Koutou Vevete ʼAkotou ʼu Tuʼania Fuli Kia Sehova
“Koutou agavaivai . . . ʼi te lalo nima mālohi ʼa te ʼAtua ke feala hana hiki ia koutou ʼi tona temi totonu, ʼo koutou vevete kia te ia takotou ʼu tuʼania fuli, heʼe tokaga ia kia koutou.”—1 Petelo 5:6, 7.
1. ʼE lava lave feafeaʼi te tuʼania kia tatou, pea ʼe lava fakatā ki teā te potu ʼaia?
KO TE tuʼania ʼe feala ke lave mamahi ki totatou maʼuli. ʼE feala pe ke fakatatau ki he kalalā ʼe ina motuhi he kiʼi musika mālie ʼi te lātio. Kapau ʼe mole he meʼa feiā ʼi te lātio, ʼe feala ki he ʼu kiʼi musika mālie ke nātou fakatupu fiafia pea mo fakafimālieʼi ia ia ʼaē ʼe ina fakalogo. Kae, ko he kalalā logoaʼa ʼe toe feala pe ke ina fetogi te tagi mālie ʼo he musika, ʼo fakatupu ʼita ai kia tatou pea mo fakahoha. Ko te tuʼania ʼe feala pe ke lave feiā ki totatou tokalelei. ʼE feala pe ke lahi ʼaupito ʼo tupu ai he mole feala ke tou kau ki he ʼu meʼa maʼuhiga. ʼIo, “ko te tuʼania ʼi te loto ʼo he tagata, koʼena te meʼa ʼaē ʼe ina fakatūlolo tona loto.”—Tāʼaga Lea 12:25.
2. Koteā ʼaē neʼe ʼui e Sesu Kilisito ʼo ʼuhiga mo te “ ʼu tuʼania ʼo te maʼuli”?
2 Neʼe palalau ia Sesu Kilisito ki te tuʼutāmaki ʼo te lelu ʼi he lahi fau ʼo te tuʼania. ʼI tana lea faka polofeta ʼo ʼuhiga mo te ʼu ʼaho fakaʼosi, neʼe ina fakatokaga fēnei: “Ke koutou tokaga kia koutou totonu, talia naʼa mamafa tokotou ʼu loto ʼi te lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli, pea mo fokifā pe kua hoko fakapuna’maʼuli mai kia koutou te ʼaho ʼaia ohage ko he hele. Heʼe haʼu anai kia nātou fuli ʼaē ʼe nonofo ʼi te kele katoa. Koia ke koutou nonofo ʼalaʼala pea mo koutou kole mamahi ʼi te temi fuli pe, ke feala ai hakotou hāo ʼi te ʼu meʼa fuli ʼaia ʼaē ʼe tonu ke hoko mai, pea mo koutou tutuʼu ia muʼa ʼo te Foha ʼo te tagata.” (Luka 21:34-36) Ohage pe ko te lahi fau ʼo te kai pea mo te lahi fau ʼo te ʼinu ʼe feala pe ke fakatupu ai he mate ʼo te fakakaukau, ʼo toe feiā aipe ko te liliu ʼaē ʼo mamafa ʼuhi ko te “ ʼu tuʼania ʼo te maʼuli” ʼe feala pe ke fakatupu ai ia tatou he ʼatamai hēʼia, ʼo hoko ai ni ʼu ikuʼaga mamafa.
Koteā Te Tuʼania
3. ʼE faka ʼuhiga feafeaʼi te “tuʼania,” pea koteā ʼihi tupuʼaga ʼo te tuʼania?
3 ʼE faka ʼuhiga te “tuʼania” ohage “ko he faigataʼaʼia ʼo te fakakaukau ʼe fakatupu mamahi peʼe fakamataku ʼo ʼuhiga mo he malaʼia ʼe ʼamanaki hoko peʼe kua ʼiloga fakatomuʼa.” Ko he “meʼa ʼa kita ʼe fakatupu mataku” ohage pe “ko he faʼahiga mataku ʼe lahi ʼaupito pea ʼe mole ko he mataku māhani ʼe tau fakaʼiloga ʼaki te ʼu meʼa ʼi te sino (ohage ko te tafe kakava, te tosio, pea mo te gāue vave ʼo te mafu), ʼaki te lotolotolua ki te moʼoni pea mo te agaaga ʼo te moʼoni ʼo te mataku, pea ʼaki te lotolotolua leva ʼo ʼuhiga mo te mafai te tauʼi ʼo te tuʼania.” (Webster’s Ninth New Collegiate Dictionary) Koia ko te tuʼania ʼe ko he faigataʼaʼia ʼe mahino gataʼa. ʼI te ʼu tupuʼaga ʼo te tuʼania ʼe kau ai te mahaki, te liliu ʼo matuʼa, te mataku ʼaē ʼi te fai fakapō, te mavae ʼi he gāue, pea mo te hoha pe ʼaē ki te ʼu meʼa ʼo tokita famili.
4. (a) Koteā ʼaē ʼe lelei ke tou manatuʼi ʼo ʼuhiga mo te hahaʼi pea mo tanatou ʼu tuʼania? (b) Kapau ʼe tou lolotoga tau nei mo he tuʼania, koteā te meʼa ʼaē ʼe feala ke tou fai?
4 ʼE mahino ia, ʼe ʼi ai te ʼu faʼahiga tuʼania kehekehe, ohage pe ko te ʼi ai ʼo te ʼu ʼaluʼaga kehekehe ʼe feala ke nātou fakatupu ai te tuʼania. Ko he ʼaluʼaga ʼe mole lave tatau ki te hahaʼi fuli. Koia, ʼe tonu ke mahino kia tatou, tatau aipe mo kapau ko he meʼa ʼe mole ina fakahoha ai ia tatou, ʼe feala ke ina fakatupu ʼi niʼihi ʼi ʼotatou ʼu kaugā fagona ʼi te tui, he toe tuʼania lahi. Koteā ʼaē ʼe feala ke fai mokā tuputupu he tuʼania ʼo mole feala hatatou tuku tatatou ʼatamai ki te ʼu moʼoni logo lelei pea mo fakatupu fiafia ʼo te Folafola ʼa te ʼAtua? Koteā ʼaē ʼe feala ke fai mo kapau ʼe tou tau mālohi mo te tuʼania ʼo mole feala ai hatatou tokakaga ki te ʼu fehuʼi ʼo ʼuhiga mo te pule faʼitaliha ʼa Sehova pea mo te agatonu faka Kilisitiano? ʼE mole lagi feala hatatou fetogi totatou ʼu ʼaluʼaga. Kae, ʼe tonu ke tou kumi te ʼu puani faka Tohi-Tapu ʼe tokoni anai kia tatou ke tou tauʼi te tuʼania ʼaē ʼe tupu mai te ʼu faigataʼa kovi ʼo te maʼuli.
ʼE Maʼu Te Tokoni
5. E feafeaʼi hatatou fai he meʼa ke ʼalutahi mo te Pesalemo 55:22?
5 Ka ʼaoga he tokoni fakalaumālie ki te kau Kilisitiano pea kua lahi fau ʼonatou ʼu tuʼania, ʼe feala hanatou maʼu he fakaloto fīmālie ʼi te Folafola ʼa te ʼAtua. ʼE ina foaki mai he takitaki ʼe tau mo te falala pea mo ina foaki mai he ʼu tuʼuga fakamoʼoni ʼe mole līʼakina tatou ʼi totatou ʼuhiga kaugana agatonu ʼa Sehova. Ohage la, neʼe hiva fēnei e te tagata fai pesalemo ko Tavite: “Tuku tau kavega kia Sehova, pea ko ia, ʼe ina lagolago anai koe. ʼE mole ina fakagafua anai ke tūkia te faitotonu.” (Pesalemo 55:22) E feafeaʼi hatatou maʼuli ʼo ʼalutahi mo te ʼu palalau ʼaia? ʼAki tatatou tuku tatatou ʼu tuʼania fuli, mo te ʼu meʼa fuli ʼaē ʼe tou hoha kiai, mo te ʼu meʼa fuli ʼaē ʼe tou matataku kiai, pea mo te ʼu meʼa fuli ʼaē ʼe tou lotomamahi ai, ki tatatou Tāmai ʼofa ʼaē ʼe ʼi selo. Ko te potu ʼaia ʼe tokoni anai kia tatou ke tou maʼu he loto fīmālie pea mo he loto tokalelei.
6. ʼO mulimuli kia Filipe 4:6, 7, koteā ʼaē ʼe feala ke fai e te faikole maʼa tatou?
6 Ko he faikole fakamalotoloto ʼe fai tuʼumaʼu ʼe maʼuhiga mo kapau ʼe tou tuku tatatou ʼu kavega, ʼo kau ai kiai mo tatatou ʼu tuʼania fuli kia Sehova. Ko te potu ʼaia ʼe ina ʼaumai anai he tokalelei ʼi te loto, koteʼuhi neʼe tohi fēnei e te ʼapositolo ko Paulo: “ ʼAua naʼa koutou tuʼania ki he meʼa, kaʼe ʼi te meʼa fuli pe, ʼaki te faikole pea mo te ʼu kole mamahi ʼaki te fakafetaʼi, koutou fakahā ki te ʼAtua takotou ʼu kole; pea ko te tokalelei ʼa te ʼAtua, ʼaē ʼe māʼoluga age ʼi te ʼu manatu fuli pe, ʼe ina taupau anai tokotou ʼu loto pea mo ʼokotou ʼu ʼatamai ʼaki ia Kilisito Sesu.” (Filipe 4:6, 7) Ko te “tokalelei ʼa te ʼAtua” ʼaē ʼe mole hona fakatatau ʼe mole ko he tokalelei māhani ʼe fakafiafia kiai te kau kaugana ʼa Sehova ʼaē kua nātou foaki tonatou maʼuli tatau aipe la mo te ʼu ʼaluʼaga ʼaē ʼe faigataʼa ʼaupito. ʼE maʼu te tokalelei ʼaia mai tatatou ʼu felogoi lelei takitokotahi mo te ʼAtua. ʼI tatatou kole te laumālie maʼoniʼoni pea mo tou tuku ia ia ke ina taki tatou, ʼe mole toʼo ai ʼatatou ʼu faigataʼa fuli ʼo te maʼuli, kae ʼe tou fakafiafia ki te fua ʼo te laumālie ʼaē ko te tokalelei. (Luka 11:13; Kalate 5:22, 23) ʼE mole lahi fau tonatou hoha ʼuhi ko te tuʼania, koteʼuhi ʼe tou ʼiloʼi ko Sehova ʼe ina fai he meʼa ki tana ʼu kaugana agatonu ke nātou “maʼuʼuli ʼi te haohaoa” pea ʼe mole ina tuku anai ke hoko he meʼa ke tupu ai honatou tuʼutāmaki ʼe mole feala hona fakatokatokaʼi.—Pesalemo 4:8.
7. Koteā te gāue ʼa te kau tagata ʼāfea Kilisitiano ʼe feala ke nātou fai ʼi tanatou tokoniʼi ʼo tatou ki te tauʼi ʼo te tuʼania?
7 Kae, e feafeaʼi mo kapau ʼe hoholo aipe ʼatatou ʼu tuʼania, logope la tatatou metitasio ʼaē ki te Tohi-Tapu pea mo tou haga faikole? (Loma 12:12) Ko te kau tagata ʼāfea ʼaē neʼe fakanofo ʼi te ʼu kokelekasio ʼe ko he tahi ʼu fakatuʼutuʼu ʼa Sehova moʼo tokoniʼi ʼo tatou ʼi te faʼahi fakalaumālie. ʼE feala ke nātou fakaloto fīmālieʼi tatou pea mo tokoniʼi tatou ʼaki tanatou fakaʼaogaʼi ʼo te Folafola ʼa te ʼAtua pea mo faikole mo tatou maʼa tatou. (Sake 5:13-16) Neʼe fakaloto mālohiʼi e te ʼapositolo ko Petelo tana ʼu kaugā tagata ʼāfea ke nātou taupau te faga ōvi ʼaki te lotolelei, pea mo te loto fakavilivili pea mo nātou liliu ko ni ʼu faʼifaʼitakiʼaga. (1 Petelo 5:1-4) ʼE tokakaga moʼoni te ʼu tagata ʼaia ki totatou maʼuli mālōlō pea mo nātou fia liliu ʼo ʼaoga. ʼIo, ke tou maʼu katoa te ʼu lelei mai te tokoni ʼa te kau tagata ʼāfea pea ke maui mālie totatou maʼuli fakalaumālie ʼi te kokelekasio, ʼe ʼaoga kia tatou fuli ke tou maʼuliʼi te tokoni ʼa Petelo: “Ko koutou kau tūpulaga, koutou fakalogo ki te ʼu tagata ʼāfea. Ke koutou kofuʼi te manatu agavaivai, heʼe ko te ʼAtua ʼe fakafeagai kia nātou ʼaē ʼe fialalahi, kae ʼe ina tuku tana agalelei makehe ki te kau agavaivai.”—1 Petelo 5:5.
8, 9. Koteā te fakaloto fīmālie ʼe feala ke maʼu ia 1 Petelo 5:6-11?
8 Neʼe toe ʼui fēnei e Petelo: “Koutou agavaivai ʼi te lalo nima mālohi ʼa te ʼAtua ke feala hana hiki ia koutou ʼi tona temi totonu, ʼo koutou vevete kia te ia takotou ʼu tuʼania fuli, heʼe tokaga ia kia koutou. Koutou nonofo ʼalaʼala, koutou nonofo tokaga. Ko tokotou fili, ia te Tevolo, ʼe hage ko he laione ʼe gugulu, ʼe feʼaluʼaki ke ina kai he tahi. Kae ke koutou tekeʼi fakamālohi ia ia ʼaki te tui, heʼe koutou ʼiloʼi ko te ʼu mamahi ʼaia ʼe hoko ki te famili katoa ʼo tokotou ʼu tēhina ʼi te malamanei. Pea, ka kua ʼosi leva tokotou mamahi ʼaē ʼi te kiʼi temi siʼipe, ko te ʼAtua ʼo te ʼofa makehe fuli pe, ʼaē neʼe ina pāui koutou ki tona kolōlia heʼegata ʼo fakatahi mo Kilisito, ʼe ina fakakatoa anai takotou akoako, ʼe ina fakaloto mālohiʼi anai ia koutou, ʼe ina fakatuʼu mālohi anai ia koutou. ʼA ia te mālohi ʼo heʼegata! Ameni.”—1 Petelo 5:6-11.
9 Ko he meʼa fakaloto fīmālie te ʼiloʼi ʼaē ʼe feala hatatou ‘vevete ʼatatou ʼu tuʼania fuli ki te ʼAtua heʼe tokaga ia kia tatou’! Pea kapau ko ʼihi ʼi ʼatatou ʼu tuʼania ʼe haʼu mai te ʼu fakahala ʼa Satana ke ina holoʼi tatatou ʼu felogoi mo Sehova ʼaki tana ʼaumai kia tatou te fakataga pea mo ʼihi mamahi, ʼe mole koa la ko he meʼa fakaofoofo te ʼiloʼi ko meʼa fuli ʼe maui mālie anai kia nātou ʼaē ʼe nātou taupau maʼu tanatou agatonu? ʼIo, ʼi te ʼosi leva ʼo tatatou mamahi ʼi te kiʼi temi siʼipe, ʼe fakakatoa anai e te ʼAtua ʼo te ʼofa makehe fuli pe tatatou akoako pea mo ina fakaloto mālohiʼi pea mo fakatuʼu mālohi anai tatou.
10. Koteā te ʼu kalitate e tolu ʼaē ʼe fakahā e ʼuluaki Petelo 5:6, 7 ʼe feala ke tokoni ki te fakamaʼamaʼa ʼo te tuʼania?
10 ʼE palalau ia ʼuluaki Petelo 5:6, 7 ki te ʼu kalitate e tolu ʼe feala ke tokoni kia tatou ke tou tauʼi te tuʼania. ʼI te ʼu kalitate ʼaia, ʼe ʼi ai te agavaivai, peʼe ko te “manatu agavaivai.” ʼE fakaʼosi te vaega 6 ʼaki te kupuʼi palalau ʼaenī “tona temi faigamālie,” ʼe faka ʼuhiga ai te maʼua ʼaē ke loto faʼa kātaki. ʼE fakahā e te vaega 7 ʼe feala ke tou vevete ʼaki he loto falala ʼatatou ʼu tuʼania fuli ki te ʼAtua ‘heʼe tokaga ia kia tatou,’ pea ko te ʼu kupuʼi palalau ʼaia ʼe ina fakaloto mālohiʼi he falala katoa kia Sehova. Koia tou vakaʼi peʼe feafeaʼi he tokoni mai ʼa te agavaivai, mo te loto faʼa kātaki pea mo te falala katoa ki te ʼAtua, ki te fakamaʼamaʼa ʼo te tuʼania.
E Feafeaʼi He Lava Tokoni ʼa Te Agavaivai
11. E feafeaʼi he lava tokoni mai ʼo te agavaivai ke tou tauʼi te tuʼania?
11 Kapau ʼe tou agavaivai, ʼe tou fakamoʼoni anai ko te ʼu manatu ʼa te ʼAtua ʼe māʼoluga age ʼi ʼatatou ʼu manatu. (Isaia 55:8, 9) ʼE tokoni mai kia tatou te agavaivai ke tou mahino ki te siʼisiʼi ʼo tatatou fakakaukau mokā ʼe fakatatau ki te fakasiosio mamaʼo ʼa Sehova. ʼE sio ia ki te ʼu meʼa ʼaē ʼe mole kaku kiai tatatou sio, ohage ko tona fakahā ʼi te meʼa ʼaē neʼe hoko ki te tagata agatonu ko Sopo. (Sopo 1:7-12; 2:1-6) ʼI tatatou agavaivai ʼaē “ ʼi te nima mālohi ʼa te ʼAtua,” ʼe tou fakamoʼoni ai ki tatatou tuʼulaga mālalo ʼi tatatou vāhaʼa mo te Tuʼi Māʼoluga. Kae, ʼe tokoni mai foki te potu ʼaia ke tou tauʼi ʼaki te ʼu ʼaluʼaga ʼaē ʼe ina fakagafua. ʼE lagi holi mālohi anai totatou loto ki he fakafimālie ʼi te moʼi lakaga pe ʼaia, kae mai tona ʼaluʼaga ʼaē ʼe matatau lelei te ʼu kalitate ʼa Sehova, ʼe ina ʼiloʼi lelei peʼe ko te temi fea pea mo feafeaʼi hana fai he meʼa maʼa tatou. Koia, ohage ko te tamaliki ʼaē kei liliki, ʼaki te agavaivai tou falala ki te nima mālohi ʼa Sehova, ʼaki te mahino papau ʼaē ʼe tokoni anai kia tatou ki te tauʼi ʼo tatatou ʼu tuʼania.—Isaia 41:8-13.
12. E feafeaʼi he lava maʼu ʼo he fīmālie fakakoloa mo kapau ʼe tou maʼuliʼi ʼaki te agavaivai te ʼu palalau ʼaē ia Hepeleo 13:5?
12 ʼE fakapipiki e te agavaivai te lotolelei ʼaē ke maʼuliʼi te ʼu tokoni ʼaē ʼe haʼu mai te Folafola ʼa te ʼAtua, ʼaē ʼe feala ke ina fakamaʼamaʼa te tuʼania. Ohage la, kapau ʼe haʼu tatatou tuʼania mai tatatou pipiki mālohi ʼaē ki te faiga ki te ʼu koloā, e lagi lelei ke tou fakakaukauʼi te tokoni ʼaenī ʼa Paulo: “Ke puli ʼi tokotou faʼahiga maʼuli te manako ki te paʼaga, koutou fakafeauga ki te ʼu meʼa ʼaē ʼe maʼu, heʼe neʼe ʼui [e te ʼAtua]: ‘Kailoa ʼe mole ʼau mavae anai ia koe kailoa ʼe mole ʼau līaki anai koe!’ ” (Hepeleo 13:5) ʼAki te maʼuliʼi ʼo te faʼahiga tokoni ʼaia ʼi te agavaivai, tokolahi neʼe nātou faka ʼāteaina ia nātou mai te tuʼania lahi pea mo he fīmālie ʼi te faʼahi ʼo te koloā. Logo aipe ko tanatou ʼaluʼaga ʼi te faʼahi ʼo te paʼaga ʼe mole lelei ai, kae ʼe mole ina puleʼi tanatou ʼu manatu ʼo tupu ai hanatou tuʼutāmaki ʼi te faʼahi fakalaumālie.
Te Gāue ʼo Te Loto Kātaki
13, 14. (a) ʼO ʼuhiga mo te kātaki fualoa, koteā te faʼifaʼitaki neʼe tuku e te tagata ko Sopo? (b) Koteā te gāue ʼe lava fai kia tatou e te fakatalitali kia Sehova ʼaki he loto kātaki?
13 Ko te kupuʼi palalau “ ʼi tona temi totonu,” ʼaē ia 1 Petelo 5:6 ʼe faka ʼuhiga te maʼua ki he kātaki fualoa. Ko te meʼa ʼe tau hoko ka loaloaga he fihifihia, ʼe feala pe ke ina fakaʼāʼāsili te tuʼania. ʼI te faʼahiga ʼaluʼaga ʼaia, ʼe ʼaoga ai ke tou tuku te ʼu meʼa ʼaē ʼe hoko, kia nima ʼa Sehova. Neʼe tohi fēnei e te tisipulo ko Sake: “ ʼE mātou kalaga manuʼia ia nātou ʼaē neʼe nātou faʼa kātaki. Neʼe koutou logo ki te faʼa kātaki ʼa Sopo pea mo te ikuʼaga neʼe tuku ake e Sehova, ko Sehova ʼe fonu ʼi te ʼofa pea mo te manavaʼofa.” (Sake 5:11) Neʼe tau mo Sopo he toe puli ʼi te faʼahi faka ekonomike, neʼe mamate tana fānau e toko hogofulu, neʼe maʼuli mamahi ʼi te mahaki fakalialia, pea neʼe fakamāuʼi hala ia ia e te ʼu tagata fakaloto fīmālie loi. ʼE mahino ia ko he toe tuʼania ʼe hoko ʼi te ʼu taʼi ʼaluʼaga ʼaia.
14 Ko te meʼa ʼaē ʼe tou ʼiloʼi papau, ko Sopo neʼe ko he faʼifaʼitakiʼaga ʼi te kātaki fualoa. Ka tou tau mo he ʼahiʼahi kovi ʼuhi ko te tui, e lagi tonu ke tou fakatalitali ki he fakafimālie, ohage pe ko tana fai e Sopo. Kae neʼe gāue te ʼAtua maʼa Sopo, ʼo ina fakafimālieʼi mai tona maʼuli mamahi pea mo fakapale ia ia ʼo mahu ʼaupito. (Sopo 42:10-17) Ko te fakatalitali fualoa ʼe ina fakatuputupu tatatou faʼa kātaki pea mo fakahā ai te loloto ʼo tatatou pipiki ʼaē kia te ia.—Sake 1:2-4.
Koutou Falala Kia Sehova
15. He koʼe koa ʼe tonu ke tou falala katoa kia Sehova?
15 Neʼe fakaloto mālohiʼi e Petelo tana ʼu kaugā fagona tui ke nātou ‘vevete ʼanatou ʼu tuʼania fuli ki te ʼAtua heʼe tokaga ia kia nātou.’ (1 Petelo 5:7) Koia ʼe feala pea ʼe tonu ke tou falala katoa kia Sehova. ʼE ʼui fēnei e Tāʼaga Lea 3:5, 6: “Tuku tau falala kia Sehova mo tou loto katoa pea mo ʼaua naʼa ke falala ki tou ʼatamai ʼāteaina. ʼI tou ʼu ala fuli tokagaʼi ia ia, pea ko ia, ʼe ina fakatonutonu anai tou ʼu ala.” ʼUhi ko te ʼu meʼa neʼe hoko kia nātou ʼi te temi ʼaē kua hili, ko ʼihi ʼaē ʼe lahi tanatou tuʼania ʼe faigataʼa kia nātou te falala ki ʼihi tagata. Kae ʼe mahino papau ko tatou ʼe tou falala ki te Tupuʼaga, te Matapuna pea mo Lagolago ʼo te maʼuli. Tatau aipe mokā ʼe mole tou tuku ʼatatou ʼu meʼa ʼi he faʼahiga ʼaluʼaga, ʼe feala hatatou falala kia Sehova ke ina hāofaki tatou mai ʼatatou ʼu malaʼia.—Pesalemo 34:18, 19; 36:9; 56:3, 4.
16. Koteā ʼaē neʼe ʼui e Sesu Kilisito ʼo ʼuhiga mo te tuʼania faʼu ki te ʼu meʼa fakasino?
16 Ko te falala ʼaē ki te ʼAtua ʼe kau kiai te fakalogo ʼaē ki tona Foha, ko Sesu Kilisito, ʼaē neʼe ina akoʼi te meʼa ʼaē neʼe akoʼi age e tana Tāmai. (Soane 7:16) Neʼe ʼeke e Sesu tana ʼu tisipulo ke nātou ‘tānaki maʼa nātou he ʼu koloā ʼi selo’ ʼaki tanatou tauhi ʼaē kia Sehova. Kae e feafeaʼi ki te ʼu meʼa fakasino ʼe ʼaoga ʼaē ʼe hage ko te meʼa kai, te ʼu mutuʼi meʼa, pea mo te nofoʼaga? Neʼe tokoni fēnei age e Sesu: “Tuku takotou hoha.” Neʼe ina fakahā ko te ʼAtua ʼe ina fafaga te ʼu manulele. ʼE ina teuʼi fakamatalelei te ʼu fisiʼi teu. ʼE mole koa la maʼuhiga age te ʼu kaugana ʼa te ʼAtua ʼi te ʼu meʼa ʼaia? ʼE mahino ia. Koia, neʼe fēnei te fakaloto mālohi ʼa Sesu: “Ke koutou haga kumi muʼa te puleʼaga pea mo te faitotonu [ʼo te ʼAtua,] pea ʼe toe foaki atu anai mo te ʼu meʼa fuli ʼaia kia koutou.” Neʼe toe ʼui fēnei e Sesu: “Koia, ʼaua naʼa koutou hoha ʼo ʼuhiga mo te ʼapogipogi, heʼe ko te ʼapogipogi ʼe ʼi ai anai tona ʼu hoha ʼo ʼona.” (Mateo 6:20, 25-34) ʼIo, ʼe ʼaoga kia tatou te meʼa kai, mo te meʼa ʼinu, mo te ʼu mutuʼi meʼa, pea mo he nofoʼaga, kae kapau ʼe tou falala kia Sehova, ʼe mole tou tuʼania fau anai ʼo ʼuhiga mo te ʼu meʼa ʼaia.
17. E feafeaʼi hatatou fakatā te ʼaoga ʼaē ke ʼuluaki kumi muʼa te Puleʼaga?
17 Ke tou haga kumi muʼa te Puleʼaga, ʼe tonu ke tou falala ki te ʼAtua pea ʼe tonu ke tou tokakaga ki te ʼu meʼa ʼaē ʼe takimuʼa ʼi totatou maʼuli. Ko he tagata uku ʼe mole hona meʼa mānava ʼe feala pe ke uku ʼi te lalo tai ko he kumi ʼo he mataʼi tofe. Ko te faʼahi ʼaia ʼe ina ʼaumai ai he falā ki tona famili. ʼE ko he meʼa maʼuhiga ia ʼe takimuʼa! Kae koteā ʼaē ʼe maʼuhiga age? Ko te ʼaele! ʼE tonu ke tau hake ake ke mānava ki te ʼaele. Ko te ʼaele ko te meʼa maʼuhiga ia ʼe takimuʼa. ʼE toe feiā aipe, e lagi ʼe ʼi ai he meʼa ʼe ʼaoga ʼi te tuʼu ʼo te ʼu faʼahiga meʼa ʼaenī ke tou maʼu te ʼu meʼa maʼuhiga ʼo te maʼuli. Kae, ʼe tonu ke takimuʼa te ʼu meʼa fakalaumālie koteʼuhi ko te ʼu meʼa maʼuhiga ʼo te maʼuli ʼo te loto fale ʼe fakalogo ki te ʼu meʼa ʼaia. Ke ʼaua naʼa tou tuʼania fau ʼo ʼuhiga mo te ʼu meʼa fakasino ʼaē ʼe ʼaoga, ʼe tonu ke tou falala katoa ki te ʼAtua. Tahi ʼaē meʼa, ‘ko te lahi ʼaupito tuʼumaʼu te gāue ʼi te ʼAliki’ ʼe feala ke tokoni ki te fakamaʼamaʼa ʼo te tuʼania koteʼuhi “ko te fiafia ʼo Sehova” ʼe ko he tule mālohi anai ia kia tatou.—1 Kolonito 15:58; Nehemia 8:10.
Koutou Haga Vevete ʼAkotou Tuʼania Kia Sehova
18. Koteā te fakamoʼoni ʼe tou maʼu ʼo ʼuhiga mo te ʼui ʼaē, ko te vevete ʼo tatatou ʼu tuʼania fuli kia Sehova ʼe feala ke tokoni moʼoni kia tatou?
18 Ke haga tuʼumaʼu tatatou tokaga ki te ʼu meʼa fakalaumālie, ʼe tonu ke tou haga vevete ʼatatou tuʼania kia Sehova. Ke tou manatuʼi tuʼumaʼu ʼe tokaga moʼoni ia ki tana ʼu kaugana. Moʼo fakatā ʼo te faʼahi ʼaia: ʼUhi ko te heʼe agatonu ʼo tona ʼohoana ki ai, ko te tuʼania ʼo te fafine Kilisitiano neʼe ʼāʼāsili ʼaupito ʼo mole kei feala hana moe. (Vakaʼi ia Pesalemo 119:28.) Kae, ʼi tona moeʼaga, neʼe ina vevete tana tuʼania kia Sehova. Neʼe ina fakahā te ʼu meʼa ʼi tona loto ki te ʼAtua, ʼo ina ʼui age te mamahi ʼaē ʼe tau mo ia pea mo tana ʼu tamaliki fafine kei liliki e lua. ʼI te hili pe ʼaē ʼo tana kumi he fakafimālie ʼi te faikole fakamalotoloto, ʼo hoki lava moe tuʼumaʼu ai, koteʼuhi neʼe falala ia ko Sehova ʼe tokaga anai ki ai pea mo tana ʼu tamaliki. Ko te fafine ʼaia, neʼe mavete leva ki muli mai ʼo mulimuli pe ki te Tohi-Tapu, kua fiafia ʼi te temi nei pea kua ʼohoana mo te tagata ʼāfea.
19, 20. (a) Koteā he ʼu potu ʼe tou maʼu ke feala hatatou tauʼi te tuʼania? (b) Koteā ʼaē ʼe tonu ke tou haga fai ʼaki ʼatatou ʼu tuʼania fuli?
19 ʼI totatou ʼuhiga hahaʼi ʼa Sehova, ʼe lahi te ʼu potu ʼe tou maʼu ke tou tauʼi te tuʼania. Ko te maʼuliʼi ʼo te Folafola ʼa te ʼAtua ʼe maʼuhiga ʼaupito. ʼE tou maʼu te meʼa kai fakalaumālie ʼe foaki mai e te ʼAtua ʼaki “te tagata kaugana agatonu mo poto,” ʼe kau ai te ʼu alatike ʼe ʼaoga pea mo te fakaloto mālohi ʼe tā ʼi Te Tule Leʼo pea mo te Réveillez-vous! (Mateo 24:45-47) ʼE tou maʼu te tokoni ʼo te laumālie maʼoniʼoni ʼa te ʼAtua. Ko te faikole tuʼumaʼu pea mo fakamalotoloto ʼe ʼaoga lahi kia tatou. ʼE nofo teuteu te ʼu kau tagata ʼāfea ʼaē kua fakanofo pea mo nātou lotolelei ke nātou foaki he tokoni pea mo he fakaloto fīmālie ʼi te faʼahi fakalaumālie.
20 ʼE ʼaoga lahi tatatou agavaivai pea mo tatatou loto kātaki moʼo tauʼi te tuʼania ʼaē ʼe ina fakahoha tatou. ʼE maʼuhiga tāfito te falala katoa ʼaē kia Sehova, koteʼuhi ko tatatou tui ʼe fakatuʼu mālohi ʼaki tana tokoni pea mo tana takitaki. Pea tahi ʼaē meʼa, ko te tui ʼaē ki te ʼAtua ʼe ina taupau tatou ke ʼaua naʼa lahi fau tatatou tuʼania. (Soane 14:1) Ko te tui ʼe ina ʼeke tatou ke tou ʼuluaki kumi muʼa te Puleʼaga pea ke tou haga nofo maʼumaʼua ʼi te gāue fiafia ʼa te ʼAliki, ʼaē ʼe tokoni mai kia tatou ke tou tauʼi te tuʼania. Ko te taʼi gāue ʼaia ʼe feala ke ina fakatupu ai ia tatou he loto fīmālie ʼi te lotolotoiga ʼo nātou ʼaē ʼe nātou hiva fakavikiviki ki te ʼAtua ʼo talu ai. (Pesalemo 104:33) Koia, ke tou haga vevete ʼatatou ʼu tuʼania kia Sehova.
ʼE Feafeaʼi Anai Hakotou Tali?
◻ E feafeaʼi he faka ʼuhiga ʼo te tuʼania?
◻ Koteā he ʼu faʼahiga fai ke feala hatatou tauʼi te tuʼania?
◻ E feafeaʼi he lava tokoni ʼo te agavaivai pea mo te loto kātaki ki te fakamaʼamaʼa ʼo te tuʼania?
◻ Moʼo tauʼi ʼo te tuʼania, he koʼe ʼe maʼuhiga te falala katoa kia Sehova?
◻ He koʼe koa ʼe tonu ke tou haga vevete ʼatatou ʼu tuʼania fuli kia Sehova?
[Paki ʼo te pasina 24]
ʼE koutou ʼiloʼi koa te tupuʼaga ʼo te ʼui e Sesu, “Tuku takotou hoha”?