Senesi

39 Neʼe ʼave e te kau Isemaele ia Sosefo ki Esipito.+ Neʼe totogi e Potifale+ ia ia mai te kau Isemaele.+ Ko Potifale neʼe ko te tagata Esipito neʼe gaue ʼi te fale hau ʼo Falaone pea neʼe pule ki te kau leʼo. 2 Kae neʼe nofo ia Sehova mo Sosefo.+ Koia, neʼe iku lelei pe te ʼu meʼa fuli ʼae neʼe ina fai. Neʼe ʼi ai ʼihi gaue neʼe tokaga ki ai ʼi te loto fale ʼo tona pule, ia te tagata Esipito. 3 Pea neʼe sio tona pule neʼe nofo ia Sehova mo ia pea neʼe tapuakiʼi e Sehova te ʼu meʼa fuli ʼae neʼe ina fai.

4 Neʼe leleiʼia e tona pule ia Sosefo, pea neʼe liliu ko hana tagata faifekau neʼe falala ki ai. Koia neʼe ina fakanofo ai ia ia ke pule ki tona loto fale pea ke tokaga ki ʼana meʼa fuli. 5 ʼI te ʼosi fai e te tagata Esipito te faʼahi ʼaia, neʼe tapuakiʼi e Sehova tona loto fale ʼuhi ko Sosefo. Pea neʼe toe tapuakiʼi foki e Sehova ʼana meʼa fuli ʼi tona loto fale ʼo feia mo ʼona kele fuli.+ 6 Pea neʼe tuku leva e Potifale ʼana meʼa fuli ke pule ki ai ia Sosefo pea neʼe mole toe tokaga ia ki he meʼa, gata pe ki tana meʼa kai. Tahi ʼae meʼa, neʼe liliu ia Sosefo ʼo malohi mo talavou.

7 Neʼe tokagaʼi leva e te ʼohoana ʼo Potifale ia Sosefo pea neʼe ina ui age ki ai: “Haʼu ke ta momoe.” 8 Kae neʼe fakafisi ki ai pea neʼe ina ui ki te ʼohoana ʼo tona pule: “Koʼeni, kua tuku mai e toku pule ʼana meʼa fuli ke au pule ki ai, pea ʼe mole toe tokaga ia ki he meʼa ʼi te loto fale. 9 ʼE mole he tahi ʼe lahi age ia au ʼi te loto fale ʼaeni. Pea neʼe mole ina fakafisi mai he meʼa kia au, gata pe ko koe, he ʼe ko koe ko tona ʼohoana. Koia ʼe lava feafeaʼi haku fai te toe agakovi lahi ʼaia pea mo agahala moʼoni ki te ʼAtua?”+

10 ʼI te ʼaho fuli pe neʼe palalau te fafine kia Sosefo kae neʼe mole loto e Sosefo ke momoe mo ia peʼe ke nofo mo ia. 11 ʼI te tahi ʼaho, neʼe ulu ki te loto fale ke ina fai tana gaue kae neʼe mole nonofo ai te hahaʼi faifekau ʼi te loto fale. 12 Pea neʼe puke leva e te fafine tona kofu ʼo ina ui age ki ai: “Haʼu ke ta momoe!” Kae neʼe ina tuku ai tona kofu kae hola ia ki tuʼa. 13 ʼI te sio ʼa te fafine neʼe ina tuku tona kofu kae hola ki tuʼa, 14 neʼe kalaga leʼo lahi ai ke logoʼi e te ʼu tagata ʼo tona loto fale pea mo ina ui: “Kotou sisio, neʼe ina ʼaumai te tagata Hepeleo ʼaeni ke manukiʼi ai tatou e te hahaʼi. Neʼe haʼu ke momoe mo au, kae neʼe au kalaga leʼo lahi. 15 Pea ʼi tana logo pe ʼae ki taku kalaga leʼo lahi, neʼe ina tuku tona kofu ʼi ʼoku tafa kae hola ki tuʼa.” 16 Hili ʼaia, neʼe tuku e te fafine te kofu ʼaia ʼi ʼona tafa ʼo kaku ki te toe liliu age ʼo tona pule ki tona ʼapi.

17 Pea neʼe toe tatau pe te ʼu meʼa ʼae neʼe ina fakamatala age ki tona ʼohoana. Neʼe ina ui: “Neʼe fia fai e te tagata faifekau Hepeleo ʼae neʼe ke ʼaumai he meʼa ke au liliu ai ko he tahi ʼe manukiʼi e te hahaʼi. 18 Kae ʼi taku kalaga leʼo lahi, neʼe ina tuku ai tona kofu ʼi ʼoku tafa kae hola ia ki tuʼa.” 19 ʼI te temi pe ʼae neʼe logo ai ia Potifale ki te ui age e tona ʼohoana: “Koʼena la te ʼu meʼa ʼae neʼe fai mai e tau tagata faifekau,” neʼe kovi ʼosi tona ita. 20 Koia neʼe ʼave ai e te pule ʼo Sosefo ia ia ki te fale pilisoni, ʼae neʼe tuku ai e te hau tana kau pilisoni. Pea neʼe nofo ai leva ia Sosefo ʼi te fale pilisoni.+

21 Kae neʼe nofo pe ia Sehova mo Sosefo pea neʼe ina fakaha age tona ʼofa agatonu ki ai. Pea neʼe ina tapuakiʼi ia Sosefo ke leleiʼia ai ia ia e te pule ʼo te fale pilisoni.+ 22 Koia neʼe tuku ai e te pule ʼo te fale pilisoni ia Sosefo ke tokaga ki te kau pilisoni fuli. Neʼe ko ia ʼae neʼe ina fakaha age te ʼu gaue fuli ʼae neʼe tonu ke natou fai ʼi te fale pilisoni.+ 23 Neʼe nofo ia Sehova mo Sosefo pea neʼe tapuakiʼi e Sehova te ʼu meʼa fuli ʼae neʼe ina fai.+ Koia, neʼe mole toe vakaʼi ai e te pule ʼo te fale pilisoni te ʼu meʼa ʼae neʼe tokaga ki ai ia Sosefo.