Senesi

40 Hili te ʼu meʼa ʼaia, ko te pule ʼo te ʼu tagata pule ʼo te vino+ ʼa te hau ʼo Esipito pea mo te pule ʼo te kau taʼo pane, neʼe nā agahala ki tonā ʼaliki, ia te hau ʼo Esipito. 2 Neʼe ita ai ia Falaone ki ʼana tagata faifekau ʼaia ʼe lua, ia te pule ʼo te ʼu tagata pule ʼo te vino pea mo te pule ʼo te kau taʼo pane.+ 3 Pea neʼe ina fakatotonu ke tuku ia naua ki te fale pilisoni ʼae neʼe takitaki e te pule ʼo te kau leʼo,+ ʼae neʼe pilisoniʼi ai ia Sosefo.+ 4 Neʼe fakatotonu leva e te pule ʼo te kau leʼo kia Sosefo ke nofo mo naua pea ke tokaga kia naua.+ Pea neʼe natou nonofo fualoa ai* ʼi te fale pilisoni.

5 Pea ʼi te fale pilisoni, ko te pule ʼo te vino ʼa te hau pea mo te tagata taʼo pane, neʼe nā tahi fai leva tana moemisi ʼi he po pe ʼe tahi. Pea neʼe tahi alu pe te moemisi mo tona fakaʼuhiga. 6 ʼI te ʼaho ake, ʼi te haʼu ʼa Sosefo ʼo fakasiosio ia naua, neʼe nā matamamahi. 7 Koia, neʼe ina fehuʼi ai ki te ʼu tagata faifekau ʼaia ʼa Falaone ʼae neʼe pilisoniʼi mo ia: “He koʼe ʼe kolua matamamahi ʼi te ʼaho nei?” 8 Neʼe nā tali age ki ai: “Neʼe ma tahi fai tana moemisi, kae ʼe mole he tahi ke ina fakamahino mai.” Neʼe ui e Sosefo kia naua: “ ʼE mole koa la ko te ʼAtua ʼae ʼe ina fakamahino te ʼu moemisi?+ Fakalelei siʼokolua loto, kae kolua fakamatala mai.”

9 Neʼe fakamatala leva e te pule ʼo te ʼu tagata pule ʼo te vino tana moemisi kia Sosefo. Neʼe ina ui age: “ ʼI taku moemisi, neʼe au sio ki he fuʼu vite. 10 ʼI te fuʼu vite ʼaia, neʼe ʼi ai ʼona vaʼa ʼe tolu, pea neʼe fisi leva, mo mātala pea neʼe momoho leva ʼona fuhiga vite. 11 Neʼe au puke te ipu ʼo Falaone, pea neʼe au toʼo te ʼu fuaʼi vite ʼo tatau ki tona ipu. Hili ʼaia, neʼe au foaki te ipu kia Falaone.” 12 Neʼe ui leva e Sosefo kia ia: “Koʼeni te fakaʼuhiga ʼo tau moemisi: Ko te ʼu vaʼa ʼe tolu ʼe ko ʼaho ʼe tolu. 13 ʼE kei toe ʼaho ʼe tolu, pea ʼe fakamavae anai koe e Falaone ʼi te fale pilisoni. ʼE ina toe fakanofo anai koe ki tou tuʼulaga,+ pea ʼe ke foaki anai kia Falaone tona ipu ohage pe ko tau fai ʼi muʼa atu.+ 14 Kae ʼe tonu anai ke ke manatuʼi ia au moka kua to lelei ia meʼa fuli kia koe. Fakalelei siʼou loto, ke ke fakaha mai tou ʼofa agatonu pea ke ke palalau kia Falaone ʼo ʼuhiga mo au, ke feala haku mavae ʼi heni. 15 ʼEi, neʼe ʼaumai fakamalohi au mai te fenua ʼo te kau Hepeleo,+ kae neʼe mole au fai he meʼa ʼe kovi ʼi heni ke pilisoniʼi ai au.”*+

16 ʼI te sio ʼa te pule ʼo te kau taʼo pane neʼe lelei te fakamahino ʼae neʼe fai e Sosefo, neʼe ina ui age ki ai: “Neʼe au toe fai mo taku moemisi, pea neʼe au sio neʼe hili ʼi toku ʼulu te ʼu kato pane hina ʼe tolu. 17 Pea ʼi te kato ʼae neʼe tafa ki ʼoluga ʼosi, neʼe ʼi ai te ʼu faʼahiga meʼa kehekehe neʼe taʼo maʼa Falaone. Pea neʼe kai e te ʼu manulele te ʼu meʼa ʼaia ʼi te kato ʼae neʼe hili ʼi toku ʼulu.” 18 Neʼe ui leva e Sosefo: “Koʼeni te fakaʼuhiga ʼo tau moemisi: Ko te ʼu kato ʼe tolu ʼe ko ʼaho ʼe tolu. 19 ʼE kei toe ʼaho ʼe tolu, pea ʼe tuʼusi anai e Falaone tou ʼulu, ʼe ina tautau anai koe ʼi he pou pea ʼe kai anai e te ʼu manulele tou sino.”+

20 Hili ki ai ʼaho ʼe tolu, neʼe fakamanatu te ʼahotupu+ ʼo Falaone, pea neʼe ina fai he kaitahi maʼa tana hahaʼi faifekau fuli. Pea neʼe ina fekauʼi ke ʼaumai te pule ʼo te ʼu tagata pule ʼo te vino pea mo te pule ʼo te kau taʼo pane, kae nonofo tana hahaʼi faifekau. 21 Pea neʼe ina toe fakanofo te pule ʼo te ʼu tagata pule ʼo te vino ki tona tuʼulaga, pea neʼe hoko atu pe tana foaki kia Falaone tona ipu. 22 Kae neʼe ina tautau te pule ʼo te kau taʼo pane ki te pou, ohage pe ko tona fakamahino age e Sosefo kia naua.+ 23 Kae neʼe mole kei manatuʼi e te pule ʼo te ʼu tagata pule ʼo te vino ia Sosefo.+