Te ʼOfa Faka Kilisitiano—ʼE Mole Gata Pe ʼi Te Palalau

ʼI TE vela ʼo te ʼapi ʼo te famili ko Bartholomew ʼi Trinité, neʼe mole nātou mamate, kae neʼe maumau fuli tonatou ʼu koloā. Neʼe feala hanatou ʼolo ʼo nonofo ʼi te fale ʼo te fafine e kāiga mo nātou pea ʼe ōvi mo nātou, kae neʼe mole gata ai.

Ko Olive Bartholomew ko te fafine Fakamoʼoni ʼa Sehova, pea ko te kokelekasio ʼaē neʼe kau ai​—⁠ʼo toe feiā kia nātou ʼo te tahi ʼu kokelekasio —⁠neʼe nātou fetuku mai te ʼu meʼa moʼo toe laga tona ʼapi pea mo tona famili. Neʼe fai e te komite te fakatuʼutuʼu ʼo ʼuhiga mo te toe laga ʼo tona ʼapi, pea kamata ai leva te gāue. Lagi ko te toko 20 kau Fakamoʼoni, pea mo ʼihi ʼo tonatou ʼu vāhaʼa fale neʼe ʼōmai ʼo kau ki te gāue ʼaia. Neʼe toe kau ai mo te kau tūpulaga, pea ko ʼihi neʼe nātou ʼaumai he ʼu meʼa ʼinu.

Ohage ko tona tala ʼi te Sunday Guardian ʼi Trinité, neʼe ʼui fēnei e Olive: “Neʼe lahi ʼaupito te ʼu meʼa ʼofa ʼaē neʼe ʼaumai ki toku loto fale. Ko toku famili ʼe mole ko he kau Fakamoʼoni ʼa Sehova, pea ko toku ʼohoana kei punamaʼuli pe ki te meʼa ʼaē neʼe sio kiai.”

Moʼo fakanounou te meʼa ʼaia neʼe hoko, ko te pule ʼo te laga fale ʼaia neʼe ina fakahā lelei ko te ʼu faʼahiga gāue ʼaia, ʼe nātou fakaʼiloga moʼoni te Lotu Faka Kilisitiano moʼoni. Neʼe ina ʼui fēnei: “ ʼE mole mātou ʼolo pe ʼi te ʼu ʼapi ʼo palalau ki te ʼofa. Kae ʼe mātou faiga ke mātou maʼuliʼi te ʼu meʼa ʼaē ʼe mātou faka mafola.”​—⁠Soane 13⁠:​34, 35.

[Paki ʼo te pasina 32]

Ko Olive Bartholomew mo tona ʼohoana