Kapite 116

ʼE Teuteuʼi e Sesu Tana Kau ʼApositolo Ki Tana Mavae

KUA ʼosi te kai ʼo te ʼaho fakamanatu, kae kei nofo pe ia Sesu mo tana kau ʼapositolo ʼi te koga fale fata. Kua vave nei pe te puli ʼa Sesu; kae, ʼe kei lahi te ʼu meʼa ke ina fakahā. “Ke ʼaua naʼa hoha tokotou loto!” ko tana ʼui ʼaia moʼo fakaloto mālohiʼi ʼo tana kau ʼapositolo. “Koutou tui ki te ʼAtua.” Kae, neʼe ina toe ʼui age, “koutou toe tui mai foki kia te ʼau”.

“ ʼI te ʼapi ʼo taku Tāmai ʼe lahi ai te ʼu nofoʼaga”, ko te hoko atu ʼaia ʼa te palalau ʼa Sesu. “ ʼE ʼau ʼalu ʼo teuteuʼi maʼa koutou he nofoʼaga (...) koteʼuhi ko te potu ʼaē ʼe ʼau ʼi ai, ke toe ʼi ai foki, mo koutou. Pea ko te potu ʼaē ʼe ʼau ʼalu kiai, ʼe koutou ʼiloʼi te ala.” ʼE mole mahino te kau ʼapositolo ʼe palalau age ia Sesu ki tana ʼalu ʼaē ki selo; koia ʼaē neʼe fehuʼi age ai e Tomasi: “ ʼAliki, ʼe mole mātou ʼiloʼi peʼe ke ʼalu kifea. E feafeaʼi leva tamatou ʼiloʼi te ala?”

“Ko ʼau ko te ala, pea mo te moʼoni, pea mo te maʼuli”, ko te tali ʼaia ʼa Sesu. ʼE moʼoni, ʼe gata pe ʼi te tali ʼo ia pea mo te faʼifaʼitaki ʼo tona faʼahiga maʼuli ʼe feala ai ki he tahi ke hū ki te nofoʼaga ʼo te Tāmai ʼaē ʼi selo, heʼe, ohage ko te ʼui ʼa Sesu, “ ʼe mole he tahi ʼe haʼu ki te Tāmai ʼi tuʼa atu ia te ʼau”.

“ ʼAliki, ko te fehuʼi ʼaia ʼa Filipo, fakahā mai kia mātou te Tāmai, pea ʼe mātou feʼauga ai.” E lagi, ʼe loto ia Filipo ke fakahā age e Sesu kia nātou he meʼa ʼe hā mai ke nātou sisio ai ki te ʼAtua, ohage ko te ʼu meʼa neʼe hā ʼaē neʼe foaki age ʼi te temi muʼa kia Moisese, kia Elia pea mo Isaia. Kae, ʼe maʼu moʼoni e te kau ʼapositolo te meʼa ʼe maʼuhiga ake ʼi te ʼu taʼi meʼa ʼaia neʼe hā, koia la ʼaia ʼe fakatokagaʼi age kia nātou e Sesu: “Kua fualoa ʼosi taku nofo mo koutou, ka mole heʼeki ke ʼiloʼi ʼau, Filipo? Ko ʼaē kua sio kia te ʼau kua sio ia ki te Tāmai.”

ʼE hā lelei ia Sesu te ʼuhiga ʼo tana Tāmai koia ko te maʼuli mo ia pea mo te vakaʼi ʼo ia, ʼe hage pe ia ko he sio ki te Tāmai. Kae, ʼe māʼoluga ake te Tāmai ʼi te ʼAlo, ohage pe ko tona fakahā ʼaē e Sesu: “Ko te ʼu meʼa ʼaē ʼe ʼau tala atu kia koutou, ʼe mole ʼau tala ʼaki haku fakatotonu tokotahi.” ʼE tuku e Sesu te ʼu fakavikiviki fuli ʼo ʼuhiga mo tana ʼu akonaki ki tana Tāmai ʼaē ʼe ʼi selo.

ʼI meʼa fakaloto mālohi leva ki te kau ʼapositolo ʼi tanatou logo ki te ʼui age e Sesu kia nātou: “Ko ʼaē ʼe tui kia te ʼau, ʼe ina fai, te ʼu gāue ʼaē ʼe ʼau fai; pea ʼe ina fai anai te ʼu gāue ʼe lahi ake ʼi ʼaenī.” ʼE mole ina ʼui ia ʼe fai anai ʼe tana kau ʼapositolo he ʼu milakulo ʼe lahi ake ʼi te ʼu milakulo ʼaē neʼe ina fai. ʼE ina fia fakahā age ʼe nātou fai anai tonatou minisitelio ʼo fualoa age, ʼi te malamanei katoa, pea ki he hahaʼi e tokolahi age.

ʼI te ʼosi ʼo tana mavae, ʼe mole līaki anai e Sesu tana kau tisipulo. “Ko meʼa fuli ʼe koutou kole anai ʼaki toku huafa, ko tana fakapapau age ʼaia, ʼe ʼau fai anai.” Pea tahi, ko tana toe ʼui age ʼaia, “ ʼe ʼau kole anai ki te Tāmai, ke ina foaki atu kia koutou he tahi tokoni, ke nofo mo koutou ʼo talu ai, ko te laumālie ʼo te moʼoni”. Ki muli age, mokā ʼosi hake anai ki selo, ʼe folahi anai e Sesu te laumālie maʼoniʼoni ʼaia ko te tahi tokoni, ki tana kau tisipulo.

Kua ōvi mai te mavae ʼa Sesu. “Kei toe pe te kiʼi temi veliveli, pea mole toe sio te malamanei kia te ʼau”, ko tana ʼui ʼaia. ʼE ʼamanaki ke liliu ia Sesu ko te laumālie fakapulipuli kia mata ʼo te tagata. Kae ʼe ina toe fakapapau age ki tana ʼu ʼapositolo agatonu: “ ʼE koutou sisio anai kia te ʼau, koteʼuhi ʼe ʼau maʼuli pea ʼe koutou maʼuʼuli anai.” ʼIo, ʼe mole gata ʼaki pe tana hā anai ʼaē kia nātou ʼaki he sinoʼi tagata ʼi te hili ʼo tona fakatuʼuake, kae, ʼi tona temi totonu, ʼe ina fakatuʼuake anai ia nātou ko te ʼu laumālie ke nātou maʼuʼuli mo ia ʼi selo.

ʼI te temi nei, ʼe tuku age e Sesu te lekula mahino gafua ʼaenī: “Ko ʼaē ʼe ina maʼu taku ʼu fakatotonu pea mo ina tauhi, ʼe ko ia ia ʼaia ʼe ʼofa kia te ʼau. Pea ko ʼaē ʼe ʼofa kia te ʼau ʼe ʼofa anai kia te ia taku Tāmai, pea ko ʼau ʼe ʼau ʼofa anai kia te ia pea ʼe ʼau hā fakalelei anai kia te ia.”

ʼI te temi pe ʼaia, ko te ʼapositolo ko Sutasi, ʼaē ʼe toe fakahigoaʼi foki ko Tateo, neʼe ʼui maʼana: “ ʼAliki, koteā koa te meʼa ʼaē neʼe hoko, ʼaē ʼe tupu ai tau fia hā pe kia mātou ka mole ke fia hā ki te malamanei?”

“Kapau ʼe ʼofa he tahi kia te ʼau, ko te tali ʼaia ʼa Sesu, pea ʼe ina tauhi anai taku folafola, pea ʼe ʼofa anai kia te ia taku Tāmai (...). Ko ʼaē ʼe mole ʼofa kia te ʼau ʼe mole ina tauhi taku ʼu folafola.” ʼO kehekehe ia mo tana ʼu tisipulo fakalogo, ko te malamanei ʼe mole ina tokagaʼi te ʼu akonaki ʼa Kilisito. Koia ʼe mole hā ai kiai.

ʼI te lolotoga ʼo tona minisitelio ʼi te kele, neʼe akonaki e Sesu te ʼu meʼa lahi ki tana kau ʼapositolo. ʼE feafeaʼi anai hanatou manatuʼi te ʼu meʼa fuli ʼaia, mo kapau, ʼo kaku pe la ki te moʼi temi ʼaia ʼe lahi te ʼu meʼa ʼe mole nātou mahino ki tona faka ʼuhiga? Kae lelei pe la, he neʼe fai e Sesu te fakapapau ʼaenī: “Ko te tokoni, te laumālie maʼoniʼoni, ʼaē ka fekauʼi mai anai e te Tāmai ʼi toku huafa, ʼe koia ia ʼaia ka ina akoʼi atu anai ia meʼa fuli pe mo fakamanatuʼi atu anai ia meʼa fuli ʼaē neʼe kua ʼau tala atu.”

Pea, moʼo toe fakaloto mālohiʼi ʼo nātou, neʼe ʼui maʼa Sesu: “ ʼE ʼau tuku atu te tokalelei, ʼe ʼau foaki atu taku tokalelei. (...) Ke ʼaua naʼa hoha tokotou loto!” ʼIo ʼe mavae ia Sesu ia nātou, kae, ʼe ina fakamahino, “ka na neʼe koutou ʼoʼofa kia te ʼau, ka na ʼaua la ʼe koutou fakafiafia ʼi takotou ʼiloʼi ʼaē ʼe ʼau ʼalu ki te Tāmai, heʼe ko te Tāmai ʼe lahi ake ia te ʼau”.

Kua siʼisiʼi te temi ʼaē ʼe kei nofo ai mo nātou. “ ʼE mole ʼau palalau anai mo koutou ʼo fualoa, ko tana ʼui ʼaia, heʼe ko te pule ʼo te malamanei ʼe haʼu. Pea ʼe mole maʼu hana puke ia te ʼau.” Ko Satana te Tevolo, ia ia ʼaē neʼe feala tana hū kia Sutasi pea mo puleʼi ia ia, ʼe ko te pule ʼo te malamanei. Kae ʼe mole ia Sesu he puani ʼe vaivai ʼe feala ke fakaʼaogaʼi e Satana moʼona ōfeʼi kehe mai te tauhi ki te ʼAtua.

Te ʼu felogoi lelei mo Sesu

ʼI te hili ʼo te kai fakamanatu, ko te ʼosi pe ʼaē ʼo te fakaloto mālohiʼi e Sesu tana kau ʼapositolo ʼaki tana fai palalau fakahagatonu pea mo matala lelei. E lagi kua hili ʼapē te māʼupō. Koia neʼe ʼui ai e Sesu: “Koutou tutuʼu ake, kae tou mavae ʼi henī.” Kae, ia muʼa ʼo tanatou hū ki tuʼa, ʼaki tona ʼofa ʼaē kia nātou, neʼe hoko atu pe tana palalau kia nātou ʼaki te lea fakatātā fakaloto mālohi.

“Ko ʼau ko te vite moʼoni, pea ko taku Tāmai ko te tagata gāue vite”, ko tana ʼui ʼaia. Ko te tagata Gāue vite lahi, ʼaē ko Sehova ʼAtua, neʼe ina to te vite fakatātā ʼaia ʼi tana fakanofo ia Sesu ʼaki te laumālie maʼoniʼoni, ʼi te temi ʼaē neʼe papitemaʼi ai ʼi te fasiga taʼu fakatōlau ʼo te taʼu 29 ʼo totatou temi. Kae ʼosi ʼaia pea fakahā age e Sesu ko te vite ʼe mole ina fakatātā pe ia ia tokotahi, ʼo ʼui maʼana: “Ko te ʼu vaʼa fuli pe ʼe ia te ʼau ʼe mole hona fua, ʼe ina toʼo, pea ko te ʼu vaʼa fuli pe ʼaē ʼe fua, ʼe ina fakamaʼa, ke toe lahi ake hona ʼu fua. (...) Ohage pe ko te vaʼa ʼe mole feala, kei ai hona fua mai ia ia tokotahi, gata pe mokā ʼe pipiki maʼu ki te vite, pea ʼe toe feiā mo koutou foki ʼe mole feala ke ʼi ai hokotou ʼu fua, gata pe mokā ʼe koutou pipiki tahi mo ʼau. Ko ʼau ko te vite, ko koutou ko te ʼu vaʼa.”

ʼI te Penikosite, ʼi te ʼosi ʼo ʼaho e 51 ki muli age, ʼe liliu anai te kau ʼapositolo pea mo ʼihi tisipulo ko te ʼu vaʼa ʼo te vite mokā folahi ifo anai te laumālie maʼoniʼoni kia nātou. ʼI tona fakasiosio lelei, ko te toko 144 000 hahaʼi ʼaē ka liliu anai ko te ʼu vaʼa ʼo te vite fakatātā. ʼAki te fuʼu vite, ia Sesu Kilisito, ʼe nātou faʼufaʼu anai te vite fakatātā ʼaē ka ina fakatupu anai te ʼu fua ʼo te Puleʼaga ʼo te ʼAtua.

ʼE fakamahino mai e Sesu peʼe feafeaʼi te maʼu ʼo he ʼu fua: “Ko ʼaē ʼe nofo ʼo tahi mo ʼau, pea mo ʼau ʼo tahi mo ia, ko ia ia ʼaia ʼe fua ʼo lahi; heʼe ʼi tuʼa atu ia te ʼau ʼe mole feala tuʼa tahi hakotou fai he meʼa.” Kae, kapau, ko he tahi ʼe mole ʼi ai hona fua, “ ʼe lī ia ki tuʼa ohage ko te vaʼa pea ʼe moamoa anai ia; pea ʼe tae te ʼu vaʼa ʼaia ʼo lī ki te afi, pea ʼe vela ai ia”. Pea ʼi te tahi faʼahi, ko tana fakapapau age ʼaia, “kapau ʼe koutou nonofo ʼo tahi mo ʼau pea mo nofo taku ʼu folafola ia koutou, koutou kole te meʼa ʼaē ʼe koutou loto kiai pea, kia koutou, ʼe hoko anai te meʼa ʼaia”.

ʼOsi ʼaia pea toe ʼui age e Sesu ki tana kau ʼapositolo: “Ko taku Tāmai ʼe faka kolōliaʼi ʼi te faʼahi ʼaenī: ke koutou haga fua ke lahi pea ke koutou hā ʼaki mai ko taku ʼu tisipulo.” Ko te ʼu fua ʼaē ʼe loto te ʼAtua ke maʼu e te ʼu vaʼa, ko te fakahā ʼo te ʼu kalitate ʼaē ʼe tatau mo ʼaē ʼo Kilisito, kae tāfito ia te ʼofa. Pea tahi foki, kapau ko Kilisito neʼe ko he tagata fai faka mafola ʼo te Puleʼaga ʼo te ʼAtua, ko te ʼu fua ʼaia ʼaē ʼe leleiʼia ʼe kau kiai te gāue ʼaē ko te fai ʼo he ʼu tisipulo ohage pe ko tana fai.

“Ke koutou nonofo ʼi toku ʼofa”, ko te tokoni mālohi age ʼaia ʼa Sesu. Kae, ʼe feala feafeaʼi tona fai e te kau ʼapositolo te faʼahi ʼaia? “Kapau ʼe koutou tauhi taku ʼu folafola, ko tana ʼui ʼaia, pea ʼe koutou nonofo anai ʼi toku ʼofa.” Pea ina toe hoko atu tana palalau: “Koʼeni taku folafola: ke koutou feʼofaʼaki ia koutou ohage ko taku ʼofa ʼaē kia koutou. ʼE mole he tahi ʼe ina maʼu he ʼofa ʼe lahi ake ʼi te meʼa ʼaenī: ke foaki e he tahi tona nefesi maʼa tona ʼu kaumeʼa.”

ʼI he ʼu hola ka hoko mai, ʼe fakahā ai anai e Sesu te ʼofa ʼaia ʼe mole hona tatau ʼaki tana foaki tona maʼuli maʼa tana kau ʼapositolo, pea mo nātou fuli ʼaē ka nātou tui anai kia te ia. Ko te faʼifaʼitaki ʼaia ʼe ina tuku mai ʼe tonu anai ke ina uga tana kau tisipulo ke nātou femaʼuʼaki te ʼofa ʼaia ʼaē ʼe aʼu ki te foaki ʼo tokita maʼuli. ʼE ko te fakaʼiloga anai ʼaia ʼonatou, ohage ko tona fakahā e Sesu ʼi muʼa atu: “ ʼAki te meʼa ʼaenī ʼe ʼiloʼi fuli ai anai e te hahaʼi ko koutou ko taku ʼu tisipulo: mo kapau ʼe koutou femaʼuʼaki te ʼofa.”

ʼI tana fakamahino ʼaē pe ko ai tona ʼu kaumeʼa, ʼe ʼui maʼa Sesu: “Ko koutou ko toku ʼu kaumeʼa mo kapau ʼe koutou fai te meʼa ʼaē ʼe ʼau fakatotonu atu. ʼE mole ʼau toe fakahigoa koutou ko te kau kaugana, koteʼuhi ʼe mole ʼiloʼi e te tagata kaugana te meʼa ʼaē ʼe fai ʼe tona pule. Kae kua ʼau fakahigoa koutou ko te ʼu kaumeʼa, koteʼuhi he kua ʼau fakaʼilo atu kia koutou ia meʼa fuli neʼe ʼau logo kiai mai taku Tāmai.”

ʼI pilivilesio fakatalakitupua leva: te liliu ko he ʼu kaumeʼa moʼoni ʼo Sesu! Kae moʼo taupau tuʼumaʼu ʼo te ʼu felogoi ʼaia mo ia, ko te kau tisipulo ʼe tonu ke ‘nātou haga fakatupu he ʼu fua’. Kapau ʼe nātou fai, “ko meʼa fuli ʼe koutou kole anai ki te Tāmai ʼaki toku huafa, ʼe ina [foaki atu anai] kia koutou”, ko te ʼui age ʼaia ʼa Sesu. ʼE moʼoni, ʼi fakapale taulekaleka leva ka maʼu anai ʼuhi ko takita fua ʼaki te fua ʼo te Puleʼaga! ʼOsi ʼaia pea toe fakaloto mālohiʼi e Sesu te kau ʼapositolo ke nātou ‘feʼofaʼaki ia nātou’, ʼosi ʼaia pea ina fakamahino age kia nātou ʼe fehiʼa anai te malamanei kia nātou. Kae, ʼe ina fakaloto mālohiʼi ia nātou ʼaki te ʼu palalau ʼaenī: “Kapau ʼe fehiʼa te malamanei kia koutou, ʼe koutou ʼiloʼi neʼe kua fehiʼa ia kia te ʼau ʼi muʼa ʼo tana fehiʼa kia koutou.” ʼOsi ʼaia, pea ina fakahā age te tupuʼaga ʼo te fehiʼa ʼa te malamanei ki tana kau tisipulo, ʼo ʼui maʼana: “Kae ʼi takotou mole kau ʼaē ki te malamanei pea ʼi taku filifili ʼaē ia koutou ʼi te lotolotoiga ʼo te malamanei, ʼe fehiʼa te malamanei kia koutou ʼuhi ko te meʼa ʼaia.”

ʼI tana toe fakamahino lahi age pe koʼe ʼe fehiʼa anai te malamanei kia nātou, neʼe ina toe ʼui age: “ ʼE nātou fai anai kia koutou te ʼu meʼa fuli ʼaia ʼuhi ko toku huafa, koteʼuhi ʼe mole nātou ʼiloʼi ia ia [Sehova ʼAtua] ʼaē neʼe ina fekauʼi mai ʼau.” ʼE moʼoni, ko te ʼu milakulo ʼa Sesu ʼe nātou faka lākahalaʼi ia nātou ʼaē ʼe fehiʼa kia te ia, ohage ko tana ʼui ʼaenī: “Ka na neʼe mole ʼau fai la ia nātou te ʼu gāue ʼaē neʼe mole heʼeki fai e he tahi, ka na ʼaua la neʼe mole ʼi ai hanatou agahala; kae ʼi te temi nei kua nātou sisio pea mo nātou fehiʼa kia te ʼau, ʼo feiā aipe ki taku Tāmai.” Koia, ohage ko tona ʼui e Sesu, ko te folafola ʼaē neʼe tohi kua hoko ia: “Kua nātou fehiʼa kia te ʼau ka mole ʼi ai hona tupuʼaga.”

Ohage pe ko te meʼa neʼe ina fai ʼi muʼa atu, neʼe fakaloto mālohiʼi e Sesu tana kau ʼapositolo ʼaki tana fakapapau age kia nātou ʼe ina tuku mai anai kia nātou te tokoni, ʼaē ko te laumālie maʼoniʼoni, te mālohi gāue ʼo te ʼAtua. “Ko ia ʼaia ʼe fakamoʼoni anai ʼo ʼuhiga mo ʼau; pea mo koutou foki, ʼe tonu ke koutou fakamoʼoni.”

Te ʼu fakatokaga fakaʼosi

Kua vave pe nei te mavae mai ʼa Sesu mo tana ʼu ʼapositolo ʼi te koga fale fata. “Neʼe ʼau tala atu te ʼu meʼa ʼaia ke ʼaua naʼa koutou tūkia”, ko te hoko atu ʼaia ʼo te palalau ʼa Sesu. ʼOsi ʼaia pea ina fakahā age kia nātou te fakatokaga mamafa ʼaenī: “ ʼE kapu anai koutou ʼi te sinakoka. ʼIo, ʼe haʼu te hola ʼaē ka haga ai anai he tahi ʼo fakapogi koutou ʼo ina ʼui anai kua tauhi ia ki te ʼAtua ʼaki he tauhi tapu.”

ʼE ʼiloga mai ia neʼe loloto te hoha ʼo te loto ʼo te kau ʼapositolo ʼi te fakatokaga ʼaia. Logope la neʼe kua ʼosi fakahā age e Sesu ʼe fehiʼa anai te malamanei kia nātou, kae ʼo aʼu mai ki te temi nei neʼe mole heʼeki ina tala fakahagatonu age ʼe matematehi anai ia nātou. “Neʼe mole ʼau tala atu te ʼu meʼa ʼaia ʼi te kamataʼaga, ko tana fakamahino age ʼaia, koteʼuhi neʼe ʼau nofo mo koutou.” Kae, ʼe ko he meʼa lelei foki tana fakamālohiʼi ia nātou ʼaki tana fakahā age te ʼu meʼa ʼaia ʼi muʼa ʼo tana mavae!

“Kae ʼi te temi nei, ko te hoko atu ʼaia ʼo te palalau ʼa Sesu, ʼe ʼau ʼalu kia ia ʼaē neʼe ina fekauʼi mai ʼau, pea ʼe mole he tahi ia koutou ʼe ina fehuʼi mai: ‘ ʼE ke ʼalu kifea?’ ” Neʼe heʼeki faʼa fualoa atu ʼi te afiafi, neʼe nātou fia ʼiloʼi te koga meʼa ʼaē ʼe ʼalu ia ia kiai, kae ʼi te temi nei ʼi te lahi fau ʼo te hoha ʼo tonatou loto ʼi te meʼa ʼaenī neʼe hoki ina fakahā age, ʼe mole kei nātou fakafehuʼi ia ia ki te faʼahi ʼaia. Pea tala ai e Sesu: “ ʼUhi ko taku ʼui atu te meʼa ʼaia, kua fonu tokotou loto ʼi te lotomamahi.” ʼE lotomamahi te kau ʼapositolo heʼe mole gata pe ʼi tanatou hoki ʼiloʼi ʼaē ʼe hoko anai kia nātou te ʼu fakataga fakamataku pea ʼe matematehi anai ia nātou, kae nātou toe lotomamahi foki ko te mavae ʼaē ʼo tonatou Pule ia nātou.

Koia ʼaē ʼe fakamahino age ai e Sesu kia nātou: “ ʼE lelei kia koutou ke ʼau ʼalu. Heʼe kapau ʼe mole ʼau ʼalu, ko te tokoni ʼe mole haʼu anai kia koutou, kae kapau ʼe ʼau ʼalu, pea ʼe ʼau tuku mai anai kia koutou te tokoni.” ʼI tona ʼuhiga tagata neʼe feala pe kia Sesu ke nofo ʼi he koga meʼa e tahi ʼi he moʼi lakaga pe e tahi, kae ka nofo anai ʼi selo ʼe feala anai tana tuku mai te tokoni, ʼaē ko te laumālie maʼoniʼoni ʼo te ʼAtua, ki tana kau tisipulo, ʼi te ʼu potu fuli pe ʼe nātou nonofo ai ʼi te kele. Koia, ko te mavae ʼa Sesu ʼe ʼaoga ʼaupito anai kia nātou.

Ko te laumālie maʼoniʼoni, ko te ʼui ʼaia ʼa Sesu, “ ʼe ina foaki anai ki te malamanei te ʼu fakamoʼoni moʼo faka tui ki ai ʼo ʼuhiga mo te agahala, pea ʼo ʼuhiga mo te faitotonu, pea ʼo ʼuhiga mo te fakamāu”. Ko te agahala ʼa te malamanei, tana mole tui ki te ʼAlo ʼo te ʼAtua, ʼe hā anai ia. Tahi ʼaē meʼa, ko te ʼu fakamoʼoni moʼo faka tui ki ai ʼo ʼuhiga mo te faitotonu ʼa Sesu ʼe fakahā anai ʼaki tana hake ʼaē ki tana Tāmai. Pea, ʼi te mole lavaʼi ʼaē e Satana pea mo te malamanei agakovi ʼaē ʼe ina puleʼi, te maumauʼi ʼo te agatonu ʼa Sesu ʼe ko he fakamoʼoni lelei ʼaia ko te pule ʼo te malamanei kua ʼosi fakamāu pea mo fakatūʼa.

“ ʼE kei lahi te ʼu meʼa ke ʼau fakahā atu, ko te hoko atu ʼaia ʼo te palalau ʼa Sesu, kae ʼe mole feala ke koutou ʼamo ʼi te temi nei.” Ko te tupuʼaga la ʼaia, ʼo tana fakapapau age ʼaē kia nātou ka ina tuku ifo anai te laumālie maʼoniʼoni, te mālohi gāue ʼo te ʼAtua, ko te laumālie ʼaia ʼe tokoni anai kia nātou ke nātou mahino lelei ki te ʼu meʼa ʼaia, ʼo mulimuli pe ki te fealagia ʼaē ʼo tanatou mahino.

Ko te meʼa tāfito ʼaē ʼe mole mahino kiai te kau ʼapositolo, ko te ʼamanaki ʼaē ke mate ia Sesu pea mo tana toe hā age anai kia nātou mokā ʼosi fakatuʼuake anai ia. Koia ʼaē ʼe nātou feʼuiʼaki ai: “Koteā te faka ʼuhiga ʼo tana ʼui mai ʼaenī: ‘ ʼE kei toe siʼipe pea ʼe molemo koutou sisio anai kia te ʼau, pea ʼe kei toe siʼipe pea ʼe koutou toe sisio anai kia te ʼau’, pea: ‘koteʼuhi ʼe ʼau ʼalu ki te Tāmai’?”

ʼE ʼiloʼi e Sesu ʼe nātou fia fakafehuʼi ia ia; koia ʼe ina fakamahino ai: “ ʼE ʼau tala moʼoni atu kia koutou: ʼe koutou fetagihi anai pea ʼe koutou tagilāulau anai, kae ʼe fiafia anai te malamanei; ʼe koutou nonofo anai ʼi te lotomamahi, kae ʼe liliu anai tokotou lotomamahi ko he fiafia.” Ki muli age ʼi te ʼaho pe ʼaia, ʼi te hoʼatā, mokā ʼosi matehi anai ia Sesu, ʼe fakafiafia anai te kau takitaki lotu, kae ʼe tagilāulau anai te kau tisipulo. Kae ʼe liliu anai tonatou lotomamahi ko he fakafiafia mokā ʼosi fakatuʼuake anai ia Sesu. Pea ko tonatou fiafia ʼe hoko atu anai mokā fakafonu anai ia nātou ʼaki te mālohi ke nātou liliu ko tana kau fakamoʼoni, ʼi tana folahi kia nātou te laumālie maʼoniʼoni ʼo te ʼAtua, ʼi te Penikosite.

ʼAki tana fakatatau te ʼaluʼaga ʼo tana kau ʼapositolo ki he fafine ʼe mamahi fānau, ʼe ʼui maʼa Sesu: “Ko he fafine, ka fānau, pea ʼe lotomamahi heʼe kua hoko mai tona hola.” Kae, ʼe ina fakatokagaʼi age, ʼe mole ina toe manatuʼi tona mamahi mokā ʼosi tupu te tamasiʼi. “ ʼE toe feiā mo koutou, ko te ʼui ʼaia ʼa Sesu, moʼo fakaloto mālohiʼi ʼo nātou, ʼe koutou lotomamahi ʼi te temi nei; kae ʼe ʼau toe sio anai kia koutou [mokā ʼosi fakatuʼuake anai ia ʼau], pea ʼe fiafia anai tokotou loto, pea ʼe mole he tahi ʼe ina toʼo anai tokotou fiafia.”

ʼO aʼu ki te temi ʼaia, neʼe mole heʼeki kole e te kau ʼapositolo he meʼa ʼaki te huafa ʼo Sesu, kae ʼi te temi nei, ʼe ina ʼui: “Kapau ʼe koutou kole he meʼa ki te Tāmai, pea ʼe ina foaki atu anai ʼaki toku huafa. (...) Heʼe ko te Tāmai ʼe ʼofa ia kia koutou, koteʼuhi ko koutou, neʼe koutou ʼoʼofa kia te ʼau pea neʼe koutou tui ko ʼau, neʼe ʼau haʼu ko te fakafofoga ʼa te Tāmai. Neʼe ʼau haʼu mai te Tāmai pea neʼe ʼau haʼu ki te malamanei. Pea tahi ʼaē meʼa, ʼe ʼau mavae ʼi te malamanei pea ʼe ʼau ʼalu ki te Tāmai.”

Ko te ʼu palalau ʼa Sesu ʼe fakaloto mālohi ʼaupito ki te kau ʼapositolo. “ ʼI te faʼahi ʼaia ʼe mātou tui neʼe ke haʼu mai te ʼAtua”, ko tanatou ʼui age ʼaia. “Kua koutou tui la ʼi te temi nei? ko te fehuʼi age ʼaia ʼa Sesu. Koʼeni ʼe haʼu te hola, ʼio, kua haʼu, te temi ʼaia ʼe fakamavetevete ai anai koutou takitokotahi ki tona ʼapi, pea ʼe koutou tuku tokotahi anai ʼau.” Logope la te mata faigataʼa ʼo te tui ki te faʼahi ʼaia, neʼe hoko moʼoni ia ʼi te po ʼaia!

“Neʼe ʼau ʼui atu te ʼu meʼa ʼaia ke koutou maʼu te tokalelei mai ia te ʼau”, ko tana ʼui ʼaia. Pea ina fakaʼosi tana palalau: “ ʼI te malamanei, ʼe koutou maʼu te mamahi, kae ke koutou lototoʼa! Kua ʼau mālo ʼi te malamanei.” Neʼe mālo Sesu ʼi te malamanei ʼaki tana fai leleiʼi ia te finegalo ʼo te ʼAtua logope la te faiga ʼaē ʼa Satana pea mo te malamanei ʼaē ʼe ina puleʼi, ke nā maumauʼi tana agatonu.

Te faikole fakaʼosi ʼi te koga fale fata

ʼAki te loloto ʼo tona ʼofa ki tana kau ʼapositolo, ʼe teuteuʼi e Sesu ia nātou ʼo ʼuhiga mo tana mavae ʼaē kua ōvi mai. ʼI te temi nei, ʼi te ʼosi ʼo tana tokoni pea mo fakaloto mālohiʼi ʼo nātou, ʼe ina hiki ake ʼona mata ki te lagi pea ina kole mamahi ki tana Tāmai: “Faka kolōlia tou ʼAlo, koteʼuhi ke faka kolōliaʼi koe ʼe tou ʼAlo, ʼo mulimuli pe ki tau tuku age kia te ia te pule ki te kakano fuli pe, koteʼuhi, kia nātou fuli ʼaē neʼe ke foaki age kia te ia, ke ina foaki age kia nātou te maʼuli heʼegata.”

Te maʼuli heʼegata! ʼE talanoa ia Sesu ki he meʼa taulekaleka. ʼI tana maʼu “te pule ki te kakano fuli pe”, ʼe feala anai ke foaki e Sesu te ʼu tapuakina ʼo tana sakilifisio faitotogi ki te hahaʼi katoa ʼaē ko tonatou ikuʼaga ko te mate. Kae ʼe ina foaki anai te maʼuli heʼegata kia nātou pe ʼaē ʼe leleiʼia e tana Tāmai. ʼI tana fakamatalatala te kupu tāfito ʼaia, ʼaē ko te maʼuli heʼegata, ʼe hoko atu te faikole ʼa Sesu ʼo fēnei:

“Ko te faka ʼuhiga ʼaenī ʼo te maʼuli heʼegata: ke nātou ako te ʼiloʼi, ʼo koe, ʼaē ko te ʼAtua moʼoni tokotahi pe, pea mo ia ʼaē neʼe ke fekauʼi mai, ia Sesu Kilisito.” ʼE moʼoni, ke feala hotatou fakamaʼuli, ʼe tonu ke tou ako ke tou ʼiloʼi ia te ʼAtua pea mo tona ʼAlo. Kae ko he mālama fakaʼatamai ʼe mole feʼauga ia.

ʼE tonu ke tou ʼiloʼi lelei ia te ʼAtua pea mo tona ʼAlo pea mo faiga ke tou kaumeʼa lelei mo nāua. ʼE tonu ke tou manatu ohage ko nāua pea mo sio ki te ʼu meʼa ohage ko tanā sisio kiai. Pea ʼo laka age ʼi te ʼu faʼahi fuli ʼe tonu ke tou faʼifaʼitakiʼi tonā ʼu kalitate ʼaē ʼe mole honatou fakatatau ʼi totatou ʼu vāhaʼa mo te hahaʼi.

ʼE hoko atu te faikole ʼa Sesu: “Neʼe ʼau faka kolōliaʼi koe ʼi te kele, neʼe ʼau fakaʼosi te gāue ʼaē neʼe ke tuku mai ke ʼau fai.” ʼI tana fakahoko ʼaē ʼo tana misio ʼo aʼu mai ki te moʼi temi ʼaia, pea mo tana falala ʼaē ʼe lava lelei anai, neʼe ina kole ki te ʼAtua: “Tāmai, faka kolōliaʼi ʼau ʼi ʼou tafa ʼaki te kolōlia ʼaē neʼe ʼau maʼu ʼi ʼou tafa ʼi muʼa ʼo te fakatupu ʼo te malamanei.” ʼE ina kole ake ke toe tuku ia ia, ʼaki te toe fakatuʼuake, ki te kolōlia ʼaē neʼe ina maʼu ʼi selo ʼi muʼa atu.

Moʼo talanoa fakanounou ki tana gāue tāfito ʼaē ʼi te kele, neʼe ʼui maʼa Sesu: “Neʼe ʼau fakaʼilo tou huafa ki te kau tagata ʼaē neʼe ke foaki mai kia te ʼau mai te lotolotoiga ʼo te malamanei. Neʼe ʼa koe, pea neʼe ke foaki mai kia te ʼau, pea neʼe nātou tauhi tau folafola.” Neʼe fakaʼaogaʼi e Sesu te huafa ʼo te ʼAtua, ia Sehova, ʼi tona minisitelio pea neʼe ina fakahāhā peʼe feafeaʼi te puaki fakalelei ʼo te huafa ʼaia, kae neʼe mole gata ʼaki pe tana fakahāhā te huafa ʼo te ʼAtua ki tana kau ʼapositolo. Neʼe ina toe faigaʼi ke lahi ake tanatou mālama kia Sehova, ki tona ʼuhiga pea mo tana ʼu fakatuʼutuʼu, ʼo toe feiā aipe mo tonatou loto fakafetaʼi ʼaē kia te Ia.

ʼI tana ʼiloʼi ʼaē ko Sehova ʼe Māʼoluga age ia te ia, ko Ia ʼaē ʼe pule kia te ia, neʼe tala e Sesu ʼaki te agavaivai: “Ko te ʼu folafola ʼaē neʼe ke tuku mai kia te ʼau, neʼe ʼau tuku kia nātou, pea neʼe nātou tali, pea neʼe nātou ʼiloʼi moʼoni ai neʼe ʼau haʼu ko tou fakafofoga, pea neʼe nātou tui neʼe ke fekauʼi mai ʼau.”

ʼAki tana fakakeheʼi tana ʼu tisipulo pea mo te hahaʼi, neʼe hoko atu te faikole ʼa Sesu ʼo ʼui maʼana: “ ʼE ʼau faikole ʼo ʼuhiga mo nātou; ʼe mole ʼau faikole ʼo ʼuhiga mo te malamanei, kae ʼo ʼuhiga mo nātou ʼaē neʼe ke foaki mai (...). ʼI taku nofo ʼaē mo nātou, neʼe ʼau leʼoleʼo ia nātou (...); pea neʼe ʼau taupau ia nātou; pea neʼe mole he tahi ia nātou neʼe ʼauha, gata pe ki te foha ʼo te fakaʼauha”, ia Sutasi Isikaliote. ʼI te temi nei, ʼe lolotoga fakahoko e Sutasi tana misio ʼaē ʼe fakatupu fehiʼa, ʼaē ko te lavakiʼi ʼo Sesu. Koia, ʼe ina fakahoko te ʼu lea faka polofeta ʼa te Tohi-Tapu, ka mole ina ʼiloʼi.

“Neʼe fehiʼa te malamanei kia nātou (...), ko te ʼui ʼaia ʼa Sesu. ʼE mole ʼau kole atu ke ke toʼo kehe ia nātou ʼi te malamanei, kae ke ke leʼoleʼo kia nātou ʼuhi ko te agakovi. ʼE mole nātou kau ʼi te malamanei, ohage ko ʼau ʼe mole ʼau kau ʼi te malamanei.” Ko te kau tisipulo ʼa Sesu ʼe nātou nonofo ʼi te malamanei, ʼaē ko te sosiete fakatagata kua fakatuʼutuʼu ʼe pule kiai ia Satana, kae ʼe tonu ke nātou fakamamaʼo tuʼumaʼu mai te malamanei pea mo tana agakovi.

“Fakamaʼoniʼoniʼi ia nātou ʼaki te moʼoni; ko tau folafola ʼe moʼoni”, ko te ʼui ʼaia ʼa Sesu. ʼI henī, ʼe ina fakahigoa te ʼu Tohi faka hepeleo, ʼaē ʼe ina lau tuʼumaʼu, ko te “moʼoni”. Kae, ko te ʼu akonaki ʼaē neʼe ina fai ki tana kau tisipulo pea mo te ʼu meʼa ʼaē ka nātou tohi anai ki muli age ʼaki te laumālie maʼoniʼoni ʼo te ʼAtua, ʼo fakakatoa ko te ʼu Tohi faka keleka faka kilisitiano, ʼe toe kau foki ki te “moʼoni”. Ko te moʼoni ʼaia ʼe feala tana fakamaʼoniʼoniʼi he tahi, ʼo fetogi katoa tona maʼuli pea mo fakaliliu ia ia ko he kilisitiano kua mavae kehe ʼi te malamanei.

ʼI te temi nei, ʼe faikole ia Sesu “ ʼo mole ʼuhiga pe mo nātou ʼaenī, kae ʼo toe ʼuhiga foki mo nātou ʼaē ka tui anai kia [te ia] ʼaki tanatou folafola”. Koia, ʼe faikole ia Sesu ʼo ʼuhiga mo nātou ʼaē ka liliu anai ko tana kau tisipulo fakanofo pea mo ʼihi ʼatu tisipulo ʼaē ka fakatahitahiʼi anai ko he “faga ōvi e tahi”. Koteā te meʼa ʼe ina kole ʼo ʼuhiga mo nātou fuli ʼaia?

“Ke nātou tahi, ohage ko koe, Tāmai, ʼe ke tahi mo ʼau pea ʼe ʼau tahi mo koe, (...) koteʼuhi ke nātou tahi ohage ko taua e ta tahi.” Ko Sesu pea mo tana Tāmai ʼe mole ko he ʼipotasi e tahi, kae e nā lototahi ʼi te meʼa fuli. ʼE faikole ia Sesu ke maʼu e tana kau tisipulo te logo tahi ʼaia, koteʼuhi ke “ ʼiloʼi e te malamanei neʼe ke fekauʼi mai ʼau pea ʼe ke ʼofa kia nātou ohage ko tou ʼofa ʼaē kia te ʼau”.

ʼO ʼuhiga mo nātou ʼaē ka liliu anai ko tana kau tisipulo fakanofo, neʼe fai e Sesu te kole ki tana Tāmai ʼe ʼi selo. Koteā te kole ʼaia? “Ko te potu ʼaē ʼe ʼau ʼi ai, ke nātou toe ʼi ai foki mo ʼau, ke nātou sisio ai ki toku kolōlia, ʼaē neʼe ke foaki mai kia te ʼau, koteʼuhi neʼe ke ʼofa kia te ʼau ʼi muʼa ʼo te fakatupu ʼo te malamanei”, ko tona faka ʼuhiga ʼi muʼa ʼo te fakatupu ʼo te fānau ʼa Atama mo Eva. Ki muʼa atu ʼi te meʼa ʼaia, neʼe ʼofa te ʼAtua ki tona ʼAlo ʼulu tokotahi, ʼaē neʼe liliu ko Sesu Kilisito.

ʼI te fakaʼosi ʼo tana faikole, neʼe toe ʼui fēnei e Sesu: “Neʼe ʼau fakahā age kia nātou tou huafa pea ʼe ʼau fakahā anai, koteʼuhi ko te ʼofa ʼaē neʼe ke ʼofa ʼaki kia te ʼau ke ia nātou, pea mo ʼau ke ʼau tahi mo nātou.” Ki te kau ʼapositolo, ko te ako ʼo te huafa ʼo te ʼAtua, ko tona faka ʼuhiga ko te ʼiloʼi takitokotahi ʼo te ʼofa ʼo te ʼAtua. Soane 14:1 ki te 17:26; 13:27, 35, 36; 10:16; Luka 22:3, 4; Ekesote 24:10; 1 Hau 19:9-13; Isaia 6:1-5; Kalate 6:16; Pesalemo 35:19; 69:4; Tāʼaga Lea 8:22, 30.

▪ Neʼe ʼalu ia Sesu kifea, pea koteā te tali neʼe maʼu e Tomasi ʼo ʼuhiga mo te ala ʼaē moʼo ʼalu kiai?

▪ Koteā te meʼa ia ʼaē neʼe kole age e Filipo kia Sesu?

▪ He koʼe ko ʼaē kua sio kia Sesu ʼe kua toe sio foki ia ki te Tāmai?

▪ Neʼe faka ʼuhiga feafeaʼi te ʼui ʼaē ʼe fai anai e te kau tisipulo ʼa Sesu te ʼu gāue ʼe lahi ake ʼi te ʼu gāue ʼaē neʼe ina fai?

▪ Koteā te faka ʼuhiga ʼo te ʼui ʼaē ʼe mole maʼu he puke ʼa Satana ia Sesu?

▪ Ko te temi fea ʼaē neʼe to ai e Sehova te vite fakatātā, pea ko te temi fea pea mo feafeaʼi te kamata kau ʼa ʼihi ki te vite ʼaia?

▪ ʼI tona fakasiosio lelei, ko te ʼu vaʼa e fia ʼo te vite fakatātā?

▪ Ko te fua feafeaʼi ʼaē ʼe loto e te ʼAtua ke fua ʼaki e te ʼu vaʼa?

▪ E feafeaʼi hatatou liliu ko he ʼu kaumeʼa ʼo Sesu?

▪ He koʼe ʼe fehiʼa te malamanei ki te kau tisipulo ʼa Sesu?

▪ Koteā te fakatokaga ʼaē neʼe fai age e Sesu ʼaē neʼe loloto ai te hoha ʼo te loto ʼo tana kau ʼapositolo?

▪ He koʼe neʼe mole fakafehuʼi e te kau ʼapositolo ia Sesu ʼo ʼuhiga mo te potu ʼaē ʼe ʼalu ia ia kiai?

▪ Koteā te meʼa tāfito ʼaē neʼe mole mahino kiai te kau ʼapositolo?

▪ Ko te lea fakatātā fea ʼaē neʼe fai age e Sesu moʼo fakahā ʼaki ko te lotomamahi ʼo te kau ʼapositolo ʼe liliu anai ko he fiafia?

▪ Maʼa Sesu, koteā te meʼa ʼaē kua vave fai e te kau ʼapositolo?

▪ Neʼe feafeaʼi te mālo ʼa Sesu ʼi te malamanei?

▪ ʼE faka ʼuhiga feafeaʼi te ʼui ʼaē ʼe maʼu e Sesu “te pule ki te kakano fuli pe”?

▪ Koteā te faka ʼuhiga ʼo te ʼui ʼaē ke ako te ʼiloʼi ʼo te ʼAtua pea mo tona ʼAlo?

▪ Neʼe fakahāhā feafeaʼi e Sesu te huafa ʼo te ʼAtua?

▪ Koteā ia “te moʼoni”, pea e feafeaʼi tana ‘fakamaʼoniʼoniʼi’ te kilisitiano?

▪ ʼE faka ʼuhiga feafeaʼi te ʼui ʼaē ko te ʼAtua, tona ʼAlo pea mo te kau atolasio moʼoni ʼa te ʼAtua ʼe nātou tahi?

▪ Neʼe kamata ʼanafea “te fakatupu ʼo te malamanei”?