Tou To Te Pulapula ʼo Te Moʼoni ʼo Te Puleʼaga
“ ʼI te uhu to tau pulapula pea ʼo aʼu ki te afiafi, ʼaua naʼa ke fakamālōlō tou nima.”—Tagata Tānaki 11:6.
1. Koteā tona faka ʼuhiga te ʼui ʼaē ko te kau Kilisitiano ʼe nātou to pulapula ia ʼaho nei?
NEʼE maʼuhiga te gāue kele ki te kau Hepeleo ʼo te temi muʼa. Ko te tupuʼaga la ʼaia ʼo te talanoa ʼa Sesu ki te gāue kele ʼi tana ʼu lea fakatātā, he neʼe nofo ʼi te Kele ʼo te Fakapapau ʼi tona maʼuli katoa. Ohage la, neʼe ina fakatatau te faka mafola ʼo te logo lelei ʼo ʼuhiga mo te Puleʼaga ʼo te ʼAtua, ki te to ʼo te pulapula. (Mateo 13:1-9, 18-23; Luka 8:5-15) ʼO aʼu mai ki te ʼaho ʼaenī, peʼe tou maʼuʼuli ʼi he fenua ʼe gāue kele ai te hahaʼi peʼe kailoa, kae ko te to pulapula ʼi te faʼahi fakalaumālie, ʼe ko te gāue maʼuhiga tāfito ʼaē ʼe tonu ke fai e te kau Kilisitiano.
2. He koʼe ʼe maʼuhiga tatatou gāue faka mafola, pea koteā te ʼu meʼa ʼaē ʼe fai ia ʼaho nei moʼo fakahoko te gāue ʼaia?
2 ʼI te temi fakaʼosi ʼaenī, ʼe ko he pilivilesio lahi hakita kau ki te to ʼo te pulapula ʼo te moʼoni faka Tohi-Tapu. ʼE fakahā lelei mai ia Loma 10:14, 15, te maʼuhiga ʼo te gāue ʼaia: “Pe feafeai tanatou logo kapau e mole he tahi e ina fagonogono? Pea e feafeai tanatou fagonogono kapau nee mole fekaui natou? O hage ko tona tohi: E taulekaleka te u vae o natou ae e natou fagonogono te u logolelei.” Kua maʼuhiga ʼaupito ʼi totatou temi, ke tou haʼele ki muʼa ʼi te gāue fakaʼatua ʼaia, ʼaki he lotomālohi. Ko te tupuʼaga la ʼaia ʼo te kau katoa ʼa te kau Fakamoʼoni ʼa Sehova ki te tā pea mo te tufa ʼo te ʼu Tohi-Tapu pea mo te ʼu tohi faka Tohi-Tapu ia lea e 340. Ko te teuteuʼi ʼo te ʼu tohi ʼaia ʼe ina fakamaʼua kiai te kau gāue e 18 000 ʼi tonatou ʼu nofoʼaga tāfito, pea mo te tahi ʼu filiale ʼi te ʼu fenua kehekehe. Pea ko te teitei ono miliona kau Fakamoʼoni, ʼe nātou kau ki te tufa ʼo te ʼu tohi faka Tohi-Tapu ʼi te malamanei katoa.
3. Koteā ʼaē ʼe fakahoko ʼaki te to ʼo te pulapula ʼo te moʼoni ʼo te Puleʼaga?
3 Koteā te ʼu fua ʼo te gāue kinakina ʼaia? Ohage ko te kamata ʼo te Lotu Faka Kilisitiano, ko te tokolahi ia ʼaho nei ʼe nātou tali te moʼoni. (Gaue 2:41, 46, 47) ʼE maʼuhiga te kaugamālie ʼaupito ʼo te kau kaugā fai faka mafola ʼo te Puleʼaga ʼaē neʼe hoki papitema, kae ko te meʼa ʼaē ʼe maʼuhiga tāfito, he ko te fai fagonogono lahi ʼaia ʼe lagolago ki te tāpuhā ʼo te huafa ʼo Sehova pea mo tona faka lākatonuʼi, ʼi tona ʼuhiga ʼAtua moʼoni e tahi. (Mateo 6:9) Tahi ʼaē meʼa, ko te ʼatamai mālama ʼo ʼuhiga mo te Folafola ʼa te ʼAtua, ʼe ina fetogi te maʼuli ʼo te tokolahi, pea ʼe lava iku ai ki tonatou hāofaki.—Gaue 13:47.
4. Neʼe fakahā feafeaʼi e te kau ʼapositolo tanatou ʼofa ki te hahaʼi ʼaē neʼe nātou fai faka mafola ki ai?
4 Neʼe mahino lelei ki te kau ʼapositolo, te maʼuhiga ʼo te logo lelei ʼaē ʼe ina lava hāofaki te hahaʼi, pea neʼe nātou ʼofa mamahi ki te hahaʼi ʼaē neʼe nātou fai faka mafola ki ai. ʼE hā lelei te faʼahi ʼaia ʼi te ʼu palalau ʼa te ʼapositolo ko Paulo, ʼaē neʼe ina tohi fēnei: “I tomatou ofa kia koutou, nee mole gata’pe mo tamatou leleiʼia ke tuku atu kia koutou te Evaselio a te Atua, pea mo omatou mauli foki, koteuhi kua koutou liliu ko omatou ofaʼaga.” (1 Tesalonika 2:8) ʼI tanatou fakahā te ʼofa moʼoni ʼaia ki te hahaʼi, neʼe faʼifaʼitakiʼi e Paulo pea mo te tahi kau ʼapositolo, ia Sesu pea mo te kau ʼaselo, ʼaē ʼe nātou kau katoa ki te gāue ʼaia ʼaē ko te hāofaki ʼo te hahaʼi. Koia, tou vakaʼi te gāue maʼuhiga ʼa te kau kaugana fakaʼatua ʼaia ʼo selo, ʼi te to ʼo te pulapula ʼo te moʼoni ʼo te Puleʼaga, pea mo tou vakaʼi peʼe fakaloto mālohiʼi feafeaʼi tatou e tanatou faʼifaʼitaki ke tou fakahoko tatatou gāue.
Neʼe To e Sesu Te Pulapula ʼo Te Moʼoni ʼo Te Puleʼaga
5. Koteā te gāue ʼaē neʼe kau tāfito kiai Sesu ʼi tana kei maʼuli ʼi te kele?
5 Ko Sesu, ʼi tona ʼuhiga tagata haohaoa, neʼe feala ke ina foaki he ʼu tuʼuga meʼa lelei ʼi te faʼahi fakasino maʼa te hahaʼi ʼo tona temi. Ohage la, neʼe feala ke ina fakamahino te ʼu manatu hala ʼo tona temi ʼo ʼuhiga mo te meʼa faka tōketā, pe neʼe feala ke ina fakalahi te poto fakatagata. Kae neʼe ina fakahā lelei ʼi te kamata ʼo tona minisitelio, ko tana gāue neʼe ko te faka mafola ʼo te logo lelei. (Luka 4:17-21) Pea ʼo aʼu ki te fakaʼosi ʼo tona minisitelio, neʼe ina fakamahino fēnei: “Ko te mea aeni, nee au tupu mai ai pea nee au haele mai ai ki te malama-nei, ke au fakamooni ki te mooni.” (Soane 18:37) Ei, neʼe maʼumaʼua ʼi te to ʼo te pulapula ʼo te moʼoni ʼo te Puleʼaga. Neʼe mole he tahi meʼa neʼe maʼuhiga age kia Sesu ʼi tana akoʼi ki te hahaʼi ʼo tona temi pe ko ai te ʼAtua pea mo Tana ʼu fakatuʼutuʼu.—Loma 11:33-36.
6, 7. (a) Koteā te fakapapau fakaofoofo ʼaē neʼe fai e Sesu ʼi muʼa ʼo tana hake ki selo, pea ʼe ina fakahoko feafeaʼi te fakapapau ʼaia? (b) ʼE malave feafeaʼi kia koutou te faʼifaʼitaki ʼaē neʼe tuku mai e Sesu ʼi te gāue fai faka mafola?
6 Neʼe fakatatau e Sesu ia ia totonu ki he Tagata To Pulapula ʼo te moʼoni ʼo te Puleʼaga. (Soane 4:35-38) ʼI te temi fuli pe, neʼe ina to te ʼu pulapula ʼo te logo lelei. Māʼia mo te temi ʼaē neʼe tau tūgaki ai ʼi te pou, neʼe ina kalagaʼi te logo lelei ʼo ʼuhiga mo te palatiso kelekele ʼaē ka hoko mai. (Luka 23:43) Tahi ʼaē meʼa, ko tana loto ʼaupito ʼaē ke faka mafola te logo lelei, neʼe mole fakaʼosi ʼi tana mate ʼi te pou fakamamahi. ʼI muʼa ʼo tana hake ki selo, neʼe ina fakatotonu ki te kau ʼapositolo ke nātou hoko atu te to ʼo te pulapula ʼo te moʼoni ʼo te Puleʼaga, pea mo nātou fai ni ʼu tisipulo. Pea neʼe fai e Sesu te fakapapau fakaofoofo, ʼo ina ʼui fēnei: “Koeni, e au fakatahi mo koutou i te aho fuape o kaku ki te gataʼaga o te temi.”—Mateo 28:19, 20.
7 ʼAki te ʼu palalau ʼaia, neʼe fakapapau ai e Sesu ʼe lagolago anai, mo takitaki, pea mo puipui anai te gāue faka mafola ʼo te logo lelei “i te aho fuape o kaku ki te gataʼaga o te temi.” ʼO aʼu mai ki totatou temi, ʼe kei leʼoleʼo aipe e Sesu te gāue fai faka mafola. ʼE ko ia totatou Takitaki, ʼaē ʼe ina leʼoleʼo te to ʼo te pulapula ʼo te moʼoni ʼo te Puleʼaga. (Mateo 23:10) ʼI tona ʼuhiga Pule ʼo te kokelekasio faka Kilisitiano, neʼe tuku age e Sehova te maʼua ʼaē ke ina takitaki te gāue faka malamanei ʼaia.—Efeso 1:22, 23; Kolose 1:18.
ʼE Tala e Te Kau ʼAselo Te Logo Lelei
8, 9. (a) Neʼe fakahā feafeaʼi e te kau ʼaselo tanatou tokaga moʼoni ki te ʼu meʼa ʼaē ʼe hoko ki te tagata? (b) He koʼe ʼe feala hatatou ʼui ʼe tou hage ko he mātaga kia mata ʼo te kau ʼaselo?
8 ʼI te temi ʼaē neʼe fakatupu ai e Sehova ia te kele, ko te kau ʼaselo “neʼe [nātou] kalaga fakafiafia fakatahi ai . . . [pea mo] nātou fakavikiviki.” (Sopo 38:4-7) Talu mai ai, ko te kau ʼaselo ʼaia neʼe nātou fia ʼiloʼi te ʼu meʼa ʼaē ka hoko ki te tagata. Neʼe fakaʼaogaʼi nātou e Sehova moʼo fakahā te ʼu logo fakaʼatua ki te tagata. (Pesalemo 103:20) ʼE moʼoni tāfito te faʼahi ʼaia ʼo ʼuhiga mo te faka mafola ʼo te logo lelei ʼi totatou temi. ʼI te meʼa ʼaē neʼe fakahā age ki te ʼapositolo ko Soane, neʼe sio ia ki te “ ʼaselo ʼe lele ʼi te lotomalie ʼo te lagi, pea neʼe ʼi ai tana logo lelei ʼe heʼegata ke ina kalagaʼi ohage he evaselio kia nātou ʼaē ʼe nonofo ʼi te kele, pea mo te puleʼaga kehekehe, te telepi kehekehe, te lea kehekehe pea mo te hahaʼi kehekehe, ʼo ina ʼui leʼo mālohi: ‘Koutou manavasiʼi ki te ʼAtua pea mo koutou faka kolōlia kia te ia, heʼe kua hoko mai te hola ʼo tana fakamāu.’ ”—Apokalipesi 14:6, 7, MN.
9 ʼE ʼui e te Tohi-Tapu ko te kau ʼaselo “ ʼe ko he ʼu laumālie moʼo tauhi ki te hahaʼi, neʼe fekauʼi nātou ke nātou tauhi ki te hahaʼi ʼaē ka nātou maʼu te hāofaki.” (Hepeleo 1:14, MN ) Ko te kau ʼaselo ʼe nātou fakahoko fakalelei tanatou ʼu gāue, pea ʼe nātou lava sivi tatou pea mo tatatou gāue. Ohage ko he mātaga ʼe sioʼi e te hahaʼi, ʼe tou fakahoko tatatou gāue kae sioʼi tatou e te kau ʼaselo. (1 Kolonito 4:9) ʼE ko he meʼa fakafiafia tatatou ʼiloʼi ʼaē ʼe mole tou gāue tokotahi, ʼi te to ʼo te pulapula ʼo te moʼoni ʼo te Puleʼaga.
ʼE Tou Fakahoko Mālohi Tatatou Gāue
10. ʼE tou lava fakaʼaogaʼi feafeaʼi ki te gāue fai faka mafola, te tokoni lelei ʼaē ʼe tuʼu ia Tagata Tānaki 11:6?
10 He koʼe ʼe tokagaʼi e Sesu pea mo te kau ʼaselo tatatou gāue? Neʼe tuku mai e Sesu te tahi tupuʼaga ʼo te faʼahi ʼaia, ʼo ina ʼui fēnei: “E au tala atu kia koutou, e i ai te fakafiafia ia mua o te kau aselo a te Atua o uhiga mo he tagata agahala e tahi kua fakahemala.” (Luka 15:10) ʼO feiā mo tatou, ʼe tou fakaʼamu ke fakahemala te hahaʼi. Koia ʼe tou faiga mālohi ai ke tou faka mafola te pulapula ʼo te moʼoni ʼo te Puleʼaga ʼi te potu fuli pe. Ko te ʼu palalau ʼaē ʼe tuʼu ia Tagata Tānaki 11:6, ʼe lava faka ʼuhiga ki tatatou gāue. ʼI te koga tohi ʼaia, ʼe fai mai e te Tohi-Tapu te tokoni ʼaenī: “ ʼI te uhu to tau pulapula pea ʼo aʼu ki te afiafi, ʼaua naʼa ke fakamālōlō tou nima, heʼe mole ke ʼiloʼi pe ko te potu fea ʼaē ka fua ai, peʼe ko henī peʼe ko hē, peʼe nā tauʼaki lelei anai.” ʼE moʼoni, ʼi te hahaʼi fuli ʼaē ʼe nātou tali tatatou logo; ʼe lagi fakafisi ki te logo ʼaia te toko lauʼi teau, pe ko te toko lauʼi afe. Kae ohage ko te kau ʼaselo, ʼe tou fiafia tatau aipe pe “ko he tagata agahala e tahi” ʼaē ʼe ina tali te logo ʼo te hāofaki.
11. ʼE lava ʼaoga feafeaʼi tatatou fakaʼaogaʼi te ʼu tohi faka Tohi-Tapu?
11 Ko te meʼa ʼaē ʼe maʼuhiga tāfito, ʼe ko te faka mafola ʼo te logo lelei. Ko te ʼu meʼa ʼaē ʼe maʼuhiga ʼaupito moʼo tokoni ki te gāue ʼaia, ʼe ko te ʼu tohi faka Tohi-Tapu ʼaē ʼe tou fakaʼaogaʼi. ʼI hona faʼahiga ʼaluʼaga, ʼe hage te ʼu tohi ʼaia ko he ʼu pulapula ʼe to ʼi te potu fuli pe. ʼE mole tou ʼiloʼi pe ko te potu fea ʼaē ka fua ai. ʼI ʼihi temi, ʼe feʼāveʼaki ʼi he ʼu hahaʼi kehekehe ia muʼa ʼo hona lau e he tahi. ʼI ʼihi lakaga, ʼe lava takitaki e Sesu pea mo tana kau ʼaselo te ʼu meʼa ʼaē ʼe hoko, ke hoko te faʼahi ʼaia maʼa te hahaʼi ʼaē ʼe fakamalotoloto. Koʼeni te ʼu faʼifaʼitaki, ʼe hā ʼaki mai ʼe lava fakahoko e Sehova he ʼu meʼa fakapunamaʼuli pea mo fakaofoofo ʼaki te ʼu tohi ʼaē neʼe tou tuku ki te hahaʼi.
Te Gāue ʼa Te ʼAtua Moʼoni
12. Neʼe tokoni feafeaʼi te nusipepa ʼāfea ki te famili, ke ina ʼiloʼi ia Sehova?
12 ʼI te 1953, ko Robert, mo Lila, pea mo tanā fānau neʼe nātou mavae mai te kolo lahi, ʼo nātou ʼolo ki he fale ʼāfea ʼe tuʼu ʼi Pennsylvanie, ʼi Amelika. Mole fualoa, pea neʼe fia faʼu e Robert te māʼanuʼaga ʼi te lalo tuʼuga ʼo tonatou ʼapi ʼaē neʼe punupunu ʼaki te ʼu papa. ʼI tana ʼosi tohoʼi te ʼu papa, neʼe ina fakatokagaʼi ʼi te muli kaupā, neʼe tānaki e te ʼu kumā te ʼu eveʼi pepa, mo te ʼu gaʼasi noix, pea mo te tahi ʼu ʼotaʼota. Pea ʼi te lotomalie ʼo te ʼu ʼotaʼota fuli ʼaia, neʼe tuku ai te kaupepa ʼo te L’Âge dʼOr. Neʼe fia lau tāfito e Robert te alatike ʼaē ʼe talanoa ki te akoʼi ʼo te fānau. Neʼe punamaʼuli ʼaupito ʼi te matala lelei ʼa te ʼu tokoni faka Tohi-Tapu ʼaē ʼe maʼu ai, pea neʼe ina ʼui kia Lila ke nā kau ki “te lotu ʼo te L’Âge dʼOr.” Hili kiai ni ʼu vāhaʼa, pea ʼōmai te kau Fakamoʼoni ʼa Sehova ki tonā ʼapi, kae neʼe ʼui age e Robert ʼe fia fai pe tonā famili ki “te lotu ʼo te L’Âge dʼOr.” Pea neʼe fakamahino age e te ʼu Fakamoʼoni ko te L’Âge dʼOr kua higoa ʼi te temi nei, ko te Réveillez-vous ! Pea ko Robert pea mo Lila neʼe nā kamata ako tuʼumaʼu te Tohi-Tapu mo te kau Fakamoʼoni, pea ki muli age neʼe nā papitema. Pea neʼe nā to te pulapula ʼo te moʼoni ʼo te Puleʼaga ki tanā fānau, pea neʼe lahi tona ʼu fua lelei. ʼI te temi nei, ko te toko 20 tupu ʼo te famili ʼaia, ʼo kau kiai mo te ʼu fānau e toko fitu ʼa Robert pea mo Lila, kua nātou liliu ko te ʼu kaugana papitema ʼa Sehova ʼAtua.
13. Koteā ʼaē neʼe ina uga te taumatuʼa ʼi Porto Rico ke nā fia ako te Tohi-Tapu?
13 Kua hili kiai taʼu e 40, ko te taumatuʼa mai Puerto Rico ko William pea mo Ada, neʼe mole nā fia ako te Tohi-Tapu. ʼI te ʼu temi fuli ʼaē neʼe fisifisi ai te kau Fakamoʼoni ʼa Sehova ki tonā matapā, neʼe fai loi te taumatuʼa, ʼe mole nā ʼi fale. ʼI te tahi ʼaho neʼe ʼalu ia William ki te fakatauʼaga meʼa moʼo toʼo ai te meʼa neʼe ʼaoga moʼo gaohi tona ʼapi. ʼI tana ʼamanaki mavae, neʼe ina fakatokagaʼi te tohi fuluʼi hega gigila, ʼe hili ʼi te foʼi tuka. Neʼe ko te tohi Religion, ko te tohi neʼe tā e te kau Fakamoʼoni ʼa Sehova ʼi te taʼu 1940. Neʼe toʼo e William te tohi ʼaia, pea neʼe punamaʼuli ʼi tana lau ai te kehekehe ʼo te lotu hala pea mo te lotu moʼoni. ʼI te tahi ʼaʼahi ʼa te kau Fakamoʼoni ʼa Sehova, neʼe fakalogo lelei e William pea mo Ada tanatou logo, pea nā kamata ako te Tohi-Tapu mo nātou. Hili kiai ni ʼu māhina, pea nā papitema ʼi te taʼu 1958, ʼi te Fakatahi Faka Malamanei Te Finegalo Fakaʼatua. Talu mai ai, neʼe nā tokoni ki te toko 50 tupu hahaʼi ke nātou liliu ko he kau Kilisitiano.
14. Koteā ʼaē ʼe fakahā e te faʼifaʼitaki ʼo ʼuhiga mo te mālohi ʼo tatatou ʼu tohi faka Tohi-Tapu?
14 Ko Karl neʼe kei taʼu 11 pea neʼe pago. Neʼe hage maʼa ia neʼe ina fai tuʼumaʼu he ʼu meʼa kovi. Ko tana tāmai, te tagata Siamani ʼe lotu Méthodiste, neʼe ina akoʼi age kia ia ko te hahaʼi agakovi, ka nātou mamate, pea ʼe tutu nātou ʼi ʼifeli. Koia neʼe mataku ʼaupito ai ia Karl ki te ʼifeli. ʼI te tahi ʼaho ʼi te 1917, neʼe sio ia Karl ki te kiʼi moʼi pepa ʼe tuku ʼi te ala, pea neʼe ina toʼo. ʼI tana lau te meʼa ʼaē neʼe tohi ai, neʼe ina foimo tokagaʼi te fehuʼi ʼaenī: “Koteā te ʼifeli?” Ko te pepa ʼaia, neʼe ko he fakaafe ki te akonaki ʼo ʼuhiga mo te ʼifeli, ʼe fai anai ki te hahaʼi pea ʼe fai anai e te kau Ako ʼo te Tohi-Tapu, ʼaē kua nātou higoa ʼi te temi nei ko te kau Fakamoʼoni ʼa Sehova. Hili kiai te teitei taʼu katoa, ʼi tana ʼosi tatuʼu ki te ʼu fono ʼa te kau Ako ʼo te Tohi-Tapu, neʼe papitema ai ia Karl, ʼo liliu ko he Ako ʼo te Tohi-Tapu. ʼI te 1925 neʼe fakaafe ia ia ke gāue ʼi te ʼu nofoʼaga tāfito ʼa te kau Fakamoʼoni ʼa Sehova—pea ʼe kei gāue ai ʼi te temi nei. Ko te gāue faka Kilisitiano ʼa te tēhina ʼaia ia taʼu e valugofulu, neʼe kamata ʼaki pe te kiʼi moʼi pepa ʼaē neʼe ina maʼu ʼi te ala.
15. Kapau ʼe ʼaoga pea koteā ʼaē ʼe lava fai e Sehova?
15 ʼE moʼoni, ʼe mole feala ki he tahi ke ina ʼiloʼi pe neʼe kau kiai te kau ʼaselo, pea neʼe lahi feafeaʼi tanatou tokoni ki te ʼu hahaʼi. Kae ʼaua naʼa tou manatu ʼi he temi, ʼe mole tokoni mai Sesu pea mo te kau ʼaselo ki te gāue faka mafola, pea ʼe feala kia Sehova ke ina fakahoko he ʼu meʼa ʼe ʼaoga moʼoni. Ko te ʼu faʼifaʼitaki ʼaenī pea mo te tahi ʼu faʼifaʼitaki, ʼe nātou fakahā mai te ʼu fua lelei ʼaē ʼe lava hoko ʼaki te ʼu tohi ʼaē ʼe tou tufa.
Neʼe Tuku Mai Kia Tatou Te Koloā
16. Koteā ʼaē ʼe mahino kia tatou ʼaki te ʼu palalau ʼo 2 Kolonito 4:7?
16 Neʼe talanoa te ʼapositolo ko Paulo ki te ‘koloā ʼi te ʼu ipu kele.’ Ko te koloā ʼaia, ʼe ko te gāue fai faka mafola ʼaē neʼe fakatotonu mai e te ʼAtua, pea ko te ʼu ipu kele ʼe ko te hahaʼi ʼaē neʼe tuku ki ai e Sehova te koloā ʼaia. Mai tona ʼuhiga ʼaē ʼe mole haohaoa te ʼu hahaʼi ʼaia pea ʼe ʼi ai tonatou ʼu tuʼakoi, ʼe toe hoko atu e Paulo tana ʼu palalau ʼo ina ʼui, ʼe lava lelei te gāue ʼaē neʼe tuku age ʼuhi ko “te mālohi ʼaē ʼe laka age ʼi te mālohi māhani, ʼe ko te mālohi ia ʼo te ʼAtua kae mole ko te mālohi ʼaē ʼe haʼu mai ia tatou.” (2 Kolonito 4:7, MN ) Ei, tou falala ko Sehova ʼe ina tuku mai anai te mālohi ʼaē ʼe ʼaoga kia tatou moʼo fakahoko te gāue ʼo totatou telituale.
17. Koteā ʼaē ʼe hoko kia tatou mokā tou to te pulapula ʼo te moʼoni ʼo te Puleʼaga, pea he koʼe ʼe mole tonu ke tou fiu?
17 ʼI ʼihi temi ʼe tonu ai ke tou fai he ʼu sakilifisio. ʼI ʼihi telituale, ʼe lagi faigataʼa peʼe mole fīmālie ai te gāue. ʼE ʼi ai te ʼu fenua ʼe tokolahi ai te hahaʼi ʼaē ʼe mole fia logo ki te gāue, peʼe nātou fakafeagai kiai. ʼE lagi lahi te ʼu faiga ʼaē ʼe fai ʼi te ʼu fenua ʼaia, kae ʼe hage ʼe mole hona fua. Kae ʼe ʼaoga tatatou ʼu faiga heʼe maʼuhiga te meʼa ʼaē ʼe tou faiga kiai. Koutou manatuʼi, ko te ʼu pulapula ʼaē ʼe koutou to, ʼe ina lava foaki ki te hahaʼi te fiafia ʼi te temi nei, pea mo te maʼuli heʼegata ʼi te ka haʼu. ʼE lahi te ʼu lakaga neʼe hoko moʼoni ai te ʼu palalau ʼo Pesalemo 126:6: “Ko ia ʼaē ka ʼalu ki tuʼa, māʼia peʼe tagi, ʼo ina ʼamo te taga ʼe fonu ko te pulapula, ʼe liliu moʼoni mai anai ʼaki he kalaga fakafiafia, ʼo ina ʼamo he taga fulumeto.”
18. Koteā ʼaē ʼe tou lava fai moʼo haga fai totatou minisitelio, pea he koʼe ʼe tonu ke tou fai te faʼahi ʼaia?
18 Tou fakaʼaogaʼi te ʼu faigamālie fuli moʼo to lahi te pulapula ʼo te moʼoni ʼo te Puleʼaga. Ke ʼaua naʼa galo kia tatou, logope la ko tatou ʼaē ʼe tou to pea mo fakavai te ʼu pulapula, kae ʼe ko Sehova ʼaē ʼe ina fakatuputupu. (1 Kolonito 3:6, 7) Kae ohage ko te fakahoko e Sesu pea mo te kau ʼaselo tanatou gāue, ʼo toe feiā pe ʼe loto e Sehova ke tou fakahoko katoa totatou minisitelio. (2 Timoteo 4:5) ʼOfa pe ke tou tokaga tuʼumaʼu ki tatatou faiakonaki, ki tatatou aga, pea mo tatatou lotomālohi ʼi te minisitelio. Koteā tona tupuʼaga? ʼE tali fēnei e Paulo: “Koteuhi i tau fai aia, e ke haofaki anai ia koe, ia koe pea mo natou e fakalogo kia te koe.”—1 Timoteo 4:16.
Koteā ʼAē Neʼe Tou Ako?
• Koteā te ʼu fua lelei ʼo tatatou to pulapula?
• Ia ʼaho nei, ʼe kau feafeaʼi ia Sesu pea mo te kau ʼaselo ki te gāue faka mafola?
• He koʼe ʼe tonu ke tou to lahi te ʼu pulapula ʼo te Puleʼaga?
• Kapau ʼe tou felāveʼi mo he ʼu fakafeagai ʼi te minisitelio, pea koteā ʼaē ʼe tonu ke ina uga tatou ke tou kātaki?
[Paki ʼo te pasina 15]
Ohage ko te hahaʼi gāue kele ʼo te Iselaele ʼāfea, ia ʼaho nei ʼe to lahi e te kau Kilisitiano te ʼu pulapula ʼo te Puleʼaga
[Paki ʼo te pasina 16, 17]
Ko te kau Fakamoʼoni ʼa Sehova ʼe nātou tā pea mo tufa te ʼu tohi faka Tohi-Tapu kehekehe ia lea e 340