Selemia
15 Neʼe ui mai leva e Sehova: “Tatau aipe pe ʼe tutuʼu ʼi ʼoku muʼa ia Moisese pea mo Samuele,+ ʼe mole au manavaʼofa anai ki te hahaʼi ʼaeni. Fakamamaʼo natou ia au, ke natou olo. 2 Pea kapau ʼe natou fehuʼi atu: ‘Ke matou olo la kifea?’ ʼe ke tali age anai: ‘Koʼeni te folafola ʼa Sehova:
“Ko natou ʼae ʼe tonu ke mamate ʼi te taʼi mahaki, ke mamate ʼi te taʼi mahaki!
Ko natou ʼae ʼe tonu ke mamate ʼi te heleta, ke mamate ʼi te heleta!+
Ko natou ʼae ʼe tonu ke mamate ʼi te hoge, ke mamate ʼi te hoge!
Pea ko natou ʼae ʼe tonu ke mamate popula, ke natou mamate popula!” ’+
3 “ ‘Koia ʼe au fakato anai ni malaʼia ʼe fa,’*+ ko te ui ʼaia ʼa Sehova, ‘te heleta moʼo matehi, he ʼu kuli moʼo toho, he ʼu manulele pea mo he ʼu manu fekai moʼo kai pea mo pulihi ia natou.+ 4 ʼEi, ʼe au fakaliliu anai natou ko he meʼa fakalialia ki te ʼu puleʼaga fuli ʼo te kele+ ʼuhi ko Manase, te foha ʼo Esekiasi, te hau ʼo Suta mo te meʼa ʼae neʼe ina fai ʼi Selusalemi.+
5 Siʼi Selusalemi, ko ai ʼae ka ʼofa atu?
Ko ai ʼae ka manavaʼofa atu?
Ko ai ʼae ka haʼu ʼo vakaʼi pe ʼe ke feafeaʼi?’
6 ʼE ui e Sehova: ‘Neʼe ke liʼaki au.+
Koia ʼae ʼe au faoʼi anai toku nima moʼou fakatuʼā pea moʼou tauteaʼi.+
Kua au fiu ʼi te ʼofa kia koe.
7 ʼE au fakamavetevete anai natou ʼi te ʼu matapa ʼo te ʼu kolo ʼo te fenua ohage ko te toʼo kehe ʼo te tegaʼi fulumeto mai tona kili.
ʼE au toʼo anai ʼanatou fanau.+
ʼE au pulihi anai taku hahaʼi
Koteʼuhi ʼe mole natou fia tuku tanatou agakovi.+
8 ʼE liliu anai ʼanatou fafine vitua ʼo kaugamalie age ʼi te ʼu fisiʼi ʼone ʼo te tai.
ʼI te fetapa ʼe au fekauʼi mai anai he tagata fakatupu maumau moʼonatou tauʼi, ʼe ina tauʼi anai te ʼu faʼe pea mo te ʼu tama tupulaga.
ʼE au fakato fakapunamaʼuli anai kia natou he mataku mo he maveuveu.
9 Kua gaʼegaʼe te fafine ʼae neʼe ina fanauʼi he toko fitu.
ʼE mole kei tau tana manava.
Neʼe to tona laʼa kae ʼe kei ʼaho,
ʼO tupu ai tona ufiufi mo tona lainoa.’*
‘Pea ko te toe ʼo natou
ʼE au tuku anai ki te heleta ʼo ʼonatou fili,’ ko te ui ʼaia ʼa Sehova.”+
10 Siʼaku faʼe, malaʼia kia au! He koʼe neʼe ke fanauʼi au?+
ʼE fakafihiʼi mo fakakēʼi au e te fenua katoa.
Neʼe mole au foaki peʼe kole he meʼa,
Kae ʼe natou lotokoviʼi fuli au.
11 Neʼe ui e Sehova: “ ʼE au tokoni moʼoni atu anai.
ʼEi, ʼe au puipui anai koe mai ʼou fili
Moka hoko te malaʼia mo te mamahi.
12 ʼE feala koa ki he tahi ke ina fasiʼi te ukamea,
Te ukamea ʼae mai te potu noleto,
Peʼe ke ina fasiʼi te kapa?
13 ʼE au tuku anai ke kaihaʼa ʼau meʼa lelei mo ʼou koloa,+
Pea ʼe mole totogi anai e ʼou fili, kae ko tou fakatuʼā ki te ʼu agahala fuli ʼae neʼe ke fai ʼi tou fenua katoa.
14 ʼE au foaki anai ki ʼou fili
Ke natou ʼave ki he fenua ʼe mole ke iloʼi.+
ʼE hage toku hauhau ko he afi
ʼE mu ke tutu ai koutou.”+
15 Sehova e, ʼe ke iloʼi te aluʼaga ʼo toku maʼuli.
Ke ke manatuʼi au mo ke tokaga mai kia au.
Ke ke lagavaka kia natou ʼae ʼe natou fakatagaʼi au.+
ʼAua naʼa ke tuai ʼi te ita naʼa natou matehi au.*
Pea ke ke iloʼi ʼe au tau mo te lainoa ʼaia ʼuhi ko koe.+
16 ʼI taku maʼu ʼau folafola, neʼe au kai natou,+
Pea ʼe fiafia lahi toku loto ʼuhi ko tau folafola,
He ʼe au fua tou huafa, Sehova ʼAtua ʼo te ʼatu kautau.
17 ʼE mole au nofo fakatahi mo natou ʼae ʼe fakafiafia tuʼumaʼu.+
ʼE au nofo tokotahi he ʼe hili tou nima ia au.
ʼE au toe ita mo au ohage pe ko koe.+
18 He koʼe ʼe au mamahi tuʼumaʼu, pea ʼe mole he faitoʼo ʼo toku lavea?
ʼE mole loto ia ke fakamalolo.
ʼE ke hage anai koa kia au ko he matapuna vai kaka
ʼE mole feala he falala ki ai?
19 Koia, koʼeni te folafola ʼa Sehova:
“Kapau ʼe ke toe liliu mai ʼe au fakamalolo anai koe,
Pea ʼe ke tuʼu anai ʼi ʼoku muʼa.
Kapau ʼe ke toʼo kehe te meʼa ʼae ʼe maʼuhiga mai te meʼa ʼae ʼe mole hona ʼaoga,
ʼE ke liliu anai ko taku tagata fakafofoga.
ʼE tonu anai ke natou haga atu,
Kae ko koe, ʼe mole ke haga anai kia natou.”
20 “ ʼE au fakaliliu koe ko he kaupa kapa malohi ʼi te lotolotoiga ʼo te hahaʼi ʼaia.+
ʼE natou tauʼi anai koe,
Kae ʼe mole natou malo anai,+
Koteʼuhi ʼe au nofo mo koe moʼou haofaki pea moʼou fakaʼateainaʼi,” ko te ui ʼaia ʼa Sehova.
21 “ ʼEi, ʼe au haofaki anai koe mai te nima ʼo te hahaʼi agakovi
Pea ʼe au fakaʼateainaʼi anai koe mai te nima ʼo te hahaʼi agafefeka.”