ʼE Koutou Hage Koa Ho He Ōvi ʼi Te ʼu Ōvi ʼAia?
‘ ʼE LELEI age he liliu ko he laione ʼi he ʼaho e tahi ʼi he liliu ko he akeno ʼi he ʼu taʼu e teau.’ Ko te ʼu palalau ʼaia neʼe fai e Benito Mussolini, ko te tagata takitaki ʼāfea ʼo Italia.
Tokolahi ohage ko Mussolini ʼe mole nātou loto anai ke fakatatau ia nātou ki he ʼu akeno feiā aipe ki he ʼu ōvi. Kae, neʼe ʼui e te hau ʼafea ʼo Iselaele ko Tavite ʼi te tohi ʼo Pesalemo, ʼo fēnei: “Ko Sehova ko toku Tagata Tauhi ōvi. (...) ʼE ina taki ʼau ki te ʼu koga meʼa mālōlō ʼe lelei tona fakapala.” (Pesalemo 23:1, 2). ʼIo, ko Sehova ʼAtua ko te Tagata Tauhi ōvi Lahi ʼe tokaga ki tana hahaʼi, koteʼuhi ʼe nātou hage ko he ʼu ōvi fakaʼeteʼete.
ʼE fakatā te hahaʼi ʼa te ʼAtua ki he ʼu ōvi ʼi te tohi ʼo Pesalemo 95:7, ʼaē ʼe tou lau fēnei: “Koteʼuhi he ko totatou ʼAtua, pea ko tatou ko te hahaʼi ʼo tana gāue mo te faga ōvi ʼo tona nima.” ʼE lagi ko ʼihi neʼe nātou fakaʼamu ki te tagata faitohi ʼo te pesalemo ʼaē ʼe talanoa “ko te ʼu ōvi ʼo tana gāue” pea “ko te hahaʼi ʼo tona nima”. Kae ʼi heni ko te ʼu kupu neʼe fehikiʼaki, pea koia ʼaē ko te hahaʼi ʼa Sehova neʼe nātou fakatatau ia nātou totonu ohage ko tana ʼu ōvi. ʼE nātou fakafiafia ʼi te ʼu lelei ʼo te gāue ʼa Sehova pea ʼe taki nātou e tona nima ʼofa.
Ko te ʼAlo ʼo Sehova, ko Sesu Kilisito, e ko te Tagata Tauhi ōvi lelei. Tuʼumaʼu ʼe ina fakatatau te hahaʼi ki he ʼu ōvi. Ohage la, neʼe palalau ia Sesu ki te “kiʼi faga ōvi” pea mo tana “tahi ʼu ōvi”. (Luka 12:32; Soane 10:14-16.) ʼO ʼuhiga mo tana kau tisipulo ʼaē ʼe hage ko he ʼu ōvi agavaivai, neʼe ʼui fēnei e Sesu: “Ko taku ʼu ōvi ʼe nātou fakalogo ki toku leʼo, pea ʼe ʼau ʼiloʼi ia nātou, pea ʼe nātou mulimuli mai ia te ʼau. Pea ʼe ʼau foaki kia nātou te maʼuli heʼegata, pea ʼe mole nātou toe mamate ʼo heʼegata, kailoa, pea ʼe mole he tahi ʼe ina toʼo anai nātou ʼi toku nima.” (Soane 10:27, 28). ʼI te nima manavaʼofa ʼo te pule, ʼe maʼu ai te manuʼia ʼo tona mālohi, tona ʼofa, tana taki, pea mo te puipui. — Fakahā 1:16, 20; 2:1.
ʼE mole lava ki he tahi ke ina toʼo ʼi te nima puipui ʼo Sesu he tahi ʼaē ʼe ko he ōvi moʼoni. ʼI te temi nei, ʼe ina lolotoga fakamavaevae te hahaʼi ʼaē ʼe hage “ko he ʼu tao” ia nātou ʼaē ʼe nātou maʼu te ʼofa ʼo Sesu ʼaē “ko te ʼu ōvi” ka nātou maʼu anai te maʼuli heʼegata ʼi te taki ʼo te Puleʼaga ʼo te ʼAtua ʼi selo (Mateo 25:31-46). ʼE koutou fakahā anai koa ʼe koutou kau ʼi te ʼu ōvi ʼaia ka tapuakiʼi?
[Haʼuʼaga ʼo te paki pasina 32]
Garo Nalbandian