Ko Te Kau Fakamoʼoni ʼa Sehova ʼi Te Malamanei Katoa—Pelesile
KO PELESILE ʼe ko he fenua lahi ʼaupito ʼi hona ʼu faʼahi kehekehe. Ko te fenua ʼe laulahi pea ʼe kaugamālie tona hahaʼi, ʼe ko te fenua ʼaia ʼe tuʼulaga nima tona laulahi ʼaupito ʼi te malamanei. ʼE teitei pe ke ina maʼu te vaelua ʼo te fenua ʼi te Potu Toga ʼo Amelika, pea ʼe tokolahi age tona hahaʼi mo kapau ʼe fakatatau mo te tahi age ʼu kolo ʼe fakatahiʼi ʼo te fenua ʼaia. ʼE lahi ʼaupito te vao matuʼa ʼo Pelesile. ʼI te vao matuʼa ʼaia ʼe tafe ai te toe liuʼa ʼe lahi age ʼi te ʼu liuʼa ʼo te kele—ko te Amazone.
ʼE toe lahi foki ia Pelesile ʼi te tahi faʼahi. Ko te hahaʼi ʼo tona kau fai faka mafola ʼo te logo lelei ʼo te Puleʼaga ʼo te ʼAtua ʼe kua fakaōvi nei ki te toko 400 000, pea ʼi te taʼu kua hili neʼe ko te toko 1 000 000 tupu neʼe ʼolo ki te ʼAho Fakamanatu ʼo te Mate ʼo Kilisito. Ko te fenua ʼaia ʼe makehe tāfito age ia ʼo ʼuhiga mo te gāue fai faka mafola ʼo te Puleʼaga. ʼE fakamoʼoni te faʼahi ʼaia e te ʼu fakamatala neʼe hoko.
Ko Te Koga Meʼa ʼe ʼAoga Ke Lahi Ai Te Gāue
Ko Atonio pea mo tona ʼohoana neʼe nā fai te puleʼaki faigataʼa ke nā mavae ʼi tonā famili pea mo te maʼuli fīmālie ʼaē neʼe nā maʼu ʼi São Paulo, ʼo feiā mo tanā gāue ʼaē neʼe lelei tona totogi, ke feala ai hanā ʼolo ʼo gāue ʼi te koga meʼa ʼaē ʼe ʼaoga ke lahi ai te hahaʼi faka mafola ʼo te Puleʼaga ʼi Minas Gerais. ʼI tonatou telituale neʼe ʼi ai te kūtuga ʼe nātou kau ki te gāue ʼi te fale ʼe gaohi ai te suka. Ko te ʼuluaki ʼaho ʼaē neʼe nātou fagonogono ai, neʼe nātou kamata te ʼu ako Tohi-Tapu e hiva. ʼI te ʼu māhina e 18, neʼe nātou fai te ʼu ako Tohi-Tapu e 40 tupu!
ʼI te kamata, neʼe fai te ʼu fono ʼi te fale ʼaē ʼe gaohi ai te suka. Kae, neʼe fia sisio te hahaʼi ʼaē neʼe hoki faka mafola ki he Fale ʼo te Puleʼaga. Koia, neʼe lue ai te kā moʼo ʼave ʼo te toko 75 hahaʼi ki te kokelekasio ʼaē neʼe ōvi mai. ʼI te fakatahi ʼaē neʼe hoko ki muli age; neʼe kau kiai te toko 45 kau ako foʼou ʼo te Tohi-Tapu pea neʼe fakafehuʼi ai nātou. Ko te toko hogofulu-ma-nima ia nātou ʼaia neʼe papitema ʼi te fakatahi. ʼE mahino ia, neʼe nātou fetāgihi ʼi tonatou fiafia!
Neʼe toe fakaʼaogaʼi pe te sosiete fai kā ʼaia moʼo fetuku ʼo te ʼu taʼi fagona ʼaia, pea neʼe fakatuʼutuʼu ai e te sosiete ʼaia ke hifo te totogi ʼo te kā. Moʼo fakamālo ki ai, neʼe fakahā age e Atonio te tohi ʼe tokoni ki te ako ʼo te Tohi-Tapu ki te patolo ʼo te sosiete fai kā ʼaia. Neʼe ina tali ke kamata hana ako faka Tohi-Tapu ʼi te afiafi pe ʼaia, pea neʼe papitema ia ʼi te hili ʼo te ʼu māhina ʼi tana ako fakamalotoloto te Tohi-Tapu. ʼI te kamataʼaga, neʼe fakafeagai tona ʼohoana, kae ʼaki te temi neʼe fetogi tana aga. Ia ʼaho nei mo ia foki kua liliu ko te Fakamoʼoni ʼa Sehova kua ʼosi papitema.
ʼI Fepualio ʼo te taʼu 1992 neʼe faʼufaʼu te kokelekasio ʼaki te toko 22 kau faka mafola faiva. ʼI te taʼu 1994 neʼe tuputupu te kau fai faka mafola ko te toko 42, pea ia nātou ʼaia ʼe ʼi ai tona ʼu pionie katoa e toko 4, peʼe ko te kau fai faka mafola ʼo te logo lelei ʼi te temi fuli. ʼAki te ʼu meʼa fuli ʼaenī, neʼe ʼui fēnei leva e Atonio: “Neʼe mahino kia maʼua taumatuʼa kapau ʼe tou ‘ ʼahiʼahiʼi ia Sehova,’ ohage ko tona fakahā mai ia Malakia 3:10, ʼe ina ‘huaʼi anai kia tatou he tapuakina ʼo aʼu ki te mole toe ʼi ai ʼo he hoge.’ ”
Ko Te Tufa ʼo Te ʼu Tohi Faka Tohi-Tapu
E lagi ko te tahi tupuʼaga ʼo te fua lelei ʼaupito ʼaē ʼo te gāue fai faka mafola ʼi Pelesile heʼe ko te kau Fakamoʼoni ʼe nātou fakahā ʼi te ʼu temi faigamālie fuli te ʼu tohi faka Tohi-Tapu. Ohage la, neʼe faitohi te kokelekasio ki te filiale ʼo te Sosiete Watch Tower ʼo kole ki ai te ʼu tohi Les jeunes sʼinterrogent—Réponses pratiques e 250. He koʼe koa neʼe lahi te fakaʼui ʼo te tohi ʼaia?
Neʼe fakamahinohino fēnei e te tohi: ‘Ko he faleako ʼo te kolo neʼe ina fakatuʼutuʼu ke ina fakaʼaogaʼi te tohi ʼaia ko he tohi ke ako ʼi he kalasi. Neʼe fai te fakatuʼutuʼu ʼaia e te ʼu pule ʼo te faleako ʼuhi ko te fagonogono faigamālie ʼaē neʼe fai e te ʼu mātuʼa Fakamoʼoni ʼa Sehova ʼaē ʼe ʼi ai tanatou fānau ʼe ako ʼi ai pea mo he tagata pule ʼo te faleako. ʼOfa pe ke hoholo atu te tapuakina ʼa Sehova ki tana kau kaugana ʼo foaki kia nātou he ako ʼe lelei ʼaki te tohi ʼaia.’ Io, pea ʼofa pe ke hoholo atu te tapuakina e Sehova ke tuputupu lelei te gāue fai faka mafola ʼo te Puleʼaga ʼi te fenua lahi ʼaia ko Pelesile.
[Talanoa ʼo te pasina 8]
TE FAKAʼALUʼALU ʼO TE FENUA
ʼi Te Taʼu Gāue 1994
TE LAHI ʼO TE KAU FAI FAKA MAFOLA: 385 099
KO TE FAKAFUAFUA: Ko Te Fakamoʼoni e 1 maʼa te toko 404
TE HAHAʼI ʼI TE ʼAHO FAKAMANATU: 1 018 210
TE LAHI ʼO TE KAU PIONIE: 38 348
TE ʼU AKO FAKA TOHI-TAPU: 461 343
TE LAHI ʼO TE KAU PAPITEMA: 24 634
TE LAHI ʼO TE ʼU KOKELEKASIO: 5 928
TE TUʼUʼAGA ʼO TE FILIALE: CESÁRIO LANGE
[Paki ʼo te pasina 9]
Ko te motokā mo tona fakatagi pukeleʼo neʼe fakaʼaogaʼi ʼi São Paulo ʼi te taʼu 1940
[Paki ʼo te pasina 9]
Ko te fai faka mafola ʼi te ’Ōloto ʼi Rio de Janeiro
[Paki ʼo te pasina 9]
Te tuʼuʼaga ʼo te Filiale ʼi Cesário Lange