“Koutou Toe Liliu Mai Kia Te ʼAu, Pea ʼe ʼAu Liliu Atu Anai Kia Koutou”
KO TE famili neʼe ʼeva fakafiafia ʼi te vao matuʼa. Pea ko Petelo ʼaē ʼe kei veliveli ʼi te fānau, neʼe hēhē ʼi tana muliʼi te ekueli. Pea fakafokifā pe kua ʼaofia te lagi e te ʼu ʼao, pea mo kamata to te ʼua. Neʼe afuafu pe, pea fakaʼosiʼosi age kua lalahi ʼosi te ʼua. ʼO tānaki vave ai e te famili tanatou ʼu meʼa pea mo nātou feleleʼi ki tanatou motokā. Pea neʼe nātou ʼofolele fuli ʼi te puli ʼaē ʼa Petelo.
ʼI te temi tonu pe ʼaia, ʼe lolotoga faiga mai Petelo ia, ʼi te kumi ʼo tona famili. Kae kua faigataʼa tana sio ki tona ala, pea ko te kiʼi ala ʼo te moʼuga kua hekeheke ia ʼuhi ko te ʼua. Kua hage kia ia ko tona ʼu vaʼe ʼe mole kei lave ki te kele ʼo to ai ia ki te luo neʼe mole sio ia ki ai. Neʼe faiga ke hake ake, kae ko te ʼu tafatafa ʼo te luo kua hekeheke.
Neʼe ʼua lalahi ʼosi ʼi te fuga moʼuga pea ko te luo kua pela katoa. Neʼe tuʼutāmaki moʼoni ia Petelo ʼuhi he kua moū ʼi loto. Kae neʼe maʼu tautonu e tana tāmai ʼo ina toho ake ia ʼaki te maea. ʼI tona ʼosi toho ake, neʼe lahi te pupulaʼi ʼo Petelo ʼi tana aga ʼaia neʼe ina fai. Kae ʼi tona pulupuluʼi e tana faʼe ʼaki te tupenu, neʼe ina tali lelei pe tona fakatonutonuʼi.
Ko te meʼa ʼaenī neʼe hoko ʼe fakatā lelei te ʼu meʼa neʼe hoko ki ʼihi ʼi te ʼu hahaʼi ʼa te ʼAtua. Neʼe nātou to ki te luo loloto ʼaē ʼo te ʼu faʼahiga meʼa ʼo te tuʼu ʼaenī pea neʼe nātou toe feholaki mai ki te fakatauga ʼaē ko te kautahi ʼa Sehova. ʼE ko he meʼa lelei ia te ʼiloʼi ko Sehova ʼe loto manavaʼofa ʼi tana tuku lelei mai ‘he maea’ moʼo tokoniʼi ia nātou ʼaia ke nātou hāo!
Ko te ʼu takitaki manavaʼofa ʼa Sehova
ʼI te temi ʼo te kau Iselaele, ʼi te ʼosi laga ʼo te fale lotu, neʼe faikole ia Salomone kia Sehova ke fagono mai ki te ʼu kole ʼo ʼuhiga mo te fale lotu. Neʼe ina ʼui ʼo fēnei: “Kapau ʼe nātou [ko te kau Iselaele] agahala kia koe (heʼe ko te tagata fuli pe ʼe agahala), pea kapau ʼe tonu ke ke hāūhāū kia nātou, pea mo līaki nātou ki te kau fili, (...) pea kapau ʼe nātou toe maʼu ia te ʼatamai poto, ʼi te fenua ʼaē ʼe nātou ʼaunofo ai, pea mo nātou kolekole atu he meʼa ʼofa, ʼi te fenua ʼaē ʼe nātou nonofo pōpula ʼai, (...) pea ʼe tonu anai ke ke fagono mai te lagi, ʼi tou ʼafioʼaga, ki ʼanatou faikole pea mo ʼanatou kolekole ke maʼu honatou meʼa ʼofa.” — 1 Hau 8:46-49.
Ko te kolekole ʼa Salomone neʼe fua manuʼia ʼi te ʼu faʼahiga meʼa kehekehe ʼo te maʼuli ʼo te kau Iselaele. Tuʼa lahi ia te lītuʼa ʼa te hahaʼi ki te ʼAtua pea mo nātou līaki ia ia. ʼI tanatou mahino ki te kovi ʼo tanatou ʼu aga, neʼe nātou toe liliu mai ʼo kumi ia ia. Neʼe loto fakamolemole aipe ia Sehova kia nātou (Teutalonome 4:31; Isaia 44:21, 22; 2 Kolonito 1:3; Sake 5:11). ʼAki ia Malakia neʼe fakanounou e Sehova tana felogoi ʼaē ia taʼu e afe mo tana hahaʼi ʼi tana ʼui ʼaenī: “Talu mai te ʼu ʼaho ʼo tokotou ʼu kui, neʼe koutou fakamamaʼo ʼi taku ʼu pelesepeto pea neʼe mole koutou taupauʼi. Koutou toe liliu mai kia te ʼau, pea ʼe ʼau toe liliu atu anai kia koutou.” — Malakia 3:7.
Te ʼu tupuʼaga ʼo te tūkia
Ohage ko te kau Iselaele, tokolahi te hahaʼi ʼa te ʼAtua ia ʼaho nei kua nātou fakamamaʼo pea mo mavae ʼi te kautahi ʼa Sehova. Koteā tona tupuʼaga? Koteʼuhi ko ʼihi neʼe nātou holi ki he meʼa ʼe hage mai ʼe mole kovi, ohage la ko Petelo ʼi tana muliʼi ʼaē ʼo te ekueli. Ko te meʼa ʼaia neʼe hoko kia Ada. ʼE fēnei tana fakamatala: “Neʼe ko he agamahani ʼa te kaugaue fuli ke mātou kakai fakatahi ʼi te fale kai ʼi te fetapā. Koia ʼaē ka nātou fakaafe ai ʼau ke mātou ʼolo ʼo ʼinu kafe ʼe ʼau tali lelei tanatou fakaafe. ʼI taku manatu ko te temi ʼaia ʼe mole ko he temi ia ʼe ʼau fakaʼaoga ki taku ʼu fono peʼe ko te faka mafola. Neʼe mole ʼau fakakaukauʼi pe la ko te meʼa ʼaia ʼe fakafeagai ki te fakatuʼutuʼu ʼaē ʼe tuʼu ia 1 Kolonito 15:33.”
“ ʼE mole tuai foki, ʼi te ʼu moeaki ku ʼau toe fakatahi mo nātou ʼo mātou ʼolo ʼo lele hosi, ʼo sinema pea mo kau mo nātou ki te ʼu fale ʼe fai ai te ʼu faʼifaʼitakiʼaga ʼata. ʼO ʼau liu tau tōtō foki la ʼi te ʼu fono. Fakamulimuli age, ʼe mole kei ʼau kau ki he fono ʼo feiā aipe mo te fagonogono. ʼI taku fakakaukauʼi age leva te meʼa ʼaē ʼe lolotoga hoko, ʼe mole kei ʼau kau ʼau ʼi te kautahi.”
Ko ʼihi tupuʼaga, ko he agahala mamafa ʼe fufū ʼe feala ki he tahi ke ina ʼui ʼe mole kei tau mo ia, ia te tauhi ki te ʼAtua (Pesalemo 32:3-5). Peʼe ko he tahi ʼe tūkia ʼi he meʼa neʼe ʼui pe neʼe fai ʼe he ʼu kau fagona kilisitiano, ʼe mole mahino kia ia te talanoa ʼaē ʼa Salomone, “ko te tagata fuli pe ʼe agahala”. — 1 Hau 8:46; Sake 3:2.
Ko ʼihi ʼe feala ke nātou lotovaivai mokā neʼe akonakiʼi (Hepeleo 12:7, 11). Ko te holi ki he faʼahiga maʼuli fakamālama ʼe toe taki pe foki ki he līaki ʼo te tauhi ki te ʼAtua. ʼE fai māhani, ko te kumi ʼo te ʼu lelei ʼo te malamanei, ʼe ina faʼao to kita temi ʼo mole kei maʼu ai leva hotatou temi moʼo gāue ki te ʼAtua (Mateo 13:4-9; 1 Timoteo 6:9, 10). ʼE feiā koa te ʼaluʼaga ʼo te hahaʼi ʼe mole kei maʼu he ʼamanaki?
ʼE koutou tali anai koa ia te fakaafe ʼa Sehova?
ʼI te tahi ʼaluʼaga neʼe fai e Sesu te palalau ʼe faigataʼa tona mahino ki ai, pea tokolahi neʼe nātou tūkia ai. ʼE ʼui fēnei: “Tokolahi ʼi tana kau tisipulo neʼe nātou toe liliu ki te ʼu meʼa ʼāfea pea neʼe mole nātou toe ʼolo pea mo ia.” Kae neʼe mole ko nātou fuli ʼaē neʼe tūkia. ʼE toe fakamatala fēnei e te Tohi-Tapu: “Pea ʼui e Sesu ki te toko hogofulu-ma-lua: ‘Pea mo koutou foki, ʼe mole koa la koutou fia ʼolo mo koutou?’ Pea tali age e Simone Petelo kia te ia: ‘ ʼAliki, ke mātou ʼolo kia ʼai? ʼE ke nofo mo te ʼu folafola ʼo te maʼuli heʼegata.’ ” (Soane 6:66-68). ʼI te fakakaukau poto ʼaē ʼa te kau ʼapositolo ʼa Sesu neʼe nātou mahino ʼe nātou tuʼutāmaki anai mo kapau ʼe nātou mavae ia Sesu.
Tokolahi ia nātou ʼaē neʼe hēhē neʼe nātou fakamoʼoni aipe ki te meʼa ʼaia. Neʼe nātou mahino ko te mavae ʼaē ʼi te kautahi ʼa te ʼAtua ʼe ko he meʼa tuʼutāmaki ia kae e ko Sehova pe mo Kilisito ʼaē ʼe nātou maʼu ai te ʼu folafola ʼaē ki te maʼuli. ʼI tanatou kua mahino ki te faʼahi ʼaia, ʼe nātou toe mahino aipe ʼe mole heʼeki tauhāla hanatou toe liliu mai, ke nātou kole kia Sehova ke fakamolemole mai kia nātou, pea mo nātou toe liliu mai kia te ia. Ko Sehova totonu pe ʼaē ʼe ina fai te fakaafe ʼaenī: “Koutou toe liliu mai kia te ʼau, pea ʼe ʼau toe liliu atu anai kia koutou.” — Malakia 3:7.
ʼIo, ʼe kofea koa e maʼu ai anai ʼe he kilisitiano moʼoni te fīmālie ʼi hana gāue pe kia Sehova? Kapau kua hēhē he tahi kae neʼe kau ki te kautahi ʼa te ʼAtua, koteā anai ka hoko kia ia ʼi te mālama? ʼE vave pe hana mahino kua kau leva ia ki te malamanei pea kua liliu ia ʼo agamālohi. ʼO kau leva ia ki te ʼu faʼahiga meʼa malualoi ʼo te tuʼu ʼaenī, tana ʼu loi, tana ʼu gāue kākā feiā mo tana ʼu aga fakasino heʼeʼaoga, ko he mālama tuʼutāmaki ohage ko te luo ʼaē neʼe fakatupu tuʼutāmaki ki te maʼuli ʼo te tama tūpulaga ʼaē ko Petelo. ʼI tana toe maʼu te ʼatamai poto pea mo mahino ko tona maʼuli heʼegata ʼe tuʼutāmaki, ʼe ina kumi fakavilivili hona hāoʼaga mai te tuʼutāmaki ʼaia. ʼIo ʼe mole ko he meʼa faigafua foki he toe liliu mai.
Neʼe koutou kau koa ia nātou ʼaē neʼe faiga ke toe liliu mai kia Sehova kae neʼe ko he meʼa mata faigataʼa? ʼO koutou mahino foki, ʼe ʼaoga he tokoni kia koutou pea mo koutou ʼiloʼi ko ʼa kotou ʼu tēhina pea mo ʼokotou ʼu tuagaʼane ʼi te kautahi ʼa te ʼAtua ʼe nātou tokoni lelei anai kia koutou. Kae neʼe kua koutou fakahā koa kia Sehova takotou ʼu faiga ʼo ʼuhiga mo te faʼahi ʼaia. Kua hoko te temi ʼaē ke ‘koutou maʼu tokotou ʼatamai poto’ pea ko te ‘temi nei ʼaē ke koutou liliu mai kia Sehova’. — 1 Hau 8:47.
Ko te tokoni ki te toe liliu mai
ʼE fakamatala e Ada te meʼa ʼaē neʼe tokoni kia ia ʼo ʼuhiga mo tana toe liliu mai, ʼo fēnei: “ ʼI tona temi tonu, ko te tuagaʼane ʼaē neʼe ina fai taku ako faka tohi-tapu neʼe ina fakaafe ʼau ki te fakatahi faka silikosikilipisio. Neʼe agamālūlū foki! Pea Neʼe mole ina leaʼi ʼau ki he meʼa! Neʼe lotoʼofa ʼaupito. Kua hili te taʼu katoa ki te fono neʼe ʼau kau ai, kae neʼe ʼau metitasio ki te mole he ʼuhiga ʼo te malamanei feiā aipe mo te mamahi, mo te lotoʼita, pea mo te ʼu aga fakasino heʼeʼaoga, ko te ʼu meʼa fuli ʼaia ʼe ū ʼi te ʼu meʼa ʼe hā mai ʼe hage ʼe mole kovi. Koia ʼaē neʼe ʼau fakatotonu ai ke ʼau kau ki te fakatahi ʼaia. ʼI taku aʼu atu ki te fale ʼaē neʼe fai ki ai te fakatahi, neʼe ʼau ʼalu ʼo heka ʼi te hekaʼaga ʼo te atu fakaʼosi pea mo nono ʼi te faʼahi fakapōʼuli. Neʼe mole ʼau loto ke sio mai te ʼu tēhina pea mo nātou fakafehufehuʼi ʼau.”
“Pea ko te ʼu akonaki ʼaē neʼe fai neʼe lahi tona ʼaoga kia ʼau. ʼI te ʼosi ʼo te polokalama, neʼe ʼau fakatotonu ke ʼau toe liliu ki te hahaʼi ʼa Sehova ke ʼau toe foaki toku maʼuli kia ia mo toku loto katoa. Neʼe lelei toku tali e te ʼu tēhina pea mo nātou ‘vikiʼi’ taku toe liliu mai.” (Luka 15:11-24). Kua fualoa te hili atu ʼo te meʼa ʼaia neʼe hoko kia Ada, pea ki te temi nei kua taʼu 25 tupu ia tana pionie katoa.
Ko ʼihi neʼe hēhē foki neʼe toe maui mālie pe ohage ko ia ʼaenī. Ko te ʼu tagata ʼāfea neʼe nātou tokoniʼi José ʼaki tanatou ʼu manatu fakatagata kae neʼe mole nātou fakatafito ʼanatou ʼu tokoni ki te Tohi-Tapu. ʼO lotovaivai ai ia José pea mo mamahi, ʼo ina līaki ai tana tauhi ʼaē kia Sehova. Neʼe taʼu valu tana mavae ʼi te hahaʼi ʼa te ʼAtua, ʼo liu ʼohoana ai mo te taʼahine ʼe mole tauhi kia Sehova. Neʼe maʼu tana fānau, pea neʼe ina tuku ke papitemaʼi tana tahi tamasiʼi ʼi te ʼēkelesia katolika.
Pea, neʼe tokoniʼi leva ia e te taupau faka silikosikilipisio neʼe ʼaʼahi kia ia pea mo ina fakaloto mālohiʼi mo te kau tagata ʼāfea ke nātou fai feiā. ʼI te temi nei kua toe lotomālohi pea mo fiafia ʼi te fia mahino ʼo tona ʼohoana ki te moʼoni. ʼI te temi nei, ko te tagata ʼāfea ʼi te kokelekasio. ʼE ʼiloga mai ʼi te ʼu meʼa ʼaia neʼe hoko, ʼe mole toʼo e Sehova te ʼu tapuakina ia nātou ʼaē ʼe nātou tali tana fakaafe ʼofa ʼaē ke liliu mai kia ia.
Ke tou maʼu te ʼu tapuakina ʼaia, ʼe tonu muʼa ke tou tali lelei te tokoni ʼaē ʼe fai mai. ʼI te ʼu kokelekasio ʼe manatuʼi e te ʼu tēhina ia nātou ʼaē ʼe mole kei gāue kia Sehova, ʼo nātou tau ʼolo ʼo ʼaʼahi kia nātou, ko hanatou fia tokoni aipe kia nātou. Ko he tali ʼo te ʼu tokoni ʼaia, ʼe ʼiloga ai leva ia te tali ʼaē ʼo te loto manavaʼofa ʼo Sehova. — Sake 5:19, 20.
ʼIo, koʼeni te temi ʼaē ke tali ai ki te fakaafe ʼa Sehova: “Koutou toe liliu mai kia te ʼau.” (Malakia 3:7; Isaia 1:18). ʼAua naʼa koutou talitali fualoa. Ko te ʼu meʼa ʼe hoko ʼi te malamanei ʼe fetofetogi fakavilivili. Ko te kautahi ʼa Sehova, ko te fakatau, ʼe ko he koga meʼa lelei ʼi te ʼu temi afā. Ko nātou pe ʼaē ka fakatau kia Sehova, ʼaē ka nātou maʼu ia te tui mālohi, pea mo fufū anai nātou ʼi tona ʼaho hāūhāū lahi. — Sofonia 2:2, 3.
[Paki ʼo te pasina 27]
ʼE koutou tali anai koa ki te fakaafe ʼa Sehova, ʼaē ke “koutou toe liliu mai kia te ʼau”?