Mokā Felāveʼi Te Potu Hahake Mo Te Potu Hihifo
“Ê KO te Oliete ʼe ko te Oliete, pea ko te Okesita ʼe ko te Okesita, pea ʼe mole felāveʼi anai ia nāua ʼi he temi.” Ko te ʼu palalau ʼaia ʼa te tagata Pilitania fai tāʼaga lea ko Rudyard Kipling, ʼe fakamanatuʼi kia tatou te lahi ʼo te kehekehe ʼo te ʼu agaʼi fenua ʼaē ʼe nātou fakamaveuveu te malamanei, ʼaē ʼe nātou lagolago ki te ʼu fehiʼa faka telepi, fakafenua, faka puleʼaga ʼaē ʼe mafola vave kia tatou fuli ia ʼaho nei. ʼI te manatu ʼa te tokolahi, ʼe mole feala koa ke fai e te ʼAtua he meʼa ki te ʼaluʼaga ʼaia? Ei, ʼe feala! Pea ʼe ina lolotoga fai nei te meʼa! ʼO toe feiā aipe mo te palalau faka tāʼaga lea ʼaē ʼa Kipling ʼo ʼuhiga mo te faʼahi ʼaia. ʼE aʼu anai ki ʼafea te maveuveu ʼa te Potu Hahake pea mo te Potu Hihifo? Neʼe ʼui e te tagata fai tāʼaga lea, ʼo fēnei: “ ʼO kaku ki te ʼaho ʼaē ʼe tutuʼu fakatahi ai ia te Kele pea mo te Lagi ia muʼa ʼo te hekaʼaga faka hau faka ʼAtua ʼo te Fakamāu.”
Neʼe tuku e te ʼAtua te maʼua ʼaē ki te fai ʼo te fakamāu ki tona ʼAlo ʼaē ko Sesu Kilisito. (Soane 5:22-24, 30) Kae ko te temi fea ʼaē ʼe kamata ai te fakamāu ʼaia? Ko ai ʼaē ʼe fakamāuʼi, pea koteā tona fua? Neʼe ko Sesu ʼaē neʼe ina fakamatalatala ʼaki te lea faka polofeta te ʼu tau ʼo te malamanei pea mo te ʼu tuʼania ʼaē neʼe hoa atu kiai, ʼaē neʼe kamata fakamamahiʼi ʼaki te malamanei ʼi te taʼu 1914. Neʼe ina tala ko te ʼu meʼa ʼaia ʼe nātou fakahā “te fakaʼiloga” ʼo tana “tau ʼi henī” fakapulipuli “pea mo te fakaʼosi ʼo te ʼu faʼahiga meʼa ʼo te tuʼu ʼaenī.”—Mateo 24:3-8.
ʼI te hoko ʼo te lea faka polofeta lahi ʼaia, neʼe faka ʼuhiga e Sesu totatou temi ohage ko he temi fakamāu, ʼo ina ʼui fēnei: “Ka haʼu anai te Foha ʼo te tagata ʼi tona kolōlia, pea mo te kau ʼaselo fuli mo ia, pea ʼe heka anai ki tona hekaʼaga faka hau faka kolōlia. Pea ʼi ʼona muʼa ʼe tānaki anai te ʼatu puleʼaga katoa, pea ʼe ina fevaevae kehe ʼaki anai te hahaʼi, ohage ko te vaheʼi e te tagata tauhi ōvi te ʼu ōvi mai te ʼu tao. Pea ʼe ina tuku anai te faga ōvi ki tona toʼomataʼu, kae ko te faga tao ki tona toʼohema.” ʼE fakatātā te faʼahi ʼaia, ko te hahaʼi fuli ʼo te temi nei ʼi te kele ʼe fakamāʼopoʼopo ia muʼa ʼo te Tuʼi Fakamāu pea ʼe ina fakamāuʼi pe ia nātou, ʼo mulimuli pe ki tanatou tali tana logo ʼaē ʼe fakamaʼuli. ʼI te kua vave hoko ʼo te fakamāu ʼi te toe mamahi lahi, ko te hahaʼi talagataʼa ohage ko te ʼu tao “ ʼe nātou ʼolo ai anai ki te pulinoa heʼegata, kae ko te kau agatonu [ko nātou ʼaē ʼe hage ko ni ʼu ōvi fakalogo], ki te maʼuli heʼegata.”—Mateo 25:31-33, 46; Fakahā 16:14-16.
‘Mai Te Hopoʼaga ʼo Te Laʼā Pea Mai Te Tōʼaga ʼo Te Laʼā’
Neʼe kamata te fakamāuʼi ʼo te mālama ʼaenī ʼi te ʼu taʼu maveuveu ʼo te ʼUluaki Tau Faka Malamanei. ʼI te temi ʼaia, ko te kau takitaki ʼo te Keletiate neʼe nātou lagolago ʼaki te loto katoa ki te ʼu tuʼuga tau. ʼO ʼiloga aipe ia nātou ohage ko he koga ʼo te mālama fakahehema ʼaē ʼe tau “mo te hāūhāū ʼo te ʼAtua.” (Soane 3:36) Kae ko ai koa te kau Kilisitiano tokalelei ʼaē neʼe haga tui ki te ʼAtua? ʼI te kamataʼaga ʼo te taʼu 1919, ko te kau Kilisitiano ʼaia neʼe kamata fakamāʼopoʼopo kia tafa ʼo te Hau, ko Sesu Kilisito.
ʼE nātou ʼōmai mai te ʼu potu fuli ʼo te kele, ʼuluaki ko te toe ʼo te kau fakanofo ʼo te toko 144 000, ʼaē neʼe fili ʼi te ʼu sēkulō ʼo te temi Kilisitiano. Ko te kau Kilisitiano ʼaia ʼe tonu ke nātou “kaugā gāue fakatahi mo Kilisito” ʼi te Puleʼaga ʼaē ʼi selo. (Loma 8:17) Kia nātou ʼaia ʼe ʼui fēnei e te polofeta ʼa te ʼAtua: “ ʼAua naʼa ke mataku, koteʼuhi ʼe ʼau nofo mo koe. Mai te hopoʼaga ʼo te laʼā ʼe ʼau ʼaumai anai tau hāko, pea mai te tōʼaga ʼo te laʼā ʼe ʼau fakamāʼopoʼopo anai koe. ʼE ʼau ʼui anai ki te potu tokelau, ‘Tuku age!’ pea ki te potu toga, ‘ ʼAua naʼa ke tāʼofi. Tuku mai toku ʼu foha mai mamaʼo, pea mo toku ʼu ʼofafine mai te potu taupotu ʼo te kele, ia nātou fuli ʼaē neʼe fakahigoaʼi ʼaki toku huafa ʼaē neʼe ʼau fakatupu maʼa toku kolōlia ʼo ʼoku totonu, ʼaē neʼe ʼau faʼu, ʼio, neʼe ʼau fai.’ ”—Isaia 43:5-7.
Kae ʼe mole gata aipe! Tāfito la talu mai te ʼu taʼu 1930, ko te toe hahaʼi tokolahi, kua kaugamālie ʼaupito ʼo lauʼi miliona, kua kamata tānaki. Ko nātou ʼaia e ko te ʼu “ōvi” ʼaē neʼe talanoa kiai ia Sesu ia Mateo 25:31-46. Ohage ko te toe ʼo te kau fakanofo ʼaē ʼi muʼa atu ia, ko te ʼu ōvi ʼaia ʼe nātou “tui” kia Ia ʼaē neʼe ina ʼui fēnei: ‘Ko koutou ko taku kau fakamoʼoni, pea ko ʼau ko tokotou ʼAtua.’ (Isaia 43:10-12) Ko te tānaki ʼo te toe hahaʼi tokolahi ʼaia ʼe ko te tahi foki ʼaia gāue ʼe fai ‘mai te hopoʼaga ʼo te laʼā ki te tōʼaga ʼo te laʼā, mai te potu tokelau ki te potu tokelau, pea mai te potu taupotu ʼo te kele.’
Ko te ʼu ōvi aga tokalelei ʼaia neʼe nātou fakatupu te ʼofa fakatautehina faka malamanei. ʼE nātou palalau ʼaki te ʼu lea kehekehe ʼo te ʼu fenua e 231 ʼaē ʼe nātou maʼuʼuli ai. Kae ʼe nātou lototahi fakalaumālie ʼaki tanatou akoʼi te “lea maʼa” ʼo te logo ʼo te Puleʼaga ʼo te Tohi-Tapu, “ke nātou pāui fuli ai ki te huafa ʼo Sehova, ke nātou tauhi fakatahi kia te ia.” (Sofonia 3:9) Ko tanatou logo tahi ʼo ʼuhiga mo te manatu, mo te fakatuʼutuʼu, pea mo te gāue, ʼe ina fakahā moʼoni ko te Potu Hahake neʼe felāveʼi mo te Potu Hihifo, pea mo te hahaʼi mai te ʼu potu fuli ʼaē, ki te tauhi pea mo te fakavikiviki ki te Tuʼi ʼAliki ko Sehova.
ʼI ʼihi ʼu fenua ko te tānaki ʼaia e lolotoga hoko ʼaki te ʼu ʼaluʼaga makehe, ohage ko tona fakahā anai e te alatike ka hoa mai.