Kua Fakatuʼu Te Puleʼaga ʼo Te ʼAtua

Neʼe kamata pule te Puleʼaga ʼo te ʼAtua ʼi te lagi, ʼi te 1914. Pea neʼe toe kamata ai foki mo te ʼu ʼaho fakamuli. ʼE tou iloʼi feafeaʼi te faʼahi ʼaia? ʼUhi pe ko te ʼu lea fakapolofeta ʼi te Tohi-Tapu pea mo te ʼu aluʼaga ʼe tou sio ki ai ʼi te malamanei, talu te taʼu 1914. Tou vakaʼi te ʼu faʼahi fuli ʼaia.

1. Kotea ʼe ui ʼi te ʼu lea fakapolofeta?

Neʼe tala ʼi te tohi ʼo Taniela ʼe kamata pule anai te Puleʼaga ʼo te ʼAtua ʼi te fakaʼosi ʼo “te ʼu temi ʼe fitu.” (Taniela 4:16, 17) ʼI ni sekulo ki muli age, neʼe ui e Sesu ko te temi ʼaia ʼe ko “te temi ʼae kua fakatuʼutuʼu ki te ʼu puleʼaga.” Pea neʼe ina ui ʼe heʼeki ʼosi te temi ʼaia. (Luka 21:24). ʼE tou vakaʼi anai neʼe ʼosi te ʼu temi ʼaia ʼe fitu ʼi te taʼu 1914.

2. Kotea ʼe ke tokagaʼi talu mai te 1914?

Neʼe fehuʼi fenei e te tisipulo ʼa Sesu kia ia: “Kotea anai te fakaʼiloga ʼo tau ʼi heni pea mo te fakaʼosi ʼo te tuʼu ʼo te ʼu faʼahiga meʼa ʼaeni?” (Mateo 24:3) Neʼe tali age e Sesu ka hau pe anai ʼi te Puleʼaga ʼo te ʼAtua ʼi selo, ʼe lahi anai te ʼu aluʼaga ʼe hoko ʼi te kele. Ohage la, ʼe ʼi ai anai ni tau, mo ni hoge pea mo ni mafuike. (Lau ia Mateo 24:7.) ʼE toe fakaha ʼi te Tohi-Tapu te aga ʼa te hahaʼi “ʼi te ʼu ʼaho fakamuli” pea ʼe ‘faigataʼa anai.’ (2 Timoteo 3:1-5) Pea ko te ʼu aluʼaga ʼaia ʼe tou sio ki ai talu mai te taʼu 1914.

3. He koʼe kua ʼasili te agakovi ʼi te malamanei?

Hili pe te fakanofo Hau ʼo Sesu, neʼe tau mo Satana pea mo ʼana temonio. Neʼe mole malo ia Satana. ʼE ui ʼi te Tohi-Tapu “neʼe li ifo ia ia ki te kele mo ʼana aselo.” (Apokalipesi 12:9, 10, 12) ʼE iloʼi e Satana ʼe pulihi anai. Koia ʼe kovi ʼosi tona ita pea ʼe lahi te ʼu mamahi ʼe ina fakatupu ʼi te kele katoa. ʼE tou mahino ai pe koʼe kua lahi te agakovi ʼi te malama ʼaeni. Kae ʼe pulihi anai e te Puleʼaga ʼo te ʼAtua te ʼu aluʼaga fuli ʼaia.

TA FAKALOLOTO

4. Te ʼu lea fakapolofeta ʼo ʼuhiga mo te taʼu 1914

ʼATA VITEO: Neʼe Pule Te Puleʼaga ʼo Te ʼAtua ʼi Te 1914 (5:02)

Neʼe fai e Nepukanesa, te Hau o Papiloni he moemisi mai te ʼAtua. Neʼe fakamahino e Taniela te moemisi ʼaia pea neʼe fakaha ai ʼe fakaʼuhiga kia Nepukanesa pea mo te Puleʼaga ʼo te ʼAtua.—Lau ia Taniela 4:17.a

Lau ia Taniela 4:20-26, pea tali ki te ʼu fehuʼi ʼae ʼe hoa mai. ʼE feala ke tokoni atu te pāki:

• (1) Kotea ʼae neʼe sio ki ai Nepukanesa ʼi tana moemisi?—Vakaʼi te 20 mo 21.

• (2) Kotea ka fai ki te fuʼu ʼakau?—Vakaʼi te vaega 23.

• (3) Kotea ka hoko ʼi te ʼosi ʼo “te ʼu temi ʼe fitu”?—Vakaʼi te vaega 26.

Te Pikipikiga ʼo Te Fuʼu ʼAkau Mo Te Puleʼaga ʼo Te ʼAtua

TE LEA FAKAPOLOFETA (Taniela 4:20-36)

Te pule fakahau

(1) He fuʼu ʼakau lahi

Gata te pule fakahau

(2) ‘Kotou taʼaga te fuʼu ʼakau’ pea tuku ke ‘fakalaka he ʼu temi ʼe fitu’

Te Toe maʼu ʼo te pule fakahau

(3) “ʼE hoki liufaki atu anai tau pule fakahau”

ʼI tona ʼuluaki fakahoko . . .

• (4) Ko ai ʼe ina fakata te fuʼu ʼakau?—Vakaʼi te vaega 22.

• (5) Neʼe gata ʼanafea tana pule fakahau?—Lau ia Taniela 4:29-33.

• (6) Kotea neʼe hoko kia Nepukanesa hili “te ʼu temi ʼe fitu?”—Lau ia Taniela 4:34-36.

TONA ʼULUAKI FAKAHOKO

Te pule fakahau

(4) Ko Nepukanesa, te Hau ʼo Papiloni

Gata te pule fakahau

(5) Hili te taʼu 606 I.M.T.S., neʼe vale leva ia Nepukanesa pea neʼe mole kei feala hana pule lolotaga taʼu e fitu

Te Toe maʼu ʼo te pule fakahau

(6) Kua toe liliu ia Nepukanesa ʼo poto pea ʼe toe kamata pule

ʼI tona lua fakahoko . . .

• (7) Ko ai ʼe ina fakata te fuʼu ʼakau?—Lau ia 1 Koloniko 29:23.

• (8) Neʼe gata ʼanafea tanatou pule fakahau? ʼE tou iloʼi feafeaʼi neʼe mole natou pule ʼi te nofo ʼa Sesu ʼi te kele?—Lau ia Luka 21:24.

• (9) Neʼe fakatuʼu ʼanafea te pule fakahau ʼaia pea ʼifea?

TONA LUA FAKAHOKO

Te pule fakahau

(7) Ko te ʼu hau ʼo Iselaele ʼae ʼe natou fakata te pule ʼa te ʼAtua

Gata te pule fakahau

(8) ʼE maumauʼi ia Selusalemi, ʼo gata ai te pule ʼa te ʼu hau ʼo Iselaele ia taʼu ʼe 2520

Te Toe maʼu ʼo te pule fakahau

(9) ʼE Hau Sesu ʼi te Puleʼaga ʼo te ʼAtua, ʼi selo

5. Neʼe fetogi te malamanei talu mai te 1914

Vakaʼi te ʼATA VITEO.

ʼATA VITEO: Neʼe Fetogi Te Malamanei Talu Mai Te 1914 (1:10)

Neʼe fakakikite e Sesu pe ʼe feafeaʼi anai te malamanei moka Hau. Lau ia Luka 21:9-11 pea fai te fehuʼi ʼaeni:

• Kotea la te ʼu aluʼaga ʼe ke sio ʼe hoko ia ʼaho nei?

Neʼe fakaha e te apositolo ko Paulo pe feafeaʼi anai te hahaʼi ʼi te ʼu ʼaho fakamuli. Lau ia 2 Timoteo 3:1-5, pea fai te fehuʼi ʼaeni:

• Kotea la kua ke tokagaʼi ia ʼaho nei ʼo ʼuhiga mo te hahaʼi?

6. Kotea ʼe tonu ke tou fai?

Lau ia Mateo 24:3, 14, pea fai te ʼu fehuʼi ʼaeni:

• Kotea te gaue maʼuhiga ʼe ha ai ʼe pule nei te Puleʼaga ʼo te Atua?

• ʼE feafeaʼi hau lagolago ki te gaue ʼaia?

Kua pule te Puleʼaga ʼo te ʼAtua pea kua ina vave puleʼi pe te kele katoa. Lau ia Hepeleo 10:24, 25 pea fai te fehuʼi ʼaeni:

• ʼE tou iloʼi kua ‘ovi mai te ʼaho ʼo Sehova,’ koia kotea ʼe tonu ke tou fai?

MANATU TAFITO

ʼE ha ʼi te ʼu lea fakapolofeta mo te ʼu aluʼaga ʼe hoko ʼi te malamanei kua fakatuʼu te Puleʼaga ʼo te ʼAtua. ʼE tou tui papau ki te faʼahi ʼaia koia ʼe tou faifakamafola ai mo kau ki te ʼu fono.

Fehuʼi Fakamanatu

• Kotea neʼe hoko hili te ʼu temi ʼe fitu ʼo te lea fakapolofeta ʼa Taniela?

• He koʼe ʼe ke tui papau neʼe kamata pule te Puleʼaga ʼo te ʼAtua ʼi te 1914?

• Kapau ʼe ke tui kua fakatuʼu te Puleʼaga, kotea anai ʼe ke fai?

TE TAHI ʼU MANATU

Ko he kau tagata popoto ʼe natou fakaha te ʼu fetogi neʼe hoko ʼi te malamanei talu mai te taʼu 1914.

“Depuis quand ce déclin brutal” (Réveillez-vous!, avril 2007)

Neʼe fetogi te maʼuli ʼa he tagata ʼuhi ko tana lau te lea fakapolofeta ʼae ia Mateo 24:14.

“Neʼe Au Leleiʼia Te Base-ball ʼo Laka Age Ia Meʼa Fuli” (Ko Te Tule Leʼo N° 3 2017)

ʼE tou iloʼi feafeaʼi ko te lea fakapolofeta ʼa Taniela ʼe fakaʼuhiga ki te Puleʼaga ʼo te ʼAtua?

“Quand le Royaume de Dieu a-t-il commencé à régner? (1^re partie)” (Ko Te Tule Leʼo (Fakafalani) ʼaho 1 ʼo Oketopeli 2014)

ʼE tou iloʼi feafeaʼi neʼe ʼosi “te ʼu temi ʼe fitu” ʼae ʼe talanoa ki ai te kapite 4 ʼo Taniela ʼi te 1914?

“Quand le Royaume de Dieu a-t-il commencé à régner ? (2^e partie)” (Ko Te Tule Leʼo (Fakafalani) ʼaho 1 ʼo Novepeli 2014)