Kapite 115

Neʼe Malaga Te Kē

ʼI TE kamata pe ʼo te afiafi, neʼe fai e Sesu te ako matamatalelei ʼo ʼuhiga mo te agavaivai ʼi tana fufulu te ʼu vaʼe ʼo tana kau ʼapositolo. ʼOsi ʼaia pea neʼe ina fakatuʼu te Fakamanatu ʼo tona mate ʼaē kua ōvi mai. ʼI te temi leva ʼaenī ʼe hoko te meʼa fakapuna’maʼuli, ʼe fakapuna’maʼuli foki ʼuhi ko te meʼa ʼaē neʼe hoki ʼosi atu pe. Neʼe fetalanoaʼaki te kau ʼapositolo pe ko ai ʼaē ia nātou ʼe lahi ake. ʼE ʼiloga ia ko te fihi ʼaia neʼe mole hoki fai pe.

Tou manatuʼi ʼi te ʼosi ʼaē ʼo te fetogi ʼo Sesu ʼi te moʼuga, neʼe fihi te kau ʼapositolo ʼi tanatou fia ʼiloʼi pe ko ai ʼaē ia nātou ʼe lahi ake. Tahi ʼaē meʼa, ko Sake pea mo Soane neʼe kua nā ʼosi kole age foki ke nā maʼu te ʼu tuʼulaga maʼuhiga ʼi te Puleʼaga, ʼo fakatupu ʼaki ai te tahi fihi ʼi te kau ʼapositolo. Pea ʼi te temi nei, ʼaenī ko te po fakaʼosi ʼo tana nofo mo nātou, neʼe lagi lotomamahi ia Sesu ʼi tana sio ʼaē ki tanatou toe fekēʼaki. Neʼe feafeaʼi tana aga?

Neʼe mole ina fakatotonuʼi te kau ʼapositolo ki tanatou aga ʼaia, ka neʼe toe palalau age ia Sesu mo he loto faʼa kātaki kia nātou ke nātou fakakaukau: “Ko te ʼu hau ʼo te ʼu puleʼaga ʼe nātou pule fakahau kia nātou, pea ko nātou ʼaē ʼe pule kia nātou ʼe fakahigoaʼi ko te ʼu Hahaʼi ʼe nātou fai te meʼa ʼaē ʼe lelei. Kae ko koutou, ʼe mole tonu ke koutou feiā. (...) Ko ai moʼoni ʼaē ʼe lahi ake, ʼe ko ʼaē koa ʼe nofo ʼi te laupapa pe ko ʼaē ʼe kaugana ki ai? ʼE mole koa la ko ʼaē ʼe nofo ʼi te laupapa?” Pea, ʼi tana fakamanatuʼi age te faʼifaʼitaki ʼaē neʼe ina tuku age kia nātou, neʼe ʼui maʼana: “Kae ko ʼau, ʼe ʼau nofo ʼi te lotolotoiga ʼo koutou ohage ko ʼaē ʼe kaugana.”

Logope tonatou heʼe haohaoa, neʼe nonofo tuʼumaʼu te kau ʼapositolo mo Sesu lolotoga tona ʼu ʼahiʼahiʼi. Koia neʼe ʼui ai maʼana kia nātou: “ ʼE ʼau fai he fuakava mo koutou, ohage ko taku Tāmai neʼe ina fai he fuakava mo ʼau, ki he puleʼaga.” Ko te fuakava ʼaia ʼa Sesu mo tana kau tisipulo agatonu ʼe ina fakatahiʼi ia nātou kia ia ki te fai ʼo te pule fakahau. ʼE ko te toko 144 000 hahaʼi pe, kua ʼosi faka tuʼakoi, ʼaē ka fakahū anai ki te fuakava ʼaia ki he Puleʼaga.

Logope la te foaki age ʼaē ki te kau ʼapositolo ʼo te ʼamanaki fakatalakitupua ʼaē ko te hau mo Kilisito, ʼe nātou fakalaka nei ʼi te temi ʼo te vaivai fakalaumālie. “ ʼE koutou tūkia fuli anai ʼo ʼuhiga mo ʼau ʼi te po ʼaenī”, ko te ʼui age ʼaia ʼa Sesu. Kae, ʼi tana fakahā age kia Petelo neʼe faikole ia ʼo ʼuhiga mo ia, neʼe ina fai age te palalau fakaloto mālohi ʼaenī: “Kae ka ke liliu mai, fakaloto mālohiʼi tou ʼu tēhina.”

“ ʼU kiʼi fānau, ʼe kei ʼau nofo mo koutou ʼi he kiʼi temi siʼisiʼi. ʼE koutou kumi anai ʼau; pea ohage ko taku ʼui age ki te kau Sutea: ‘Ko te potu ʼaē ʼe ʼau ʼalu kiai, ʼe mole feala hakotou ʼōmai kiai’, ʼi te temi nei ʼe ʼau toe tala atu foki kia koutou te meʼa ʼaia. ʼE ʼau foaki atu kia koutou te fakatotonu foʼou: ke koutou feʼofaʼofaniʼaki ia koutou, pea ohage pe ko taku ʼofa ʼaē kia koutou, ke toe feiā foki mo koutou, ke koutou feʼofaʼofaniʼaki. ʼAki te meʼa ʼaenī ʼe ʼiloʼi fuli ai e te hahaʼi ko koutou ko taku ʼu tisipulo: mo kapau ʼe koutou femaʼuʼaki te ʼofa.”

“ ʼAliki, ʼe ke ʼalu kifea?” ko te fehuʼi age ʼaia ʼa Petelo.

“Ko te potu ʼaē ʼe ʼau ʼalu kiai, ko te ʼui age ʼaia ʼa Sesu, ʼe mole feala hau muli mai ia te ʼau ʼi te temi nei, kae ʼe ke muli mai anai ia te ʼau ki muli age.”

“ ʼAliki, ko te toe ʼui age ʼaia ʼa Petelo, he koʼe ʼe mole feala ke ʼau muliʼi koe ʼi te temi nei? ʼE ʼau foaki anai toku maʼuli maʼa koe.”

“ ʼE ke foaki anai tou maʼuli maʼaku? ko te fehuʼi age ʼaia ʼa Sesu. ʼE ʼau tala moʼoni atu kia te koe: kailoa, ʼe mole heʼeki ʼuʼua anai te moa ka kua ke fakafisi tuʼa tolu kia te ʼau.”

“Kapau ʼe tonu ke ʼau mate mo koe, ko te ʼui age ʼaia ʼa Petelo, kailoa, ʼe mole ʼau fakafisi anai kia te koe.” Pea ʼi te toe ʼui age pe e te kau ʼapositolo ʼaē, neʼe fakalakilaki ia Petelo ʼo ʼui maʼana: “Kapau ʼe higa ia nātou fuli ʼaē ʼuhi ko koe, ka ko ʼau ʼe mole ʼau higa tuʼa tahi anai ʼau!”

ʼI tana fakamanatuʼi age te temi ʼaē neʼe ina fekauʼi ai tana kau tisipulo ke nātou ʼolo ʼo fai faka mafola ʼi Kalilea, ʼo mole ʼave hanatou ʼu kiʼi taga paʼaga pe ko he ʼu kato meʼa kai, neʼe fehuʼi age e Sesu kia nātou: “Neʼe koutou hala koa la mo he meʼa?”

“Kailoa!” ko tanatou tali age ʼaia.

“Kae ʼi te temi nei, ko ʼaē ʼe ʼi ai hana falā ke ina toʼo, ʼo feiā foki mo he kato meʼa kai; pea ko ʼaē ʼe mole ʼi ai hana heletā ke ina fakatau tona kofu tuʼa moʼo totogi ʼo hana heletā. Heʼe, ʼau tala atu kia koutou, ʼe tonu ke hoko ia te ʼau te ʼu meʼa fuli ʼaē neʼe tohi, ʼo fēnei: ‘Neʼe tuku ia ki te hahaʼi ʼaē ʼe nātou manukinukiʼi te lao.’ Ko te meʼa ʼaē ʼo ʼuhiga mo ʼau, ʼio, ʼe lolotoga hoko nei ia.”

ʼAki te ʼu palalau ʼaia, neʼe fakahā e Sesu te temi ʼaē ʼe tutuki anai ia ia ʼi te pou mo te ʼu tagata agakovi, ʼi tona tahi faʼahiga ʼui ko te ʼu tagata ʼe nā manukinukiʼi te lao. Neʼe ina toe fakahā ai foki, ko tana ʼu tisipulo ʼe tau anai mo te ʼu fakataga fakamataku ki muli age. “ ʼAliki, koʼeni ʼi henī te ʼu heletā e lua”, ko te ʼui age ʼaia ʼa te kau ʼapositolo.

“Kua feʼauga”, ko te tali age ʼaia ʼa Sesu. ʼE tou vakaʼi anai ki muli age, ko te ʼu heletā ʼe nā faka fealagia anai kia Sesu ke ina fai ʼaki he tahi ako ʼe ʼaoga tāfito. Mateo 26:31-35; Maleko 14:27-31; Luka 22:24-38; Soane 13:31-38; Fakahā 14:1-3.

▪ He koʼe ʼe fakapuna’maʼuli te kē ʼa te kau ʼapositolo?

▪ Neʼe feafeaʼi te fakatokatoka e Sesu te kē ʼaia?

▪ Koteā te meʼa ʼaē ʼe fakahoko e te fuakava ʼaē neʼe fai e Sesu mo tana kau tisipulo?

▪ Koteā te fakatotonu foʼou ʼaē ʼe fai age e Sesu, pea koteā tona maʼuhiga?

▪ Neʼe fakahā feafeaʼi koa e Petelo te lahi fau ʼo tana falala ʼaē ʼe mole higa anai ia ia, pea koteā ʼaē neʼe ʼui age e Sesu kia ia?

▪ He koʼe ko te ʼu fakatotonu ʼa Sesu ʼo ʼuhiga mo te ʼave ʼo he kiʼi taga paʼaga pea mo he kato meʼa kai ʼe kehekehe ia mo te ʼu fakatotonu ʼaē neʼe ina fai ʼi muʼa atu?