Neʼe Mate Koa Ia Malia ʼi Te ʼu Meʼa Māhani ʼAē ʼe Mamate Ai Te Hahaʼi?

OHAGE ko tona fakahā e te nusipepa ʼo te Vatikano ko LʼOsservatore Romano, ʼe ʼui fēnei e te akonaki Katolika ʼo te Asopesio: “Ko te Taupoʼou Imakulata neʼe ʼāteaina mai te mele fuli ʼo te agahala olisinale, neʼe ʼave tona sino pea mo tona laumālie ki te kolōlia ʼi selo, ʼi te fakaʼosi ʼo tona maʼuli ʼi te kele.” ʼE fakahā mai e te nusipepa ʼaia, ʼaki te akonaki ʼaia ko ʼihi kau teolosia Katolika neʼe nātou lau ko Malia “neʼe mole mate kae neʼe hiki atu aipe ia ia mai tona maʼuli ʼi te kele ki te kolōlia ʼi selo.”a

Mole heʼeki fualoa, ko te Tuʼi Tapu ko Soane Paulo 2 neʼe ina fakahā he manatu ʼe mole tatau mo te faʼahi ʼaia. ʼI te Fakatahi Lahi neʼe fai ʼi te ʼaho 25 ʼo Sūnio ʼo 1997 ʼi te Vatikano, neʼe ina ʼui fēnei: “ ʼE mole fakahā mai e te Tauhi Foʼou te ʼu ʼaluʼaga ʼo te mate ʼa Malia. Mai tona ʼuhiga ʼaē ʼe mole talanoa ki te faʼahi ʼaia, ʼe feala ai ke tou manatu neʼe mate ohage pe ko te mate māhani ʼa te hahaʼi pea neʼe mole hoko he meʼa makehe ʼi tana mate . . . Ko te ʼu fakamatala ʼaē ʼe ʼui neʼe mole feiā tana mate, ʼe mole honatou tafitoʼaga.”

Ko te fakamahino ʼaia ʼa te Tuʼi Tapu ko Soane Paulo 2, ʼe hā ʼaki ai te hala maʼuhiga ʼi te akonaki ʼo te Tupu Imakulata ʼa Malia. Kapau ko te faʼe ʼa Sesu neʼe “ ʼāteaina mai te mele fuli ʼo te agahala olisinale,” neʼe feala feafeaʼi ke mate ʼi te ʼu “meʼa māhani” ʼaē ʼe mamate ai te hahaʼi ʼuhi ko te agahala ʼa Atama? (Loma 5:​12) Ko te fihifihia faka teolosia ʼaia ʼe tupu mai te manatu hala ʼa te Lotu Katolika ʼo ʼuhiga mo te faʼe ʼa Sesu. Koia ʼe mole tou punamaʼuli ai pe koʼe ʼe mole mahino lelei pea mo fefakafeagaiʼaki te ’Ēkelesia ʼo ʼuhiga mo te akonaki ʼaia.

Logope la ʼe fakamatala mai e te Tohi-Tapu ko Malia neʼe agavaivai, mo agatonu pea mo aga faka lotu, kae ʼe mole ina ʼui mai neʼe ina maʼu te ʼu kalitate ʼaia ʼuhi ko tana “tupu imakulata.” (Luka 1:​38; Gāue 1:​13, 14) Kae ʼe ʼui fēnei e te Tohi-Tapu: “Ko tatou fuli neʼe tou agahala pea mole tou aʼu ki te kolōlia ʼo te ʼAtua.” (Loma 3:​23) Ei, ko Malia neʼe agahala pea mo heʼe haohaoa ohage pe ko te hahaʼi fuli, pea ʼe mole he meʼa ʼe fakamoʼoni ʼaki neʼe kehekehe tana mate mo te mate māhani ʼa te hahaʼi fuli.​—Vakaʼi ia 1 Soane 1:​8-10.

[Nota ʼi te lalo pasina]