalogo ki toku leʼo, ʼe mole he tahi ia natou+ 23 ʼe sio anai ki te fenua ʼae neʼe au fakapapau ke au foaki ki ʼanatou tamai. ʼEi, ʼe mole he tahi ia natou ʼaia ʼe mole fakaʼapaʼapa mai kia te au, ʼe sio anai ki te fenua.+ 24 Kae neʼe mole tatau te manatu ʼa taku tagata faifekau ko Kalepo+ mo natou ʼaia. Neʼe haga fakalogo pe ia kia te au ʼaki tona loto katoa. Koia ʼe au fakahu anai ia ia ki te fenua ʼae neʼe alu ki ai, pea ʼe maʼu anai e tona hologa ia te fenua ʼaia.+ 25 ʼE nonofo te kau Amaleke mo te kau Kanaane+ ʼi te potu fenua laulelei, koia apogipogi, ʼe kotou toe liliu mai anai ʼo olo ki te toafa, ʼi te ala ʼo te Tai Kula.”+

26 Pea neʼe ui leva e Sehova kia Moisese mo Alone: 27 “ ʼE kaku anai ki ʼafea te haga muhumuhu ʼa te hahaʼi agakovi ʼaeni kia te au?+ Neʼe au logo ki te muhumuhu ʼa te kau Iselaele kia te au.+ 28 Kolua ui age kia natou: ‘ ʼE ui e Sehova: “ ʼE au tala moʼoni atu, ʼe au fai anai ʼo mulimuli ki ʼakotou palalau ʼae neʼe au logo ki ai!+ 29 ʼE kotou mamate anai ʼi te toafa ʼaeni,+ ʼei, ia koutou fuli ʼae ʼe taʼu 20 ʼo fai ki ʼoluga pea neʼe tohi, ia koutou fuli ʼae neʼe muhumuhu kia te au.+ 30 ʼE mole hu anai he tahi ia koutou ki te fenua ʼae neʼe au fakapapau atu ke kotou nonofo ai,+ gata pe kia Kalepo, te foha ʼo Sefune pea mo Sosue, te foha ʼo Nune.+

31 “ ‘ “Pea ʼe au fakahu anai ki te fenua ʼakotou fanau, ʼae neʼe kotou ui ʼe ʼave popula anai,+ pea ʼe natou iloʼi anai te fenua ʼae neʼe kotou fehihiʼa ki ai.+ 32 Kae ʼe kotou mamate anai ʼi te toafa ʼaeni. 33 Pea ʼe liliu anai ʼokotou foha ko ni tagata tauhi manu ʼi te toafa lolotoga taʼu ʼe 40,+ pea ʼe natou utu pe anai te ʼu fua ʼo takotou heʼe agatonu, ʼo kaku ki takotou mamate fuli ʼi te toafa.+ 34 ʼE kotou utu anai te ʼu fua ʼo ʼakotou agahala lolotoga taʼu ʼe 40, ʼo mulimuli pe ki te ʼu ʼaho ʼe 40 ʼae neʼe kotou olo ai ʼo vakaʼi fakafufu te fenua, ko te ʼaho ʼe tahi ki te taʼu ʼe tahi, ʼei, ko te ʼaho ʼe tahi ki te taʼu ʼe tahi.+ Pea ʼe kotou iloʼi ai leva te kovi ʼo te agatuʼu ʼae kia te au.*

35 “ ‘ “Ko au ia Sehova, kua au palalau. Koʼeni te meʼa ʼae ʼe au fai anai ki te hahaʼi agakovi fuli ʼaeni, ʼae neʼe fakatahitahi ke natou fakafeagai mai kia te au: ʼE natou pupuli fuli anai ʼi te toafa ʼaeni, pea ʼe natou mamate fuli ai anai.+ 36 Ko te ʼu tagata ʼae neʼe fekauʼi e Moisese ke olo ʼo vakaʼi fakafufu ia te fenua pea neʼe natou fakamatala te ʼu meʼa ʼe kovi ʼo ʼuhiga mo te fenua ʼi tanatou toe liliu mai, ʼo tupu ai leva te muhumuhu ʼa te hahaʼi katoa kia Moisese,+ 37 ʼei, ko te ʼu tagata ʼaia neʼe natou fakamatala he ʼu meʼa ʼe kovi ʼo ʼuhiga mo te fenua, ʼe tauteaʼi anai natou pea ʼe mamate anai ia muʼa ʼo Sehova.+ 38 Kae ʼe maʼuli pe anai ia Sosue, te foha ʼo Nune pea mo Kalepo, te foha ʼo Sefune, ʼae neʼe nā kau ia natou ʼae neʼe olo ʼo vakaʼi te fenua.” ’ ”+

39 ʼI te temi ʼae neʼe fakaha ai e Moisese te ʼu palalau ʼaia ki te kau Iselaele fuli, neʼe natou lotomamahi ʼaupito ai. 40 Pea neʼe natou ʼala uhuuhu leva pea mo natou fia hake ki te tumutumu ʼo te moʼuga, ʼo ui: “Neʼe matou agahala. Kae ʼi te lakaga nei, kua matou tokalelei ke matou hake ki te koga meʼa ʼae neʼe palalau ki ai ia Sehova.”+ 41 Kae neʼe ui e Moisese: “He koʼe ʼe kotou talagataʼa ki te fakatotonu ʼa Sehova? ʼE mole fua lelei anai kia koutou. 42 ʼE mole tonu ke kotou hake, he ʼe mole nofo ia Sehova mo koutou, pea ʼe malo anai ʼokotou fili ia koutou.+ 43 ʼE nonofo ʼi ai te kau Amaleke mo te kau Kanaane ʼo fakatalitali kia koutou,+ pea ʼe kotou mamate anai ʼi te heleta. ʼE mole nofo anai ia Sehova mo koutou he neʼe kotou lituʼa kia Sehova.”+

44 Kae neʼe lahi fau tanatou falala kia natou, ʼo natou hake ai ki te tumutumu ʼo te moʼuga,+ kae neʼe tuku te aleka ʼo te fuakava ʼa Sehova ʼi te lotomalie ʼo te nofoʼaga pea neʼe toe nofo aipe mo Moisese.+ 45 Neʼe hihifo leva te kau Amaleke mo te kau Kanaane ʼae neʼe maʼuʼuli ʼi te moʼuga ʼaia, ʼo tauʼi natou. Neʼe feholaki ai te kau Iselaele ʼo kaku ki Holema.+