“ ʼE ʼAu Moemisi Koa?”
Ko te fakamatala ʼaenī ʼe haʼu mai Malawi, ʼo ʼuhiga mo te Fakatahi Faka Tisitilike maʼuhiga ʼa te kau Fakamoʼoni ʼa Sehova ʼaē neʼe fai ʼi te fasiga taʼu māfana ʼo te 1995, pea neʼe ko tona kupu tāfito ʼaenī “Tou Vikiviki Fakafiafia Ki Te ʼAtua.”
“ ʼI TE loaloaga ʼo te ala fālahi, ʼi te teitei vaelua ʼo te kauvai ʼo te potu hihifo ʼo te foʼi Vai ʼo Malawi, neʼe hoki fakatuʼu ai te pano kua hili kiai taʼu e 29. ʼE tou lau fēnei ai, ‘Te Fakatahi Faka Tisitilike ʼa Te Kau Fakamoʼoni ʼa Sehova.’
“Neʼe tau ia tafa ʼo te pano ʼaia te foʼi kamio lahi, pea ʼi te taumuli ʼo te kamio ʼaia, neʼe tutuʼu ai te toko 200 tupu hahaʼi mai te kolo ʼo Mzuzu. Neʼe nātou ʼōmai mo te ʼu taga mutuʼi meʼa, mo te ʼu tupenu, mo te ʼu kulo meʼa kai, te ʼu pākete, mo te meʼa kai, te ʼu fafie, pea mo te ʼu Tohi-Tapu, ke nātou fakatahitahi mo tonatou ʼu tēhina mo tuagaʼane e toko 3 000, mai te tahi ʼu potu fenua.
“ ʼI tamatou faka felāveʼi mo te ʼu tēhina, ʼi tanatou hū ki tuʼa mai te kamio, neʼe tau mai ia George Chikako, ʼaē ʼe taʼu 63, ʼo ina tohotoho tana lelue ʼi te ʼone, he neʼe haʼu lelue lolotoga ʼaho e lua, mai te kolo ko Nkhotakota. Lolotoga ni ʼu taʼu, neʼe pilisoni tuʼa fā te tēhina ko Chikako he neʼe mole ina fia maumauʼi te ʼu pelesepeto ʼo te Tohi-Tapu. Neʼe mate tona tēhina mataʼi tama ʼi tona tā ʼaē ʼi te fale pilisoni. ʼE ʼui fēnei e Chikako ‘ ʼE ʼau moemisi koa? Ko te fakatahi ʼaenī ʼe fai fakahāhā ʼi te ʼaho, pea ko te hahaʼi ʼaenī ʼe nātou hiva leʼolahi te ʼu katiko! Koteʼuhi lolotoga ni ʼu taʼu, neʼe tonu ke mātou fakatahitahi ʼi te pōʼuli, ʼo hiva leʼo veliveli te ʼu katiko, pea neʼe tonu ke mātou pasipasi māmālie. ʼI te temi nei, kua gafua tamatou fono, pea kua punamaʼuli te hahaʼi ʼi tanatou sio ʼaē ʼe mātou hahaʼi ʼaupito, he neʼe manatu nātou, ʼe mātou tokosiʼi!’
“Ko te koga meʼa ʼaē ʼe fai ai te fakatahi, ʼe ʼāʼā ʼaki te vao pea ʼe fakamalumalu ʼaki te ʼato kaho neʼe mole haʼihaʼi. Neʼe laga maʼa te kau telekē te ʼu kiʼi fale ʼakau ʼe ʼaofi ʼaki te vao, pea mo te ʼu fale moe ʼe mole punupunu. ʼE mātou logo ʼi te pōʼuli ki te ʼu hiva logo lelei ʼe mole kei fai leʼo veliveli ʼuhi ko te mataku ki te fakataga.
“ ʼE tau mo feʼauga ke fakatoʼo te kupu tāfito ʼaenī ki te fakatahi ‘Tou vikiviki fakafiafia ki te ʼAtua’!”
[Haʼuʼaga ʼo te paki]
Mountain High Maps® Copyright © 1995 Digital Wisdom, Inc.