Novepeli

Kapau ʼe ke maʼu fanau, tokoni kia natou ke fai hanatou tali ʼe alu tahi mo tonatou taʼu. ʼI ʼihi temi, ʼe talanoa he alatike ako ki he ʼu manatu maʼa te hahaʼi lalahi, ohage ko te fihifihia ʼi te maʼuli fakataumatuʼa peʼe ko te maʼa ʼi te ʼu aga ʼae ʼe tonu ke fai. Kae ʼe ʼi ai pe anai he palakalafe ʼe tahi peʼe lua ʼe feala ke tali ai te fanau. Pea toe tokoni age ke natou mahino pe koʼe ʼe mole hinoʼi tuʼumaʼu anai natou moka hiki tonatou nima. ʼI tau fakamahino age ʼaia, ʼe mole natou lotomamahi anai moka hinoʼi he tahi kehe ke fai hana tali. (1 Tim. 6:18) ʼE tou lava teuteuʼi fuli he ʼu tali ʼe fakakololiaʼi ai ia Sehova pea fakalotomalohiʼi ai ʼotatou tehina mo tuagaʼane. (Taag. 25:11) Logo la ʼi ʼihi temi ʼe feala ke tou fakamatala he aluʼaga neʼe hoko kia tatou, kae ʼaua naʼa tou palalau fau huʼu mo tatou. (Taag. 27:2; 2 Ko. 10:18) Kae tou faiga ke tou palalau tafito ʼi ʼatatou tali ʼo ʼuhiga mo Sehova, mo tana Folafola pea mo ʼana kaugana fuli.—Apk. 4:11. w23.04 24-25 ¶17-18

ʼE maʼuhiga te ʼofa ke tou nofo ʼalaʼala pea ke tou fakapotopoto. (Mat. 22:​37-39) Kotea pe he fihifihia ʼe feala ke hoko ʼi tatatou faifakamafola, kae ʼe tokoni mai totatou ʼofa ki te ʼAtua ke hoko atu tatatou gaue. (2 Tim. 1:​7, 8) ʼUhi ʼae ʼe tou ʼoʼofa ki te hahaʼi ʼae ʼe mole tauhi kia Sehova, ʼe tou haga faifakamafola pea mo faitelefoni peʼe tou faitohi. ʼE tou falala ʼe fetogi anai te hahaʼi ʼi he ʼaho pea mo natou kamata fai te meʼa ʼae ʼe totonu. (Esk. 18:​27, 28) ʼE tou toe ʼoʼofa ki ʼotatou tehina mo tuagaʼane. ʼE tou fakaha te ʼofa ʼaia moka tou “fefakalotomalohiʼaki pea mo fetokoniʼaki.” (1 Tes. 5:11) ʼE tou fefakalotomalohiʼaki ohage pe ko he kau solia ʼe natou fetokoniʼaki ʼi te tau. ʼE mole tou fia fakamamahiʼi hotatou tehina peʼe tuagaʼane, peʼe tou liufaki te kovi ʼaki te kovi. (1 Tes. 5:​13, 15) ʼE tou toe fakaha te ʼofa moka tou fakaʼapaʼapa ki te ʼu tehina ʼae ʼe natou takitaki te kokelekasio.—1 Tes. 5:12. w23.06 10 ¶6; 11 ¶10-11

Ko te ʼuluaki faʼahi ʼae ka tokoni mai ke malohi tatatou tui, ʼe ko te metitasio ki te sakilifisio ʼo Sesu. ʼE ko te fakamoʼoni ʼaia ʼe hoko anai te ʼu fakapapau ʼa Sehova. Ka tou fakakaukau lelei ki te ʼu tupuʼaga ʼo te foaki mai e te ʼAtua te sakilifisio ʼaia, pea mo te ʼu aluʼaga neʼe ina ʼutakiʼi, ʼe toe malohi age ai tatatou tui ki tana fakapapau ʼae ke tou maʼuʼuli ʼo heʼe gata ʼi he malama ʼe lelei age. He koʼe ʼe feala ke tou ui te faʼahi ʼaia? Tou fakakaukauʼi pe kotea ʼae neʼe ʼutakiʼi e Sehova. Neʼe ina fekauʼi mai tona ʼAlo ʼulu tokotahi ʼae ʼe ʼofa mamahi ai mo felogoi lelei mo ia, ke haʼu ʼo tupu tagata ʼi te kele pea ke liliu ko he tagata haohaoa. ʼI tana maʼuli ʼi te kele, neʼe katakiʼi e Sesu te ʼu ʼahiʼahi kehekehe pea neʼe mamahi ʼaupito ʼi tona mate. ʼE mahino ia, ʼe mole tuku anai e totatou ʼAtua ʼofa ke mamahi tona ʼAlo pea ke mate, kehe pe ke tou maʼu he maʼuli lelei kae nounou. (Soa. 3:16; 1 Pet. 1:​18, 19) ʼUhi ʼae neʼe foaki mai e Sehova tona ʼAlo ʼofaina moʼo tokoni mai, ʼe ina fakahoko pe anai tana fakapapau ʼae ke tou maʼuʼuli ʼo heʼe gata ʼi te malama foʼou. w23.04 27 ¶8-9

ʼE loto moʼoni koa ia Sehova ke ina fakatuʼuake te kau mate? ʼEi ʼe mahino ia. Neʼe ina takitaki ʼihi tagata ke natou tohi ʼi te Tohi-Tapu tana fakapapau ʼo ʼuhiga mo te fakatuʼuake. (Esa. 26:19; Apk. 20:​11-13) Pea ka fai e Sehova he fakapapau ʼe ina fakahoko tuʼumaʼu pe. (Sos. 23:14) ʼI tona fakahagatonu ʼe fakaʼamu lahi ke ina fakatuʼuake te kau mate. Manatuʼi te ʼu palalau ʼae neʼe fai e te pateliaka ko Sopo. Neʼe tui papau kapau ʼe mate ʼe fakaʼamu lahi anai ia Sehova ke toe maʼuli ake. (Sopo 14:​14, 15) ʼE toe tatau tana fakaʼamu ki ʼana kaugana ʼae kua mamate. ʼE loto moʼoni ke ina fakatuʼuake natou ke natou fiafia mo maʼuli malolo. Kae ʼe feafeaʼi ki te toko lauʼi miliale hahaʼi ʼae kua mamate kae neʼe heʼeki natou iloʼi te moʼoni ʼo ʼuhiga mo ia? ʼE loto e totatou ʼAtua fonu ʼi te ʼofa ke ina toe fakatuʼuake mo natou. (Gaue 24:15) ʼE ina fia foaki kia natou te faigamalie ʼae ke natou liliu ko hona ʼu kaumeʼa pea ke natou maʼuʼuli ʼo heʼe gata ʼi te kele.—Soa. 3:16. w23.04 9 ¶5-6

Kotea ʼae ʼe feala ke ke fai ke malohi age tau ʼamanaki? Kapau ʼe ke ʼamanaki maʼuli ʼo heʼe gata ʼi te kele, ʼe feala ke ke lau te ʼu fakamatala ʼi te Tohi-Tapu ʼo ʼuhiga mo te Palatiso mo ke metitasio ki ai. (Esa. 25:8; 32:​16-18) Fakakaukauʼi pe ʼe feafeaʼi anai te maʼuli ʼi te malama foʼou, ke hage kia koe kua ke maʼuli ʼi ai. Kapau ʼe ke manatuʼi tuʼumaʼu tau ʼamanaki ʼae ke ke maʼuli ʼi te malama foʼou, pea ʼe hage anai kia koe ʼou mamahi ʼe “fakatemi pea mo . . . maʼamaʼa.” (2 Ko. 4:17) ʼE ke malohi anai ʼuhi ko te ʼamanaki ʼaia ʼe foaki atu e Sehova. Kua fai e Sehova he ʼu fakatuʼutuʼu ke ke maʼu ai te malohi. Koia, ka ʼaoga atu he tokoni ke ke fakahoko he gaue, peʼe ke ke katakiʼi ai he faigataʼaʼia, peʼe ke ke taupau tou fiafia, faikole fakamalotoloto kia Sehova pea mo fai tau ako tokotahi ke ke maʼu ai te tokoni. Tali te ʼu fakalotomalohi mai ʼou tehina mo tuagaʼane. Haga manatuʼi tuʼumaʼu tau ʼamanaki. Pea ʼe ‘fakamalohiʼi anai koe ʼaki te mafimafi ʼo te ʼAtua, ke feala ai hau ʼutakiʼi ia meʼa fuli pea mo ke kataki fualoa ʼi te fiafia.’—Kol. 1:11. w23.10 17 ¶19-20

ʼE lahi te ʼu tupuʼaga ke tou fakamalo ai kia Sehova ʼi te faikole. ʼE feala ke tou fakamalo kia te ia ʼuhi ko te ʼu meʼa lelei fuli ʼae ʼe tou maʼu, he ʼe ko te ʼu meʼa ʼofa lelei fuli ʼe haʼu mai ia te ia. (Sakp. 1:17) Ohage la, ʼe feala ke tou fakaha totatou lotofakafetaʼi ki te taulekaleka ʼo te kele mo te matalelei ʼo te fakatupu. ʼE feala ke tou toe fakaha totatou lotofakafetaʼi kia te ia ʼuhi ko totatou maʼuli, totatou famili, ʼotatou kaumeʼa, pea mo totatou ʼamanaki. Pea ʼe tou fia fakamalo kia Sehova ʼi tana fakafealagia ʼae ke tou fakakaumeʼa lelei mo ia. ʼE lagi tonu ke tou faiga malohi ʼo fakakaukauʼi he ʼu faʼahi ke tou fakamalo ai kia Sehova. Kotea tona tupuʼaga? He ʼe tokolahi ʼi te malama ʼaeni ʼe mole lotofakafetaʼi. ʼE tokaga tafito pe natou ki te meʼa ʼae ʼe natou fia maʼu, kae mole natou fakakaukauʼi pe ʼe feafeaʼi hanatou fakamalo ki te ʼu meʼa ʼae kua natou maʼu. ʼE iloga anai kua tou kamata faʼifaʼitakiʼi tanatou aga ʼaia, mo kapau ʼe tou kole tuʼumaʼu pe kia Sehova he ʼu meʼa ʼi ʼatatou faikole. Ke mole liliu ʼo feia ʼatatou faikole, ʼe tonu ke tou fakaha tuʼumaʼu totatou lotofakafetaʼi ki te ʼu meʼa fuli neʼe fai e Sehova maʼa tatou.—Luka 6:45. w23.05 4 ¶8-9

Ko Sehova ʼe ko tatatou Tamai ʼofa. Koia ʼe mole ina loto ai ke tou mamahi. (Esa. 63:9) Kae ʼe mole ina haofaki anai tatou mai te ʼu fihifihia fuli, ʼae ʼe feala ke hage ko ni vai tafe peʼe ko he ʼu afi. (Esa. 43:2) ʼE ina fakapapau mai ʼe tokoni mai anai ke tou “fakalaka” ai, peʼe ke tou lava tauʼi. Pea ʼe toe tokoni mai ke malohi tuʼumaʼu pe ʼatatou felogoi mo ia logo la te ʼu faigataʼaʼia. Tahi ʼae, ʼe ina foaki mai tona laumalie maʼoniʼoni ʼae ʼe malohi ke tou faʼa kataki. (Luka 11:13; Flp. 4:13) Koia, ʼe feala ke tou falala ʼe foaki tuʼumaʼu mai pe e Sehova te meʼa ʼae ʼe ʼaoga kia tatou ke tou faʼa kataki pea mo nonofo agatonu kia te ia. ʼE loto e Sehova ke tou falala kia te ia. (Hep. 11:6) ʼI ʼihi temi, ʼe lagi tou manatu ʼe mole tou lava tauʼi anai he faigataʼaʼia. Pea ʼe lagi mole kei tou loko tui ʼe tokoni mai anai ia Sehova. Kae ʼe fakapapau mai ʼi te Tohi-Tapu, ʼe foaki mai anai e te ʼAtua te malohi ʼae ka tokoni mai ke tou “kake ʼi he foʼi kaupa.” (Pes. 18:29) Koia, ʼaua naʼa tou lotolotolua kae tou faikole mo tui ʼe tali mai anai Sehova ki ʼatatou faikole.—Sakp. 1:​6, 7. w23.11 22 ¶8-9

Ko he fakamatala matalelei ʼaia ʼi te Tohi-Tapu ʼo te ʼofa moʼoni. Pea ʼe fakalotofimalie ki he taumatuʼa he ʼe ha ai ʼe feala ke malohi tuʼumaʼu tanā feʼofaʼaki. ʼE tonu ke faiga malohi he taumatuʼa ke malohi tuʼumaʼu tanā feʼofaʼaki. ʼE hage pe ko he afi, ke mu tuʼumaʼu ʼe maʼua ke hokohoko. He ʼe ka mole fai te faʼahi ʼaia, pea ʼe mate anai. ʼO toe feia pe, ʼe feala ke fefakahaʼaki tuʼumaʼu e he taumatuʼa he ʼofa ʼe malohi, moka ʼe nā tokaga ki ai. ʼI ʼihi temi, ʼe lagi tokagaʼi e ʼihi taumatuʼa kua vaivai tanā feʼofaʼaki, tafito la moka nā tau mo ni fihifihia fakapaʼaga, te mahaki, peʼe ko te hoha ʼo te taupau fanau. Ke taupau ke malohi te “afi mai ia Sehova,” ʼe tonu ke faiga malohi te tagata pea mo te fafine ʼohoana ke lelei ʼanā felogoi mo Sehova. w23.05 20-21 ¶1-3

Kotea ʼae ʼe tonu ke tou fai ke lahi age tatatou lototoʼa? ʼE feala ke fakalotomalohiʼi tatou e ʼatatou matuʼā ke tou lototoʼa. Kae kapau ʼe lototoʼa ʼatatou matuʼā, ʼe mole fakaʼuhiga leva ʼe tou toe lototoʼa anai mo tatou. ʼE mole hage ko te tuku holo ʼa he ʼu matuʼā he tofiʼa ki ʼanā fanau. ʼE tou ako ke tou lototoʼa ohage ko tatatou ako he gaue. Ke tou popoto ʼi te fai ʼo he gaue, ʼe tonu muʼa ke tou sioʼi tatatou faiako, pea tou faʼifaʼitakiʼi leva. ʼO toe feia pe, ʼe tou ako ke tou lototoʼa moka tou tokagaʼi pe neʼe fakaha feafeaʼi e ʼihi te kalitate ʼaia, pea mo tou faʼifaʼitakiʼi leva natou. Ohage ko Taniela, ʼe tonu ke tou iloʼi lelei te Folafola ʼa te ʼAtua. ʼE tonu ke malohi ʼatatou felogoi mo Sehova, ʼo tou haga tuʼumaʼu kia te ia ʼi te faikole pea mo avahi totatou loto. Pea ʼe tonu foki ke tou falala kia te ia, ʼo tou tui papau ʼe tokoni mai. ʼI te temi ʼae ka ʼahiʼahiʼi ai tatatou tui, ʼe tou lototoʼa anai. ʼI te agamahani, ʼe fakaʼapaʼapaʼi he tahi ʼe lototoʼa. Pea ʼe feala ke uga ai ʼihi ke natou fia iloʼi ia Sehova. Koia, ʼe lahi ni tupuʼaga lelei ke tou lototoʼa. w23.08 2 ¶2; 4 ¶8-9

ʼI te Fakakeleka, ko te kupu “vakavakaʼi fakalelei” neʼe fakaʼaogaʼi moʼo palalau ki te faʼahiga vakavakaʼi ʼo te aulo peʼe ko te siliva ke iloʼi pe ʼe moʼoni. Koia, ʼe tonu ke tou vakavakaʼi fakalelei te ʼu meʼa ʼae ʼe tou logo ki ai peʼe ko ʼae ʼe tou lau, ke tou iloʼi ai pe ʼe moʼoni. ʼE toe maʼuhiga age kia tatou ʼi te ovi mai ʼo te mamahi lahi. ʼAua naʼa tou hoko tui ki te ʼu palalau ʼa ʼihi, kae tou fakaʼaogaʼi ʼotatou fealagia fakakaukau moʼo fakatatau te ʼu meʼa ʼe tou lau peʼe ko ʼae ʼe tou logo ki ai mo te meʼa ʼe akoʼi mai ʼi te Tohi-Tapu pea mo te kautahi ʼa Sehova. ʼE mole kakaʼi ai anai tatou e te ʼu logo ʼae ʼe haʼu mai te kau temonio. (Taag. 14:15; 1 Tim. 4:1) Kua tou iloʼi ʼe hao anai te hahaʼi ʼa te ʼAtua ʼi te mamahi lahi. Kae ʼe mole tou iloʼi pe kotea ka hoko kia tatou takitokotahi ʼi te ka haʼu. (Sakp. 4:14) Ko te faʼahi ʼe tou tui papau ki ai, pe ʼe tou fakalaka maʼuli ʼi te mamahi lahi peʼe tou mamate ʼi muʼa ʼo tona hoko mai, ʼe foaki mai anai te maʼuli heʼe gata mo kapau ʼe tou nonofo agatonu. ʼOfa pe ke tou sioʼi fakamamaʼu tatatou ʼamanaki taulekaleka pea ke tou nofo teuteu ki te ʼaho ʼo Sehova! w23.06 13 ¶15-16

ʼE ʼi ai ʼihi lea fakapolofeta ʼe mole tou iloʼi pe hoko feafeaʼi anai. (Tan. 12:​8, 9) Kae ʼe mole fakaʼuhiga leva ʼe mole hoko anai he lea fakapolofeta he ʼe mole tou mahino pe hoko feafeaʼi anai. ʼE tou tui papau, ʼe fakaha mai anai e Sehova te meʼa ʼae ʼe tonu ke tou iloʼi ʼi tona temi totonu, ohage pe ko tana fai ʼi te temi muʼa. Ka ʼosi tala anai te logo “tokalelei pea mo fimalie” ʼe ʼohofi pea mo maumauʼi anai te ʼu lotu hala e te ʼu malohi fakapolitike ʼo te malama ʼaeni. (1 Tes. 5:3; Fkha. 17:​16, 17) Hili ʼaia, ʼe natou tauʼi anai te ʼu kaugana ʼa Sehova. (Esk. 38:​18, 19) Pea ʼe kamata ai anai te tau fakamuli ʼae ko Alamaketone. (Fkha. 16:​14, 16) ʼE feala ke tou tui papau kua vave hoko mai pe te ʼu aluʼaga ʼaia. ʼI tatatou talitali ki ai, tou haga fakaha tatatou lotofakafetaʼi ki tatatou Tamai ʼofa ʼae ʼi selo. ʼE tou fakaha tatatou lotofakafetaʼi moka tou ako te ʼu lea fakapolofeta pea mo fakalotomalohiʼi ʼihi ke natou fai feia. w23.08 13 ¶19-20

Neʼe talanoa ia te apositolo ko Paulo ki te tui, mo te ʼamanaki pea mo te ʼofa. Pea neʼe ina fakaʼosi leva tana palalau ʼo ina ui fenei: “Ko ia ʼae ʼe lahi ʼi te ʼu [kalitate] ʼaia ʼe ko te ʼofa.” (1 Ko. 13:13) He koʼe neʼe ui e Paulo ia te faʼahi ʼaia? ʼI te ka haʼu, ʼe mole kei ʼaoga anai ke tou tui ki te ʼu fakapapau ʼa te ʼAtua ʼo ʼuhiga mo he malama foʼou peʼe ke tou ʼamanaki ʼe ina fakahoko anai te ʼu fakapapau ʼaia, he ʼe ʼi te temi ʼaia, ʼe kua hoko fuli anai. Kae ʼe hoko atu pe anai tatatou ʼoʼofa kia Sehova pea mo te hahaʼi. Pea ʼe haga tuputupu anai totatou ʼofa ʼaia ʼo talu ai. Pea tahi, ʼe tou fakaha ai ko tatou ko te ʼu Kilisitiano moʼoni. Neʼe ui fenei e Sesu ki ʼana apositolo: “ ʼAki te faʼahi ʼaia, ʼe iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.” (Soa. 13:35) Pea ka tou feʼofaʼaki, ʼe tou taupau ai totatou logo tahi. Neʼe ui e Paulo ko te ʼofa “ ʼe ina fakatahiʼi te hahaʼi ʼi hona faʼahiga aluʼaga ʼe lelei tukupau.” (Kol. 3:14) Neʼe tohi fenei e te apositolo ko Soane ki ʼona tehina mo tuagaʼane: “Ko ia ʼae ʼe ʼofa ki te ʼAtua ʼe tonu foki ke ʼofa ki tona tehina.” (1 Soa. 4:21) Koia, ka tou feʼofaʼaki ʼe tou fakaha ai ʼe tou ʼoʼofa ki te ʼAtua. w23.11 8 ¶1, 3

ʼI te Tohi-Tapu, ʼe fakata te maʼuli ʼo te kau Kilisitiano ki he lele. Ko natou ʼae ʼe lele ʼo kaku ki tona fakaʼosi, ʼe natou maʼu anai te fakapale ʼae ko te maʼuli heʼe gata. (2 Tim. 4:​7, 8) ʼE tonu ai ke tou faiga malohi ke hoko atu tatatou lele, tafito la he ʼe kua tou vave kaku ki tona fakaʼosi. Neʼe fakaha mai e te apositolo ko Paulo pe kotea ka tokoni mai ke tou fakaʼosi tatatou lele. Neʼe ina ui ke tou “liakī . . . ia meʼa mamafa fuli” pea ke “tou faʼa kataki ʼo lele ʼi te lele ʼae neʼe tuku mai ki ʼotatou muʼa.” Neʼe mole fia ui mai e Paulo ʼe mole he ʼamoga ʼe tonu ke ʼamo e he Kilisitiano. Kailoa, kae neʼe ina fia ui mai ke tou liʼaki te ʼu meʼa mamafa fuli ʼae ʼe mole ʼaoga. ʼE feala ke talolo tatatou lele ʼuhi ko te ʼu meʼa mamafa ʼaia pea mo tou gaʼegaʼe ai. Ke tou faʼa kataki ʼo lele, ʼe tonu ke tou iloʼi te ʼu meʼa mamafa ʼaia pea ke tou liʼaki. Kae ʼi te tahi age faʼahi, ʼe mole tou fia liʼaki te ʼu ʼamoga ʼae ʼe tonu ke tou ʼamo, he ʼe kapau ʼe tou fai te faʼahi ʼaia, ʼe mole kei feala anai hatatou kau ki te lele.—2 Tim. 2:5. w23.08 26 ¶1-2

Ko he tahi ʼe fakapotopoto ʼe fakaʼapaʼapa ki te manatu ʼa ʼihi. Ohage la, ko ʼihi tuagaʼane ʼe natou fai vali kula kae mole feia ʼihi. Ko ʼihi Kilisitiano ʼe natou inu kava fakapotopoto kae fakafisi ʼihi. Pea ʼe feala ke filifili e te kau Kilisitiano he ʼu faitoʼo kehekehe he ʼe mole natou fia mahahaki. Kapau ʼe tou tui papau ʼe lelei te ʼu meʼa ʼae ʼe tou filifili pea mo tou fakamaʼua ki te ʼu tehina mo tuagaʼane ke natou mulimuli ki ai, ʼe feala ke natou tukia ai pea mo fakatupu maveuveu ʼi te loto kokelekasio. (1 Ko. 8:9; 10:​23, 24) Ohage la, neʼe mole tohi e Sehova pe ko te ʼu mutuʼi meʼa fea ʼae ʼe lelei mo ʼae ʼe kovi. Kae ʼe ina tuku mai he ʼu pelesepeto ke tou filifili lelei. Ka sisio mai te hahaʼi ki tatatou faʼahiga teuteu, pea ʼe tonu ke natou fakakololiaʼi ai te ʼAtua. ʼE tou fakaha ʼe tou “fakapotopoto” moka tou filifili ʼotatou mutuʼi meʼa pea mo he ʼu teu ʼe fakapoipoi. (1 Tim. 2:​9, 10) Koia, ʼe mole tou kumi anai ke tokagaʼi tatou e te hahaʼi. Pea tahi ʼae, kapau ʼe maʼuhiga age ki te ʼu tagata ʼafeā te ʼu pelesepeto ʼi te Tohi-Tapu, ʼe mole natou fakatuʼu anai ni lekula ʼo ʼuhiga mo te faʼahiga teuteu pea mo te faʼu ʼo te ʼulu. w23.07 23-24 ¶13-14

Neʼe fakaha mai e Sehova pe ʼe feafeaʼi hatatou maʼu he ka haʼu fiafia. Ko natou ʼae ʼe natou tali te fakaafe ʼa te fafine logoaʼa mo “agavale” ʼe natou fia maʼu he fiafia ʼi te fai ʼo te ʼu aga heʼe ʼaoga. ʼE taki natou ki “te ʼu potu loloto ʼo te Faitoka.” (Taag. 9:​13, 17, 18) ʼE kehe age te aluʼaga ʼae ʼo natou ʼae ʼe natou tali te fakaafe ʼa te fafine ʼae ʼe ina fakata “te poto moʼoni”! (Taag. 9:1) ʼEi, ʼe akoʼi tatou ke tou ʼoʼofa ki te ʼu meʼa ʼae ʼe ʼofa ki ai ia Sehova pea ke tou fehihiʼa ki te ʼu meʼa ʼae ʼe fehiʼa ki ai. (Pes. 97:10) Pea ʼe tou fiafia ʼi te fakaafe ʼo te hahaʼi ke natou maʼu te ʼu fua lelei mai “te poto moʼoni.” ʼE hage “ ʼe tou kalaga ʼi te ʼu potu maʼoluga ʼo te kolo: ‘Hahaʼi ʼae ʼe hoko tui, kotou ʼomai ki heni.’ “ Ko te ʼu lelei ʼae ʼe tou maʼu ʼo feia mo natou ʼae ʼe natou tali te fakaafe ʼaia, ʼe mole gata pe ʼi te temi nei. Kae ʼe heʼe gata, he ʼe feala ai ke tou “maʼuʼuli” ʼo heʼe gata “ ʼo mulimuli ki te ʼatamai ʼae kua [tou] maʼu.”—Taag. 9:​3, 4, 6. w23.06 24 ¶17-18

ʼE ke hoha koa moka fehuʼi atu e he tahi ʼi tou fale gaue peʼe ʼi te fale ako ʼo ʼuhiga mo te ʼu akonaki ʼae ʼe ke tui ki ai? Tokolahi ia tatou ʼe tou feia. Kae ko te fehuʼi ʼae ʼe ina fai atu ʼe lagi ko he faigamalie ke ke iloʼi ai tana manatu, peʼe ko te ʼu faʼahi ʼe tui ki ai. Pea lagi feala anai hau faifakamafola ki ai. ʼI te tahi age faʼahi, ʼe feala ke faifehuʼi mai he tahi he ʼe fia fihi pe ia mo tatou. ʼE mole tou punamaʼuli ki ai. ʼE lahi te ʼu loi ʼe feʼaveʼaki ʼo ʼuhiga mo te ʼu faʼahi ʼae ʼe tou tui ki ai. (Gaue 28:22) Pea ʼe tou maʼuʼuli ʼi “te ʼu ʼaho fakamuli,” ʼe ko he temi ʼe “mole . . . maʼuli felogoi” ai te hahaʼi pea mo natou “fekai.” (2 Tim. 3:​1, 3) ʼE lagi ke feʼekeʼaki: “Ka fakafihiʼi e he tahi te ʼu akonaki Fakatohi-tapu ʼae ʼe au tui ki ai, ʼe feafeaʼi haku tali age ʼaki he fakaʼeteʼete mo he agalelei?” ʼE ʼaoga atu anai te agamalū. Ko he tahi ʼe agamalū ʼe mole ita vave pea ʼe lotololomi moka fakafeagai he tahi ki ai peʼe moka mole ina iloʼi pe feafeaʼi hana tali. w23.09 14 ¶1-2

ʼI ʼihi temi, ʼe foaki mai e te kautahi he ʼu tokoni moʼo ʼotatou puipui mai te fia maʼu koloa pea mo he ʼu gaue ʼe fakafeagai ki te lao ʼa te ʼAtua. Pea ʼe tapuakiʼi tatou moka tou muliʼi te tokoni ʼaia. (Esa. 48:​17, 18; 1 Tim. 6:​9, 10) ʼE tou tui papau ʼe hoko atu pe e Sehova tana fakaʼaogaʼi he ʼu tagata moʼona fakafofoga, ke natou foaki he ʼu tokoni lolotoga te mamahi lahi pea lolotoga ia Taʼu ʼe Afe. (Pes. 45:16) ʼE tou hoko atu koa tatatou muliʼi te takitaki ʼaia? ʼE faigafua anai hatatou fai te faʼahi ʼaia, mo kapau ʼe tou muliʼi te takitaki ʼa Sehova ʼi te temi nei. Koia, tou haga muliʼi te takitaki ʼa Sehova, pea ʼe kau ai mo te takitaki ʼae ʼe haʼu mai te ʼu tagata ʼae neʼe fakanofo ke tokakaga kia tatou. (Esa. 32:​1, 2; Hep. 13:17) Pea ka tou fai feia, ʼe tou falala katoa ai ki totatou Takitaki lahi ʼae ko Sehova, ʼe ina puipui anai tatou mai te ʼu tuʼutamaki fakalaumalie, ʼo ina taki ai tatou ki te maʼuli heʼe gata ʼi te malama foʼou. w24.02 25 ¶17-18

Neʼe fiafia te apositolo ko Paulo ʼi tana tauhi kia Sehova. Kae neʼe lahi te ʼu faigataʼaʼia neʼe tau mo ia. ʼI ʼihi temi, neʼe loaloaga tana faifolau, pea neʼe feala ke tuʼutamaki ai. Ohage la, neʼe tau hoko kia ia “he ʼu tuʼutamaki ʼi te ʼu vai tafe, [pea] mai te hahaʼi kaihaʼa.” Pea neʼe toe ta ia ia e ʼona fili. (2 Ko. 11:​23-27) Pea ko ʼihi Kilisitiano neʼe mole natou lotofakafetaʼi ki tana ʼu gaue ʼae neʼe ina fai moʼo tokoni kia natou. (2 Ko. 10:10; Flp. 4:15) Kotea ʼae neʼe tokoni kia Paulo ke hoko atu tana tauhi kia Sehova? Neʼe iloʼi lelei e Paulo ia Sehova ʼuhi he neʼe ina lau te ʼu Tohi Taputapu pea mo te ʼu aluʼaga ʼae neʼe hoko kia ia. Neʼe tui papau ai ʼe ʼofa Sehova ia ia. (Loma 8:​38, 39; Efe. 2:​4, 5) Pea neʼe toe lahi ʼaupito ai tona ʼofa kia Sehova. Neʼe ina fakaha tona ʼofa ʼaia ʼi ‘tana tokoni ki te kau maʼoniʼoni pea neʼe ina haga fai.’—Hep. 6:10. w23.07 9 ¶5-6

Tokolahi te hahaʼi ʼe natou iloʼi ʼe ʼaoga ke ʼi ai he ʼu puleʼaga pea ʼe tonu ke natou fakalogo ki ʼihi lao ʼe fakatuʼu e “te ʼu pule maʼoluga” ʼaia. Kae ka mole natou leleiʼia he lao peʼe fefeka fau kia natou, pea ʼe mole kovi kia natou te talagataʼa ki ai. ʼE fakaha lelei ʼi te Tohi-Tapu, ʼe fakatupu e te ʼu puleʼaga fakatagata he ʼu mamahi, ʼe takitaki natou e Satana pea kua vave pe tonatou fakaʼauha. (Pes. 110:​5, 6; Ekl. 8:9; Luka 4:​5, 6) Kae ʼe toe ui mai ai: “Ko ʼae ʼe fakafeagai ki te ʼu pule ʼaia ʼe fakafeagai ia ki te fakatuʼutuʼu ʼa te ʼAtua.” ʼE moʼoni ko te ʼu pule maʼoluga ʼe ko he fakatuʼutuʼu fakatemi pe ia ʼe fakagafua e te ʼAtua pea ʼe ʼaoga moʼo taupau te tokalelei. Koia ʼe tonu ai ke tou ‘foaki ki te hahaʼi fuli te ʼu meʼa ʼae ʼe tonu ke tou foaki age kia natou’ pea ʼe kau ki ai te ʼu tukuhau, te fakaʼapaʼapa mo te fakalogo. (Loma 13:​1-7) ʼE lagi tou manatu ʼe mole he ʼaoga ʼo he lao, peʼe mole faitotonu peʼe fefeka fau. Kae ʼe tou fakalogo kia Sehova, pea ʼe ina kole mai ke tou fakalogo ki te ʼu pule, gata pe moka natou fakamaʼua mai ke tou fai he meʼa ʼe fakafeagai ki te ʼu fakatotonu ʼa te ʼAtua.—Gaue 5:29. w23.10 8 ¶9-10

ʼI te tupu ʼa Samisoni, neʼe puleʼi e te kau Filisitini te puleʼaga ʼo Iselaele. Neʼe natou gaohi koviʼi te kau Iselaele. (Tfm. 13:1) Neʼe lahi ai tonatou mamahi. Koia, neʼe filifili e Sehova ia Samisoni ke “ina haofaki . . . te kau Iselaele mai te ʼu nima ʼo te kau Filisitini.” (Tfm. 13:5) Ke feala hana fakahoko, neʼe tonu ke falala ia Samisoni kia Sehova. ʼI te tahi ʼaho, neʼe ʼomai te ʼu solia Filisitini ke natou puke ia Samisoni ʼi Lehi. ʼE mahino ia neʼe tuʼu te kolo ʼaia ʼi Suta. Neʼe matataku ai te kau Sutea. Koia neʼe natou fai ai te tonu ke natou puke ia Samisoni ʼo ʼave ki ʼonatou fili. Ko te ʼu tagata totonu ʼa Samisoni neʼe natou haʼi ia ia ʼaki he ʼu maea ʼe lua neʼe kei foʼou pea natou taki ia ia ki te kau Filisitini. (Tfm. 15:​9-13) Kae “neʼe hifo leva te laumalie ʼo Sehova kia Samisoni ʼo malohi ai.” Pea neʼe motumotuhi e Samisoni te ʼu maea. “Neʼe ina maʼu leva he kaugao ʼo he asino neʼe heʼeki fualoa tana mate” pea neʼe ina toʼo ʼo matehi ʼaki ni tagata Filisitini ʼe toko 1 000.—Tfm. 15:​14-16. w23.09 2 ¶3-4

Neʼe fakaha mamalie mai e Sehova tana “fakatuʼutuʼu heʼe gata” ʼi tana Folafola. ʼE feala hana fai he tahi puleʼaki ke hoko ai tana fakatuʼutuʼu, pea ʼe to lelei tuʼumaʼu pe he ʼe ina “fakaʼaogaʼi . . . ia meʼa fuli moʼo fakahoko tana fakatuʼutuʼu.” (Taag. 16:4) Pea ko te ʼu fua lelei ʼo tana fakatuʼutuʼu ʼe heʼe gata ia. Kotea te fakatuʼutuʼu ʼaia pea kotea te ʼu fetogi neʼe ina fai ke hoko ai tana fakatuʼutuʼu? Neʼe fakaha e Sehova ki te ʼuluaki taumatuʼa tana fakatuʼutuʼu ʼo ʼuhiga mo naua. Neʼe ina ui fenei age: “Kolua fanaunau pea mo liliu ʼo hahaʼi, kolua fakahahaʼi pea mo puleʼi te kele, pea kolua puleʼi . . . mo te ʼu manu fuli pe ʼae ʼe maʼuʼuli ʼi te kele.” (Sen. 1:28) Kae neʼe talagataʼa ia Atama mo Eva pea neʼe mafola ai te agahala ki te hahaʼi fuli pe. Neʼe mole taʼofi e te faʼahi ʼaia ia Sehova ke ina fakahoko tana fakatuʼutuʼu. Neʼe ina fai he tahi puleʼaki. Neʼe ina fakakaukauʼi atu aipe ke fakatuʼu he Puleʼaga ʼi selo. Pea ko te Puleʼaga ʼaia ka ina fakahoko anai tana fakatuʼutuʼu ʼo ʼuhiga mo te tagata pea mo te kele.—Mat. 25:34. w23.10 20 ¶6-7

ʼE lava tokoni mai ia Sehova ke tou haga tauhi agatonu kia te ia. ʼE lagi faigataʼa hatatou hoko atu, tafito la moka kua fualoa tatatou tauʼi hotatou vaivaiʼaga. ʼI ʼihi temi, ʼe hage mai ʼe kovi age ʼotatou vaivaiʼaga ʼi ʼae neʼe tauʼi e te apositolo ko Petelo. Kae ʼe foaki mai anai e Sehova te malohi ke ʼaua naʼa tou tuku ʼatatou faiga. (Pes. 94:​18, 19) Ohage la, ko te tehina neʼe faitagata lolotoga ni taʼu ʼi muʼa ʼo tana iloʼi te moʼoni. ʼE mole kei ina fai tana aga heʼe ʼaoga ʼaia. Kae neʼe tonu ke ina haga tauʼi lolotoga he temi tona holi kovi ʼaia. Kotea ʼae neʼe tokoni kia ia? ʼE ina ui: “ ʼE foaki mai e Sehova te malohi.” Pea ʼe ina hoko atu fenei: “ ʼAki te tokoni ʼa te laumalie ʼo Sehova . . . neʼe au ako ai ʼe feala ke au fakaalu tahi toku maʼuli mo te moʼoni . . . Neʼe feala ai ke fakaʼaogaʼi au e Sehova, pea logo la ʼoku vaivaiʼaga, kae ʼe haga foaki tuʼumaʼu mai pe e Sehova te malohi.” w23.09 23 ¶12

ʼU tehina tupulaga, ʼe tonu ke kotou faiga ke kotou fotufotuʼa ʼi te faʼahi fakalaumalie. Koia, mulimuli ki he ʼu faʼifaʼitaki lelei, fakaʼaogaʼi lelei ʼou fealagia fakakaukau, ke ke tuha mo te falala, ako ke ke poto ʼi te fai ʼo he gaue, pea teuteu ke feala hau fakahoko he tahi ʼu maʼua. ʼE lagi mata faigataʼa kia koe te mulimuli ki te ʼu faʼahi fuli ʼaeni neʼe tou vakaʼi. Kae ʼaua naʼa ke tuʼania he ʼe ke lava fakahoko anai. Manatuʼi e fia tokoni atu ia Sehova. (Esa. 41:​10, 13) Pea ʼe toe fia tokoni atu mo ʼou tehina mo tuagaʼane ʼo te kokelekasio. Ka ke liliu ʼo fotufotuʼa ʼi te faʼahi fakalaumalie, ʼe fiafia lahi anai tou maʼuli. ʼE matou ʼoʼofa ia koutou ʼu tehina tupulaga! Ke tapuakiʼi e Sehova takotou faiga nei ke kotou liliu ko he ʼu tehina kua fotufotuʼa ʼi te faʼahi fakalaumalie. w23.12 29 ¶19-20

Ohage la ʼe ke fakatahi mo he ʼu tehina mo tuagaʼane. ʼE kotou fiafia pea ʼe ke toho he ʼu pāki ʼo koutou fuli. ʼE mole ke toho pe he ʼu pāki ʼe lua. Kae lagi ko pāki ʼe tolu, naʼa ʼi ai he pāki ʼe mole lelei. Pea ʼe ke tokagaʼi ʼi he pāki ʼe mata mamalu he tehina. ʼE ke molehi anai he ʼe ʼi te ʼu pāki ʼae ʼe lua ko natou fuli ʼae ʼe tuʼu ai, ʼo feia mo te tehina, ʼe natou malimali. ʼI te agamahani, ʼe tou maʼu he ʼu suvenia lelei mai tatatou fakatahi mo ʼotatou tehina mo tuagaʼane. Kae kapau neʼe ui pe neʼe fai e he tahi he faʼahi ʼe mole tou leleiʼia, kotea ʼae ka tou fai? ʼE tou faiga anai ke tou galoʼi te faʼahi ʼaia, ohage pe ko tatatou molehi te pāki ʼae ʼe mole lelei. (Efe. 4:32) ʼE feala noa pe, koteʼuhi ʼe lahi age te ʼu temi neʼe tou fakafiafia ai mo ia pea ʼe kei tou manatuʼi. ʼE ko te ʼu suvenia lelei ʼaia ʼe tou fia taupau pea ʼe maʼuhiga age kia tatou. w23.11 12-13 ¶16-17

ʼE tonu ke ha ʼi te faʼahiga faiteuteu ʼa he fafine Kilisitiano tana tokagaʼi te manatu ʼa ʼihi. ʼE matou vikiʼi ʼotatou tuagaʼane kua fotufotuʼa ʼi te faʼahi fakalaumalie he ʼe ha tanatou fakaʼapaʼapa ʼi tanatou faiteuteu. ʼE toe maʼu foki e te ʼu tuagaʼane fuli ʼae kua fotufotuʼa ʼi te faʼahi fakalaumalie te kalitate ʼae ko te fakasiosio tonu. Kotea te fakasiosio tonu? Ko he tahi ʼe fakasiosio tonu ʼe ina fakakehekeheʼi te meʼa ʼae ʼe lelei mo ʼae ʼe kovi, pea ʼe ina fai leva ni tonu ʼe lelei. Tou vakaʼi te faʼifaʼitaki ʼo Apikaile. Neʼe fai e tona ʼohoana he tonu neʼe feala ke tuʼutamakiʼia ai tona loto fale katoa. Kae neʼe fai fakavilivili e Apikaile he tonu, pea ko tana fakasiosio tonu neʼe haofaki ai te tokolahi. (1 Sam. 25:​14-23, 32-35) ʼE toe ʼaoga ke tou fakasiosio tonu ke tou iloʼi ai te temi ʼae ke tou palalau ai mo te temi ʼae ke tou fakalogologo ai. Pea ʼe toe ʼaoga anai te kalitate ʼaia kia tatou, ke mole tou fia iloʼi meʼa fuli moka tou fia tokoni ki ʼihi.—1 Tes. 4:11. w23.12 20 ¶8-9

Neʼe tohi e te apositolo ko Paulo te ʼu palalau ʼaia ki te kokelekasio ʼae ʼi Loma. Neʼe ako e te ʼu tehina mo tuagaʼane ʼaia ke natou iloʼi ia Sehova mo Sesu, neʼe natou tui ai kia naua, pea neʼe natou papitema ʼo liliu ko ni kau Kilisitiano. Neʼe natou liliu ai ʼo “faitotonu ia muʼa ʼo te ʼAtua ʼuhi ko [tanatou] tui” pea neʼe fakanofo natou ʼaki te laumalie maʼoniʼoni. (Loma 5:1) Neʼe natou maʼu ai he ʼamanaki taulekaleka ka hoko moʼoni anai. Ki muli age neʼe faitohi ia Paulo ki te ʼu Kilisitiano ʼi Efeso ʼo ʼuhiga mo te ʼamanaki ʼae neʼe foaki age e te ʼAtua. ʼE natou ʼamanaki maʼu anai “he tofiʼa maʼa te kau maʼoniʼoni.” (Efe. 1:18) Pea ki te kau Kolose, neʼe fakaha age e Paulo pe ʼe natou maʼu anai ʼifea tonatou fakapale. Neʼe ina ui fenei age: “ ʼE kotou maʼu te ʼamanaki ʼae ʼe taʼofi maʼa koutou ʼi selo.” (Kol. 1:​4, 5) Koia ʼe ʼamanaki te kau Kilisitiano fakanofo ke fakatuʼuake natou ki te maʼuli ʼo heʼe gata ʼi selo, ʼae ka natou kaugā hau ai mo Kilisito.—1 Tes. 4:​13-17; Fkha. 20:6. w23.12 9 ¶4-5

ʼI te Fakakeleka ko te kupu “taupau” ʼe fakaʼuhiga ki he kau solia ʼe natou puipui he kolo mai te ʼu tuʼutamaki. Pea ʼe momoe fimalie te hahaʼi ʼo te kolo ʼi tanatou iloʼi ʼae ʼe taupau natou e te kau solia. ʼO toe feia pe ka taupau e te tokalelei ʼo te ʼAtua totatou loto mo totatou fealagia fakakaukau ʼe tou logoʼi ai te tokalelei he tou iloʼi ʼe puipui tatou. (Pes. 4:8). Ohage pe ko Ana maʼia pe ʼe mole fetogi vave totatou aluʼaga kae ʼe tou logoʼi pe he tokalelei. (1 Sam. 1:​16-18) Pea ka tou fimalie, ʼi te agamahani, ʼe tokalelei tatatou fakakaukau pea ʼe faigafua ai te fai ʼo he tonu. Kotea ʼae ʼe feala ke tou fai? Ka ke tuʼania, kole kia Sehova ke ina puipui koe. ʼO feafeaʼi? Faikole kia Sehova ʼo kaku ki tau logoʼi tou tokalelei. (Luka 11:9; 1 Tes. 5:17) Ka ke tau mo he aluʼaga faigataʼa, kataki ʼo faikole he ʼe ke logoʼi ai te puipui ʼo tou loto mo tou fealagia fakakaukau e te tokalelei ʼo Sehova.—Loma 12:12. w24.01 21 ¶5-6

Moʼo fakatapuha te huafa ʼo tana Tamai, neʼe ʼutakiʼi e Sesu te ʼu gaohi koviʼi kehekehe, mo te ʼu laukovi mo ni fasituʼu ʼo ʼuhiga mo ia. Neʼe ina iloʼi papau neʼe agatonu pe ki tana Tama ia meʼa fuli, pea kia ia, neʼe mole ʼi ai he tupuʼaga ke ufiufi ai. (Hep. 12:2) Pea neʼe ina iloʼi pe ko Satana ʼae neʼe ina tauʼi fakahagatonu ia ia ʼi te temi faigataʼa ʼaia. (Luka 22:​2-4; 23:​33, 34) Neʼe faiga malohi ia Satana ke mole nofo agatonu ia Sesu, kae neʼe to noa ʼana faiga. Neʼe fakamoʼoni e Sesu ko Satana ko he tahi ʼe gutuloi ʼaupito mo agakovi, pea ko Sehova ʼe ʼi ai ʼana kaugana ʼe natou lava nofo agatonu maʼia ʼi te ʼu ʼahiʼahi ʼae ʼe kovi ʼaupito! ʼE ke fia fakafiafiaʼi koa tou Hau? Kapau koia, ke hoko atu tau vikiʼi te huafa ʼo Sehova ʼaki tau fakaha te ʼuhiga totonu ʼo totatou ʼAtua. ʼI tau fai feia, ʼe ke mulimuli ai ki te faʼifaʼitakiʼaga ʼa Sesu. (1 Pet. 2:21) Ohage ko Sesu, ʼe ke fakafiafiaʼi anai ia Sehova pea mo fakamoʼoni ai ko Tona fili lahi ko Satana ʼe gutuloi mo agakovi! w24.02 11-12 ¶11-13

ʼI te ʼu taʼu ʼe nima kua hili, neʼe papitema te toko tahi miliona tupu ko te kau Fakamoʼoni ʼa Sehova. Ka ke foaki tou maʼuli kia Sehova, ʼe ke filifili ke ke liliu ko he tisipulo ʼa Sesu Kilisito pea mo ke fakamuʼamuʼa ʼi tou maʼuli te fai ʼo te finegalo ʼo te ʼAtua. Koia, kotea ʼae ʼe tonu ke ke fai? Neʼe ui e Sesu: “Kapau ʼe fia muli mai he tahi ia te au, ke fakafisi kia ia totonu.” (Mat. 16:24) Ko te kupusiga palalau ʼaeni neʼe fakaliliu ʼi te Fakakeleka “fakafisi kia ia totonu” ʼe feala ke toe fakaliliu fenei “mole kei kita maʼuli maʼa kita totonu.” ʼI tau kua foaki tou maʼuli kia Sehova, ʼe tonu anai ke ke fakafisi kia meʼa fuli ʼe fakafeagai ki tona finegalo. (2 Ko. 5:​14, 15) Ko tona fakaʼuhiga ʼe tonu anai ke ke liʼaki “te ʼu gaue ʼo te kakano,” ohage ko te ʼu felaveʼi fakasino heʼe ʼaoga. (Kal. 5:​19-21; 1 Ko. 6:18) ʼE ke maʼuli mamahi koa mo kapau ʼe ke fakalogo ki te ʼu fakatotonu ʼaia? Kailoa ia, mo kapau ʼe ke ʼofa ia Sehova pea mo ke tui papau ʼe fua lelei kia koe ʼana lao.—Pes. 119:97; Esa. 48:​17, 18. w24.03 2 ¶1; 3 ¶4

ʼE foaki e Sehova ia tona laumalie maʼoniʼoni kia natou ʼae ʼe fiafia ai. (Mat. 12:18) ʼE feala ke tou feuiʼaki fenei: ‘Neʼe au lava fakaha koa ʼihi kalitate ʼo te laumalie maʼoniʼoni?’ Ohage la, lagi neʼe ke tokagaʼi kua ke faʼa kataki age mo ʼihi ʼi muʼa ʼo tau iloʼi ia Sehova? Koia kapau ʼe ke fakaha ia te ʼu kalitate ʼo te fua ʼo te laumalie, pea ko te laumalie ʼaia ʼe gaue ia koe. Koia ʼe fiafia ia Sehova ʼo ʼuhiga mo koe. ʼE foaki e Sehova ia te ʼu lelei ʼo te sakilifisio ʼa Sesu kia natou ʼae ʼe fiafia ai. (1 Tim. 2:​5, 6) Kotea ʼe feala ke ke fai mo kapau ʼe ke tui ki te totogi pea mo kua ke papitema? Kae ʼe faigataʼa tau tui ʼe fiafia ia Sehova ʼo ʼuhiga mo koe. ʼAua naʼa galo kia koe ʼe tonu ʼi ʼihi temi ke tou tokakaga ki te ʼu meʼa ʼae ʼe tou logoʼi. Kae ʼe feala pe ke tou falala kia Sehova. ʼE faitotonu kia te ia ia natou ʼae ʼe tui ki te totogi pea ʼe ina fakapapau ʼe ina tapuakiʼi ia natou ʼaia.—Pes. 5:12; Loma 3:26. w24.03 30 ¶15; 31 ¶17