Te Faiva ʼi Te Fakatupu ʼo He Meʼa—Ko He Meʼa ʼOfa Mai Te ʼAtua
ʼE FAKAFIAFIA ia Sehova ʼi te ʼu meʼa ʼaē neʼe ina fakatupu. (Pesalemo 104:31) Ko te fiafia lahi ʼe ina maʼu ʼi tana fakatupu ʼe ʼiloga ʼi te meʼa ʼaē ʼe fakamatala ia Senesi 1:31: “Neʼe sio ai te ʼAtua kia meʼa fuli neʼe ina fai pea koʼeni ko te meʼa ʼaia neʼe lelei ʼaupito.”
ʼE mole faka tuʼakoi e Sehova te fiafia ʼaia kia ia totonu. Neʼe ina tuku kia Sesu te pilivilesio ʼaē ke liliu ko te meʼa gāue ʼaē neʼe ina fakaʼaogaʼi moʼo fakatupu te ʼu meʼa fuli. (Soane 1:3; Kolose 1:16, 17) ʼI tona ʼuhiga “meʼa gāue faiva,” ko Sesu neʼe toe ‘fiafia foki ʼi muʼa [ʼo Sehova] ʼi te temi fuli pe.’—Tāʼaga Lea 8:30, 31.
Ko te faiva ʼo te fakatupu ʼo he meʼa ʼe mole maʼu pe ʼi selo. ʼE tohi fēnei e te tagata ko Eugene Raudsepp ʼi tana tohi (How Creative Are You?), “Neʼe fakatuʼu ko he koga ia ʼo te tagata.” Ko te faʼahi ʼaia neʼe mole hoko fai pe, koteʼuhi neʼe fakatupu te tagata ki te paki ʼo te ʼAtua. (Senesi 1:26) Koia neʼe ʼai ai e Sehova ki te tagata fuli pe ke fakafiafia ki te ʼu faiva ʼo te fakatupu ʼo he meʼa.—Sake 1:17.
Koia, ʼe mole ko he meʼa fakapuna’maʼuli te palalau lelei ʼa te Tohi-Tapu ʼo ʼuhiga mo te hiva, mo te meʼe, mo te fai teuteu, mo te kuka, mo te faiva ʼi te fakahoko ʼo he gāue, pea mo ʼihi ʼatu ʼu faʼahiga faiva ʼi te fakatupu ʼo he meʼa. (Ekesote 35:25, 26; 1 Samuele 8:13; 18:6, 7; 2 Fakamatala 2:13, 14) Ko Pesalele, ko he tagata tufuga, neʼe ina fakaʼaogaʼi tona faiva moʼo “fai ʼo he ʼu fakatuʼutuʼu” ko te tokoni ʼaia ki te laga ʼo te tapenakulo. (Ekesote 31:3, 4) Neʼe lagi ko te tagata tauhi ōvi ko Sapale ʼaē neʼe ina ʼuluaki faʼu te fale lā, ko he meʼa neʼe fakatupu, ʼe ʼaoga lahi ki te faʼahiga maʼuli fehikitaki. (Senesi 4:20) Ko Tavite neʼe mole gata pe ʼi tona ʼuhiga tagata hiva pea mo faʼu hiva, kae neʼe ko he tagata fakatupu meʼa gaoʼi musika foʼou. (2 Fakamatala 7:6; Pesalemo 7:17; Amosi 6:5) Neʼe lagi ko Miliame ʼaē neʼe ina taki ke ʼalu fakatahi te meʼe fakafiafia ʼaē neʼe ina faka maʼuhigaʼi te hāofaki faka milakulo ʼa te kau Iselaelite ʼi te Tai Kula.—Ekesote 15:20.
Ko te meʼa ʼe tau hoko, ko te faiva ʼi te fakatupu ʼo he meʼa ʼe ko te fua ia ʼe ina uga te tauhi moʼoni. ʼAki te faiva ʼo te fakatupu ʼo he meʼa, neʼe fakaʼaogaʼi e Sesu te ʼu lea fakatātā pea mo te ʼu ako moʼo ʼave ʼo tana logo. Neʼe toe uga foki mo ʼana ʼu tisipulo ke nātou “gāue kinakina ʼi te folafola pea mo te fai akonaki.” (1 Timoteo 5:17) ʼIo, ko tanatou gāue faka mafola ʼe mole ko he gāue māhani pe. Ko he faiva ʼe fakamaʼua ai he ʼu fakatuʼutuʼu fai akonaki ʼi te faʼahi ʼo te fakatupu. (Kolose 4:6) Ko te faʼahi ʼaia ʼe maʼuhiga tāfito ʼi te akoʼi ʼo te fānau.—Teutalonome 6:6, 7; Efesi 6:4.
Koia, ʼe vaevae e Sehova mo niʼihi te fiafia ʼaē ʼe ina maʼu ʼi te fakatupu ʼo te ʼu meʼa. Ko he toe meʼa ʼofa ia!