Kapite 26
Te tau o uhiga mote mea ae e totonu
1. Kotea te u mea e lua ae e tonu ke taui ete kilisitiano?
O KAKU aipe kihe puli ote malamanei a Satana, kote kau kilisitiano e tonu ke natou tau moo mavae mai tana pule. Nee tohi fenei ete apositolo ko Paulo: “Koutou tui te mahafu tau katoa ate Atua ke feala hakotou taofi mau kite u [kaka] ate Tevolo.” (Efese 6:11-18). Aki ia Satana pea mo tona malamanei, etonu foki ke tou toe taui mo otatou u holi kovi. E ui fenei ete Tohi-Tapu: “Kote holi ote loto ote tagata e kovi ia mai tana kei veliveli.”—Senesi 8:21; Loma 5:12.
2. a) He koe e tou tautau mau te holi malohi kite fai ote mea ae e kovi? b) He koe e tonu ke tou taui otatou u holi kovi?
2 Uhi kote agahala ae ne mau mai a Atama, ko totatou loto e feala keina eke tatou kite fai ote mea ae e kovi. Kohe vaivai kite eke aia e faka uhiga ia kohe pulihi ote mauli heegata. E tonu foki ke tou tau o uhiga mote mea ae e totonu. Maiala mote apositolo ko Paulo nee ina fai te tau aia, o hage ko tana ui: “Kau fia fai te mea ae e totonu, kote mea ia ae e kovi eia teau.” (Loma 7:21-23). E feiape mo koe, kote tau e feala ke faigataa. E feala anai ke iai he tau lahi i loto ia koe. Kotea anai he tonu kake fai?
3. a) E kote tau feafeai i loto o kita ae e fetolo ai te tokolahi? b) I tona uhiga ae kote tokolahi e natou fai te mea ae e kovi kae natou fia fai te mea ae e totonu eina faka mooni te palalau faka tohi-tapu fea?
3 Kua ke iloi foki iate u faka papau taulekaleka faka atua ae o uhiga kihe mauli heegata ite haohaoa ite kele. Kua ke tui kiai pea eke fia kau ai. Eke faka mooni kiai ko tou lelei heegata e kote tauhi kite Atua. Kae fealape ke fakatupu e tou loto ia koe he holi kite fai ohe u gaue kovi o hage kote folonikasio, te kaihaa, mo ihi atu mea. Ko ihi e natou ako te tohi aeni e lagi natou fai ape ni u aga e kovi, o natou iloipe kote u mea aia e koviia ete Atua. I tanatou fai te mea ae e kovi kae natou fia fai te mea ae e lelei e faka mooni aki ia te tonu ote palalau faka tohi-tapu aeni: “E kaka te loto, o laka age ia ite mea fulipe, pea e mole lava ia ke faitoo o lelei.”—Selemia 17:9.
KOTE TAU E FEALA KE KITA MALO
4. a) E faka logo kite a ia te malo pee kote to ite tau aia? b) Kotea ia ae e aoga ke kita malo ai ite tau o uhiga mote mea ae e totonu?
4 Aua leva naa ke ui e mole feala ke kita lolomi tota u holi kovi. Kapau eke loto mooni kiai, e feala ia keke faka malohii tou loto koteuhi keina taki koe ite ala ae e lelei, kae kote mea aia e fakalogo kia koe (Pesalemo 26:1, 11). E mole feala ke tau he tahi o malo maa koe. Koia e maua foki keke haga ako te malama faka tohi-tapu ae eina foaki te mauli (Soane 17:3). Kote malama aia e mole tonupe ke lave kite atamai, kae tonu foki ke toe lave kite loto, ke tupu ai hau gaue kite mea ae e totonu.
5. E feafeai he ako ote manako kite u lao ate Atua?
5 E feafeai he ako ote manako kite u lao ate Atua? E kohe metitasio ia kiai. Fai kia koe te fehui aeni: Kotea te mauhiga ote fakalogo kite Atua? Sio kite u fua e mau e natou ae nee mole natou tokaga ki tana u lao, o hage kote taahine tau 19 aeni nee ina tohi fenei: “Nee tua tolu, taku mau te mahaki faka matakiloto. I tona tua tolu, nee mole kei au amanaki leva e kei feala ke mau haku tamasii he nee tafa au o too toku nofoaga tamasii.” Ka kita talagataa kite u lao ate Atua, e kita mau ai te u mamahi (II Samuele 13:1-19). Kohe fafine nee ina fai te folonikasio nee ina tala fenei mohe loto mamahi: “E molepe he lelei ote mea aia ite loto mamahi pea mote loto vaivai ae e mau ite osi ote talagataa. Eau mamahi aki nei.”
6. a) He koe kote lelei ae e feala ke kita mau ite fai ote mea ae e kovi e mole iai hona aoga? b) E kote faahiga mauli feafeai ae nee feala ke mauli ai ia Moisese i Esipito?
6 Kae, ite ui a ihi, kote folonikasio, te faka vale kite kava pea mote u toloke e mau ai te lelei; kae kote lelei aia e lau e faka temi peia. Aua naake tuku ke taki koe kihe ala e mole ke mau ai te fimalie mooni pea mo fualoa. Manatui e koe ia Moisese, ae nee taupau o hage kohe “tama ote ofafine o Falaone”. Nee nofo ia ite mau koloa ite fale hau o Esipito. Kae, e ui ete Tohi-Tapu i tana liliu leva kua lahi, nee ina fili ia “ke gaohi kovii ia ia mote hahai ate Atua i taana ia mau te faka fiafia faka temi ote agahala”. (Hepeleo 11:24, 25.) Kote faahiga mauli kovi pea mo heeaoga ae ia e iloga mai kote mauli aia ote fale hau o Esipito nee tonu ke mau ai he lelei. Kotea leva te tupuaga ia ote maliu mai ai a Moisese?
7. He koe nee maliu kehe ia Moisese mai te “fiafia faka temi ote agahala” ite fale hau o Esipito?
7 Koteuhi nee tui ia kia Sehova pea nee ina iloi ia te mea ae e mauhiga lahi age ite faka fiafia faka temi ote agahala. E ui ete Tohi-Tapu: “Nee sio faka mamau ia kite totogi ote fakapale.” Nee metitasio ia Moisese kite u faka papau faka atua. Nee tui ia kite faka tuutuu ate Atua ae kote fakatupu ohe tuu foou fai totonu. Kote ofa lahi o Sehova pea mo tana u aga lelei kite hahai katoa nee lave i tona loto. Ko Moisese nee mole gata akipe hana lau tohi o uhiga mo Sehova pe nee logope kihe talanoa kiai. Nee “nofo malohi ia o hage ia e sio ki Ae e faka pulipuli”. (Hepeleo 11:26, 27.) Ko Sehova nee mooni ia kia Moisese pea ki tana u faka papau kihe mauli heegata nee toe feia pe.
8. a) Kotea te mea ae e aoga kia tatou ke tou malo ite tau o uhiga mote mea ae e totonu? b) Kotea te tonu ae e fakaha mai ete tama ae ia e tonu ke tou mau?
8 Kae feafeai ia koe, e hage koa ia Sehova kia koe kohe Tahi mooni, kohe Tamai e ofa ia koe? Ka ke manatui te u faka papau faka atua, eke faka kaukaui koa ia koe ite palatiso, hau faka fiafia ai ite u lelei ae nee faka papau mai kiai? (Vakai te u pasina 156 kite 162.) Ke kita malo ite tau ae kite u faka eke kite kovi, e tonu ke kita fakatahi lelei mo Sehova. O hage ko Moisese, e maua foki mo tatou ke tou “sio faka mamau kite totogi ote faka pale”. I hana fia fai te folonikasio, kohe tama tau 20 nee mulimuli ia kite faifaitaki aga a Moisese; eina ui: “Ko taku falala kihe mauli heegata e mauhiga aupito age ia ke fetogi aki he u kii temi nounou pe ote fai ote mea ae e kovi.” E mole koala kote aga aia e lelei?
KOHE AKO E MAU MAI ITE U HALA A IHI
9. Nee hala feafeai ia Tavite ite tau o uhiga mote mea ae e totonu?
9 O mole hage ko Tavite, aua naa ke tuku age ke lelu tau tokaga. Kohe aho nee tuu ai iaia ite ato o tona fale ae e faka heketalaa, nee sio ia kite fafine finemui ko Pati-Sepa e maanu. Mole ui ia ke maliu kehe mai i mua ohe tupu oni manatu kovi i tona loto, nee haga mamatape ia. Ite kua malohi o tona manako kite fafine nee ina fekau ai ke aumai ki tona fale hau. Ki muli age, ite kua faitama ate fafine pea mote mole kei iloi e Tavite he fufu o tana feauaki, nee ina fai puleaki ai ke matehi te ohoana ote fafine ihe tau.—II Samuele 11:1-17.
10. a) Nee feafeai te faka tua o Tavite o uhiga mo tana agahala? b) Kotea ia ae nee feala ai ke aua naa ina fai te feauaki?
10 Nee kohe agahala faka mataku ia, aia nee ina faka to ai ia Tavite kihe toe mamahi lahi. I tana kua mamahi, nee faka tua e Sehova o tuku te tokakovi ki tona api o au aipe ki tona mate (Pesalemo 51:3, 4; II Samuele 12:10-12). Kote loto o Tavite nee kaka lahi age ia i tana manatu; ko tona u holi kovi nee malo ia. Nee ina ui ki muli age: “Koeni, aki te mamahi nee fanaui au ite hala, pea ite agahala nee fakatupu ai au e taku fae.” (Pesalemo 51:5). Kae kote agahala aia pea mo Pati-Sepa nee mole kohe mea ia e mole feala tona tuku. Nee tupupe ia ite haga sio a Tavite kite fafine. Nee mole ina fai ia he mea ke tuku ai tona manako kihe ohoana ohe tahi age.
11. a) Kotea te faahiga ako e mau mai te faka matala kia Tavite? b) Kia koe, kotea te u faahiga mea e feala ai ke natou faka masila “te holi faka sino”? c) O hage ko tona ui mai ehe tama tupulaga, kotea ia ae ka faka tafa mai ai iaia ae e poto?
11 Kotea te ako e feala ke kita mau ai ite faka matala aia? Aeni: E tonu ke kita hola mai te u faahiga mea ae e feala ai ke tupu ai he u holi faka sino e mole aoga. O hagela, kotea anai te mea ka hoko mo kapau eke lau ni tohi pee ke sio kihe u ata eina faka mauhiga te u mea faka sino? E mahino papau ia ko tou u holi faka sino e asili malohi ai. Faka tafa mai te u gaue pea mote u faka fiafia ae e natou faka masila “te holi faka sino”. (Kolose 3:5; I Tesalonika 4:3-5; Efese 5:3-5.) Aua naa ke tuku ia koe keke lavea ite folonikasio. Kohe tama tau 17 nee ina fai te palalau aeni: “E faigafua te ui: ‘Eau iloi te temi ae e tonu kau tuku ai.’ E mooni e feala ke kita iloi, kae toko fia e natou tuku kei tautonu? E lelei age pe takita faka tafa mai te u faahiga mea ae e faka tuutamaki.”
12. Kotea te faifaitakiaga ae nee tuku e Sosefo ka tou taupau mau anai i totatou atamai?
12 Kanapaula nee taupau mau e Tavite i tona atamai te faifaitaki a Sosefo, kana auala nee mole agahala kite Atua. I Esipito, nee faka nofo ia Sosefo ke pule ite api o Potifale. Ka puli ia Potifale, ko tona ahoana, ae e manako kite mea faka sino, eina faigai te faka halai o Sosefo, he nee tupulaga ia. “Momoe mo au!”, ko tana ui aia kia Sosefo, kae faka fisi ia. Kae nee iai te aho, nee ina puke ai pea ina faigai ai kena momoe. Nee fakahao e Sosefo iaia pea hola ai. Nee ina faka malohii tona loto o mole manatu ia, kite faka fimalie o tona u holi faka sino a ia totonu, kae kite mea ia ae e totonu ia mata ote Atua. Eina ui: “E feafeai leva haku lava fai anai te toe hala lahi aia pea mo agahala osi kite Atua?”—Senesi 39:7-12.
KOHE TOKONI E AOGA MOO MAU TE MALO
13, 14. a) Kotea ia ae e aoga moo mau ote malo? b) Kotea te u faahiga fetogi nee fai e natou ae nee liliu o kilisitiano i Kolonito, pea aki te tokoni feafeai? c) Nee kote u faahiga tagata feafeai ia Paulo mo Tito ite temi ae?
13 Kohe malo ite tau aia, e tonu ke lave te malama faka tohi-tapu ki tou loto pea ina eke koe kite gaue. Kote fakatahi mote hahai ate Atua e toe aoga foki ke kita liliu ai kohe tahi o tona kautahi ae e ha. Aki te kautahi, tatau aipe pe nee feafeai tau aga mua, eke fetogi ai anai. Nee fai tohi fenei ia Paulo o uhiga mote kau Kolonito: “Aua naa koutou tuku ke fakahei koutou. Mole he fai folonikasio, he tahi e tauhi fakatata, he tahi e fai feauaki, he u tagata e taupau moo fai kia natou he u holi e mole tonu ke fai, he u tagata e momoe mohe tahi u tagata, he kau kaihaa, he kau manumanu, he kau konahia, he kau lea kovi, he kau faka malohi e natou mau anai te puleaga ote Atua. Pea nee kote uhiga aia o ni ihi ia koutou. Kae kua fufulu ia koutou.”—I Kolonito 6:9-11.
14 Faka kaukau mua! Ite kau kilisitiano aia nee iai te kau fai folonikasio afea, te kau fai feauaki, te kau tagata nee manako tagata, te kau kaihaa pea mote kau konahia. Kae aki te tokoni ate kautahi faka kilisitiano, nee natou fetogi. Kote apositolo ko Paulo totonu nee ina fai mo ia te mea ae e kovi (I Timoteo 1:15). Kia Tito, tona kau tagata, nee ina fai tohi o fenei: “Mo tatou foki, ite temi ae, nee tou vavale, talagataa, heia, popula kihe u holi pea mohe u faahiga lelei kehekehe.”—Tito 3:3.
15. a) Kotea ia ae e ha mai ai nee mole faigafua kia Paulo te fai ote mea ae e totonu? b) Kotea te aoga kia tatou ote faifaitakiaga aia?
15 I tana liliu o kilisitiano, nee faigataa koa kia Paulo te fai ote mea ae e totonu? Ei. I tona mauli katoa, nee ina taui te u holi kovi ae nee popula kiai. Nee ina tohi fenei: “Ko toku sino, eau tukipalai pea eau taki ia o hage he tahi e popula, hee au manavasii naa hili anai taku faka mafola kite hahai, kae au liliu au, ihe faahiga meape, kohe tagata e faka laka halai.” (I Kolonito 9:27). Ko Paulo nee ina faka maua iaia kite fai ote mea ae e lelei, tatau aipe moka haga tona sino o eke iaia kite kovi. Kapau eke faifaitaki kia Paulo, pea e feia mo koe eke malo anai ite tau aia.
16. Kotea te u faifaitaki i totatou temi e natou tokoni anai kia koe keke malo ite tau ae o uhiga mote mea ae e totonu?
16 Kapau e faigataa kia koe he liaki ohe aga e kovi kua ke mahani kiai, alu mua kihe fakatahi ate kau Faka mooni a Sehova. Eke felavei anai iai mohe u hahai e fiafia, e natou mau he aga maa. Kae, ite temi ae nee natou kau ite malamanei aeni aia e kote folonikasio, te feauaki, te konahia, te kaihaa, te gaohi mea faka fufu, te loi pea mote gaoi paaga e kohe u mea mahani ia (I Petelo 4:3, 4). O toe feiape, kote fakatahi mote kau Faka mooni a Sehova ite u fakatahi ote kokelekasio, aia e tonu keke foimo fai faka vilivili, eke to lotoa ai anai ihe u hahai nee natou tau ke natou liaki he u aga pea mohe u holi kovi aia e lagi ke taui pela mo koe totonu. Kataki! Nee natou malo, pea aki te tokoni ate Atua eke malo ai anai, pea mo koe.
17. a) Kote faahiga fakatahi feafeai ae e aoga ke kita malo ai ite tau? b) Koai ae e feala keke mau ai he tokoni moo faka tokatoka o tou u fihifihia?
17 Kapau kua fuafualoa hau ako te Tohi-Tapu, e mahino ia eke kau ite u fakatahi ate kau Faka mooni a Sehova. Haga fai tuumau. Kote tokoni pea mote faka loto malohi faka laumalie a ihi kilisitiano e aoga ia kia tatou (Hepeleo 10:24, 25). Faka feiloi aki mote kau “tagata mua” pee kau tagata afea ote kokelekasio, ae ko tonatou maua kote “fafaga ote faga ovi ate Atua”. (I Petelo 5:1-3; Gaue 20:28.) Aua naa ke faka meamea te palalau kia natou mo kapau eke sio e aoga he tokoni kia koe keke litua kihe aga mahani e kovi. E natou fonu ite ofa, ite agalelei pea mote tokaga.—I Tesalonika 2:7, 8.
18. Kote faahiga amanaki kihe temi ki amuli feafeai ae e feala keina faka malohii tatou o uhiga mote fai ote tau?
18 E maua ke tou taui te malamanei a Satana, pea mo totatou kakano agahala. Kote agatonu kite Atua e kohe tau foki ia ite aho fulipe, kae eiai tona gata aga. Kua vavepe, ko Satana e puli anai pea ko tona malamanei aga kovi e maumaui anai. Koia, ite tuu foou ate Atua aeni kua ovi mai, kohe u faahiga mea totonu ka natou faka faigafua anai tatatou lele. Ko tona faka osi leva, e mole toe iai anai he iloga aga ote agahala, pea e mole tou toe fai anai he tau faigataa moo fai te mea ae e totonu.
19. He koe e tonu ke tou lava faa kataki lahi ke lelei ina ai tatou e Sehova?
19 Aua naa puli i tatatou sio te tuu foou. Tou too “moo puloga tau ia te amanaki kite mauli”. (I Tesalonika 5:8.) Tou faifaitaki kite fafine kei finemui aeni nee ina ui fenei: “Eau manatu kite u mea fulipe aeni nee foaki mai kiau e Sehova pea mote u faka papau nee ina fai kiau. Nee mole ina siakina au, kae nee ina tapuakina au aki te u faahiga tapuakina kehekehe. Eau iloi kote mea ae e loto kiai o uhiga mo au e kote lelei ateape pea eau loto keina lelei ia iau. Kote mauli heegata e mauhiga aupito ia ke tupu ai hata faa kataki maa Sehova.” Tou tuli te fai totonu ke tou sio kite hoko ‘ote u faka papau lelei ae nee fai e Sehova’ kia natou ae e oofa kia teia.—Sosue 21:45.
[Paki ʼo te pasina 219]
Kapau la kote faahiga mauli ote Esipito afea e lave lelei kite sino, kotea te tupuaga ia o toona liaki e Moisese?
[Paki ʼo te pasina 220, 221]
Nee haga siope ia Tavite; nee mole faka tafa ia mai te mea ae nee ina taki ai iaia kite fai ote mea ae e kovi
[Paki ʼo te pasina 222]
Nee tekei e Sosefo te u faiga holi kovi ate ohoana o Potifale