ʼUluaki Palalau

Kiā Koutou ʼAē ʼe ʼOʼofa Iā Sehova:

Neʼe ʼui fēnei e Sesu: “ ʼE kotou ʼiloʼi . . . anai te moʼoni, pea ko te moʼoni ʼe ina fakaʼāteaina anai koutou.” (Soane 8:32) ʼE ko he ʼu palalau fakalotomālohi ʼaia! ʼEī, ʼe feala ke tou ʼiloʼi ia te moʼoni, māʼiapē lā ʼi te ʼu “ ʼaho fakamuli” faigataʼa ʼaenī ʼaē kua mafola ʼaupitō ai te loi. (2 Timoteo 3:1) ʼE kei kotou manatuʼi koa te temi ʼaē neʼe kotou kamata mahino ai ki te moʼoni, ohagē ko tona fakahā ʼi te Folafola ʼa te ʼAtua? Neʼe ko he toe fiafia lahi neʼe kotou maʼu ʼi te temi ʼaia!

Kae ohagē pē ko te maʼuhiga ʼaē ʼo te maʼu ʼo te ʼatamai mālama totonu ʼo te moʼoni pea mo te kau tuʼumaʼu ki tona tala ʼaē ki te hahaʼi, ʼe tonu foki ke toe ʼalutahi tatatou aga pea mo te moʼoni. Moʼo fai ia te faʼahi ʼaia, ʼe tonu ke tou haga nonofo ʼi te ʼofa ʼo te ʼAtua. Koteā tona fakaʼuhiga? ʼE tou maʼu tona tali ʼi te ʼu palalau ʼaē neʼe fai e Sesu ʼi te pō ʼi muʼa ʼo tona mate. Neʼe ina ʼui fēnei ki tana kau ʼapositolo agatonu: “Kapau ʼe kotou taupau taku ʼu fakatotonu, pea ʼe kotou nonofo anai ʼi toku ʼofa, ohagē pē ko taku taupau te ʼu fakatotonu ʼa te Tamai pea mo au nofo ʼi tona ʼofa.”—Soane 15:10.

Kotou tokagaʼi neʼe nofo Sesu ʼi te ʼofa ʼo te ʼAtua he neʼe fakalogo ki te ʼu fakatotonu ʼo tana Tamai. ʼE toe tatau ʼo ʼuhiga mo tātou iā ʼaho nei. Ke tou nonofo ʼi te ʼofa ʼo te ʼAtua, ʼe tonu ke tou maʼuliʼi ia te moʼoni ʼi te ʼaho fuli pē. ʼI te pō pē ʼaia, neʼe ʼui fēnei e Sesu: “Kapau ʼe kotou ʼiloʼi te ʼu meʼa ʼaia, pea ʼe manūʼia ia koutou mo kapau ʼe kotou fai.”—Soane 13:17.

ʼE matou fakaʼamu moʼoni ke tokoni atu ia te tohi ʼaenī ke kotou haga maʼuliʼi ia te moʼoni pea mo feala ai ke kotou nonofo “ ʼi te ʼofa ʼo te ʼAtua . . . ki te maʼuli heʼegata.”—Suta 21.