“ ʼE Koutou Fai Te Aga ʼAē ʼe Fakamaʼua Mai e Te ʼAtua Ke Tou Fai”
KO TE fakalogo ʼa te kau Kilisitiano ki te ʼu pule fakafenua “ ʼuhi ko te ʼAliki,” ʼe feala ke tupu ʼaki ai honatou “vikiʼi [heʼe] nātou fai te meʼa ʼaē ʼe lelei.” (1 Petelo 2:13-15) Neʼe hoko te meʼa ʼaia ki te kau Fakamoʼoni ʼa Sehova ʼi Afelika ʼo te Potu Toga, ʼaē neʼe nātou fai tanatou fakatahi faka Tisitilike ʼi te fale lahi ʼo he faleako.
ʼI te ʼuluaki ʼaho ʼo te fakatahi, neʼe fakatalitali te kau polisi ʼo te faleako ke nātou felāveʼi mo te hahaʼi ʼitaʼita pea mo fakatupu maveuveu ʼaē ʼe ʼōmai māhani ki te ʼu fakatahi kehekehe ʼaē ʼe fai ʼi te faleako. Kae neʼe mole heʼeki nātou felāveʼi mo he kau Fakamoʼoni ʼa Sehova, koia neʼe mole nātou ʼiloʼi ʼe nātou punamaʼuli ʼaupito anai ki te meʼa ʼaē ka hoko!
ʼI te hūʼaga ʼo te faleako, neʼe huke e te kau polisi te ʼu motokā fuli ʼaē neʼe hū pea mo mavae ʼi te faleako. Neʼe nātou punamaʼuli ʼaupito ʼi te agalelei, mo te loto faʼa kātaki, pea mo te fakaʼapaʼapa ʼa te hahaʼi kia nātou, logope la neʼe nātou fakatuai nātou ʼi te huke ʼaia ʼo te ʼu motokā. Neʼe mole fakafeagai te hahaʼi ki te faʼahi ʼaia, pea neʼe mole nātou fakafihi, peʼe nātou leakovi ohage ko te meʼa ʼaē ʼe hoko māhani. Neʼe ʼui e te tagata ofisie, “ ʼE mole koutou hage ko te tahi ʼu hahaʼi, heʼe koutou agavaivai pea mo nofo fakalogologo, pea neʼe mātou fakatokagaʼi fuli te faʼahi ʼaia.”
ʼI te ʼiloʼi ʼa te pule ʼa te kau polisi te fakalogo ʼa te kau Fakamoʼoni ʼa Sehova, neʼe ina fakatotonu ai leva ke ʼaua naʼa huke te ʼu motokā “heʼe [nātou] agalelei ʼaupito.” Koia la ʼaē, ko te ʼu motokā fuli ʼaē neʼe maʼu ai te kiʼi fakaʼiloga “FAS” (Fakamoʼoni ʼa Sehova), neʼe tali ke nātou hū ka mole huke.
ʼI te ʼosi ʼo te fakatahi, neʼe ʼui e te pule ʼa te kau polisi, ʼe ina fakaʼamu ke toe felāveʼi mo te kau Fakamoʼoni ʼa Sehova. Neʼe ina ʼui fēnei, “Ko tamatou hoki sioē ki he hahaʼi ʼe agalelei feiā. ʼE koutou fai te aga ʼaē ʼe fakamaʼua mai e te ʼAtua ke tou fai.” Ko te ʼu fakavikiviki ʼaia ʼe ko he fakaloto mālohi ki te kau Kilisitiano moʼoni ke nātou ‘taupau he aga lelei,’ ke feala ki te hahaʼi ke nātou ‘faka kolōlia te ʼAtua ʼuhi ko tatatou ʼu gāue lelei ʼaē ʼe nātou sio mata kiai.’—1 Petelo 2:12.