Te ʼu Fehuʼi ʼa Te Kau Lautohi

Koteā te meʼa ʼe feala ke fai ʼe he kilisitiano mokā ʼe faigataʼa hana maʼu hona hoa ke ʼohoana mo ia?

Logope la ko tatou ko te kau kilisitiano, ʼe feala ke tou lotovaivai mo kapau ʼe tou fakaʼamu ki he meʼa ʼe mole feala ke hoko. Ko te ʼu meʼa ʼaē ʼi totatou loto ʼe fakamatalatala lelei ia Tāʼaga Lea 13:12, ʼi tana ʼui fēnei: “Ko he fakatalitali fualoa ʼe fakatupu he loto mahaki.” Ko te meʼa ʼaia neʼe hoko ki ʼihi kilisitiano ʼi tanatou fia ʼohoana kae neʼe mole nātou maʼu honatou ʼu hoa ʼe tau mo nātou. ʼE moʼoni tāfito te palalau ʼaia ʼo ʼuhiga mo nātou ʼaē ʼe ʼui e Paulo ʼe “mālohi te holi ʼaia”. — 1 Kolonito 7:9.

Neʼe tuku e Sehova ki te loto ʼo te tagata te fia maʼu ʼo he katoa moʼoni ʼaē ko te fafine. Koia, ʼe mole fakapuna’maʼuli kia tatou te faʼahi ʼaia mokā ʼe mālohi ʼi he ʼu kilisitiano selipatea tokolahi (Senesi 2:18). ʼE ko he ʼu manatu ia ʼe mole kovi pea ʼe ko he faʼahi ia ʼe fakamālohiʼi ʼi he ʼu agaʼi fenua ʼaē ʼe faka maʼuhigaʼi te ʼohoana (ʼe fakamaʼua ke ʼohoana ʼi he taʼu ʼe fakatuʼutuʼu kiai) peʼe mokā ko he ʼu kilisitiano selipatea ʼe nātou fakatahi mo he ʼu taumatuʼa fiafia ʼi te kokelekasio. Kae, ʼe mole ko he meʼa lelei ia te tuku ʼo he loto tuʼania ke loaloaga. Koia ʼaē, ʼe feafeaʼi ki he kilisitiano hana fai te fakatuʼutuʼu ʼaia ke mole liliu ʼo nofo tuʼania ʼaupito ʼo ʼuhiga mo te faʼahi ʼaia?

ʼE mole ko he fakatuʼutuʼu ʼe faigafua, pea ʼe mole tonu anai ki ʼihi ke nātou ʼui ko te meʼa ʼaia ʼe ko he fakavalevale ia peʼe ko he meʼa ʼe mole hona ʼuhiga. Kae ʼi te agamahani, ʼe fakalogo te tokaga pea mo te fakatokatoka ʼo te ʼaluʼaga ʼaia ki ʼaē ʼe tau mo te fihifihia.

ʼE tou maʼu te tonu ʼi te fakatuʼutuʼu faka tohi-tapu maʼuhiga ʼaenī: “ ʼE lahi age te manuʼia ia ʼo tata foaki ʼi ʼaē ia ʼo tata tali.” (Gāue 20:35). Ko te lea ʼaia neʼe fai e te tagata selipatea ko Sesu Kilisito, pea neʼe ko he meʼa ia neʼe ina ʼiloʼi lelei. Ko tatatou fai he ʼu meʼa maʼa ʼihi ʼaki he manatu ʼe lelei, ʼe ko he meʼa lelei moʼo tokoni ki he tahi pe ia tatou moʼo lolomi ʼo he ʼu manatu ki he talitali fualoa. Koteā tona faka ʼuhiga ki te kilisitiano selipatea ʼaē ʼe kei tau mo te faʼahi ʼaia?

Ke koutou fai he ʼu gāue ʼofa maʼa tokotou famili pea mo ʼihi ʼi te kokelekasio, pea mo fakatuputupu takotou gāue ʼi te minisitelio. Ko te tokoni ʼaenī ʼe mole ʼui leva, ‘ke koutou maʼumaʼua, pea ke koutou galoʼi anai tokotou fia ʼohoana’. Kailoa ia. Kapau ʼe koutou maʼumaʼua ʼi te ʼu meʼa maʼuhiga ʼo te gāue faka kilisitiano, ʼe feala ke koutou ‘taupau maʼu ʼi tokotou loto, ke koutou mālohi ʼi tokotou loto’ pea mo feala pe ke koutou fakaʼaoga tokotou ʼu fealagia ʼo te temi nei ki he faʼahi ʼe lelei. — 1 Kolonito 7:37.

Ko nātou ʼaē neʼe nātou holi fau ke nātou ʼohoana neʼe nātou tuku ke liliu tonatou ʼu holi ʼo maʼuhiga ʼaupito. Neʼe nātou aʼu ʼosi ki te fakatuʼutuʼu ʼi te ʼu sulunale tanatou kumi ʼo hanatou ʼu hoa. Kae, ʼe ko he meʼa lelei age, he maʼuliʼi fakalelei ʼo te ʼu meʼa lelei ʼe maʼu ʼi te temi selipatea. Koutou vakaʼi te ʼu alatike: “Ko te kau kaugana ʼa te ʼAtua ʼe nātou selipatea kae ʼe nātou katoa — Ko te faʼahiga maʼuli koloaʼia” ʼi Te Tule Leʼo ʼo te ʼaho 15 ʼo novepeli 1987, feiā mo te alatike “Ko te ʼohoana ko te fakatafitoʼaga koa ʼo te fīmalie?” ʼi Te Tule Leʼo ʼo te ʼaho 15 ʼo maio 1992.

Ko te faikole kia Sehova ʼe ko he tokoni moʼo loto faʼa kātaki ʼi te maʼuli faka selipatea (Filipe 4:6, 7, 13). Tokolahi te kau kilisitiano selipatea neʼe nātou maʼu ʼi tanatou fakaʼaoga tonatou ʼu temi faigamalie moʼo ako pea mo metitasio ki te Folafola ʼa te ʼAtua pea mo kau ki te ʼu fono faka kilisitiano, neʼe nātou toe maʼu ‘te fīmālie ki tonatou ʼu nefesi’, ohage ko te fakapapau ʼaē neʼe fai e Sesu ki tana kau tisipulo (Mateo 11:28-30). Ko te meʼa ʼaia neʼe tokoni aipe kia nātou ke nātou tuputupu ʼi te faʼahi fakalaumālie, koteʼuhi ke nātou liliu anai ko he ʼu hahaʼi ʼohoana taulekaleka mo kapau ʼe nātou maʼu honatou ʼu hoa ʼe tau mo nātou.

ʼAua naʼa galo kia koutou, ko Sehova ʼe ina ʼiloʼi te ʼaluʼaga ʼo te kau selipatea fuli ʼe gāue kia ia. ʼE ina ʼiloʼi te meʼa ʼaē ʼi tokotou loto ʼo ʼuhiga mo te temi nei. Ko tatatou Tāmai ʼofa ʼaē ʼi selo ʼe ina toe ʼiloʼi pe foki te meʼa ʼaē ʼe maʼuhiga tāfito kia koutou ʼo ʼuhiga mo te faʼahi fakalaumālie feiā aipe mo te faʼahi ʼo te ʼu meʼa ʼaē ʼi tokotou ʼu loto. ʼE feala ke koutou ʼiloʼi papau anai te meʼa ʼaenī: ʼi hakotou loto faʼa kātaki aipe ʼo tauhi kia Sehova pea mo maʼuliʼi te ʼu fakatuʼutuʼu ʼo tana Folafola ʼi te ʼaho fuli pe, ʼe feala ke koutou ʼiloʼi papau ʼe ina fakafimālie anai te ʼu meʼa ʼe ʼaoga tāfito kia koutou ʼo ʼuhiga mo tokotou fīmālie. — Vakaʼi ia Pesalemo 145:16.