Te ʼu Fehuʼi ʼa Te Kau Lautohi

Ko ai te kau Filisitini ʼaē ʼe talanoa ki ai te Tohi-Tapu?

ʼE tau palalau te Tohi-Tapu ki te hahaʼi ʼe ʼiloa ko te kau Filisitini, ʼaē neʼe maʼuʼuli ʼi Kanaane ʼi te temi ʼaē neʼe maʼu ai e te hahaʼi ʼāfea ʼa te ʼAtua te Kele ʼo te Fakapapau. Lolotoga te temi loaloaga, ko te kau Filisitini ʼāfea ʼaia neʼe nātou fakafeagai ki te hahaʼi ʼa te ʼAtua, ohage ko tona fakaʼiloga lelei ʼi te fakamatala ʼo te felāveʼi ʼa Tavite pea mo te tagata lahi pea mo toʼa ʼa te kau Filisitini ʼaē neʼe higoa ko Koliate.—1 Samuele 17:1-3, 23-53.

ʼE fakahā e te Tohi-Tapu ko te kau Filisitini ʼo te temi ʼāfea neʼe ʼōmai mai Caphtor ʼo ʼolo ki te potu toga-hihifo ʼo te mata fenua ʼo Kanaane. (Selemia 47:4) Kofea ia Caphtor? ʼE fakatokaga fēnei e te tohi (The International Standard Bible Encyclopedia, 1979): “Logope ʼe mole he fakamoʼoni moʼo tukuʼaki, ʼe hinoʼi e te kau popoto ʼo te temi nei te motu ʼo Kelete (peʼe lagi ko Kelete ʼo fakatahi mo te ʼu motu ʼo Égée, ʼaē ʼe nātou agaʼi fenua tahi), ʼe mahino ia ko te koga meʼa tonu ʼaia.”—Tohi 1, pasina 610.

ʼO ʼalutahi mo te faʼahi ʼaia, ʼe lau fēnei ia Amosi 9:7 ʼi te Tohi-Tapu Les Saintes Écritures—Traduction du monde nouveau: “ ‘ ʼE mole koa la koutou hage ko te ʼu foha ʼa te kau Etiopea, Ê ʼu foha ʼo Iselaele?’ ko te ʼui ʼaia ʼa Sehova. ‘Neʼe mole koa la ʼau faka hake ia Iselaele mai te fenua ʼo Esipito, pea mai Kelete te kau Filisitini, pea mo Kile ia Silia?’ ”

ʼE mole ʼiloʼi peʼe ko te temi fea ʼaē neʼe ʼōmai ai te hahaʼi ʼāfea ʼe māhani ʼi te tai, mai Kelete ki te koga meʼa ʼo Kanaane ʼaē neʼe higoa ko Filisitia, te mata fenua ʼi te potu toga-hihifo ʼi te vaha ʼo Joppé pea mo Gaza. ʼE hage neʼe kua nātou ʼi te koga meʼa ʼaia ʼo te mata fenua ʼi te temi ʼo Apalahamo pea mo Isaake.—Senesi 20:1, 2; 21:32-34; 26:1-18.

Ko te kau Filisitini neʼe hoko atu pe tonatou ʼuhiga mālohi hili te temi fualoa ʼo te hū ʼa Iselaele ki te fenua ʼaē neʼe fakapapau age e te ʼAtua kia nātou. (Ekesote 13:17; Sosue 13:2; Kau Fakamāu 1:18, 19; 3:3, 4; 15:9, 10; 1 Samuele 4:1-11; 7:7-14; 13:19-23; 1 Hau 16:15) Ki muli age ʼo te temi ʼafio ʼo te hau Sutea ko Osiasi, neʼe nonofo te kau Filisitini ʼi te ʼu kolo ʼo Kate, mo Sapene, pea mo Asitote. (2 Fakamatala 26:6) Ko ʼihi ʼo tanatou ʼu kolo ʼaē ʼe faka maʼuhiga ʼi te ʼu fakamatala faka Tohi-Tapu neʼe ko Écron, Askélon, mo Gaza.

Neʼe puleʼi e Alexandre le Grand ia Gaza te kolo ʼa te kau Filisitini, pea ʼaki te temi, ʼe ʼiloga neʼe mole kei hage te kau Filisitini ko he hahaʼi ʼe tuku keheʼi. ʼE tohi fēnei e te polofesea ko Lawrence E. Stager ʼi te tohi (Biblical Archaeology Review, Maio/Sūnio 1991): “Neʼe kau mo te kau Filisitini ʼi te ʼaunofo ʼi Papiloni. . . . Kae ʼe mole maʼu he fakamatala ʼo ʼuhiga mo te meʼa ʼaē neʼe hoko ki te kau Filisitini ʼaē neʼe ʼaunofo. Ko nātou ʼaē neʼe lagi nonofo ʼi Askélon ʼi te hili ʼo te puleʼi e Nébucadrezzar, ʼe ʼiloga ia neʼe puli tonatou ʼuhiga lanu makehe. Neʼe mole kei ʼi ai he tahi age fakamatala faka hisitolia ʼo ʼuhiga mo te kau Filisitini.”

Ko te higoa ʼo te temi nei ʼo Palesitina ʼe haʼu ia mai te ʼu kupuʼi palalau faka Latina pea mo faka Keleka, ʼaē ʼe haʼu tonu mai te kupuʼi palalau faka Hepeleo ʼaē ʼe faka ʼuhiga ki te “Filisitia.” Ko ʼihi fakaliliu faka Tohi-Tapu ʼi te lea faka Alape ʼe nātou fakaʼaogaʼi te kupuʼi palalau ʼe faka ʼuhiga ki te kau “Filisitini,” ʼe feala pe ke fakatatau ʼaki te kupuʼi palalau ʼaē ʼe faka ʼuhiga ki te kau Palesitina ʼo te temi nei. Kae, ʼe fakaʼaogaʼi e te Tohi-Tapu (Today’s Arabic Version) te kupuʼi palalau faka Alape ʼe kehe age ia, ʼo ina fakakeheʼi ai te kau Filisitini ʼo te temi ʼāfea pea mo te kau Palesitina ʼo te temi nei.

[Paki ʼo te pasina 31]

Ko te ʼu toega fenua ʼi Askélon

[Haʼuʼaga ʼo te paki]

Pictorial Archive (Near Eastern History) Est.