Ko Te Hala ʼa Ai?

ʼE tokolahi te hahaʼi ʼe nātou lau ʼe ko te ʼAtua ʼaē ʼe ina fakatupu tonatou ʼu fihifihia. ʼE ʼui fēnei e te tāʼaga lea faka Tohi-Tapu: “Ko te vale ʼa te tagata ʼe ina fakatokakovi tona maʼuli, pea ʼe tupu ai tana ʼita ki te ʼAliki.” (Tāʼaga Lea 19:3, The New English Bible) Kae kapau ʼe kita ʼui ko te ʼAtua ʼaē ʼe ina fakatupu te ʼu malaʼia ki te tagata, pea ʼe hage ʼe kita ʼui, ko te ʼatu fakaʼī ʼaē ʼe hoko ʼuhi ko te konahia ʼa te hahaʼi, ʼe ko te hala ʼa te tagata ʼaē neʼe ina faʼu te ʼu motokā.

ʼAki tana Folafola, te Tohi-Tapu, neʼe foaki e te ʼAtua te takitaki lelei ki te malamanei. Kapau ʼe tou ako te tānakiʼaga tohi fakaʼatua ʼaia, te Tohi-Tapu, pea mo tou mulimuli ki te ʼu lao pea mo te ʼu pelesepeto ʼaē ʼe fakahā ai, ʼe tou hāo anai ʼi te ʼu tuʼutāmaki ʼo te maʼuli. Kae ʼe fakatupu kovi anai kia kita mo kapau ʼe mole kita mulimuli ki te takitaki ʼo te Tohi-Tapu. Ohage la, ko te hahaʼi ʼaē ʼe lahi fau tanatou kai, mo te hahaʼi ʼaē ʼe suluka, mo ʼiʼinu fakavale, peʼe nātou fai folonikasio, ʼi te agamāhani ko te ʼu meʼa ʼaia ʼe fua kovi ki tonatou maʼuli. (Luka 21:34; 1 Kolonito 6:​18; 2 Kolonito 7:1) Neʼe tohi fēnei e te ʼapositolo ko Paulo: “Ko te meʼa ʼaē ʼe to e te tagata, ʼe ko te meʼa pe ʼaia ʼaē ka ina utu; koteʼuhi ko ʼaē ʼe ina to ʼuhi ko te kakano ʼe ina utu anai mai tona kakano te fakaʼauha, pea ko ʼaē ʼe ina to ʼuhi ko te laumālie ʼe ina utu anai mai te laumālie te maʼuli heʼegata.”​—Kalate 6:​7, 8.

ʼI meʼa lelei foki hakita maʼuli ʼo mulimuli ki te ʼu lao ʼa te ʼAtua pea mo tana ʼu pelesepeto! Kapau ʼe tou fai te faʼahi ʼaia, pea ʼe hoko anai kia tatou te fakapapau ʼaenī ʼaē neʼe fai mai e te ʼAtua ʼaki tana polofeta ko Isaia: “Ko ʼau Sehova ko ʼau tou ʼAtua, ia Ia ʼaē ʼe ina akoʼi koe ke ʼaoga kia koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai. Â! Kanapaula neʼe ke tokagaʼi fakalelei taku ʼu fakatotonu! Kanaʼauala ko tou fīmālie ʼe hage anai ia ko te liuʼa pea ko tau faitotonu ohage ko te ʼu peau ʼo te tai.”​—Isaia 48:17, 18.