Ko Te Kau Faka Mafola ʼo Te Puleʼaga ʼe Nātou Fakamatala

Ko Te Logo Lelei ʼo Te Puleʼaga ʼe Faka Mafola Anai

LOLOTOGA te ʼu sēkulō ko te fakafeagai tāfito ʼa te ʼAtua, ia Satana te Tevolo, neʼe ina fakaʼaogaʼi ʼaki he faʼahiga faiva te ʼu puleʼaga faka politike pea mo te lotu hala, ko tana ʼu faiga ʼaia ke tāʼofi te mafola ʼo te Lotu Faka Kilisitiano moʼoni. Kae ko te ʼu faiga ʼaia neʼe mole iku ia. Neʼe fakakikite e Sesu ko “te logo lelei ʼaenī ʼo te puleʼaga ʼe faka mafola anai [kae mole ʼui ia, “ ʼe lagi faka mafola anai” peʼe “ ʼe feala pe anai ke faka mafola”] ʼi te kele katoa, ko he meʼa fakamoʼoni ia ki te ʼu puleʼaga katoa.”—Mateo 24:14.

Ko te tō ʼa Satana neʼe ʼiloga ʼi Heleni. ʼI te fenua ʼaia neʼe faigaʼi e te ’Ēkelesia Orthodoxe faka Keleka ke ina fakagata ki te kau Fakamoʼoni ʼa Sehova te faka mafola ʼo te logo lelei ʼo te Puleʼaga. Kae, ohage ko tona fakaʼiloga ʼi te fakamatala ʼaenī, ki muli age ko te ʼu moʼoni ʼa te Tohi-Tapu neʼe kaku ki te hahaʼi ʼaē ʼe faitotonu logope la te fakafeagai.

Lagi kua hili kiai te ʼu taʼu e 30, neʼe tali e te patele Orthodoxe faka Keleka te logo lelei pea neʼe ina fakahā tana fia liliu ko he Fakamoʼoni ʼa Sehova. Kae neʼe fakafeagai mālohi tona ʼu kāiga ki te faiga ʼaia pea neʼe nātou fakamālohiʼi ia ia ke ina līaki tana fakatahi mo te kau Fakamoʼoni. Moʼo fakafiafiaʼi tona famili, neʼe ina hoko atu pe tona tuʼulaga faka pelepitelo; kae neʼe ina fakamoʼoni tuʼumaʼu neʼe tokoni age te kau Fakamoʼoni ʼa Sehova ki ai ʼo ʼuhiga mo te ako ʼo te moʼoni pea ko te potu ʼaia neʼe ina līaki moʼo fetogi ʼaki hana maʼu ʼo he tuʼulaga māʼoluga ʼi te lotu hala.

Kae, neʼe tautau palalau lelei ʼo ʼuhiga mo te kau Fakamoʼoni ʼa Sehova mokā maʼu hona temi faigamālie. Neʼe lahi te ʼu lakaga neʼe ina tokoniʼi ai te hahaʼi, kapau neʼe nātou fia ako te ʼu moʼoni ʼa te Tohi-Tapu, neʼe lelei ke nātou ako mo te kau Fakamoʼoni. Hili te ʼu taʼu kiai neʼe ʼi ai ʼihi neʼe nātou muliʼi tana fakaloto mālohi ʼaia.

Mole faʼa fualoa neʼe mahaki kovi te patele pea neʼe ina ʼiloʼi kua ʼamanaki mate. ʼI tana ʼi te lopitali, neʼe ina pāui tana fānau, pea neʼe nātou fakatahitahi fuli ʼi tona vaʼe palepale.a Neʼe ina fakamatalatala age kia nātou kapau ʼe mate, ʼe feala pe hanatou toe felāveʼi mo ia. Neʼe palalau age kia nātou ʼo ʼuhiga mo te akonaki ʼa te Tohi-Tapu ʼo ʼuhiga mo te toe fakatuʼuake anai ʼa te tagata e Sehova ke maʼuʼuli ʼi he palatiso ʼi te kele, kae kapau neʼe nātou fia sio moʼoni ki te hoko ʼo te faʼahi ʼaia, neʼe tonu ke nātou ako te moʼoni mai te Tohi-Tapu pea ke nātou mavae ʼi te lotu hala. Neʼe ina fakaʼui ai kia nātou ke nātou fakatahi mo te kau Fakamoʼoni ʼa Sehova pea ke nātou ako mai ia nātou peʼe feafeaʼi te liliu ko he ʼu Kilisitiano moʼoni.

Mole faʼa fualoa pea neʼe mate te patele. Kae ko tana tokoni fakaʼosi ki tana fānau neʼe ʼi ai tona ʼu fua lelei. Ko tona ʼofafine, ohage pe ko te tokolahi ʼo tona ʼu kāiga, neʼe fakafeagai mālohi ki te kau Fakamoʼoni ʼa Sehova ʼo feiā mo tanatou gāue. Kae neʼe mole feala ia ke ina meʼa noaʼi te pāui fakamalotoloto ʼa tana tāmai ʼaē neʼe tūgaki mate, koia ʼi te temi ʼaē neʼe felāveʼi ai mo te kau Fakamoʼoni ʼa Sehova, neʼe ina kamata ako te Tohi-Tapu. ʼO mole faʼa fualoa neʼe liliu ko he Fakamoʼoni, ʼaki tana foaki ʼo tona maʼuli maʼa Sehova ʼAtua pea mo tana fakahā ʼo tona voto ʼaki te papitema.

ʼI Heleni pea mo te ʼu fenua e 230 tupu, ʼe falala te kau Fakamoʼoni ʼa Sehova ki te mālohi ʼo te laumālie maʼoniʼoni ʼa te ʼAtua. ʼAki te tokoni katoa ʼa te laumālie maʼoniʼoni, ʼe nātou kau ki te fakahoko ʼo te fakakikite ʼa Sesu: “ ʼE koutou maʼu anai te mālohi mokā hifo atu anai te laumālie maʼoniʼoni kia koutou pea ʼe koutou liliu anai ko haku kau fakamoʼoni ʼi Selusalemi pea mo Sutea katoa pea mo Samalia ʼo kaku ki te potu ʼaē ʼe mamaʼo ʼo te kele.”—Gāue 1:8.

[Nota ʼi te lalo pasina]