Ko He ʼu Mataʼi Tohi Mo Tona Faka ʼUhiga Makehe
“IEHOVA SIT TIBI CUSTOS”
KO TE faka ʼuhiga ʼo te ʼu kupusiga palalau ʼaia “Ko Sehova tou hāofakiʼaga,” neʼe tohi te ʼu kupuʼi palalau ʼaia ʼi te muʼa kaupā ʼo te fale neʼe faʼu ʼi te 17 sēkulō ʼi Celerina, ko he kolo ʼe tuʼu ʼi te potu hihifo ʼo Suisi. ʼI te koga meʼa moʼugaʼia ʼaia, ʼe mole ko he meʼa fakapuna’maʼuli te maʼu ʼo te huafa ʼo te ʼAtua neʼe tā pe neʼe pena ki he ʼu fale kua lauʼi sēkulō tona ʼāfea, ki te ʼu ʼēkelesia pea mo te ʼu nofoʼaga patele. Neʼe feafeaʼi te liliu ʼo te huafa ʼo Sehova ʼo ʼiloa feiā?
Neʼe liliu te koga fenua ʼāfea ʼaē ko Rhétie (ʼaē neʼe kau kiai te ʼu koga ʼo te Siamani ʼo te potu toga-hahake ʼo te temi nei, mo Otilisia pea mo Suisi ʼo te potu hahake) ko he telituale Loma ʼi te taʼu 15 ʼi muʼa ʼo totatou temi. Ko te hahaʼi ʼaē neʼe nonofo ai neʼe nātou palalau ki te lea faka Romanche, ko he lea ʼe haʼu mai te faka latina neʼe liliu leva ko he tuʼuga lea kehekehe, pea ko ʼihi ʼi te ʼu lea ʼaia ʼe kei fakaʼaogaʼi pe ʼi te ʼu liuʼa ʼo te ʼu moʼuga Alpines ʼo Suisi pea mo te potu tokelau ʼo Italia.
ʼI te hoholo mai ʼo te temi, neʼe fakaliliu leva te ʼu koga ʼo te Tohi-Tapu ki te lea faka Romanche. Ohage la, ko te Biblia Pitschna, ʼaē neʼe maʼu ai te ʼu Pesalemo pea mo te ʼu Tohi Faka Keleka ʼo te Tohi-Tapu. ʼI te Tohi-Tapu ʼaia, ʼaē neʼe tā ʼi te 1666, ʼe tuʼa lahi te ʼasi ai ʼo te huafa ko Iehova ʼi te ʼu Pesalemo. ʼAki te liliu ʼa te Tohi-Tapu ko te ʼuluaki tohi ʼaia ke lau ʼi te ʼu loto fale, neʼe māhani te kau lautohi ʼo te Biblia Pitschna ki te huafa ʼo te Tupuʼaga.
Kae, ko te ʼu taʼiake ʼaē neʼe hoa mai leva ki muli age neʼe mole nātou faʼa leleiʼia te ʼu fehuʼi faka Tohi-Tapu. Tokolahi neʼe mole nātou kumi ke nātou ʼiloʼi pe koteā te faka ʼuhiga ʼo te kupu ʼaē ko “Iehova,” ʼo toe feiā aipe mo te kau takitaki lotu neʼe mole nātou faiga pe la, ke nātou fakamahino te kupu ʼaia. Koia la ʼaē, neʼe liliu leva te ʼu mataʼi tohi ʼaia ko ni ʼu meʼa fakamatalelei pe, ko he fakaʼiloga ʼaia ʼo he temi kua hili.
ʼI te ʼu taʼu ʼe lauʼi hogofulu ʼaenī neʼe hoki hili atu, neʼe hoko leva te fetogi makehe ʼo ʼuhiga mo te fakamahino. Neʼe ʼōmai te kau Fakamoʼoni ʼa Sehova mai te ʼu koga fenua mālalo ʼo Suisi, ʼo mālōlō ʼi te ʼu liuʼa matalelei ʼaia pea mo faiga ke nātou ako ki te hahaʼi ʼaē ʼe nonofo ai, te ʼAtua ʼaē ko tona huafa ko Sehova. Ko ʼihi kau Fakamoʼoni kua nātou fakatuʼu tonatou ʼu ʼapi ʼi te koga meʼa ʼaia, koia neʼe feala ai ke nātou fakaʼaogaʼi he temi ʼe loaloaga age moʼo fakahā ki te hahaʼi te ʼu fakatuʼutuʼu fakatalakitupua ʼa te Tupuʼaga ʼo ʼuhiga mo te kele pea mo te tagata. Koia la ʼaē, ko te ʼu mataʼi tohi ʼāfea ʼaia faka Romanche kua ʼi ai tona faka ʼuhiga foʼou ki te hahaʼi ʼe nātou ako te moʼoni ʼo ʼuhiga mo te ʼAtua ko Sehova.
[Paki ʼo te pasina 32]
IEHOVA PORTIO MEA: Ko Sehova toku vahe.—Vakaʼi ia Pesalemo 119:57